Revelation 2

1—Sáñeva' anjerdyes, mu' ĉọjcacsity ñuru'tyity yụ́tyi' in mu'in Efesoĉan bä'yitydyes in, jéme ọij p̂eyacdye' mu'indyes in: “Yi mu' tapchucsity yävätidye' ọ́rota' in tacvesya' un mu' judyeya' dyete'ĉaĉan vera yụ'taquis mu'ĉaĉan tyeij mi'ity. Yi mu' jínac: 2Yụ anic chị́yeyac jun' chuc bä'yi mi'in, fer carijtaqui yụ́dyes mi'in, judyeya' tyum'chutidye'tum ji'cajñetiñe' ñịbedyes mi'in, judyeya' chime' jam dyichchucsi mi'in mu'in ac̣hi'yity in. Chime'dye mi'in jị'ĉojtacsi mu'in väñädye'ya' yity in: Tsun jutactyi' Jen'tyi' mu', mi'in qui nam' chị́yacsi anic väväjñity in. 3Mi'in na tyum'chuti-dye'tum bä'yi mi'in, me' tsan' ñịbedyes jị'ĉojtiñe' yụ́dyes, jam qui nam' shọijtiñe' mi'in. 4Me' tsan' me' bä'yi mi'in, mọ'ya' qui nam' yiris dyijyedye' mi'in jam rụijsis, ĉaĉaij na aty jam mạ'jitiĉa' yụ mi'in, jam jeñej jiquej mi'in. 5Mọ'dyes dyijyeba-dac quivij, anic aty moch penjan mi'in, chime'dye dyijyebadac juchajche' mi'in paj qui cuvij jiĉun mi'in Jen'dyes, yojdyem' tashche' jiquej u mi'in. Jam dyijyeban' juchajche' jụijya' mi'in, yụ ra' meijjetyebadyeyac yụ'taquis vera. 6Mọ'ya' qui nam' jäm'si' dyijyedye' mi'in, mọ' ma'jotye-biyacsi' yụ, jun' chuc mi'in fạ́cacsebi ji'chäyitidye' mu'in Nicolaitassi' in, yụ chime' fạ́cacsebi dyijyedye' mu'in. 7Tyi chuc chuntumtyi' in paj jäm' se've' in ọij p̂eyacdye' jätäjyi' chuc mọ' Jen'si' Ạ'edye' mu', jéyacsi' mu'in ñuru'tyity yụ́tyi' in. Tyi chuc ji'peñe'tyi' a'c̣his dyijyedye' in, yụ ra' yụ'tyeyacsi paj qui mu'in jebei' in mọ' tsạ'chucsis sacacdye', mọ' cätidye' chidyi'ĉanya' bu'yis jäm'si'che' bä'yedye', mọ' jäm'tyes Jen'.”233 8—Sáñeva' anjerdyes mu' ĉọjcacsity mu'in ñuru'tyity yụ́tyi' in mu'in Esmirnaĉan bä'yitydyes in, jéme ọij p̂eyacdye' mu'indyes in: “Yi mu' Tashchety judyeya' Jäquity, mu' säñity jiquej judyeya' tsạ'ebantyi'. 9Yi mu' jínac: Yụ nash chị́yeyac jun' chuc bä'yi mi'in, jun' chuc ñịbedyes jị'ĉojtiñe' yụ́dyes mi'in, judyeya' jun' chuc mi'in anic ñịbety. Me' tsan' me' mi'in, Jen'si'ya' qui nam' vej mu' anic jedye'tumtyi' mi'in. Chime'dye yụ chịj jun' chuc pạrej judío in fer ñäñinac in. Mu'in me'tyinactyi' in, me' tsan' judío na'i in, jam qui nam' anictyity judío shupqui in, Satanástyi' shupqui in. 10Ñịbedyes jụijya' jị'ĉojtiñe' mi'in, jam ra' noi'yi mi'in. Pạrej ra' Sọyo' ji'ĉujtyinac mi'in, mọ' ra' yi' paj