Revelation 20

1Cạvete yụ yirity anjer mạyedye'che' jijtuij. Chácaquis unĉan mu' mọ' mochĉansidyes to', judyeya' chäcdyis cadena chime' mu'. 2- 3Mu' anjer tŝọ́tyete mu' c̣hovaj bu'yity, mu' tạ'caty urucyatydye nas Sọyo', mu'dyem' Satanás, c̣họco'jete chat qui va'quecte mochĉansi'ĉan to', mu'ĉan ĉär'tac, chat qui cachtacdye'tum yụ'tyeye' mọ' chụi'dye' to'si'. Mir ra' yómodye' mu'ĉan ra' me' bu'yi ĉär' bu'yi, jadyic ra' väñätucsi jacchety muntyi' in, jun' qui' chuc cạ̈tsetaqui mir yómodye'. A ra' me'si' jäqui've, mensi'tuqui ram' ji'shubac mu' mu'ĉantyi'. 4Cạvacsi yụ dai' ayo'si' bä'yaquis in. Mu'in mu'che' bä'yity in so'mac in paj qui ayo'bu'yi in. Chime'dye cạvacsebi yụ ạ'edye' mu'in ijactyi' jiquej in, tätsactyi' jo'no' jiquej in cäc̣hä'chucdye'ya' mu' Jesús judyeya' voro'yedye'ya' Jen'si' p̂eyacdye' mu'. Mu'in jam tima'quisety in mu' vajedyedye' bu'yity mijam jen'tuptety in jäm'tacdye' mu' chime', mijam cachtacdye'tumtyi' mu'si' jáfiche' in mijam unche'. Yụ cạvacseban tsạ' bu'ban in, judyeya' Cristotum ayo'bu'yi in, mir ra' yómodye' me'qui' ra' ayo'bu'yi in. 5Mọ' tashches vañinyedye' shupqui', yoctyi' na säñity in jambi' ra' vañinyeban mu'in in, jun' qui' chuc cạ̈tsetaqui mir yómodye' in. 6Anic ra' där ma'joij mu'in in, tashchesya' vañinyedye', mu'in ra' Jen'dyety in, mu'in ra' jam jun' cạve' in jadyiquis sän'dye' tŝijĉansi'. Chat qui ra' mu'in yụ'tac in cudyitity Jen'che' in judyeya' Cristoche', mir ra' yómodye' Cristotum ayo'bu'yi in. 7Cạ̈tsetaquiya' ra' mir yómodye', chat q̂uin'dyem' ra' ji'shubac mu' Satanás, yóĉandyem' ĉä'räijĉan u. 8Sacti ra' mu' väñätucsequi muntyi' jacchety in, pai' bä'yity in, mu'in nash Gogvety in judyeya' Magogvety in, me' jéyacsi in mu'in fạ́quetety Jen' in. Satanás ra' vajmu'ya'jeyacsi räj jacchety muntyi' in, anic ra' dai' ji'shupcacsi jeñejti marvety jáman. Me'tum ra' vajmu'yaij in paj qui chuti Jen'tum in. 9Mu'in väc̣hä'tyity in pai' ra' jịjcaij in mu'insi'che' jac mu'in anicjetety Jen' in, cọijtacsebi ra' bä'yedye' in mọ' Jerusalén, mọ' mạ'je'si' Jen', mu'inche' ra' tŝọij in. Vátyequejdye ra' mạyedye'-ches tŝij tŝọcsi', mọ' ra' tasteyacsi' ji'co'shayacsi'. 10Mọ' Sọyo', väñätucsis jiquej, mọ' va'cac tŝijĉan yóĉandyem' co'shai'ĉan asufretum o, yóĉan-dyem' vajedyedye' bu'yity u judyeya' chime' mu' väñädye'ya' p̂eyaquity, mu' p̂eyaqui vajedyedye' bu'yitydyes. Mu'ĉan ra' räjĉan ñịbedyes cạve' in, mạij judyeya' tsedyedye', mijam ra' jụ'ñisĉan mạyedye' shuban mu'ĉantyi' in. 11Cạve' yụ yiris därsi' ayos bä'yaquis mu' jai'bas, cạvete yụ mu'che' bä'yity chime'. Jac judyeya' mạyedye'ches jedye' räj mọ' mọtsi' in Jen'si'ya' vej mu', aty jam quivij ji'cavibun' in. 12Chime'dye cạvacseban yụ räj mu'in säñity jiquej in, muju'chaty in judyeya' uya'yaty in, mu'ya' mu'in in Jen'si'ya' vej in. Chat qui vanchuc mọ' quirca in judyeya' yocsi' quirca chime' vanchuc, mọ' ji'jäcacsebi' tịj Jen'ya' ra' bä'yity in. Chat qui mu' Jen' jị'cäts yụ'tacsi mu'in säñity in jun' jun' chuc sánac quircache' in, jun' jun' chuc bä'yaque jacche' jiquej in. 13Jen' ji'shupcacseban mu'in marĉantyi' p̂utity in, judyeya' mu'in ru'dyei'yaty in, judyeya' mu'in säñitysi'ĉantyi' ĉär'tacdye' in, räj mọ' shuban' Jen'ya'. Jen' räj jị'cäts yụ'tacsi jun' chuc bä'yaque jacche' jiquej in. 14Mu'in ru'dyei'yaty in judyeya' mu'in säñitysi' ĉär'tacdye' mu'in, mu'in aty va'cac tŝijĉan in. Mọ' jadyiquis sän'dye' pärä'yis mọ' shupqui'. 15Tyi chuc jam sánactyi' tịj in Jen'si'che' quirca mu', mu'in me'tyity in va'cac tŝijĉan in.

will be added

X\