1 Chat qui yoctyi' cạvete yụ anjer ferdye'tumtyi', mạyedye'che' jijtuij, comon' bu'yi dyicba'badyem'. Jo'no'che' nam' o'pito' bu'yi', vejya' na mạijyi jeñej mu' tsun, mọ' na yuj mu' jeñej furquis tŝij, me' bu'yi ji'caviti mu' anjer. 2 Mu' me'chui' unĉan miquis sánacdye' dajtacsi'. Mọ' na tacves yuj mu' marche' bu'yi' mu', mọ' na q̂uimves yuj mu' chanam'che' bu'yim'. 3 Fer mu' äjyi, jeñej yi pupujri' tär'yity, me' p̂eyaqui. Äjyedye'-ĉandye mọmo' me'ĉandye mu'in voryi vatyquej yävätidye' pururu in, anic úya'qui' yi p̂eyaqui in. 4 Aty me'si' se'vacsebi yụ p̂eyacdye' mu'in, aty ra' tsan' yụ sánacsebi p̂eyacdye' mu'in. Vátyequej se've' yụ yiris p̂eyacdye' mạyedye'ches, yi' mọ' jin yụ: —Jam ra' jị'chiqueyacsi mi yoctyi' muntyi' in mu'insi' p̂eyacdye' in yävätidye'yitysi' pururu in, mijam ra' sánacsebi mi p̂eyacdye' mu'in —yi jin yụ. 5 Mu' na anjer cạvetety yụ, mu' yútyity marche' judyeya' chanam'che', tacves un mu' che'jeyaqui c̣họco'yi mạye-dye'che', 6 judyeya' yụ'taqui p̂eyacdye' mu' Jen'si'che' tịj mu', mu' räjĉan bu'yity, mu' räj jäm'tyety mạyedye' judyeya' jac judyeya' mọ' mar, räjtumdye me'chui'si' in. Jen'si'che' tịj mu', mu' anjer yụ'taqui p̂eyacdye', yi': —Jadyic ra' tupudye'. 7 Aty ra' boñiya' mu' yävätidye'yity anjer me'ĉandye ra' mu' Jen' jị'cätse' mọ' caminves dyijyedye' mu', mọ' jéyacsis jiquej úñity mu', mu'in jaso'mitity p̂eyacdye' jiquej in —yi mu' anjer. 8 Cuvij yi' mọ' mạyedye'ches p̂eyacdye', mọ' se'ves jiquej yụ cuvij jin yụ: —Tạij ĉọcme mu' anjer, mu' yútyity marche' judyeya' chanam'che', jäctyecme unĉansi' mu' mọ' miquis sánacdye' dajtacsi'. 9 Me'dye yụ ĉọcte mu' anjer, jéte yụ: —So'miti' miquis sánacdye'. Mu' vorjin yụ: —Miya'ĉa, jebeva'. Chụ'ĉan ra' cạvdyi' ĉọi' mi, a qui na ram' vo'coĉan mi bịcuc tŝọi'. 10 Me'dye unĉansi' jäctyete yụ mọ' miquis sánacdye' judyeya' qui jebei' yụ. Anic cạvdyi' ĉọi' chụ'ĉan yụ jeñej coroma, a qui nam' venjoi'ya' vo'coĉan yụ anic bịcuc tŝọi'. 11 Chat qui mu' jin yụ: —Cuvij ra' jị'chiqueyacsi mi mọ' p̂eyacdye' so'minsi' Jen', mọ' p̂eyacsis muntyi' in jun' chuc ra' mu'in in, mu'in yịjyi muntyi' in, yoc yoc p̂eyaquity in, pai' bä'yity in judyeya' ayo' mu'in chime', me' me' ra' p̂eyacsi mi.
