Philippians 2

1Cristo fer bu'yi yu'tyinac mi'in, mu' ma'joij yu'tyinac mi'in mạ'jitidyesya' mu', aty tibä'yebitinte Jen'si' Ạ'edye' mu', judyeya' jäm'yedye'tum bä'yi chime' mi'in, judyeya' ñịbe' ĉọcsi chime' mi'in. 2Mọ'dyes yụ jéyac paj qui vaj meij mạ'jitidyeij bä'yi mi'in, mijam ra' yoc yoc dyijyi mi'in, dam'dye jäm' vaj cäts cạtiñe' dyijyedye' mi'in. Me' bä'yi jụijya' mi'in, me' ra' chat ma'joij yu'tiĉa' yụ mi'in. 3Jam ra' fibi'nacdye'tum bä'yi mi'in mijam ra' ĉụi'si' dyijyedye' me'chuqui mi'in, jäm'yedye'tum ra' bä'yi mi'in yoctyi'tum muntyi' in. Jam ra' va'bunyi mi'in, dam'dye jäm' muju'cha' dyijtucsi mi'in yoctyi' chätidye' mi'in, uya'ya' qui ra' ĉụi' ĉúti mi'in. 4Jam ra' ĉụi'sim' jedye' dyijtuqui mi'in, jemoñe' chime' dyijtucsi chätidye' mi'in. 5Cäc̣hä'chubimac Jesucristos dyijyedye' mu'. 6Mu' nash tạ'caty Jen' bu'yity, mu' qui nam' jam dyijyi yejĉoij ra' ayo'bu'yi yojdyem' Jen' u mu'.174 7Ĉụi'si'ya' dyijyedye' mu' räj farajje' ayo'bu'yedye' mu', úche' qui atsij, jeñej qui muntyi' me' na'i, úñity qui yu'ti. Muntyi' bu'yi qui ji'caviti, 8ĉụi' uya'ya' yu'ti, chiquete Jen' mu' ĉụi' ji'säsdyi ji'ujati,175 dadam' ñịbedyes jị'ĉojtye' sän'dye' tsị́cadyes, croshche' ijate in. 9Mu' qui Jen' muju'cha' jayu'ti, räj yoctyi' ayo' in cajnacsi,176 anic mọjo'cha' jayu'buti tịj mu', 10paj qui räjen' in dyụtsyi Jesúsya' in aty se'vepteya' tịj in, räjen'dye mạyedye'che' bä'yity in judyeya' jacchety in, judyeya' jacĉan bä'yity chime' in, räjen'dye ra' dyụtsyi Jesúsya' in tima'quete in. 11Räjen'dye ra' mu'in ji'jäcte in, yi ra' in: “Jesucristo nash anictyity Ayo'”, yi ra' in, tima'cacdye'ya' Jen' mu' Ạvatusin' tsun. 12Chätidye' mạ'jeyacdyety yụ, pen'dyetuyacdyem' yụ jiquej, mi'in räjĉan chäquibutiĉa' yụs p̂eyacdye' mi'in. ̣Q̂uin' chat itŝij yụ, mọ'dyes dadam' muju'cha' jemoñe' chäquibutiĉa' yụs p̂eyacdye' mi'in. Yụ'taĉam' ferdye' paj qui jị'cätseptinte Jen'si' dyijyedye' mu' mi'indyes, mọ' mạ'jes mu' aty ji'c̣honnac jiquej mi'in, fer irijyi mu'che' mi'in. 13Mu'dye Jen' so'minac ĉojtyi'ĉandyes dyijyedye' mi'in paj qui mạ'je' Jen'dyes mi'in, chimu'dye so'minac ferdyedyes paj qui tupuj chiquebitinte p̂eyacdye' mu'. 14Räjĉan ra' me' mi'in aty qui ra' jam jedye' jítidyeij mi'in, aty qui ra' jam mistyiva'ti chime' mi'in. 15Jam ra' me' bä'yi mi'in, rụij qui bä'jam' paj qui jam jụ'ñij ĉojtyi'ĉan mi'in. Jemoñe' Jen'tyi' ạva' bu'yi mi'in ac̣hi'yityĉan muntyi' in juchajtumtyi'ĉan in. Mạij bu'jam' bä'jam' yojdyem' ọ́rota' u, me'jeyacsejam' mạijchucsejam' mu'in úchety jacchety muntyi' in, 16jị'chique-yac-sejam' tsạ'chucsis p̂eyacdye'. Me' bä'yi jụijya' mi'in yụ ra' ma'jotyeyac mi'in aty atsijbanya' mu' Cristo, me' ra' jorojĉan jam fibidyes shupqui' mọ' carijtacdye' Jen'dyes yụ, voro'tyeyacya' yụ jiquej. 