Philippians 1

1Yụ Pablo pen'dyetun yụ Timoteo, tsun nash úñity Jesucristoty mu'. Yụ sáñe' ọij mi'indyes Filiposĉantyidyes mi'in Jen'tyi' ñuru'tyity mi'in judyeya' Jesucristoty mi'in, räjtumdye mu'ĉantyi' ĉọjcacsity in judyeya' nọ́taquity in, räjdyes ọij sánacdye'. 2Yụ cọdyete Jen' mu' Ạvatusin'tyi' tsun, judyeya' mu' Jesucristo Ayo' tsun paj qui mu' ñịbe'jitidyes so'minac mi'in paj qui chime' so'minac ma'jodye' ĉojtyi'ĉandyes mi'in. 3Jun'si' ĉụi' dyijtuyacya' yụ, yụ yoshoropaij jéte Jen' mi'indyes. 4Räjĉan cọdacdye'ĉan yụ, ma'jodye'tum yụ cọdyete Jen' mi'indyes, 5ĉaĉaij na ñútyitiĉa' yụ mi'in carijtacdye' Jen'dyes, yoqui'dyem' jiquej tiyacchutiya' voro'tacsi yụ jäm'si' p̂eyacdye' Jen'si' mu', me'dye q̂uin', me' yejĉoij ñútyitiĉa' yụ mi'in. 6Yụ anic chị́yete Jen' jun' chuc mu' tiyacchui' jiquej carijtaqui ĉojtyi'ĉan mi'in, mu'dye ra' yejĉoij fer bu'yi yu'nac ĉojtyi'ĉan mi'in jun' qui' chuc atsijbanya' mu' Jesucristo. 7Yụ räjĉan ma'jodye'tum dyijtuyac mi'in anic mạ'jeyac yụ mi'in. Tupuj me' dyijtuyac mi'in ĉaĉaij na mi'in ñútyitiĉa' carijtacdye'ya' yụ, mọ' so'minsi' Jen' yụ ñịbe'jitidyesya' mu'. Me' tsan' ĉär'taquisĉan yụ, me' tsan' jam, yejĉoij qui nam' ñútyitiĉa' yụ mi'in voro'yedye'ya' yụ mọ' jäm'si' p̂eyacdye' Jen'si' mu'. Me' tsan' ayosya' vej mu'in, yụ qui nam' rụij jéyacsi mọ' p̂eyacdye' paj qui jam cäj shupqui' mọ', taca' qui nam' mi'in yejĉoij dyijtutiĉa' yụ mi'in. 8Jen' chäyin yụ anic rụij p̂eyaqui yụ, jun' chuc yụ fer mạ'je' cạveyac mi'in, mu'dye Cristo Jesús so'min yụ mạ'jitidyes mu' paj qui me' mạ'jeyac yụ. 9Mọ'dyes yụ cọdyete Jen' mi'indyes paj qui mi'in dadam' yejĉoij mạ'jitidyeij bä'yi mi'in, paj qui chime' dyijyedye'tum bä'yi mi'in, paj qui räjĉan rụij dyijyi mi'in. 10Chat qui ra' tupuj chị́yetiñe' jụ'ñis chuc jäm'si' dyijyedye' paj qui mọ' cäc̣hä'chutiñe' mi'in. Me' jụijya' mi'in anic ra' rụij bä'yi mi'in judyeya' ra' chat jam jụ'ñiij shupqui mi'in Jen'si'ya' vej mu', aty atsijbanya' mu' Cristo. 11Me' jụijya' mi'in mọjo'chas qui ra' dam'dye jäm'yedye' me'chutiñe' q̂uin' mi'in, Jesucristosya' ferdye' mu' me' ra' bä'yi mi'in, chat qui ra' muntyi' in tima'quete Jen' in mi'indyes. 12Vojity, yụ ra' jị'chiqueye-yac mi'in jun' chuc mọ' ñịbedyes jị'ĉojtye'si' yụ ĉär'tyinya' yụ in, jam qui nam' ji'dyäquepte in jäm'si' p̂eyacdye' Jen'si' mu', me'dye chat mọ' ji'tse'e' mọmo' p̂eyacdye'. 13Jesha' mu'in räj väc̣hä'tyity in ĉọjcatety ayo' in judyeya' yoctyi' muntyi' chime' in, räj mu'in chịj in jun' chuc Cristodyes ĉä'räij yụ.173 14Chime'dye araj räj vojity tsun, me' tsan' chịj in jun' chuc ĉä'räij yụ, jam qui nam' mọ' jäquijnacsi', me'dye chat Ayo' yi paj qui dadam' meijquejĉoij voro'tacsi in Jen'si' p̂eyacdye' mu', mijam dam' noi'yedye'tum voro'tacsi in. 15Mu'ya' pạrej jam jäm'si'ya' dyijyedye' voro'tacsi in Cristos p̂eyacdye' mu', mọ' jị'fajque' in jun' chuc yụ muju'cha' jụj ja'yacsi muntyi' in, mu'in na uya'ya' jụj ja'yacsi in. Mu'in me'tyity voro'tacsity in mạ'je' dai' jụj ja'yacsi in paj qui mu'in mọmo' tima'cac in. Yoctyi' na voro'tacsity in jam me' in, rụijsisyam' dyijyedye' voro'tacsi in. 16Uts mạ'jitidyestum voro'tacsi in, mu'in mạ'jin yụ in chịj in mu'dye Jen' me' yu'tyin yụ paj qui yụ jị'chiqueyacsi muntyi' in jun' chuc anic rụijsis mọ' jäm'si' p̂eyacdye' Jen'si' mu'. 