Revelation 12

1Ji'caviti' vátyequej yiris ji'cavitidye' mạyedye'ches anic jiquijnacdyes mọ'. Ji'naijti' yiris p̂en mọ' comon' bu'yis tsunya' judyeya' yútye' mọ' ịvaj, ọ́rota' na ĉäs bu'yi jo'no'che' mọ', yiri'tac pạ̈rä' jiyi ọ́rota', me'si' ĉäschucsi'. 2Mọ' na jạjtsis p̂en aty are'rei'si' atsvun, aty shavyi' aty c̣hẹi'ya' basdyi' mọ'. 3Chat qui yocsi' ji'cavitidye' ji'naijti' mạyedye'che', anic där jiquijnacdyes mọ', därtyi' c̣hovaj bu'yity jäijnäty, me' ji'naijti'. Yävätidye' jo'no' mu' cäts ĉästacdyedye'tum jịjcai' jo'nom', dáshu qui nam' yiri'tac me'chui'. 4Mu' c̣hovaj bu'yity cọ́diya' mu' dai' vijtucsi mạyedye'chety ọ́rota' in, arajdye chocya' qui' ọ́rota' mạyedye'chety in jịva'chacsi,252 me'qui' jäcacsi ọ́rota' in va'cacsequi jacche' jị'tŝocsi. Chat qui mu' c̣hovaj bu'yity ĉọ́que' mọ' p̂en jambi' basdyis, mọ'si'ya' vej mọ' dyäqui mu', bisbi' ạva' mọ', ĉaĉaij na mu' dyijyi jebebi' ra' tsan' ạva' mọ'. 5Me'dye na'i ạva' mọ' son', mu' ra' ayo'bu'yidyety räjdyes jacchety muntyi' in, ferdye'tum ra' ayo'bu'yi mu', yojdyem' mutyudye' fiyero o, me' bu'yi' ra' ayo'bu'yedye' mu'. Mu' ạva' mọ' cạc Jen'ya', yóche'dyem' ayo'bu'yi mu' u. 6Mọ' na p̂en ĉa'joi' cäjyasĉan jac jịjcai'. Mu'ĉan mu' Jen' jä'mij jäm' yụ'tyeye' paj qui mọ'ĉan bä'yi', yiri' mir pärä' qui' cien jäbän qui'tac mạyedye', me'si' ji'säcsac mọ'ĉan. 7Chat qui chutidye' shupqui' mạyedye'che'. Mu'in anjer in ayo'tum mu'in Miguel, mu'tum chuti in c̣hovaj bu'yitytum räjtumdye anjer mu'. 8Mu' c̣hovaj bu'yity anjertumdye mu' räj ji'penac in mọ'dyes qui jam jun' mạyedye'che' ji'bä'yac in. 9Tacjeyac mu' c̣hovaj bu'yity, úche' jacche' jị'tŝoc mu', mu' urucyatydye tạ'catydye mu' nas Sọyo', mu'dyem' Satanás, mu' väñätucsity räj jacchety muntyi' in, anjertumdye mu' va'cac jacche' tŝọij in. 10Yụ se've' fersi' p̂eyacdye' mạyedye'che', yi': “̣Q̂uin' chat aty ayij tupudye', Jen' aty ra' ji'c̣honacsi muntyi' mu'. Mu' ra' jị'ĉoi' därsi' ferdye' mu', ferdye'tum aty ayo'bu'yi mu'. Mu' Ji'c̣honacsity jajutitity Jen' jị'ĉoi' ra' ferdye' mu', aty ra' pai' bu'yiya' ọij jac ayo'bu'yi. Aty va'cac mạyedye'ches mọ' Sọyo', mọ' ñäñibusin'si' vojity tsun Jen'si'ya' vej mu', mạij judyeya' tsedyedye' me' bu'yi ñinacsi' jiquej. 11Mu'in na vojity tsun ji'peñe' Sọyo' in mu'si'ya' chäsh mu' Oveca bu'yitysi'ya' judyeya' Jen'si' p̂eyacdye' mu', mọ' jị'chiqueyacsis in, mọ'ya' ji'peñe' in. Mijam quijñe' chime' sän'dye' in, mijam otejjiti in ijac Jen'dyes in. 12Paj ma'joij mi'in räj mi'in mạyedye'che' bä'yity mi'in. Mi'in na jacche' bä'yity mi'in judyeya' marvety mi'in, anic ra' där ñịbe' cạvetiñe' mi'in, ĉaĉaij na aty mi'inche' tŝọi' mọ' Sọyo'. Anic där fạ́coij tyeij ĉaĉaij na chịj mu' aty c̣hẹi'ya' jadyic ra' tupudye' mu'”, yi' mạyedye'ches p̂eyacdye'. 13Mu' c̣hovaj bu'yity aty ĉúti aty jacche' va'cac mu', chat qui mu' mu'che' tŝọij joijnosche' tse' mu'. 14Mọ'si' na p̂ensi' pärä' pavaj so'mac je'ñes boñis, chat qui mọ' turen' jácati', cäjyasĉan jac jịjcai' ĉa'joi' mọ', yóĉandyem' jäm' yụ'tac o. Chat qui mọ'ĉan ĉọjcac jam qui c̣hovai', chibin yómodye' choc, me'qui' ji'säcsac mọ'ĉan. 15Chat qui mu' c̣hovaj bu'yity ji'shupque' ojñi' majsi' chụ'ĉansi' mu', cojiro ji'shupte. Mọ' qui ojñi' mạ'je' tsan' ji'p̂ute' mọ' p̂en. 16Mọ' p̂en jañutyiti' mọ' jac, ĉụi'dye vanacyi', mọ'ya' qui coren' jịjcai' mọ' ojñi' ji'shupques chụ'ĉan mu' c̣hovaj bu'yity. 17Mu' c̣hovaj bu'yity anic där fạ́coij tyeij mọ'tum p̂entum, mọ'dyes qui mu' ĉọcsequi p̂entyi' vóshi' mọ', mu'in chiqueptety Jen'si' p̂eyacdye' in judyeya' cäc̣hä'-chui'tyi' p̂eyacdye' in, mọ' so'macsis Jesús, mu'intum qui chuti in. 18Mu' c̣hovaj bu'yity sinve mar jịjcaij.

will be added

X\