17Me' ra' tsan' ijac yụ voro'tacdyes, ma'jodye' qui na ram' shupqui' yụ́dyes. Sän'dye' ra' yụ jeñej bu'yi' ra' tuyacdye' Jen'dyes, mọ' tuyetintes Jen' mi'in anicyedye'ya' mi'in, me' bu'yi' ra' mọ' sän'dye' yụ. Tupuj ijac yụ, me' tsan' me', ma'jodye'tum qui nam' bä'yi yụ, mi'inmun ra' chime' ma'joij bä'yi mi'in, 18me'dye ra' mi'in chime' ma'jojam' yụ́tum. 19Ayo' tsun Jesús yíya', yụ dyijyi cavin ra' jutete yụ mu' Timoteo paj qui mi'inya' jadyiqui mu', paj qui mu' tuban' p̂eyacdye' jíbun yụ jun' chuc bä'yi mi'in, chat qui ra' yụ ma'jodye'tum se've' yụ mọ' p̂eyacdye' aty chịjya' yụ. 20Uts Timoteo mum' yirity dyijtunac ĉojtyi'ĉan mi'in, yojdyem' yụ u, itŝij mu'ya' yoctyi' me' dyijtunactyi' mi'in. 21Yoctyi' qui nam' in ĉụi'sim' jedye' dyijtuqui in, jam méqui' Jesucristos dyijyedye' dyijtupte in. 22Mi'in aty chị́yetinte mu' Timoteo, anic rụijtyity nọ́taquity mu'. Jeñej yirity ạva' nọ́taqui jen' mu', me' bu'yi mu' carijtaqui yụ́tum voro'tacsiya' tsun jäm'si' p̂eyacdye' Jen'si' mu'. 23Mọ'dyes dyijyi yụ, yụ ra' jutete mu've mi'inya' aty chịjya' yụ jun'jin chuc ra' yụ in, vatyquej ra' mu' tashchety ayo' ji'c̣hoñin yụ, vatyquej ra' jam. 24Yụ ĉúti Jen'che' tsun, c̣hoñi ra' yụ, chat qui ra' mu've yụ ĉọcyac mi'in. 25Chime'dye dyijyi yụ jemoñe' yụ jutebajte mi'inya' mu' vojity tsun Epafrodito, mu' nash úya' jutetinte mi'in paj qui mu' ñútyin yụ. Mu' nash yụ́tum carijtaqui, jeñej bu'yi väc̣hä'tyity Jen'tyi' mu', me' chuti Jen'dyes mu'. 26Mu' fer jemonnac mi'in, anic tárinac mi'in ĉaĉaij na se'vaqui mi'in jun' chuc japacjoij jiquej mu'. Yi mu': “Vatyquej ra' fer tárin yụ in,” yi mu'. 27Anicdye me' mu' fer japacjoij jiquej, arajdye säñi. Mu' qui nam' Jen' ñịbe' jáĉuti, jaji'chäĉun. Jam mum' ñịbe' jáĉuti, yụ́mun chime' ñịbe' ĉun, a vuty säñi jiquej jụijya' mu', a vuty dam'dye cächyi' táris yụ. 28Mọ'dyes yụ ferche' mạ'je' cavin jutebajte yụ mu've mi'inya' paj qui ma'jotye-bajtinte mi'in cạvebajtinteya' mu' mi'in, yụsmun ra' chime' faraj yoquedye'. 29Me'dye ra' mi'in chime' ma'jodye'tum ra' tiĉun'bajtinte uts Epafrodito ĉaĉaij na vaj vojity mi'intum Ayo'si'ya' vej mu'. Jäm'jemac mi'in, jäm'jeyacsejam' räj mu'in me' me'tyity in. 30Mu' nash fer carijtaqui Cristodyes, jäm' araj säñi carijtacdye'yam', mijam ĉụi' ñutsjiti, me'dye yụm' dyijtun jedye' chuc jemoñes yụ, mu' fer ñútyin yụ. Mọ' mi'in jam tupuj ñútyitiĉa' yụ mi'in, ĉaĉaij na itŝij mi'in.

will be added

X\