Matthew 9

1Chat qui mu' Jesús mu'ya' bijti covambache' nopjan mọ' tsique', ĉụi'si'ĉan bä'yedye' jijtuban mu'. 2Yirity tuyete in punichjoijtyi' muntyi', turac-dye'che' tuyete in. Jesús aty cạvacsi jun' chuc fer anicjete mu'in in, chat qui jéte mu' punichjoijtyi' muntyi': —Ma'jova mi ạva' yụ, atyu' u vayac juchaj mi. 3Pạrej muyayaj in jị'chiyacsity yụ'tacdye' Jen'si' mu', yi in ĉojtyi'ĉan mu'in: “Anic ñinacdye' Jen'ya' shupqui' ọij p̂eyacdye' mu'.” 4Mu' qui nam' Jesús chị́yacsebi dyijyedye' mu'in mọ'dyes qui jéyacsi mu': —¿Jun' dash me' ac̣hi' dyijyi ĉojtyi'ĉan mi'in? 5¿Jụ'ñis buty ra' carij ĉọ́tiñe' mi'in are' vayac juchaj utssi' mu', are' chäĉän mu'? Are' jéte yụ: “Aty vayac juchaj mi”, jam jụijya', jéte yụ: “Sacyebada mi'ebada.” ¿Jätäjyi mi'in u? 6̣Q̂uin' ra' jị'caveyeyac yụ jun' chuc ferdye' so'mac yụ paj qui yụ vayacjetyetacsi juchaj jacchetysi' muntyi' in, ĉaĉaij nash yụ Anictyity Muntyi'. Jajiti mu' punichjoijtyi' muntyi': —Sacyebada, tapjebada' jubij mi, tạij aca'ya' jịjcabada mi. 7Anicdye me', mu' punichjoijtyi' jiquej sacyeban judyeya' acatuban mu'. 8Mu'in muntyi' in, aty me' cạveteya' in anic irijyi in, chat qui tima'quete Jen' in ĉaĉaij na mu' so'macsi därsi' ferdye' muntyi' in. 9Chat qui mu' Jesús jọban mi'eban mu'. Cạvete yirity muntyi' Mateo tịj mu', mu' tsim'tety querec̣ha Romaĉantyi-dyety ayo', aca'ĉan bä'yity mu' tsim'teĉan querec̣ha. Jesús jafaijti jajiti: —Cäc̣hä'chuti' ram. Chat qui mu' Mateo sacyi cäc̣hä'chute mu' Jesús. 10Yirisĉan mạyedye' mu' Jesús säcsequi Mateosĉan aca'. Dai' atsij in juchajtumtyi' muntyi' in judyeya' tsim'tety querec̣ha in, mu'inmun chime' mesache' säcsi in. 11Fariseo pạrej cạvacsi in, mọ'dyes qui yi in jéyacsi Jesústyi' jị'chiyactyi' mu', yi in: —¿Jun' dash me' uts ji'chäyinactyi' mi'in yiri'ya' me'tyitytum säcsi? Mu' säcsi tsim'tetytum querec̣ha judyeya' juchajtumtyi'tum in. 12Jesús se'vacsebi p̂eyacdye' mu'in, chat qui jéyacsi: —Muntyi' räshtyi' in jam jun' jemonte mu' pịñitucsity in, mu'in chat japacjoijtyi' muntyi' in jemonte pịñitucsity in. 13Jemoñe' dyijtutiñe' mi'in ọij sánacdye' Jen'si' mu' paj qui tupuj chị́yetiñe' jätäjyi' chuc cại' mọ', yi' “Yụ muju'cha' mạ'je' paj qui ñịbe' ĉọcsi mi'in, uya'ya' mọ' mạ'je' yụ mọ' ji'co'shayacdye' yụ́dyes”, yi' sánacdye'. Yụ atsij jam rụijtyitydyety in, yụ atsij juchajtumtyidyety in ĉọshseti yụ. 14Atsij mu'in jị'chiyactyi' Juantyi' mu', mu' chojtacsity. Mu'in ĉọcte Jesús in, jéte in: —Tsun judyeya' fariseo in pucmun yịñij Jen'dyes tsun. ¿Jun' dash mu'in jị'chiyactyi' mi mijam dam' yịñij Jen'dyes in? 15Jesús qui vorjeyacsi: —Jesha' mu'in feshtaijtyi' in vämitydyes in jam mu'in tupuj táredye'tum yịñij in taca'dye mu' mu'ya' vämity jụijya'. A qui na ayijya' tupudye' jäcac mu', chat q̂uin'dyem' yịñij pen'dye' mu'. Me'dye ra' yụ chime', aty jäcacya' yụ q̂uin'dyem' ra' yịñij jị'chiyactyi' yụ. 16Jesha' mu' ishoijtyi' quị'si' shẹi'joij jụijya', jam jun' raptac mụi'tyityya' quị'si'. Me' na jụijya' mọ' ra' raptacdye' mu' shätim', chat qui ra' mu' isho' quị'si' quivij peñi shẹi'joij. 17Chime'dye muntyi' in mijam jun' bijtye' in mụi'sis tyédye' vino urucyasĉan sho'pa'. Me' jụijya' aty pashi' tyei' mọ' tyédye', topjoi' ra' mọ' sho'pa', räj ra' nai' tŝọi' mọ' tyédye', mọ'tumdye ra' moñi' sho'pa'tum. Jemoñe' bijtac mụi'sisĉan sho'pa' paj qui jam vaj me' moñi' in.39 18Taca' p̂eyacva'joij mu' Jesús, me'ĉandye atsij yirity muntyi' judío mu', mu' tashche' bu'yity vajmu'yadye'ĉan. Dyụtsyi Jesúsya' jéte: —Mụi'dye säñi' ạva' yụ. Atsiva, toco'jecbiva' a' mọ'si', me' jụijya' mi, tsạ'eban' ra' mọ'. 