Matthew 6

1Jam ra' carijtaqui Jen'dyes mi'in muntyisya' vej mu'in, paj qui jam tima'quinac in. Me' jụijya' mi'in itŝi' ra' méquis bíjodye' so'mac mi'in Jen'ya' mạyedye'-chetyya', mu' Ạvatunactyi' mi'in. 2Ñịbe'jetinte jụijya' yirity jayejjotaquity muntyi', caminve ra' mi'in. Jam ra' cäc̣hä'chucsebi mi'in mu'insi' dyijyedye' mu'in ac̣hi'yitysi' in jäm' yu'ti tsan' in. Muntyisya' vej mu'in vajmu'ya-dye'ĉan in judyeya' prasaya' in mu'ya' ñịbe'jeyacsi muntyi' in, paj qui tima'cacsi muntyi' in. Yụ rụij jéyac: mọ' ram' bíjodye' mu'in, mijam ra' so'mac bijodye' Jen'ya' in. 3Jam ra' me' mi'in, nọ́tyetacsi jụijya' mi'in paj jam tyi chịj in, mijam ĉụi'tyi' chätidye' mi'in. 4Caminve ram' nọ́tyetacsi muntyi' mi'in, chat qui ra' mu' Jen' so'minac bijodye' mi'indyes ĉaĉaij na mu' cavinactyi' caminve. 5Cọdaqui jụijya' Jen'che' mi'in, jam ra' cäc̣hä'chucsebi dyijyedye' mi'in mu'insi' ac̣hi'yitysi' in jäm' yu'ti tsan' in. Mu'in anic ma'jotyety run'quen'ĉan cọdaqui Jen'che' in vajmu'yadye'ĉan in judyeya' prasaya' in, paj qui cạvacsi muntyi' in. Yụ rụij jéyac, mọ' mọmo' ram' bíjodye' mu'in, aty ra' jam bijodye' so'mac Jen'ya' in. 6Jam ra' mi'in me' cọdaqui Jen'che' jụijya' mi'in, jemoñe' pạrejyi mi'in ĉụi'si'ĉan ĉushaquis sisvac judyeya' ĉär'jevac chụi'dye' mi'in. Mu'ĉan ra' cọdyetinte Jen' mu' Ạvatunactyi', mu' jam cạvetintety mi'in. Mu' nash naijbunac, me' tsan' caminve cọdaqui mi'in, mu'dye ra' so'minac bíjodye'. 7Cọdyetinte jụijya' mi'in mu' Jen' jam ra' fibi'yi ĉụi' mi'in pärä'quiquij ji'jäctinte, jam jeñej mu'in jam chị́yetety Jen' in. Va'ves mọ' dyijyedye', jeñej aty Jen' jụjjeyacsebi cọdacdye' ĉúti u in pärä'quiquij ji'jäcte tsan' in, jeñej aty me' ĉọ́te u in. 8Jam ra' cäc̣hä'chucsebi dyijyedye' mi'in mu'insi' in, ĉaĉaij na jambi' cọdyetinte jụijya' mi'in, mu' Jen' Ạvatunactyi' mi'in, mu' aty chäyinac jedye' chuc jemontiñe' mi'in. 9Cọdyetinte jụijya' Jen', yi ra' jétinte: Tsuntyi' Jen' mạyedye'chety, paj muntyi' in ạ̈räjjin in. 10Chime'dye tsun cọdaqui paj qui cavintum ayo'bu'yi mi, yojdyem' mạyedye'che' cại' u in mísi' dyijyedye', paj me'dye mu'in chime' úchety jacchety in. 11Räjĉan mạyedye' so'mitiĉam' säcsedyedyes tsun. 12Jam ra' dyijtubutiĉa' juchaj tsun, yojdyem' tsun jam dyijtucsebiban juchaj mu'in yódyetydyem' juchatuntyi' u tsun. 13Jam ra' ji'ĉujtiĉa' carijsisya' jedye', chime' ñutsjitiĉam' paj qui jam ji'peñin tsun sọyo'. 14Jam dyijtucsebi juchaj mu'in juchatunactyi' jụijya' in, me'dye ra' mu' chime' mạyedye'chety Jen' Ạvatunactyi' mi'in, mu' ra' jam dyijtubunac juchaj mi'in. 15Yejĉoij na jụijya' mi'in dyijtucsebi juchaj mu'in juchatunactyi' in, me'dye ra' mu' chime' Jen' mu' Ạvatunactyi' mi'in mu' ra' yejĉoij dyijtubunac juchaj mi'in. 16Jäm'dyeya' yịñij Jen'dyes jụijya' mi'in, jam ra' quisba'naqui vejya' mi'in yịñijdyes, jam ra' jeñej mu'in ac̣hi' dyijyity in, jäm' yu'ti tsan' in, ĉaĉaij na mu'in in quisba'naquity vejya' in paj qui räj chị́yacsi in yịñij Jen'dyes in, me' mạ'je' mu'in in. Yụ rụij