Revelation 16

1Se've' yụ yiris fersi' p̂eyacdye' shupquis Jen'si'ĉan aca' mu', yi' mọ' jéyacsi' mu'in yävätidye'yity anjer in: —Tạij mi'in va'quecac jacche' mọ' piji'ĉansi', mọ' därsi' Jen'si' fạ́codye' mu'. 2Me'dye mu'in in, mu' tashchety anjer sacyi, chat mu' shachjeque' mọ' piji'ĉansi' jedye' jacche' jị'tŝoi'. Vatyquej shupqui' chómin'dye' muntyi'che' in, tyi chuc cachtacdye'tumtyi' in vajedyedye' bu'yitysi' mu' judyeya' jen'tuptety jäm'tacdye' in yódyesdyem' mu' u, räj vatyquej mu'in chómiñi tyeij in, anic där a'c̣his chómin'dye' játŝuti in, fersi' are'redye' jị'ĉojtye' in.255b 3Pärä'yity anjer shachje' mu' marĉan jị'tŝoi' piji'ĉansi'. Chäsh vatyquej tyei' muñi' ojñi', jeñej chäsh mu' ijactyis muntyi', jo'mei' tyei' ojñi', räj marĉansi' jedye' tsạ' bu'yis in räj säñi' in. 4Chibinyity anjer shachje' mu' cojiroĉan jị'tŝoi' judyeya' chanam'ches ojñi' chime' in, mọ'che' jị'tŝoi' piji'ĉansi' mu'. Chäsh vatyquej tyei' muñi' ojñi'.256 5Se've' qui yụ p̂eyacdye' mu' anjersi' mu' ĉọjcai'tyi' ojñi', yi: “Tsuntyi' Ayo' mi nash tạ'caty, mi mọmo' mu'ya' q̂uin', mim' yirity rụijtyity. Me' tsan' so'macsi mi va'tacdye' jacchety muntyi' in, rụijsisya' qui nam' dyijyedye' me'jeyacsi mi, 6ĉaĉaij na jacchety muntyi' in ji'chäshacsi in ijacsiya' jiquej in mu'in anicjintyi' in, judyeya' mu'in so'macsity p̂eyacdye' mi, mu'indye q̂uin' ji'tyecsi chäsh mi, mọ' anic rụijsis va'tacdye' mu'indyes in”, yi mu'. 7Chat qui se've' p̂eyacdye' yụ ji'co'shayacdye'ches yi': —Anic me' mi nash muju'cha' ferdye'tumtyi' Jen', Ayo' tsun, anic rụijsisya' dyijyedye' jị'cayacsim, jam méqui' cäj cạqui dyijyedye' mi. 8Vạjpedye'yity anjer shachje' mu' piji'ĉansi', tsunche' jị'tŝoi'. Mọ'dyes qui mu' tsun coshyedyes so'mac paj qui jị'mucsi muntyi' in, jeñej qui tŝij, me' qui jị'mucsi. 9Me'dye qui mu' tsun coshyedye'ya' jị'mucsi muntyi' in, me' tsan' me' mu'in qui nam' taca' yejĉoij jam anicjete muntyi' in, mem' ñiñete Jen' in, mu' me'chui'tyi' va'tacdye'. Me' tsan' me' jị'ĉojtye' va'tacdye' in, mijam qui nam' dyijyeban juchajche' in mijam p̂ucush tima'quebajte Jen' in. 10Ĉanam'yity anjer shachje' piji'ĉansi' mu' yóĉandyem' ayo'bu'yi vajedyedye' bu'yity u, tomaj vatyquej tyei', juñum tŝọi' ayo'bu'yedye'ĉan mu'.257 Mu'ĉan bä'yity in anic där ñịbe' cạve' räj in, cara'vaqui nem in are'redye'ya' mu'in. 11Ñiñete qui Jen' in mu' mạyedye'chety are'redye'ya' mu'in judyeya' chómin'dye'ya' mu'in, jam qui nam' dam' dyijyeban juchajche' in mijam farajjeyaqui a'c̣his dyijyedye' mu'in. 12Jäbänyity anjer