19Chat qui mu' Jesús sacje' jịjcate mu' muntyi' räjtumdye jị'chiyactyi' mu'. 20Ĉụi'dye ayij yiris p̂en japacjoi'si'. Aty yiri'tac pạ̈rä' jiyi' yómodye' me' bu'yi' chäshvaqui' a' mọ'. C̣hẹi'ya'jete Jesús murujruche' mu', toco'jepte ĉaptacdye've quị'si' mu'. 21Yi' dyijyi' tashche' ĉojtyi'ĉan mọ': “Täjyedye'ĉan ram' quị'si' mu', chäĉän' yụ.” 22Caman'yi mu' Jesús vejtui' mọ' p̂en, yi je': —Ma'jova mi ạva' yụ, aty anicyedye'ya' chäĉän' q̂uin' mi. P̂eyacdye'ĉandyem' chäĉän' mọ' p̂en. 23Aty ventyecbite aca' in mu' tashche' bu'yitysi' vajmu'yadye'ĉan in, dạcacsequi boñity in nạcdyedyes nanasvundyesi', judyeya' uya'qui'dyi táreva'que' mọ' nanas in. 24Yi Jesús jéyacsi: —Shubadac mi'in, jam nash mọ' säñi' nanas, ĉọshi' nash mọ'. Mu'ĉantyi' in dyisacte in mu' Jesús mọ' se'vepteya' in p̂eyacdye'. 25Aty ji'shupcacsiya' muntyi' in, Jesús qui siti yóĉandyem' mọ' nanas o. Tapjebi' un mọ', sacyeban' vatyquej. 26Muntyi' in pai' jị'chiqueyacsi yoctyi' in, räj chị́qui in jun' chuc ji'chäĉän' mọ' nanas. 27Chat qui jọban mu' Jesús. Pärä' tofety muntyi' jịjcabajte in, fer p̂eyaqui in, yi in: —Davidtyi' vóshi' mu', ñịbe'jitiĉa' ra' tsun mi'in. 28Aty aca'ĉan mu' siti Jesús, chat qui mu'in tofety ĉọcte in. Yi jéyacsi mu' Jesús: —¿Me' buty anicjitiĉa' yụ mi'in paj qui me' jị'naijbadyeyac mi'in? Vorjete mu'in in: —Anicdye me', Jị'chiyacsity. 29Chat qui mu' Jesús toco'jeyacsebi vej mu'in, jéyacsi: —Me' ra' chäĉän mi'in ĉaĉaij na anicyi mi'in. 30Me'ĉandye naijbun in. Jesús ferche' jéyacsi: —Jam ra' jun' jị'chiqueyacsi mi'in yoctyi' muntyi' in. 31Aty jọbanya' in cavin jị'chiqueyacsi yocsi've bä'yity in. 32Aty jọban mu'in tofety jiquej in, chat qui tuyete in jam p̂eyaquity muntyi', ĉaĉaij na sọyo'tumtyi' mu'. 33Jesús meijjetyebajte mọ' sọyo', me'ĉandye p̂eyaĉan mu' muntyi'. Anic äjyi muntyi' in, yi in: —¡Mijam jäm'dyeya' jo'mes cạveja' tsunsi'ĉan jac Israelĉan! 34Mu'in na fariseo yi in: —Sọyoty ayo' mọ'in jaso'miti ferdye', mọ'dyes qui me' mu' Jesús tupuj meijjetyetacsi sọyo' in. 35Jesús räj socor'je' mọ'ĉansi' bä'yedye' in. Mu'ĉan vajmu'ya-dye'ĉan judío in jị'chiyacsi mu', judyeya' voro'tacsi Jen'si' p̂eyacdye' mu', p̂eye' aty c̣hẹi'ya' ayo'bu'yi ra' Jen'. Chime'dye mu' ji'chäcacseban muntyi', yịjyi are'redye' muntyis in judyeya' japacjodye'tumtyi' in, me' me' ji'chäcacseban. 36Jesús aty cạvacsiya' dai'tyi' muntyi' in, mu' ñịbe' ĉọcsi ĉaĉaij na mu'in jo'meque'queij cajotyiti in, itŝi' tyei' dyijyedye' mu'in, jeñej oveca in jam ĉọjcacsis in, me' cạvacsi muntyi' in. 37Mọ'dyes mu' Jesús jéyacsi jị'chiyactyi' mu': —Anic därsi' vädacdye' mọ'ya', itŝij qui nam' tyi vädaquity in. 38Cọdyemac mi'in mu' me'chui'tyi' vädacdye' paj qui mu' yụ'tacsi vädaquity muntyi' in, cạyacsity p̂eyacdye' in.

will be added

X\