Revelation 19

1Aty me'si' se've' yụ fersi' p̂eyacdye' mạyedye'ches jeñej yi' shachtyity muntyi' in yi p̂eyaqui in: “¡Tima'queja mu' Jen' Ayo' tsun! Mum' yirity ji'c̣honsin' tsun, mum' yirity ferdye'tumtyi' judyeya' mạijquedye'tumtyi'. 2Anic rụijsisya' dyijyedye' mu' jị'cäts yụ'tacsi muntyi' in, jam méqui' cäj cạqui dyijyedye' mu'. Rụijsisya' dyijyedye' mu' so'me' va'tacdye' mọ' chị́yacdyes me'taquis p̂en, mọ' ac̣hi'tye'si' jac a'c̣hisya' dyijyedye' mọ'. Mọ'dyes mu' Jen' va'tacdye' so'me' ĉaĉaij na mọ' ji'ijapte úñity mu', mọ' mọs juchaj.” 3Cuvij p̂eyaqui yi in: “Tima'queja mu' Ayo' tsun, ĉaĉaij na räjĉan ra' na'i' jị'sa' bä'yedye'ĉan.” 4Mu'in pärä' qui'tac vạjpedye' jiyity muntyi' in tashche' bu'yity in mọ'intumdye vạjpedye' tsạ'bu'yis in dyụtsyi' Jen'ya' in bä'yaquischetyya', mu' tima'quete in. Yi in: “Paj me', me' ra' tima'queja mu' Jen'.” 5Se've' yụ p̂eyacdye' bä'yaquitysi'che', yi': “Tima'queja tsuntyi' Jen', räj mi'in úñity mu' chime' irijyity Jen'che' mi'in, muju'chaty mi'in judyeya' uya'yaty mi'in, räj mi'in tima'quemac mu' Jen'.” 6Se've' yụ anic fersi' p̂eyacdye', jeñej yi' shachtyity muntyi' in, judyeya' jeñej yi' ojñi' chaban'si', judyeya' jeñej yi pururu fạ́coijtyi', me'qui'ĉan yi' se've' yụ. Yi' mọ' p̂eyacdye': “Tima'queja tsuntyi' Jen', mu' muju'cha' ferdye'tumtyi' Ayo' tsun, ĉaĉaij na mu' aty ayo'bu'yi. 7Mọ'dyes jemoñe' ma'joja' tsun, jemoñe' därsi'tum ma'jodye' tima'queja Jen', ĉaĉaij na aty ayij tupudye' vämedyedyes ra' mu' Oveca bu'yitysi', chime'dye p̂en mu' aty jä'mii'tyi' vämedyedyes mọ'. 8Mọ' so'mac paj qui jäm'tyi'ĉan quị'si' jụi'butyĉan pashyityĉan. (Mu' jụi'buty quị'si' cại' jeñej rụijsis dyijyedye' mu'in anicjetetysi' Jen' in, me' bu'yi mu'.” 9Mu' anjer jin yụ: —Sáñeva' q̂uin' räj ọij: “Anic där mu'in ma'joij mu'in fayactyi' in paj qui ĉọ́que' in mọ' vämedye' feshta Oveca bu'yitysi' mu', mu'tum ra' yiri'ya' säcsi in.” Mu' jin yụ chime': —Ọij nash anicsis p̂eyacdye' Jen'si' mu'. 10Dyụtsyi tsan' yụ anjersi'ya' vej mu', tima'quete tsan' ra' ĉúti yụ. Mu' qui yi jin yụ: —Jam ra' dyụtsyim ĉaĉaij nash yụ chime' Jen'tyi' úñity mu', yojdyem' mi u judyeya' vojity mi, mu'in rụij cäc̣hä'chuptety p̂eyacdye' in, mọ' p̂eyes mu' Jesús. Jen' ram' tima'quetem. Anicdye me', mu'in jaso'mitity p̂eyacdye' Jen' in mọ'dyem' mu'in voro'tacsi in mọ' rụijsis p̂eyacdye' p̂eyes Jesús. 11Cạvi yụ vanacyi' mạyedye'che', mọ'che' ji'naijti' yiris jai'bas cavayo. Mu' foqui'tyity mu'che' jéte in: Rụij Dyijyity, judyeya' Jị'cätse'tyi' P̂eyacdye', me' jéte in, ĉaĉaij na rụijsisya' dyijyedye' chuti judyeya' jị'cäts yụ'tacsi muntyi' in. 12Vej na mu' p̂údyei' je'ñei' adye', jo'no'che' nam' dai' me'chui' ĉästacdye' mu'. Chime' a'che' mu' sánac tịj mu', mijam tyi chị́yepte mọ'che' in, ĉụi' mọmo' chị́yaqui. 