jéyac, mọ' ram' bíjodye' mu'in, mijam ra' so'mac Jen'ya' in. 17- 18Jam ra' me' mi'in, yịñij Jen'dyes jụijya' mi'in jemoñe' favti vejya' mi'in, jäm' yu'ti mi'in paj qui muntyi' in jam chäyinac in mi'in yịñij Jen'dyes mi'in. Mu' na Jen' cavinactyi' caminve, mu' ra' so'minac bijodyedyes mi'in. 19Jam ra' dụri'ñetiñe' jedye' jacches, mọ' jam men ac̣hi'joi'si' chicäjräi'si', judyeya' pạrej shu'aijtyi' cại' in. 20Dam'dye jäm' mạyedye'che' dụri'nac, mọ'che' chat jam jedyei' mijam chicäjräi', mijam shushu'aty mu'che' in. 21Tyi chuc jacche' dụri'ñe' jedye' in, mọ' mọmo' dyijtuva'que' ĉojtyi'ĉan mu'in, mu'in na mạyedye'che' dụri'ñe'tyi' jedye' in, mọ' mu'in dyijtui' in ĉojtyi'ĉan mu'in. 22Vej mi'in jeñej bu'yi' yiris a'ĉansi' mạijyis mi'in. Jäm'si' vej jụijya' mi'in, räj a'ĉan mạij bu'yi' mi'in. 23A'c̣his na jụijya' vej mi'in, tojmai' a' mi'in. Itŝi' mạijquedye' a'ĉansi' jụijya' mi'in, därsi' ra' tojmadye' a'ĉan mi'in. 24Uñity jam jun' tupuj pärä'che' úñi, ĉaĉaij na yirity ra' mạ'jete, yoctyi' na jam, mu' mạ'jetety mu' ra' jäm' carijtyeyete, yoctyi' na ra' fạ́quete jam jäm' carijtyeyete. Me'dye mi'in chime', jam ra' jun' pären'che' ji'säsdyi mi'in, Jen'che' judyeya' querec̣hache'. 25Mọ'dyes yụ jéyac: Jam ra' cajotyetiñe' mi'in jedye' chuc ra' jebetiñe' tsạ' bu'yedyes mi'in, mijam ra' dyijtutiñe' mi'in jedye'ĉan chuc ra' cofjeban' mi'in. Jam säcsedyem' tsạ'chunac mi'in, mijam quị'sim' jemonac a'che' mi'in. 26Cạvacsejam' mọ'in jaijtyi' in, jam jun' ĉụi' cäti' in mijam vädaĉan' in, mijam jäm' yụ'taqui' säcsedye' aca'ĉan in, mu' qui nam' Jen' mạyedye'chety ji'säcsacsi. ¿Jaijtyi' buty mọmo' mạ'jeyacsi Jen'? Jam jun' me', mi'in muju'cha' mạ'jinac. 27Chime'dye mi'in, me' tsan' fer dyijyi mi'in, mijam qui nam' jun' ñucjeyaqui sän'dye' mi'in, paj tsan' yiris hora tsạ' bu'yetaqui mi'in. 28- 29¿Jun' buty cajotyiti mi'in quị'sidyes? Jesha' mọ' därä' jámetumsi' in, me' tsan' jam carijtaqui' in mijam p̂anaqui' quị'si' in, yụ qui nam' jéyac, anic mọjo'cha' jäjämun quị'si' mọ'in, mijam mu' me' ayo'tyi' quị'si' jo'mety Salomóntyi' jiquej. Me' tsan' muju'cha' jäm' yu'ti ya'ijtyi'ĉan quị'si' jam cätstacsi, mọjo'cha' jäjämun mọ'in jáme in. 30Me' mu' Jen' jị'qui' mọ' därä', mọ' jam men bu'yis, cavin ji'co'shayac, dadam' ra' mi'in Jen' ji'quinac. Mi'in anic dam' mọmo' anicjetintety Jen'. 31Mọ'dyes jam ra' dyijyi ĉojtyi'ĉan mi'in, mijam ra' yi mi'in: ¿Jedye' buty ra' jebeja'? ¿Junatyi' bu ra' quị'si' dạcja? 32Mu'in jam chị́yetety Jen' in jo'mes mọmo' dyijtui' in. Mi'in na jam me', mu' Jen' Ạvatunactyi' mi'in chäyinac jedye' chuc jemontiñe' mi'in. Ĉútac mu'che' mi'in, mu' ra' so'minac. 33Mọjo'cha' ra' dyijtutiñe' ayo'bu'yedye' Jen'si' mu', mu' chiquemac chat qui ra' mu' so'minac räj jedye' chuc jemontiñe' mi'in. 34Mọ'dyes jam ra' cajotyiti mi'in jun' chuc ra' yocsi' mạyedye', aty ra' ayijya' mạyedye' tupuj ra' mọ' dyijtutiñe'. Jam ra' cächjetiñe' dyijyedye' mi'in jambi' cha'shes mạyedye', q̂uin'sis dyijtuvac dyijyedye' mi'in.

will be added

X\