Revelation 13

1Cạvete yụ yirity vajedyedye' bu'yity marĉantyi' shupqui, yävätidye' jo'no' mu' judyeya' yiri'tac dáshu mu'. Dáshu mu' cäts ĉästacdye-dye'tum jịjcai'. Chime'dye cäts jịjcai' sánacdye' jo'no'che' mu'. Me' mu'in in jo'no' bu'yity in Jen'si' tịj mu' ĉụi'situpte in, mọ' ñinacdye' shupqui' Jen'si'ya' vej mu'. 2Mu' vajedyedye' bu'yity cạvetety yụ jeñej bu'yi ị́tsiquij, mọ' na yuj mu' je'ñei' tsan' juyu'tyeñes, chụ' na mu' je'ñei' pupujris, jo'meij mu'. Chat qui mu' c̣hovaj bu'yity ĉụi'si' yụ'tacdye' mu' jayu'ti mu' vajedyedye' bu'yity, mu' qui nọ́taqui ayo'bu'yi, därsi'tum ferdye' so'mac. 3Yiris jo'nom' vajedyedyes mu' mọ' are'jajiti' mọmo' jiquej, jeñej ra' säñi' tsan' mọ' jo'nom', me' bu'yi' are'redye' shupqui' mọ', chäĉän' qui nam'. Jacchety muntyi' räj äjjete in mu' vajedyedye' bu'yity, mu' cäc̣hä'chute in. 4Mu' jen'tute muntyi' in mu' c̣hovaj bu'yity tima'quete in, ĉaĉaij na mu' jaso'miti ferdye' mu' vajedyedye' bu'yity. Mu'mun chime' jen'tute in vajedyedye' bu'yity, yi in: —Jam tyi cätste in mu' vajedyedye' bu'yity, mijam tyi tupuj chuti mu'tum in —yi in. 5Chime'dye mu' vajedyedye' bu'yity jam ji'dyäcac va'bunye-dyes p̂eyacdyem', ĉụi' jeñej bu'yi Jen', me' bu'yi yu'ti, mọ' ñinacdye' shupqui' Jen'si'ya' vej mu'. Mu' qui ayo'bu'yi vạjpedye' qui'tac pärä' jiyi' ịvaj, me'qui'yam' yụ'tac ayo'bu'yi mu'. 6Me' ĉụi' tiyacchuti jañäñiti Jen', chime'dye Jen'si' tịj ñiñepte, judyeya' bä'yedye' chime' mu', mạyedye'chetymun chime' ñinacsi. 7Chime'dye mu' vajedyedye' bu'yity so'mac paj qui chuti mu'intum in anicjetetytum Jen' in paj qui ji'penacsi. Chime'dye so'mac mu' paj qui räjdyes ayo'bu'yi muntyidyes in, yịjyidyes in, yoc yoc p̂eyaquity in, pai' bä'yity in, räjdyes ayo'bu'yi mu'. 8Räj jacchety muntyi' in jen'tute ra' in, mu'indyety ra' jam jen'tute in tyi chuc sánactyi' tịj in quircache' Oveca bu'yitysi'che' mu', mu' ijactyi' jiquej. Tạ'cas aty sánac tịj mu'in jambi'dyem' jäm'tacya' ọij jac jiquej. 9Tyi chuc chuntumtyi' in paj jäm' se'vaqui in ọij p̂eyacdye'. 10“Tyi chuc yụ'tac jụijya' in paj qui mu'in ĉär'tac in, ĉär'tac ra' mọmo' in. Tyi chuc yụ'tac jụijya' in paj qui mu'in coc̣hinoya' ijac in, ijac ra' mọmo' in.” Mọ'dyes mu'in anicjetety Jen' in jemoñe' yejĉoij tyum'chutidye'tum bä'yi in judyeya' yejĉoij anicjete Jen' in. 11Yoctyi' qui cạvete yụ vajedyedye' bu'yity jacĉan shupqui. Pärä'tyity mu' dáshu miqui'munsim', je'ñei' oveca ban'sis, p̂eyacdye' na mu' jeñej yi' c̣hovaj bu'yitysi' p̂eyacdye' mu', me'dye mu' p̂eyaqui. 12Fer ayo'bu'yi mu' mu'si'ya' vej mu' tashchetysi'ya' vajedyedye' bu'yity, ĉaĉaij na mu' jäquity so'mac mu'si' yụ'tacdye', me' bu'yidyem' chime' mu' jäquity vajedyedye' bu'yity. Mu' ferche' jéyacsi paj qui räj jacche' bä'yity in tima'quete in mu' tashchety vajedyedye' bu'yity, mu'dye chäĉäntyi' fersi'ya' are'jitidye' jiquej. 13Mu' jäquity vajedyedye' bu'yity jị'caveyacsi därsi' ferdye' mu'. Ji'vorve' mạyedye'ches tŝij, ọ́chem' tŝọi' muntyisya' vej mu'in. 14Me' bu'yi mu' so'mac ferdye' paj qui jị'caveyacsi ferdye' mu' mu'si'ya' vej mu', mu' tashchetysi'ya' vajedyedye' bu'yity. Mọ'ya' se' ja'yacsi jacchety muntyi' in paj qui anicjepteve väñädye' in. Jéyacsi paj qui jäm'tye' in jäm'tacdye', paj jo'mei' yódyeijdyem' mu' u tashchety vajedyedye' bu'yity u, mu' coc̣hinoya' are'jitity jiquej, jam qui nam' säñi mu', paj jo'mei' jäm'tye' jäm'tacdye' in. 15Mu' qui jäquity vajedyedye' bu'yity, so'mac mu' chime' ferdye', mu' qui so'me' jụ́tyedyes mọ' jäm'tacdye', yojdyeijdyem' mu' tashchety vajedyedye' bu'yity u. Rụijdye me', mọ' p̂eyaqui' jäm'tacdye', mọ' qui ji'ijacsi' tyi chuc jam tima'quety in mọ' jäm'tacdye', mọ' jo'mes yódyeij-dyem' tashchety vajedyedye' bu'yity u. 16Chime'dye mu' jäquity vajedyedye' bu'yity jéyacsi räj muntyi' in, isho' in judyeya' jam isho' in, jedye'tumtyi' in judyeya' ñịbety in, úñity in judyeya' jam úñity in, räjen'dye jéyacsi paj qui cachtac in tacvesche' un mu'in, jam jụijya', jáfiche' mu'in. 17Tyi chuc jam jo'mestumtyi' in cachtacdye'tumtyi' in, mu'in ra' jam jun'tye' jedye' ya'ij in, mijam ra' jun'tye' chime' in ji'mincai' jedye' in. Mu'si' cachtacdye' mu' vajedyedye' bu'yitysi', mu'si'dye tịj mu', jam jụijya', nómeroche' tịj mu', me' bu'yi' shupqui' cachtacdye' mus. 18Tyi chuc dyijyedye'tumtyi' tupuj chị́yepte in mu'si' nómero vajedyedye' bu'yitysi'. Yojdyem' muntyis nómero u, mọ' cại'si' tịj mu', me' bu'yi' shupqui' mọ', ọij nash nómeros cachtacdye' mọ': jäbän qui' cien, jäbän qui'tac jäbän jiyi', me'sim'.

will be added

X\