Revelation 1

1Ọij q̂uin' sánacdye' Juansi' mu', mọ' p̂eye' jị'cavacdye' Jesucristos mu'. Mu' Jen' mọ' jaji'caviyiti Jesucristo jun' chuc ra' jiyi' cavintum yocsi'ĉan mạyedye', paj qui mu' ji'jiyeyacsi muntyi' mu'. Mọ'dyes qui mu' Jesucristo jutete yirity anjer mu' paj qui mọ' jaji'chäquiyiti mu' Juan úñity mu'. 2Anicdye me', mu' Juan rụij mu' jị'chiqueyacsi Jen'si' p̂eyacdye' mu', jun' chuc cạve' mu', mọ' p̂eyes Jesucristo. 3Anic där ra' ma'joij mu'in p̂eye'tyi' in ọij sánacdye', judyeya' mu'in chime' se'vaquity in mọ' p̂eyacdye', judyeya' chique'tyi' chime' in, ĉaĉaij na aty c̣hẹi'ya' mọ' tupudye' cạ̈tsi' ra' ọij sánacdye'. 4- 5Yụ Juan, yụ sáñe' ọij mi'indyes yävätidye' ñuru'tyity mi'in Cristoty, Asiaĉansi' bä'yedye' bä'yity mi'in. Yụ cọdyete Jen', mu' tạ'caty, mu' mu'yaty q̂uin', mu'dye ram' yejĉoijtyi', mu' cọdyete yụ judyeya' Ạ'edye' mu' judyeya' mu' Jesucristo paj qui so'minac ñịbe'jitidyes mu' judyeya' ma'jodye' ĉojtyi'ĉandyes mi'in. Mọ' Ạ'edye' mu' yävätidye' bu'yis shupquis ĉụi'si'ya' vej mu', yóche'dyem' bä'yi u ayo'bu'yiche'. Mu' Jesucristo rụij jị'chique-yacsity p̂eyacdye' mu'. Mu' nash tashi vañinyeban, mu'dye q̂uin' tashche' bu'yi ayo'bu'yi räjdyes jacchety ayo' in. Mu' mạ'jisin'tyi' tsun, ĉụi'si'ya' chäsh mu' ji'c̣honsin' tsun juchajĉantyi' jiquej tsun. 6Mu'dye yu'sin' tsun paj qui ayo'bu'ja' mu'tum judyeya' yu'sin' chime' paj qui cudyitiĉaty bu'ja' Jen'che', mu' Jesucristoty Jen' mu'. ¡Paj jam mọtsi' tima'cacdye' mu', mu'si' ayo'bu'yedye' jam ra' jụ'ñisĉan mạyedye' mọtsi' mu'. Paj me'. 7Anicdye me', dyicba'ba-dye'ĉan ra' atsijban mu', räj ra' taquen' jị'ĉojtuyeĉun'bajte in. Mu'in p̂o'c̣hetety jiquej in, chime' ra' mu'in jị'ĉojtuyeĉun'bajte in atsijbanya' mu'. Räj ra' jacchety muntyi' in, yịjyi p̂eyaquity in, me' me' ra' tári in atsijbanya' mu'. Paj me'. 8“Yụ nash Tashchety judyeya' Jäquity,” yi mu' Ayo' tsun, mu' muju'cha' ferdye'tumtyi' Jen', mu' tạ'caty, mu' mu'yaty q̂uin', mu'dye ram' yejĉoijtyi'. 9Yụ Juan vojity mi'in, mu' Jesucristo vaj cäts ayo'bu'yi tsundyes, vaj cäts chime' tyum'chutiĉa' ñịbedyesya', mọ' jị'ĉojtyeja'si' Jesucristodyesi' tsun. Jesha', yụ va'cac marĉansi'che' poc̣ho' mu'che' ĉä'räij yụ voro'yedyes Jen'si' p̂eyacdye' mu', mọ' p̂eyes Jesucristo. Mọ' poc̣ho' Patmos tịj mọ'. 10Me' jiyi' Ayo'si'ĉan mạyedye' tsun, Jen'si' Ạ'edye' mu' tŝútyin yụ. Ĉụi'dye murujruche' yụ fersi' p̂eyacdye' se've' yụ, fer mạ'i', jeñej yi' boñedye'. 11Mọ' jin yụ: —Mọ' ra' cạves q̂uin' mi, mọ' ra' räj sáñem paperche', chat qui ra' juteyeyacsim mu'in ñuru'tyity yụ́tyi' in, mu'in yäväti-dye'yity Asiaĉansi' bä'yedye' bä'yity in. Juteyeyac-seva Efesoĉan bä'yity in, judyeya' Esmirnaĉantyi' in, judyeya' Pérgamoĉantyi' in, judyeya' Tiatiraĉantyi' in, judyeya' Sardisĉantyi' in, judyeya' Filadelfiaĉantyi' in, judyeya' Laodiceaĉantyi' in, me' me' ra' juteyeyacsim sánacdye' sáñe'si' ra' mi —yi mu' jin yụ. 12Cạvi yụ tyi buty me' jin yụ. Cạvacsi yụ yävätidye' yụ'taquis vera, oro in. 13Mu'ya' c̣hac je'ñeij anictyity muntyi', me' cạvete yụ. Moc̣haty quị'si' mu' tyuj bu'yi yujvem', mọ' na e'feya' pan bu'yis mu', oro mu'. 14Fin mu' anic mọjo'cha' jai'bas je'ñei' ovecas fin mọ', vej nam' anic p̂údyei' mu' je'ñei' adye'. 15Yuj nam' anic pịshyim' jeñej ya'i'si' fiyero túnes, judyeya' fer mạ'i' vatyquej p̂eyacdye' se've' yụ, jeñej yi' ojñi' chaban'si'. 16Tacvesya' un mu' tapchucsi yävätidye' ọ́rota' in, chụ'ĉan na mu' yiris shupqui' chutidyes coc̣hino, pärä've to'cacsis vejya' na jeñej pashquedyem' tsunsim'.232 17Nạijtacdye'ĉan mọmo' säñej tŝọij mụijya' yụ, jeñej yirity säñity muntyi', me' tŝọij yụ. Toco'jin yụ tacvesya' un mu', yi jin yụ: —Jam ra' noi'yi mi, yụ nash Tashchety judyeya' Jäquity. 18Me' tsan' säñi jiquej yụ, tsạ' bu'ban qui nam' q̂uin' yụ, yejĉoij qui ram' tsạ' bu'yi yụ, aty jam ra' quivij säñi yụ. Yụ nash bächäi' mọ' sän'dye', me'chui' yụ mọ' chácaquis säñitysi'ĉan ĉär'tacdye' in. 19Sáñe' ra' mi jun' chuc aty cạve' mi, judyeya' jun' chuc jiyi' q̂uin', judyeya' jun' chuc ra' jiyi' jäqui've yocsi'ĉan mạyedye', me' me' ra' sáñe' mi. 20Jesha', yụ ra' jéye jedye' buty cại' in mu'in yävätidye' ọ́rota' in, cạvacsity mi tacvesĉan un yụ, judyeya' mọ'in yävätidye' yụ'taquis vera oro in. Mọ'in yävätidye' yụ'taquis vera mọ' cại' in yụ́tyi' ñuru'tyity in yävätidye' bä'yedye' bä'yity in, judyeya' mu'in yävätidye' ọ́rota' in mọ' cại' mu'in yävätidye' anjer in mu'in ĉọjcacsity in —yi Ayo' tsun jin yụ.

will be added

X\