Philippians 4

1Vojity, mạ'jeyacdyety yụ, yụ fer mạ'je' cạveyac mi'in, anic fer ma'joij yu'tiĉa' yụ mi'in, yụ anic ma'jotyeyac jun' chuc bä'yi Jen'dyes mi'in, mọ'dyes fer bu'jam' Ayodyes mi'in. 2Mi Evodia judyeya' mi Síntique, yụ ferche' jéyac, jemoñe' vaj cäts dyijyi' pären'dye mi'in, ĉaĉaij na vaj voji' mi'in Ayos mi'in. 3Chime'dye mi pen'dye' yụ, mi nash jị'cätse'tyi' p̂eyacdye', yụ jéye, paj qui nọ́tacsi mi mọ'in pärä'sis p̂en in paj qui jäm'jibun' quivij in. Mọ'in carijtaquis yụ́tum in voro'tacsiya' yụ jiquej mọ' jäm'si' p̂eyacdye' Jen'si' mu'. Clementetum chime' carijtaqui' mọ'in in, yoctyi'tum pen'dye' yụ in, vaj me' carijtaqui Jen'dyes tsun. Räj quircache' sánac tịj mu'insi' in mọ' ji'jäcacsi' mu'in Jen'ya' ra' bä'yity in. 4Ma'jodye'tum bä'jam' mi'in ĉaĉaij na Ayoty mi'in. Quivij yụ ra' jéyac: ¡Ma'jojam' bä'jam' mi'in! 5Räjĉan jäm'yedye'tum bä'jam' räjtum muntyi'tum mi'in. Jesha', aty c̣hẹi'ya' ayidye' Ayos tsun. 6Jam ra' jedye' cajotyetiñe', dam'dye jäm' cọdyetinte mu' Jen', jedye' chuc jemontiñe'ya' cọdyemac mọmo' mi'in, räjĉan yoshoropaij jémac chime'. 7Chat qui ra' mu' Jen' so'minac ma'jodye' ĉojtyi'ĉandyes mi'in, mọ' ra' ĉujcabunac ĉojtyi' mi'in judyeya' dyijyedye' mi'in, paj qui jam yocve dyijyi mi'in, ĉaĉaij na Jesucristoty mi'in. Mọ' ma'jodye' so'misin'si' Jen' anic mọjo'chas mọ', mijam ọ́ya' jun'dyem' tupuj cha'shepja mọ' ma'jodye' mu' mijam chị́yepja. 8Ọij ra' jadyic jéyac p̂eyacdyeij vojity. Jam ra' a'c̣his jedye' dyijtutiñe' ĉojtyi'ĉan mi'in, jäm'sim' dyijtuvac jedye', jụ'ñiñis chuc rụijsis dyijyedye' in, judyeya' jụ'ñiñis chuc ma'jotacsi' in, judyeya' jụ'ñiñis chuc jam cäjsis in, judyeya' jam jụ'ñis in, judyeya' mạ'jeyacdyes in, judyeya' jäm'yedyes in, judyeya' jụ'ñiñis chuc tima'cacdyes in, jo'memes mọmo' dyijtuvac mi'in. 9Yejĉojam' chäquibutiĉam' p̂eyacdye' yụs mi'in mọ' baja' jị'chiyeyacsi' jiquej. Jun' chuc jị'chiyeyacya' yụ jiquej, jun' chuc bä'yi yụ mi'insi'ya' vej jiquej, me'dye ra' bä'yi mi'in chime'. Me' jụijya' mi'in mu' Jen' so'misin'tyi' ma'jodye' ĉojtyi'ĉandyes tsun, mu' ra' pen'dyetunac mi'in. 10Där ma'joij yụ Ayo'si'ya' vej mu', ĉaĉaij na chijäm' quivij dyijtutiĉa' yụ mi'in, jutiyibudyiĉa' quivij nọ́tacdye' mi'in. Yụ qui nam' chịj jam yaquintutiĉa' yụ mi'in, mọ' mọmo' chịj yụ jam jun' bu'yaque jiquej mi'in. 11Me' tsan' me' jéyac yụ, yụ qui nam' jam ji'yoquin jayejjotacdye' yụ, ĉaĉaij na aty chịj yụ ma'jodye'tum bä'yi yụ, jedye' chuc mọ'ya' jụijya' yụ, me' tsan' jayejjotaqui jedye' yụ, vaj me' qui nam' ma'joij yụ. 12Jäm'dyeya' jayejjotaqui jedye' yụ, jäm'dyeya' na dai' me'chui' yụ. Mọ'dyes chịj yụ ma'jodye'-tum bä'yi yụ, me' tsan' mọjo'cha' jedye' me'chui' jụijya' yụ, me' tsan' jayejjotaqui jụijya' yụ, ma'jodye'tum qui nam' bä'yi yụ. 13Räj jedye' chuc carijsis jị'ĉojtye'si' yụ, jo'mesya' mu' Cristo so'min yụ dyichyedyes ferdyedyes yụ, tupuj qui dyichyi yụ, me' tsan' fersi'ya' ñịbedyes. 14Me' tsan' me' yụ, anic qui nam' där jäm' mi'in jutiyitiĉa' nọ́tacdye' mi'in úĉan yóĉandyem' ñịbe' bä'yiĉan u yụ. 15Chịj mi'in jun' chuc yụ tiyacchuse jiquej voro'tacsi yụ jäm'si' p̂eyacdye' Jen'si' mu', aty Macedoniaĉan jiquej sacje' yụ, mi'in na Filiposĉantyi' me'dye mi'in mọmo' jutiyitiĉa' mi'in tsạ' bu'yedyety yụ, jam me' yoctyi' anicjetety Jen' in jutiyin yụ in. 16Chime'dye aty mu'ĉan yụ Tesalónicaĉan jịjcaij yụ jiquej, mi'in cuvij jutiyitiĉa' mi'in, jam yiri' quim' me' jutiyitiĉa' mi'in. 17Jam mum' querec̣ha dyijtute yụ, mi'inmun chime' dyijtuyac, paj qui Jen'si'che' quirca sánac ñịbe'yedyes so'mitiĉas yụ mi'in, mọ'ya' qui ra' bijodyes so'minac mi'in mu' Jen'. 18̣Q̂uin' chat uts Epafrodito tuyin yụ uts querec̣ha jutiyitiĉaty mi'in, räj mu' so'min yụ, tupuj yụ́dyety muju'cha' me'chute q̂uin' yụ. Ọij nọ́tacdye' so'mitiĉas yụ mi'in mọ' jeñej bu'yi' ji'co'shayacdye' Jen'dyes jẹrejres, me' shupqui' mọ', anic mọ' ma'jotyibunac Jen'. 19Yụ́tyi' Jen' räj ra' so'minac jedye' chuc jemontiñe' mi'in, paj qui jam jayejjotaqui jedye' mi'in, ĉaĉaij na mu' Jen' räj me'chui' jedye', Jesucristoya' mu' ra' so'minac mi'in. 20Tima'queja mu' Jen', Ạvatusin'tyi' tsun, jam ra' jụ'ñisĉan mạyedye' mọtsi' tima'cac-dye' mu'. 21Vorjeyacsejam' räj mu'in anicjetety Jen' in, mu'in Jesucristoty in. Uts úĉantyi' vojity in mu'in vorjinac chime' in. 22Räj mu'in úĉantyi' Jen'tyi' ñuru'tyity in vorjinac chime' in, mu'in carijtaquity in ayosĉantyi' aca' in, mu' muju'chaty ayo' Romaĉantyi', mu'in dadam' muju'cha' vorjinac in. 23Yụ cọdyete mu' Jesucristo, Ayo' tsun paj qui mu' ñịbe'jitidyes so'minac räj mi'in. Paj me'.

will be added

X\