Matthew 4

1Chat qui Jen'si' Ạ'edye' mu' jácati mu' Jesús cäjyasĉan jac jácati, mu'ĉan qui Sọyo' mạ'je' tsan' jaji'ĉujti a'c̣hisya' dyijyedye'. 2Vạjpedye' qui'tac mạyedye' me'qui' mu'ĉan jam dam' säcsi, mọ'dyes qui aty me'si' chique' dáquis mu'. 3Sọyo' jaĉucdyi jajiti: —Mi nash Jen'tyi' Ạva' jụijyam, uts mij in ji'munacseva paj pan shupqui in. 4Jesús vorje': —Jam, ĉaĉaij na yi' sánac-dye': “Jam nash säcsedye' ram' jạtsa'chuti muntyi', chime' Jen'si'mun p̂eyacdye' mu', mọ' ra' jạtsa'chuti”, yi' p̂eyacdye' Jen'si' mu'. 5Chat me'si' mọ' Sọyo' jácati Jen'si'ĉan bä'yedye' mu' Jerusalénĉan, fajche' jácati Jen'si'che' aca' mu'. 6Chat qui yi' Sọyo' jajiti: —Mi Jen'tyi' Ạva' jụijyam, roi'yebada mụijya' úchety, ĉaĉaij na yi' sánacdye': “Jen' ra' jutacsi anjer mu', mu'in qui ra' ĉujcan in judyeya' tapchun in unĉan mu'in paj qui jam are' tŝọij mi.” 7Jesús vorjete: —Chime'dye yocsi' sánacdye' yi': “Jam ra' jị'ĉojtem mu' Jen' Ayo' mi.” 8Därtyi'che' qui mụcu' jácati mọ' Sọyo' jaji'caviyiti räj jacches bä'yedye' in, räjtumdye jedye' mọ'. 9Sọyo' jajiti: —Yụ ra' so'meye räj ọij cạves q̂uin' mi, yụ́ya' dyụtsyi jụijya' mi, yụ tima'quiti' jụijya' mi. 10Jesús vorje': —Tạij jọbada Satanás, yi' nash sánacdye': “Jen' Ayo' mi mu' tima'queme, mum' yirity cọdyeme.” 11Chat qui jọban' mọ' Sọyo' yạjquibajte mu' Jesús, anjer qui atsij in nọ́tyete in chat ji'säcsete in. 12Aty se've'ya' p̂eyacdye' mu' Jesús jun' chuc ĉär'te in mu' Juan, chat qui roi'je' mu' Galileaĉan jịjcaij mu'. 13Dam'tuquim' Nazaretĉan, Capernaumve qui jịjcaij mu' bä'yi, tsique'ves mọ' bä'yedye'. Mọ' jac vóshi'vunsi' Zabulónsi' jiquej judyeya' Neftalísi' jiquej. 14Me' cạ̈tsi' p̂eyacdye' Isaíassi' jaso'mitis Jen' jiquej. 15Yi' sánacdye': “Mu'in bä'yity in Zabulónsi'ĉan jac jiquej judyeya' Neftalísi'ĉan chime', judyeya' tsique've bä'yity in, judyeya' pam'vety Jordán bä'yity in, judyeya' Galileaĉan bä'yity in, yóĉandyem' jam judío u in. 16Mu'in tojmadye'ĉan bä'yity jiquej in, mu'in därsi' mạijquedye' cạve' in, mọ' qui mạijchucsi' mu'in tojmadye'ĉantyi' in mu'in säñi bä'yity in”, yi' sánacdye'. Jesús me' jị'cätse' ọij sánacdye' voro'yedye'ya' mu'. 17Chat qui Jesús tiyacchui' voro'tacsi, yi mu': —Dyijyevac juchajche' mi'in, atyu' u c̣hẹi'ya' ayo'bu'yi ra' Jen'. 18Sinve tsique' Galilea nati Jesús. Cạvacsi pärä' muntyi' in, Simón judyeya' mu' Andrés, vojitytum, mu'in tạbity in. Simón, Pedro chime' tịj mu'. Mu'in va'cajquiqui sạji' tsique'ĉan in. 19Jesús jéyacsi: —Cäc̣hä'chutiĉam' yụ, mi'in tạbity, tạbacsity ra' muntyi' yụ'tyeyac. 20Yiristum farajjetaque' sạji' mu'in judyeya' cäc̣hä'chute in. 21Aty muju'veya' mu' Jesús pärä' muntyi' cạvacsi, Santiago judyeya' Juan vojity mu', mu' Zebedeoty ạva' mu'. Covam-bache' jen'tum in, ra'bacva'joban sạji' in. Jesús fayacsi, 22chime'dye mu'in yiristum farajjeyactaqui jen' mu'in judyeya' covamba mu'in chime', chat qui cäc̣hä'chute in mu' Jesús. 23Jesús räj socor'je' mọ'ĉansi' bä'yedye' in Galileaĉansi', mu' jị'chiyacsi vajmu'yadye'ĉan judío in, mu'ĉan voro'tacsi Jen'si' p̂eyacdye' mu', p̂eye' aty c̣hẹi'ya' ayo'bu'yi ra' Jen'. Chime'dye ji'chäcacseban japacjoijtyi' in, räj mu'in are'reijtyi' in. 24Pai' bu'yi' jac se've' in jun' chuc mu' Jesús, Siriaĉantyi' chime' se've' in. Mọ'dyes tuyete in räj mu'in are'reijtyi' in, japacjoijtyi' in, judyeya' ñe'ity in, judyeya' punichjoijtyi' in, judyeya' sọyo'tumtyi' in, räj me' me' ji'chäcacseban mu' Jesús judyeya' meijjetyetacseban sọyo' chime'. 25Anic shach muntyi' cäc̣hä'chute in, Galileaĉantyi' in judyeya' Decápolisĉantyi' in, Jerusalénĉantyi' in, Judeaĉantyi' in, judyeya' nopej Jordán bä'yity in, me' me' cäc̣hä'chute in.

will be added

X\