qui ĉär'tac mi'in, yiri'tac ra' mạyedye' me' ñịbe' cạvetiñe' mi'in. Yejĉojam' cäc̣hä'chutiĉam' yụ paj ra' tsan' ijanacya' in cäc̣hä'chuc-dye'ya' yụ, jam ra' yocve dyijyi mi'in, chat qui ra' yụ so'meyac bíjodye', paj qui Jen'ya' räjĉan bä'yi mi'in. 11Tyi chuc chuntumtyi' in paj jäm' se've' in ọij p̂eyacdye' jätäjyi' chuc Jen'si' Ạ'edye' mu', jéyacsi' mu'in ñuru'tyity yụ́tyi' in. Tyi chuc ji'peñe'tyi' a'c̣his dyijyedye', mu' ra' jam jị'ĉojtye' jäqui'ves sän'dye'.” 12—Sáñeva' anjerdyes, mu' ĉọjcacsity mu'in ñuru'tyity yụ́tyi' in Pérgamoĉan bä'yity in, jéme ọij p̂eyacdye' mu'indyes in: “Yi mu' me'chui'tyi' mọ' chutidyes coc̣hino, mọ' pären've to'cacsis, yi mu' jínac: 13Yụ chị́yeyac jun' chuc bä'yi mi'in, chịj chime' yụ mu'ĉan bä'yi mi'in yóĉandyem' ayo'bu'yi Satanás u. Me' tsan' me' mi'in, yejĉoij qui nam' cäc̣hä'chutiĉa' yụ mi'in, mijam farajjetiñe' anicyedye' yụ́che' mi'in. Mi'inĉan ijate in mu' Antipas, mu' jị'cäts yu'buntyi' p̂eyacdye' yụ, mu'ĉan ijate in yóĉandyem' bä'yi Satanás u. Me' tsan' mu'ĉan bä'yi mi'in, yoqui'dyem' ijate u jiquej in mu' Antipas, jam qui nam' peñi mi'in. 14Me' tsan' me' mi'in, mọ'ya' qui nam' dyijyedye' mi'in jam ma'jotyebiyacsi', ĉaĉaij na pạrej mi'in cäc̣hä'chubitinte ji'chäyitidye' Balaamsi' jiquej mu'. Mu' jaso'miti dyijyedye' mu' Balac jiquej paj qui mu' ji'se' ja'yacsi Israeltyi' vóshi' in. Mu' jéyacsi paj qui jebei' in mọ' säcsedye' jäm'tacdye'ya' jadyiquis, jéyacsi chime' paj qui vo'voij in, me' bu'yi' shupqui' ji'chäyitidye' mu'. 15Chime'dye pạrej mu'ya' mi'inĉantyi' in cäc̣hä'chucsebi in ji'chäyitidye' mu'in Nicolaítas in, mọ' nash yụ fạ́cacsebi dyijyedye' mu'in. 16Dyijyebadac juchajche' mi'in, jam jụijya' me' mi'in, yụ ra' yiristum ĉọcyac, chuti ra' yụ me'tyitytum in chutidyesya' coc̣hino, mọ' shupquis chụ'ĉan yụ, p̂eyacdye'ya' ra' yụ va'tacdye' so'macsi. 17Tyi chuc chuntumtyi' in paj jäm' se've' in ọij p̂eyacdye' mọ' Jen'si' Ạ'edye' mu', jéyacsis mu'in ñuru'tyity yụ́tyi' in. Tyi chuc ji'peñe'tyi' a'c̣his dyijyedye' in yụ ra' mu'in so'macsi paj qui jebei' in mọ' mạyedye'ches säcsedye' maná,234 mọ' jam cạves muntyi' in. Chime'dye yụ ra' so'macsi yirity jai'baty mij, mọ'che' ra' sánac mụi'sis tịj mu'in, mọ' jam chị́yacsebis yoctyi' muntyi' in. Mu' ram' so'mactyi' mij, mu' ram' chị́yaqui mụi'sis tịj ĉụi'si' mu'.” 