13Coftyity na mu' c̣huctac chäshĉan. Tịj na mu': P̂eyacdye' bu'yity.259 14Mu'in mạyedye'chety väc̣hä'tyity shachtyity in cäc̣hä'chute in jai'bascheche cavayo in, jụi'buty quị'si' pashyity mu'in. 15Mu' P̂eyacdye' bu'yity to'cacsis coc̣hino chutidyedyes shupqui' chụ'ĉan mu', me' bu'yi' p̂eyacdye' mu', mọ'ya' ra' mu' ji'penacsi räj jacchety muntyi' in. Chat qui ra' ayo'bu'yi mu'indyes in, ferdye'tum ra' ayo'bu'yi, yojdyem' mutyudye' fiyero o. Mu'dye ra' jị'caveyacsi muntyi' in därsi' fạ́codye' mu' muju'cha' ferdye'tumtyi' Jen', jeñej yirity muntyi' yútyeva'quety ova, me' bu'yi ra' va'tacdye' so'macsi. 16Coftyityche' mu' judyeya' jäñäcya', sánac yi': “Mu' ayo'bu'yi räjdyes ayo' in, mu' nash ayo', mu'in ayoty in”, yi' sánacdye'. 17Nạijte yụ anjer tsunche' bu'yi, rụi'cujcuij mu'che'. Fer p̂eyaqui mu' yi jéyacsi mọ'in jaijtyi' in mọ'in che've tyei'si' in, jéyacsi: —Ayijam' mi'in jaijtyi', vajmọ'ya'yejam', c̣hụcmun ra' yu'ti' mi'in, mu' nash Jen' so'minac. 18Mọ' ra' jebacsebi' mi'in, ayos shush mu'in judyeya' väc̣hä'tyitysi' mu'in judyeya' ayotysi' mu'in judyeya' cavayos mọ'in judyeya' foqui'tyitysi' chime' mu'in. Jebacsebi' ra' mi'in muntyis shush mu'in, judyeya' úñitysi' mu'in judyeya' jam úñitysi' mu'in, muju'chatysi' in, judyeya' uya'yatysi' chime' in, me' me' ra' jebacsebi' shush mi'in jaijtyi' mi'in —jéyacsi mu' anjer mọ'in jaijtyi' in. 19Chat qui cạvete yụ mu' vajedyedye' bu'yity judyeya' jacchety ayo' in, räjtumdye väc̣hä'tyity mu'in. Räj mu'in vajmu'yaij in paj qui vaj cäts chuti mu'tum in cavayochety in, räjtumdye väc̣hä'tyitytum mu'. 20Chat qui tapteyac mu' vajedyedye' bu'yity, mu'tumdye väñädye'ya' p̂eyaquity, mu' p̂eyaqui vajedyedye' bu'yitydyes, mu' jị'caveyacsity ferdye' jiquej mu'si'ya' vej vajedyedye' bu'yitysi'ya'. Ferdye'ya' jị'caveyacsis mu' väñädye'ya' p̂eyaquity se' ja'yacsi väñätucsi mu'in cachtacdye'tumtyi' in vajedyedye' bu'yitysi'ya' judyeya' mu'in jen'tuptety jäm'tacdye' in, anicjeptety väñädye' in, mu'in chime' se' ja'yacsi mu' väñädye'ya' p̂eyaquity. Pären'dye mu'in tsạ' va'cac tŝijĉan in, yóĉandyem' co'shai'ĉan asufretumsi' o. 21Mu'in na väc̣hä'tyity mu'in pärä'tyity in tas ijac in. Mu' cavayochety räj ijacsi väc̣hä'tyity mu'in to'cacsisya' coc̣hino chutidyedyes, mọ' shupquis chụ'ĉan mu', mọ'ya' ijacsi mu'. Mọ'in qui jaijtyi' in jebacsebi' shush mu'in jun' qui' chuc c̣hụcmun yu'ti' in.

will be added

X\