17Yoctyi' na in jam me' in, mu'in jam jäm'si'ya' dyijyedye' voro'tacsi in Cristos p̂eyacdye' mu', ĉụi'si'yam' va'bunyedye' mu'in voro'yi in, chime'dye dyijyi in mạ'je' ji'tarin yụ in úĉan ĉär'taquisĉan, me' ĉúti tsan' in. 18Me' tsan' me' bu'yi' mọ' dyijyedye' mu'in, jam qui nam' mọ' jedye' yi', paj tsan' jäm'si'ya' dyijyedye' mu'in, paj tsan' jam, ma'joij qui nam' shupqui yụ ĉaĉaij na mọ'dye Cristos p̂eyacdye' voro'tacsi in. Yụ ra' yejĉoij ma'jodye'tum bä'yi, 19ĉaĉaij na chịj yụ ji'c̣hoñin ra' yụ in úĉantyi', ĉaĉaij na mi'in cọdyetinte Jen' yụ́dyes Jesucristosmun Ạ'edye' mọ' chime' ñútyin yụ, mọ'dyes qui ra' ji'c̣hoñin yụ in. 20Yụ fer dyijyi ĉojtyi'ĉan paj qui jam ji'penac yụ Jen'si'ya' dyijyedye' mu' yụ́dyes. Me'dye mọ' mọmo' mạ'je' yụ paj qui sóñi'yedye'tum voro'tacsi yụ paj qui räj tima'quete Jen' in yụ́dyes. Me' tsan' tsạ' yụ, me' tsan' ijac yụ, jam mọ' jedye'yi', me'dye mọmo' mạ'je' yụ paj qui tima'quete Jen' in yụ́dyes. 21Tsạ'dyem' yụ, Cristodyes ra' bä'yi yụ, a na ra' säñiya' yụ, dadam' mọ' mọjo'cha' jäm' yụ́dyes. 22- 23Yejĉoij tsạ' bu'yi jụijya' yụ, tupuj yejĉoij úche' carijtaqui Jen'dyes yụ. Pärä' qui nam' mọ'ya' dyijyedye' me'chui' yụ, dam'dye jäm' yạjqui' yụ ọij jac paj qui yụ pen'dyetute mu'che' mu' Cristo. 24Me' tsan' me' bu'yi' tsan' mọ' dyijyedye' yụ, dadam' qui nam' mọ' jemoñeij paj qui tsạ' bu'yi úche' yụ paj qui tupuj yejĉoij jị'chiyeyac mi'in. 25Yụ chịj yejĉoij ra' taca' tsạ'bu'yi úche' yụ, pen'dyetuyac ra' taca' mi'in, yejĉoij ra' nọ́tyeyac mi'in paj qui mi'in yejĉoij ma'jodye'tum anicjetinte Jen', paj qui p̂añi mu'dyes mi'in. 26Taca'dye ra' me' yụ cuvij ĉọ́ĉadyeyac yụ, chat qui ra' därsi'tum ma'jodye' yoshoropaij jétinte Jen' yụ́dyes mi'in Jesucristoty muntyi' mi'in. 27Dam'dye jäm' räjĉan rụij bä'yi mi'in jun' chuc yi' mọ' jäm'si' p̂eyacdye' Cristos mu'. Me' ra' tsan' ĉọcyac jụijya' yụ, me' ra' tsan' jam, jemoñe' qui nam' vaj cäts bu'yi' dyijyedye' mi'in, fer bu'yi bä'yi mi'in, yejĉojam' vaj cäts fer carijtaĉam' Jen'dyes mi'in, jéyacsejam' p̂eyacdye' mu'. Me' bä'yi jụijya' mi'in, yụ ra' mọ' se've' jun' chuc Jen'dyes bä'yi mi'in. 28Jam ra' méqui' quijnacsi mi'in mu'in fáquinactyi' in p̂eyacdyedyes Jen'si' mu', sóñi'jeyacsejam' mọmo' mi'in. Mọ'ya' ra' chịj in jun' chuc ra' so'mac va'tacdye' Jen'ya' in, mi'in qui na ram' ji'c̣honac, ĉaĉaij na Jen'dye so'minactyi' ferdye' paj qui mi'in ji'penacsebi a'c̣his dyijyedye' mu'in. 29Ñịbe'jitidyesya' mu' yu'tyinac mi'in paj qui carijtaqui Cristodyes mi'in, jam mọ' mọmo' paj qui anicyi mi'in, chime'dye ñịbe'jitidyesya' mu' yu'nac mi'in paj qui ñịbedyes jị'ĉojtiñe' mi'in mu'dyes chime'. 30Anicdye me', vaj cäts tsun fer chutiĉa' Jen'dyes p̂eyacdyedyes mu'. Mi'in aty cavitiĉa' jiquej yụ mi'in, jun' chuc fer chuti yụ, me'dye q̂uin' taca' yejĉoij me' chuti Jen'dyes yụ, mọ' yejĉoij se'vetiñe' q̂uin' mi'in.

will be added

X\