Revelation 18

1Aty me'si' yoctyi' qui nạijte yụ anjer, chạij mạyedye'che' jijtuij, anic fer bu'yity mu' anjer, mọ' mạijquedye' mu' mạijchui' räj ọij jac. 2Fer p̂eyaqui yi: “Mọ' därsi' bä'yedye' Babilonia aty va'tacdye' so'mac mụijya' jị'tŝoc mọ', mọ'dyes mu'ĉan bä'yity in aty itŝij in, mọ'indyety sọyo' mọ'ĉan in, yịjyi mọ'ĉan a'c̣his sọyo' in, judyeya' a'c̣hisdyety jaijtyi' in. 3Muntyi' räj in pai' bu'yity jiquej in cäc̣hä'chubi' jiquej in a'c̣his dyijyedye' Babiloniavunsi' jiquej mọ'. Chime'dye jacchety ayo' in juchaij mọ'tum jiquej in, mọ' jeñej bu'yi' vo'vodye' shupqui' mu'in. Chime'dye mọ' bä'yedye' anic ji'bijoyacsi' mu'in ji'mincaquity jiquej in, mu'in ji'mincayacsi dai' jedye' in, mọ' fer mạ'je'si' in”, yi mu' anjer. 4Se've' yụ yocsi' mạyedye'ches p̂eyacdye', yi': “Yụ jéyac mi'in yụ́tyi' muntyi' mi'in: Shupquejam' mọ' bä'yedye', jam ra' cäc̣hä'chubitiñe' juchaj mọ' paj qui jam mi'inmun cạtiñe'. 5Mọ' bä'yedye' jam ọ́ya' juchaj mọ', mạyedye'che' täj bu'yim', mu' na Jen' dyijtubi' juchaj mọ'. 6Paj därsi' va'tacdye' so'mac mọ', jun' chuc ñịbe'tacsi' yoctyi' in, paj me' bu'yi'dyem' so'mac va'tacdye' chime'. So'meva' va'tacdye' juchadyes mọ', dadam' därsi' va'tacdye' jị'cayeva'. So'meva' pärä' qui' va'tacdye' juchadyes mọ', jun' chuc mọ' ñịbe'tacsi' yoctyi' in, pärä' qui'dye jị'cayeva'. 7Anic där fibi'naqui' mọ' bä'yi' jiquej där a'c̣his jäm'taqui'. Cätsdye me' därsi' ñịbedyes so'meva' judyeya' därsi' táredyes, ĉaĉaij na ĉojtyi'ĉan yi' mọ': Yụ jeñej ayo' bä'yi' yụ, mijam yiris jedye' jayejjotaqui' yụ. Yụ jam dam' jeñej mọ'in p̂en säntaquis vämtyi' in, mijam ra' cạve' táredye' yụ, yi' fibi'naquis p̂eyacdyem'. 8Ĉụi'si' ra' fibi'nacdye' mọ' jaji'me'ti', yiristum ra' so'mac ñịbedyes mọ', judyeya' dáquis, judyeya' sän'dye', judyeya' tŝij, me' me' ra' dam'je' mọ' bä'yedye', ĉaĉaij na mu' Jen' Ayo' tsun anic ferdye'tumtyi', mu' jị'cäts yụ'bity va'tacdye' mọ'.” 9Chime'dye mu'in jacchety ayo' in juchaij mọ'tum in, jeñej bu'yi' vo'vodye', me' bu'yi' shupqui' muntyi'tum in, ĉụi' ac̣hi'ti in. Mu'in ra' där yoqui in, táre' ra' in mọ' bä'yedye' aty nạijbi'ya' jị'sa' in mọ' bä'yedyes. 10Meijtubi' ra' in cạvebi' jị'sa' in, mijam ra' dam' c̣hẹi'ya'yi in ĉaĉaij na noi'yi ra' in, yi ra' in: “Vatyquej ra' tsunche' tŝọi' mọ' va'tacdye' mọ'.” Chime'dye yi ra' in: “Anic där otej därsi' bä'yedye', mọ' fer bu'yis jiquej, där ñịbe' cạve', vátyequejdye mọ'che' tŝọi' va'tacdye'.” 11Jacchety ji'mincaquity in anic ra' där yoqui tyeij in, táre' ra' in mọ' bä'yedye', ĉaĉaij na ra' aty itŝij méquity jäctyetacsity jedye' mu'in. 12Dai' mọ'ya' jedye' ji'mincacdyes mu'in: oro mu'in judyeya' plata mu'in, judyeya' ya'ijtyi' mij mu'in, judyeya' ya'ijtyi' quị'si' mu'in, muju'cha' jäm'tyi' mu'in, pạrej cạ'ijdyeijtyi' mu'in pạrej jäijnäty mu'in. Chime'dye ji'mincai' in yịjyi jẹrejres son ya'i'si', judyeya' yịjyi yocsi' jämi' son in, judyeya' marfil in, judyeya' bronse in judyeya' fiyero in judyeya' jäm'tyi' mij marmol in, jo'memes jämi' in ji'mincacdyes mu'in. 13Chime'dye ji'mincai' in säcsedyedyes jẹrejres judyeya' ta'yacdyes jẹrejres in, judyeya' ji'co'shayacdyes jẹrejres