Revelation 15

1Nạijtye' yụ yiris ji'cavitidyes mạyedye'ches, anic jiquijnacdyes. Mu'ya' yävätidye' anjer cại'tyi' in jadyiquis yävätidye'yis va'tacdye', mọ'ya' ra' jadyic fạ́codye'tumsi' va'tacdye' so'macsis muntyi' in mu' Jen'. 2Chime'dye cạve' yụ yiris choñemsi' jeñej därsi' ojñi' cafon bu'yis tŝijtum, me' bu'yi' nạijtye' yụ. Mu'che' mu'in in jam ji'penactyi' in mu'si'ya' vej mu' vajedyedye' bu'yitysi'ya' judyeya' mu'si'ya' vej jäm'tacdyesya' in, mu'in jam jụjbitety tịj in mu'si' vajedyedye' bu'yitysi', mọ' nómeroches tịj mu'. Sinve mọ' choñemsi', mu've rụi'cujcuquen in mu'in jam ji'penactyi' in, cäts vịcdyestutum in, mọ' so'macsis Jen'. 3Mu'in jimeyete Jen' in, Moiséssi' jimacdye' jimbite in judyeya' Oveca bu'yitysi' chime' mu'.253 Mu' Moisésvun Jen'tyi' úñity jiquej mu'. Yi in: “Tsuntyi' Jen' Ayo' tsun, mi nash muju'cha' ferdye'tumtyi', där jäm'si' räj carijtacdye' mi judyeya' jäm'tacdye' mi, anic jäm' äjyedyes in. Anic rụijsis dyijyedye' mi, mijam dam' cäj bu'yi', mi nash ayo'bu'yi räjdyes jacchety muntyi' in. 4Jam jụ'ñity ĉụi'tun in, räj ra' irijyi míche' in, räj ra' tima'quibun ferdye' in. Mim' yirity rụijtyity, itŝij yoctyi' me'. Räj muntyi' úchety in räj bu'yi' ọij jac atsij ra' in dyụtsyi míya' in, tima'quitin ra' in, ĉaĉaij na cavibun in anic rụijsis dyijyedye' mi.” 5Aty me'si' nạijbite yụ Jen'si' aca' mu' mạyedye'ches, mọ'dye vavdye' mọ' Mọjo'cha' Tsäqui'sis, mọ' vanacyi' nạijbite yụ. 6Aca'ĉantyi' shupqui in yävätidye' anjer in, mu'in cại'tyi' in yävätidye' va'tacdye' in. Anic jiyi jụi'bubuty quị'si' mu'in, judyeya' pashyi chime' mu'in, mọ' na e'feya' pan bu'yis mu'in, oro mọ' mu'in. 7Yiris mọ' vạjpedye'yis tsạ'bu'yis in so'macsi mu'in yävätidye' anjer in, cäts yiris jịjcai' piji' oro in, bänänäj mọ'ĉan Jen'si' fạ́codye' mu', mu' räjĉan tsạ'tyi' Jen'. 8Mọ' na Jen'si' aca' mu' sät tŝọi' jị'sa' mọ'ĉan,254 mọ' shupquis Jen'si'ya' ferdye' mu' judyeya' mạijquedye'ya' mu'. Jam tyi tupuj sisbite Jen'si' aca' mu', jun' qui' chuc cạ̈tsi' mọ' yävätidye' va'tacdye' in, mọ' cại'si' in mu'in yävätidye'yity anjer in.

will be added

X\