Matthew 7

1Mi'in ra' jam ĉojtyi'ĉan mi'in ac̣hi' dyijtucsebi yoctyis dyijyedye' mu'in, mijam ra' p̂eijtacsebi juchaj mu'in, paj qui mu' Jen' jam dyijtubunac juchaj mi'in. 2Me' ac̣hi' dyijtucsebi yoctyis dyijyedye' jụijya' mi'in, me'dye ra' Jen' chime'jinac mi'in. Dyijtucsebiya' mi'in juchaj muntyis mu'in, me'dye ra' Jen' chime'jibunacdye dyijtubunac juchaj mi'in. 3- 4Mi'in cavin cạvacsebi yoctyis juchaj mu'in, ĉụi'si' na juchaj jam cạvaqui mi'in. Jeñej cavin cạvetiñe' miquis patsacdye' chätidyesĉansi' vej mi'in, mọ'ya' qui nam' me'chutiñe' därsi' son ĉụi'si'ĉan vej mi'in, jam chị́yaqui ĉụi' mi'in. Yi jétinte chätidye' mi'in, “Jesha' yụ ra' jäcbibadyeye miquis vejĉansi' patsacdye' mi,” yi jétinte, ĉụi'si'ĉan qui nam' vej mi'in därsi' son mọ'ĉan, mijam mọ' chị́yaqui mi'in. 5¡Anic ac̣hi' dyijyity mi'in, jäm' yu'ti tsan' mi'in! Jemoñe' tashche' chum va'caqui ĉụi'si'ĉansi' vej jedye' mi'in, chat qui ra' q̂uin'dyem' chuñem naijti mi'in paj qui tupuj jäctyebajtinte chätidyes mi'in mọ' vejĉansi' miquis jedye' mu'. 6Jam ra' Jen'si' jedye' so'macsi mi'in mu'in jeñejtyity ac̣huj in, vátyequej ra' roi'jinac in. Mijam ra' ya'ijtyi' mij mi'in so'macsi mi'in mu'in jeñejtyity cochij in, mu' ra' yútyeva'te mọmo' mu'in. 7Cọdyemac Jen', mu' ra' so'minac, quevvac, chat qui ra' dạctiñe', fayevac chụi'dye'ya' mi'in paj qui mu' vanacjiyinac mi'in. 8Tyi chuc cọdyetety, mu' ra' so'mac, tyi chuc queve'tyi', mu' ra' dạque', tyi chuc fayity chụi'dye'ya', chat qui ra' vanacjeyeyac mi'in. 9Jesha' ạva' mi'in cudyityinac jụijya' pan ¿so'maqui bu ra' mij mi'in? ¡Jam jun'! 10Chime'dye cudyityinac ạva' jụijya' mi'in yiris tạbedye', ¿so'maqui bu ra' nas mi'in? ¡Jam jun'! 11Me' tsan' ac̣hi'yity mi'in, chịj qui nam' mi'in so'maqui ạva' mi'in jäm'si' jedye', dadam' mu' muju'cha' mạyedye'chety Jen' Ạvatunactyi' mi'in, mu' ra' so'macsi jäm'si' mu'in cọdyetyetety in. 12Jemoñe' mi'in jäm'yedye'tum jäm'jeyacsi räj muntyi' in. Jesha' mi'in mạ'jetiñe' paj qui muntyi' in jäm'yedye'tum jäm'jinac in, me'dye ra' mi'in jäm'yedye'tum jäm'jeyacsi räj muntyi' in. Me' jäm'jeyacsi jụijya' mi'in, me' ra' chat tas chiqueptinte Jen'si' yụ'tacdye' mu' judyeya' sánacdye' mu'in jaso'mitity p̂eyacdye' Jen' in. 13Sisvac ịtsu'quisya' chụi'-dye', ĉaĉaij na därves chụi'dye' judyeya' mọ' därves majmi rụij tŝijĉan jịjcai', anic mọ' dai' muntyi' jịjcai' in. 14Mọ' na ịtsu'qui'ves chụi'dye', judyeya' ịtsu'qui'ves