18—Sáñeva' anjerdyes, mu' ĉọjcacsity mu'in ñuru'tyity yụ́tyi' in Tiatiraĉan bä'yity in, jéme ọij p̂eyacdye' mu'indyes in: “Yi mu' Jen'tyi' Ạva' mu', mu' p̂údyety vej je'ñety adye' judyeya' pịshyity yuj je'ñety ya'i'si' fiyero túnes. 19Yi mu' jínac: Yụ nash chị́yeyac jun' chuc bä'yi mi'in, chime'dye chị́yebiyac mạ'jitidyes mi'in, judyeya' carijtacdye' mi'in judyeya' anicyedye' mi'in judyeya' tyum'chutidye' mi'in, me' úñi yụ́dyes mi'in, jam jeñej jiquej. 20Me' tsan' me' mi'in, juñucsi'dyety qui nam' jayej mi'in, ĉaĉaij na jam jedye'jetiñe' mọ' ac̣hi'yis p̂en Jezabel. Mọ' ĉụi' yi'si': Yụ nash so'macsi' p̂eyacdye' Jen'si' mu', yi'. Jam nash me', ĉaĉaij na väñädye'ya' mọ' se' ja'yacsi' úñity yụ paj qui mọ'dyes vo'voij in judyeya' paj qui jebei' chime' säcsedye' in, mọ' jäm'tacdye'ya' jadyiquis. 21Yụ tsan' bise' paj qui dyijyeban' juchajche' mọ', jam qui nam' mọ' mạ'je' farajje' shapudyem'. 22- 23Mọ'dyes yụ ra' fersi' so'me' japacjodye' mọ' p̂en, yụ ra' ijabi' ạva' mọ', chime'dye yụ ra' so'macsi anic därsi' ñịbedyes mu'in vo'voijtyi' mọ'tum in, jam dyijyeban juchajche' jụijya' in. Me' ra' mu'in ñuru'tyity yụ́tyi' in, räj ra' chịj in jun' buty yụ chị́yacsebi ĉojtyi' mu'in judyeya' dyijyedye' mu'in. Me' ra' yụ so'meyac va'tacdye' cäts yirityityi mi'in jun' chuc bä'yi jiquej mi'in. 24Mi'in na yoctyi' Tiatiraĉan bä'yity mi'in, mi'in jam cäc̣hä'chubitiñe' mọ' a'c̣his ji'chäyitidye' Jezabelsi' mọ', mọ' je'si' in caminsis ji'chäyitidye' Satanássi', je'si' in, jam mọ' ji'chäyiti mi'in. Mọ'dyes yụ jam yocsi' p̂eyacdye' so'meyac mi'in, 25me'dye yiris mọmo' jéyac mi'in paj qui jẹjcai' cäc̣hä'chutiñe' mọ' rụijsis p̂eyacdye', mọ' me'chutiñes q̂uin' mi'in, me' ra' mi'in jun' qui' chuc atsijbanya' yụ. 26Mu'in na ji'peñe'tyi' a'c̣his dyijyedye' in judyeya' chäquintyi' yụ in jun' qui' chuc jadyic in, mu'in me' bä'yity in yụ ra' yụ'tacsi paj qui ayo'bu'yi muntyidyes in, pai' bu'yity in, 27yojdyem' mu' Jen' u yụ yu'tyin yụ paj qui ayo'bu'yi yụ. Me'dye ra' mu'in chime' ayo'bu'yi in, ferdye'tum ra' ayo'bu'yi in, jeñej yäcäs fiyero tupuj p̂etaijje' puñuj, me' bu'yi' shupqui' ra' ayo'bu'yedye' mu'in. 28Chime'dye yụ ra' so'macsi mu' ọ́rota' tui'tyi' nạijjodye'. 29Tyi chuc chuntumtyi' in paj jäm' se've' in ọij p̂eyacdye' mọ' Jen'si' Ạ'edye' mu' jéyacsis mu'in ñuru'tyity yụ́tyi' in.”

will be added

X\