Matthew 28

1Aty me'si' mọ' mạyedye' jị'jutyitidyes aty ra' nạijjoi'ya' mọ' dọmico, chat qui mọ' María Magdalena judyeya' yocsi' María, sacti' in ĉọ́ĉajte in ru'dyei'ya'. 2Me'ĉandye fer bubaqui' jac, ĉaĉaij na aty chạij yirity Ayo'tyi' anjer mu', mạyedye'che' jijtuij mu' bur'jebajte mu'yaty därtyi' mij ru'dyei'yaty jiquej, judyeya' mu'che'dye qui bä'yi. 3Mu' anjer jeñej venai'quedye' me' mu', judyeya' quị'si' mu' anic jiyi jui'buty, jeñej tsafa', jo'mety. 4Mu'in väc̣hä'tyity in aty cạveteya' in, fer noi'yi in, noc̣ho'noc̣hoyequi in, me'ĉandye säñej tŝọij in jeñej säñity, me' tŝọij in. 5Mu' anjer jéyacsi p̂en in: —Jam ra' noi'yi' mi'in, yụ nash chị́yeyac mi'in quevtinte mu' Jesús, mu' pactety croshche' jiquej in. 6Aty itŝij atsvun úĉan, aty nash vañinyeban mu' yoj yetaquidyem' jiquej u. Ayijam' cạveshvac ọij to', yóĉandyem' me' bu'yi jiquej u. 7Tạij mi'in cavinyejam' jéyacseĉajsham' jị'chiyactyi' mu': “A nash vañinyeban mu', mu' chum ra' tashche' Galileave jịjcaij mu', mu've ra' cạvetinte mi'in,” jéyacsi ra' mi'in. Ọij nash p̂eyacdye' mi'indyes. 8Me'dye mọ'in p̂en in cavintum mi'eban' in, ma'jodye'tum in judyeya' noi'yedye'tum in, shujmun tyeban' in jéyacseĉan' in jị'chiyactyi' mu'. 9Reptete vatyquej in mu' Jesús mu' qui vorjeyacsi. Dyụtsyi' mọ'ya' in toco'jepte yuj in, ma'jotyete in. 10Jesús jéyacsi: —Jam ra' noi'yi' mi'in. Tạij mi'in, jéyacsejam' jị'chiyactyi' yụ mu'in vojity bu'yity yụ in. Jéyacsejam' paj qui Galileave jịjcaij in, paj mu've cavin yụ in. 11Jäqui've aty jọban' mọ'in p̂en in, pạrej väc̣hä'tyity in mu'in ĉọjcaquity ru'dyesya' jiquej in, bä'yedye'ĉan jịjcaij mu'in in, ĉọcsequi mu'in tashchety cudyitity Jen'che' in, räj jéyacsi mu'ĉantyi' in jun' chuc cạve' in. 12Mu'in tashchety cudyitity Jen'che' in vajmu'ya'jeyacsi in mu'intum tashchetytum ĉọjcacsity in, chịmo'dye p̂eye' in. Chat qui dyijyi in so'macsi querec̣ha mu'in väc̣hä'tyity in paj qui väñäij mu'in in. 13Mu'in ayo' jéyacsi in: —Me' ra' jéyacsi muntyi' mi'in: “Ĉọshva'joijtyi' tsun tsedyedye', vatyquej atsij jị'chiyactyi' Jesústyi' mu', mu'in shu'ayeti in a' mu' Jesúsvunsi'”, me' bu'yi ra' jéyacsi mi'in. 14Chime'dye se'vaqui jụijya' mu' ayo' Romaĉantyi', tsundye ra' ji'c̣hu'c̣huyebajte paj qui jam mi'inche' tŝọi' mọ' va'tacdye' —jéyacsi judíoty ayo' mu'in. 15Anicdye me', jụjyi in mu'in väc̣hä'tyity in querec̣hadyes mu'in chicacsebi in p̂eyacdye' mu'in judíotysi' ayo' mu'in. Anicdye me' mọ'dyem' q̂uin' mu'in judío in pai' bä'yity in anicje' in mọ' väñädye'. 16Mu'in yiri'tac yirity jiyi jị'chiyactyi' mu', mu'che' jịjcaij in mụcu'che' Galileaĉan, yóche'dyem' jéyacsaque jiquej u. 17Mu'in jị'chiyactyi' in aty cạveteya' in, mu'in dyụtsyi in ma'jotyete in, me' tsan' me' pạrej qui nam' ĉojtyi'ĉan yi in, “Vatyquej ra' jam mu'.” 18Jesús c̣hẹi'ya'jeyacsi jéyacsi: —Jen' yu'tyin yụ paj qui yụ ayo' bu'yi räjdyes in, mạyedye'chedyes judyeya' jacchedyes. 19Mọ'dyes tạij mi'in, pai' ọij jac jịjcajam' yoc yoc p̂eyaquity in ĉọcseĉam', jị'chiyacsi ra' mi'in paj qui cäc̣hä'chun yụ in, chime' ra' chojtacsi mi'in Jen'si'che' tịj mu', judyeya' Ạvasche' tịj yụ, judyeya' Ạ'edyesche' tịj mu'. 20Jị'chiyacsi ra' jäm' mi'in paj qui mu'in chime' räj chäquibun p̂eyacdye' yụ in, räj p̂eyacdye' yụ so'meyac mi'in. Yụ ra' räjĉan mạyedye' pen'dyetuyac mi'in jun' qui' chuc ọij jadyic tupudye'.

will be added

X\