majmi, Jen'ya' jịjcai'si', yóĉandyem' tsạ' bu'yiĉan u in, mọ' jam dai'yaij jịjcai' in, anic carij jịjcai' in. 15Ĉujcatiĉam' mi'in ĉaĉaij na dai' mu'ya' va've jị'chiyacsity in, jeñej bu'yi jaso'mitity p̂eyacdye' Jen' in. Jeñej jam tsäqui'yis oveca mi'inya' in, ĉojtyi'ĉan qui nam' mu'in jeñej tsäqui'yis vajedyedye' me' bu'yi in. 16Tupuj mi'in chị́yacsi me'tyity in cạvacsebi jụijya' mi'in dyijyedye' mu'in. Jesha', mọ' a'c̣his därä' jụijya' jam jun' mọ' ji'shupque' ova, judyeya' mọ' yätijtumsi' därä' jam jun' mọ' ji'shupque' higo. 17Me'dye chime' mọ' tsạ'si' cätidye' jäm'si' väsh ji'shupque', mọ' na shína'joi'si' cätidye' a'c̣his väsh ji'shupque'. 18Mọ' tsạ'si' cätidye' jam jun' ji'shupque' a'c̣his väsh, mọ' na shína'joi'si' cätidye' jam jun' ji'shupque' jäm'si' väsh. 19Jụ'ñis chuc jam jäm'si' cätidye' mọ' jam jäm'si' ji'shupques väsh mọ', mọ' tupuj p̂ạc judyeya' ji'co'shayac tŝijĉan. 20Me'dye chime' muntyi' in tupuj chị́yac in jäm'yity in judyeya' ac̣hi'yity in, cạvacsiya' mi'in jun' chuc bä'yi in, are' jäm' bä'yi in are' jam jäm' bä'yi in. 21Me' ra' tsan' dai'tyi' jin yụ in: “Ayo' tsun, Ayo' tsun”, yi in, jam qui na ram' räj siti Jen'ya' in. Mu'in ram' chäquibuntyi' dyijyedye' Jen'si' yụ in mạyedye'chety, mu'in ram' mu'ya' jịjcaij in ayo'bu'yedye'ĉan mu'si'. 22Aty ra' ayijya' jadyiquis tupudye', dai' ra' muntyi' jin tsan' yụ in: “Ayo' tsun, mísi' tịj ji'jäcbiyac voro'tacsiya' muntyi' tsun judyeya' meijjetyetacsi sọyo' tsun, judyeya' chime' tsun därsi' ferdye' jị'caveyacsi tsun mische' tịj.” 23Yụ qui na ram' jéyacsi: “Yụ jam chị́yeyac, meijyejam' mi'in, ac̣hi'yity mi'in.” 24Tyi chuc se'vibun ọij p̂eyac-dye' yụ in, judyeya' chäquibun yụ in, jeñej bu'yi yirity acaijtyi' dyijyedye'tumtyi', därtyi'che' mij jäm'tye' aca' mu'. 25Me' qui tsan' choj tŝọi' añej, judyeya' tomi' jac judyeya' tyi'mu fertyi', jam dam' jedyei' aca' mu', ĉaĉaij na därtyi'che' bu'yi' mij jämi'. 26Mu'in na in me' tsan' se'vibuntyi' yụ in ọij p̂eyacdye' yụ, jam qui nam' chäquibun jụijya' yụ in, jeñej mu' yirity muntyi' itŝity dyijyedye' mu' acaijtyi', jámanche' jäm'tye' aca' mu'. 27Ayij mọ' añej choj tŝọi', judyeya' tomi' jac judyeya' tyi'mu fertyi', chat qui natsyetŝọi' aca' mu', pịtsi'cac tŝọi' mu'. 28Aty me'si' jị'chiyacsi mu', mu'in muntyi' in anic äjjepte ji'chäyitidye' in, 29jam muyejjoij jị'chiyacsi, jam jeñej mu'in jị'chiyacsity yụ'tacdye' in Jen'si' mu'.

will be added

X\