in, judyeya' vino, aceite, ja'sha, trivo judyeya' cu'dye' in, oveca in judyeya' cavayo in judyeya' careto chime' in. Chime'dye úñity in ji'mincacsi in, me' tsan' ạ'edye'tumtyi' muntyi', ji'mincate mọmo' in, me' me' ji'mincai' jedye' in jo'mesya' querec̣haij in. 14Mu'in ji'mincaquity in táre' ra' in mọ' bä'yedye' je' ra' in: “Aty mọtsi' räj jedye' mi fer mạ'je'si' jiquej mi, aty räj mọtsi' ya'i'si' säcsedye' mạ'jes mi, aty itŝi' jäjämunsi' jedye' mi judyeya' räj querec̣ha mi, räj mọ' mọtsim, mijam ra' jụ'ñisĉan mạyedye' quivij ca'ñibun' mi”, je' in. 15Mu'in ji'mincaquity jo'mes mu'ĉan jiquej in, mu'in querec̣haijtyi' mu'ĉan jiquej in, mu'in ra' meijtuban' cạveban' in mọ' bä'yedye', yoqui in judyeya' táre' in äjyedye'tum in jam qui na ram' c̣hẹi'ya'yi in ĉaĉaij na noi'yi quijñe' in, vatyquej ra' mu'inche' muñi' mọ' va'tacdye'. 16Yi ra' in táredye'ĉan mu'in: “Anic där otej mọ' därsi' bä'yedye'. Me'chute jiquej mu' muju'cha' ya'ijtyi' quị'si', cạ'ijdyeijtyi' judyeya' jäijnäty. Oro shásha mọ' jiquej judyeya' ya'ijtyi' mij in. 17̣Q̂uin' qui nam' yiristum mọmo' räj mọtsi'”, yi ra' in. Räj mu'in bächätety marĉantyi' covamba in judyeya' mu'in covambache' carijtaquity in, räjtumdye mu'in jịjcatety in, mu'in covambache' carijtaquity in me' querec̣haveij in, räj mu'in meijtui'dye chime' cạve' in mọ' bä'yedye'. 18Aty nạijbi'ya' jị'sa' in fer ra' p̂eyaqui yi in táredye'ĉan mu'in: —Anic där jäm'si' jiquej mọ' bä'yedye', mijam cätstye' yocsi' bä'yedye' in —yi ra' in. 19Anic där táre' mu'in in, p̂uijdasya' bucjiti in jo'no'che' mu'in. Tárisdye'tum yi in: “Där otej mọ' därsi' bä'yedye'vun, mọ' jedye'tum yu'sin'si' jiquej räj tsun marĉantyi' covambache' carijtaĉaty tsun, yiristum mọmo' tas mọtsi'”, yi in. 20Mi'in na mạyedye'che' bä'yity mi'in ma'jojam', räjtumdye mi'in anicjetintety Jen' mi'in judyeya' mi'in so'minactyi' p̂eyacdye' Jen', judyeya' mi'in chime' jutactyi' Jen'tyi' mu', ma'jojam' räj mi'in. Ma'jotyebivac va'tacdye' mọ', atyu' u mu' Jen' ñịbe'tye' mọ' bä'yedye' mọ' jị'ñibe'canacsi' jiquej mi'in. 21Yirity qui ferdye'tumtyi' anjer che'jete yirity chäcdyity mij, je'ñety musaquity jo'mety. Mu'dye va'quecte pusaijsijte marĉan. Yi je' mọ' bä'yedye': “Me' ra' mi chime' Babilonia, ferdye'tum me'jeyac mi, aty ra' jam jụ'ñisĉan mạyedye' quivij na'eban' mi, meij ram' jịjcai' mọtsi' mi. 22Me'qui'dye ra' jadyic dujdujdyi se'vac cayeĉan in judyeya' jimaquity in, jadyic ra' vịva'que' in judyeya' boñity in. Me'qui'dye ra' carijtacva'joij carijtaquity in judyeya' acaijtyi' in, me'qui'dye ra' musaqui' in. 23Me'qui'dye ra' jä'ñi' mạijyis mọ'ĉan, jadyic ra' chime' vämedyes feshta mọ'ĉan. Anic chị́yacdyety mu'ĉantyi' ji'mincaquity jiquej in, pai' bä'yedye' ĉọ́quety in, chime' cọcojsi'nacdye'ya' mi se' ja'yacsi' jiquej jacchety muntyi' mi pai' bu'yity in, jo'mesya' väñätucsim”, yi mu' anjer je' mọ' Babilonia. 24Mọ'si'dye juchaj mọ' ji'ijacsi' mu'in jaso'mitity p̂eyacdye' Jen' in judyeya' mu'in anicjetety Jen' in, mọ' ji'ijacsi' räj mu'in pai' bä'yity jacchety in ijactyi' jiquej in, me' bu'yi' juchaj shupqui' mọ'sim', mọ'dyes qui va'tacdye' mọ'che' tŝọi'.

will be added

X\