shachje' piji'ĉansi' mu' därtyi'ĉan cojiro Eufratesĉan, mu'ĉan mu' jị'tŝoi'. Chañej vatyquej tyeij mu' cojiro, paj qui tupuj jiyi nobi in mu'in väc̣hä'tyity in ayo'tumdye mu'in, mu'in pam've bä'yity in. 13Cạvacsi yụ chibin sọyo' in anic a'c̣hic̣his in, mu'insi'ĉan chụ' shupqui' in, vajedyedye' bu'yitysi'ĉan, judyeya' c̣hovaj bu'yitysi'ĉan judyeya' mu'si'ĉan chime' mu' väñädye'ya' p̂eyaquitysi', mu' p̂eyaqui vajedyedye' bu'yitydyes, cäts yirityĉan jịjcai' shupqui' sọyo' in. Mọ'in sọyo' in je'ñeñei' ococo in, jo'memei' ji'caviti' in. 14Mọ'in sọyo' in, ferdye' me'chui'si' in, mọ'in jị'caveyacsi' muntyi' in ferdye' mọ'in. Ayidye' mọ'in chibin sọyo' in tuyacsi' in jacchety ayo' in, väc̣hä'tyitytum mu'in, mu'in pai' bu'yity in, mọ'in vajmu'ya'jeyacsi' in paj qui vajmu'yaij in chuti' mu'tum in mu' muju'cha' ferdye'tumtyi' Jen'. Ayij ra' jụijya' tsäqui'sissi' tupudye' Jen'si' mu', mu'tum ra' chuti in. 15Yi mu' Cristo: “Se'vaĉam', caminve ra' atsij yụ yojdyem' shushu'aty muntyi' u, me' ra' yụ, mi'inche' ra' tŝọij yụ, mijam ra' chị́va'joij mi'in. Där ra' ma'joij in tyi chuc tsạ' bu'va'joijtyi' in, judyeya' jä'mii'tyity quị'si'ĉan mu'in paj qui jam cädäj shupqui in, paj qui jam tsị́caij in”, yi mu'. 16Chat qui mọ'in sọyo' in vajmu'ya'jeyacsi' in jacchety ayo' in väc̣hä'tyitytum mu'in, paj qui mu'ĉan chuti in, Armagedónĉan, me' tịj mọ' hebreosĉan p̂eyacdye'. 17Yävätidye'yity anjer mu' qui shachje' piji'ĉansi' mu', tyi'muĉan mu' jị'tŝoi'. Chat qui se've' yụ fersi' p̂eyacdye' Jen'si'ĉan aca' mạyedye'ches, yóĉandyem' ayo'bu'yi u, yi' p̂eyacdye': —A to' o tas cạ̈tsi'. 18Me'ĉandye pururu fạ́coij vena'yaqui vatyquej tyeij, judyeya' fer chime' bubaqui' jac. Anic fersi' bubacdye', jam jäm'dyeya' me' bubacdye' jacsim', yoqui'dyem' jäm'tacya' muntyi' jiquej in, jam me' bubaqui' jac jiquej, ọya'ya' mọmo'. 19Bubacdye'ĉan mọ' därsi' bä'yedye' chet tyei' mọ' jac, chibinĉan shupqui' mọ' bä'yedye'. Chime'dye yocves bä'yedye' in pai'sis in räj mọ'in jọ'chai' in. Me' mu' Jen' dyijtucsebi a'c̣his dyijyedye' mu'in Babiloniaĉantyis in, mọ'dyes mu'si'ya' fạ́codye' därsi' jị'caveyacsi, va'tacdye' so'macsi. 20Marĉansi' poc̣ho' in räj ọya' jịjcai' pechi' in, mu'in na mụcu' in nạyen' tyeij in. 21Mu' na tsafa', där mu' tsäqui' jọ'chaij, muntyi'che' tŝọij in, yedyej därmuntyi', pạrej vạjpedye' arova yacñity in, jäm' tyimyacñity in.258 Uts na muntyi' in yejĉoij mọmo' ñiñete Jen' in mọ' va'tacdye-dyesya' mu', anic jiyi' därsi' mọ' va'tacdye' shupqui' muntyidyes in.

will be added

X\