Matthew 26

1Aty me'si' jị'chiyacsi mu' Jesús, jéyaqui jị'chiyactyi' mu': 2—Mi'in nash chịj jayej pärä'dyety mạyedye' Ji'c̣honacdyes feshta. Aty ra' me'si', yụ Anictyity Muntyi', ji'me'tyin ra' yụ in ayo'ya', mu'in qui ra' pactyin yụ in croshche'. 3Mu'in tashchety cudyitity Jen'che' in judyeya' mu'in tashchety ĉọjcacsity in vajmu'yaij tsudyujñiti in ayosĉan aca', tashchetysi' cudyitity Jen'che', tịj mu' Caifás. 4Mu'ĉan vaj meij dyijyi in caminve ra' tapjete in mu' Jesús judyeya' ji'ijate in. 5Yi jítidyeij in: —Jam ra' feshtaya' tapjeja, cäjya' ra' tapjeja paj qui jam sac ja'yacseja' räj yoctyi' muntyi' in. 6Mu' Jesús ĉọcte yirity muntyi' Betaniaĉantyi' mu', bayi'yity jiquej, Simón tịj mu', mu'ĉan siti Jesús. 7Säcseva'joij mu'ĉan yiris p̂en vatyquej ayij, jẹrejres tui' puñujĉan, mọ' puñuj mij jäm'tacdye'. Anic jiyi' ya'i'si' mọ' jẹrejres, mọ'ya' tsa'mete Jesús jo'no'chem'. 8Jị'chiyactyi' mu' aty mọ' cạve' in, fạ́coij tyeij mu'in in, yi in: —¿Jun' dash me' fibi'jeyac ọij jẹrejres? 9Anic nash mọ' ya'i'si', tupuj ji'mincac, mu' qui querec̣ha so'mac in mu'in jayejjotaquity jedye' in. 10Jesús chị́yacsebi dyijyedye' mu'insi' in, chat qui jéyaqui jị'chiyactyi' mu': —¿Jun' dash me' mi'in mọ' p̂eijtiñe' p̂en? Anic jäm'si' yu'tyiyin yụ. 11Räjĉan ra' mi'inya' mu'in jayejjotaquity jedye' in, yụ qui na ram' itŝij, aty ra' jam pen'dyetuyac mi'in. 12Ọij p̂en q̂uin' aty tsa'min yụ, jeñej bu'yi' tai'tac a' yụ nạcdyedyes ra' yụ. 13Yụ jéyac mi'in, pai' junanaj ĉụi' voro'yi in Jen'si' p̂eyacdye' mu', räj bu'yi' ra' ọij jac, p̂eye' ra' in jun' chuc tsa'min jiquej yụ, muntyi' ra' in jam mọ' yaquintubi' in. 14Mọ'dye mạyedye' yirity jị'chiyactyi' Jesústyi' mu', Judas Iscariote tịj mu', mu' ĉọcsequi mu'in tashchety cudyitity Jen'che' in. 15Yi mu' jéyacsi: —Ji'taptyeyeyac Jesús jụijya', ¿juñucsi' bu ra' ya'ityitiĉa' yụ mi'in? Chat qui mu'in ya'ityete in chibin qui' tac ficha plata. 16Chat qui mu' Judas tiyacchuti queve' jun' bu'yi' chuc ra' ji'taptyeyacsi in mu' Jesús. 17Cha'she' in mọ' tashches mạyedye' feshtas, yi' pan jam ji'dujraquistumtyi'. Jị'chiyactyi' Jesústyi' mu' ĉọcte in jéte in: —¿Juna' mạ'je' um paj qui mọ'ya' jäm'tyeyeyac tsun säcsedye' Ji'c̣honacdyedyes feshtadyes? 18Jesús vorjeyacsi: —Tạij sisvac ọij bä'yedye', ĉọctinte ra' mu' muntyi' jéyactyi' yụ, jétinte ra' mi'in: “Mu' Ji'chäyintyi' tsun yi jin mi: Aty c̣hẹi'ya' tupudye' yụ, mísi'ĉan ra' aca' säcsi jebei' yụ Ji'c̣honacdye-dyes feshta jị'chiyactyi'tum yụ.” 19Anicdye me', jị'chiyactyi' mu' chiquepte p̂eyacdye' in, mu'ĉan jịjcaij in jäm'tye' in mọ' Ji'c̣honacdyedyes säcsedye'. 20Aty shocamyejoi' atsij mu' Jesús, mesaya' bä'yi jị'chiyactyi'tum mu' säcsi in. 21Säcseva'joij in, yi mu' Jesús: —Yụ ra' jéyac, yirity mi'inĉantyi' q̂uin' mu' ra' yu'tyin yụ ayo'ya' in. 22Anic där yoqui jị'chiyactyi' mu', cäts yirityityij jéte in: —Jị'chiyacsity, ¿jam adac yụ? —jéte in. 23Jesús vorjeyacsi: —Yódyetydyem' jibityintyi' u yụ mọ'dye piji', mu'dye ra' yu'tyin yụ. 24Yụ Anictyity Muntyi' yụ ijac ra' yụ ĉaĉaij na yi' mọ' sánacdye'. Me' tsan' me', mu' qui na ra' ji'mincantyi' yụ där ra' ñịbe' cạve' mu'. Dam'dye jäm' jam na'aque jiquej mu' me'tyity muntyi'. 25Chat qui yi mu' Judas, mu' ji'mincatety ra' Jesús, jéte: —Jị'chiyacsity, ¿jam adac yụ? Jesús vorjajiti: —Anicdye me' yoj yidye bu um. 26Taca' säcseva'joij in, mu' Jesús tapjete mu' pan, yoshoropaij jéte Jen', chat qui q̂uemi'vete, so'maqui jị'chiyactyi' mu', jéyacsi: —Miya'ĉa uts, jebemac ĉaĉaij na uts nash jeñej bu'yi ĉụi'si' a' yụ. 27Tyéquis qui tapje' yoshoropaij jéte Jen', so'maqui jị'chiyactyi' mu', jéyacsi: —Räjen'dye ra' mi'in tyétiñe'. 28Ọij nash jeñej bu'yi' ĉụi'si' chäsh yụ, mọ' chäsh yụ ferdye' jaso'miti' p̂eyacdye' Jen'si' mu', muntyidyes yụ'tac mọ' p̂eyacdye'. Chäshi ra' yụ dai'dyes muntyi' in vayacdyes juchaj muntyis in. 29Yụ jéyac, aty ra' jam quivij tyeij yụ ovas fi' mọ', mụi'sis qui ra' tyeij yụ yiri'ya' mi'intum pen'dyetuyacya' atsvun ayo'bu'yedye'ĉan Jen'si' yụ. 30Chat qui Jen'si' jimacdye' jime' in chat qui shupqui in mụcu'che' Orivoche' jịjcaij in. 31Jesús jéyaqui jị'chiyactyi' mu': —Ọij q̂uin' tsedyedye' räjen'dye ra' farajjitiĉa' yụ mi'in, ĉa'joij ra' mi'in. Me' ra' cạ̈tsi' sánacdye' yi': “Jen' ra' ijacsebi mu' ĉọjcai'tyi' oveca in, chat qui ra' ji'pai'cac oveca in.” 32A na ra' vañinyebanya' yụ, yụ chum ra' tashche' Galileave jịjcaij, jä'quiijdye ra' mi'in. 33Pedro qui yi jéte: —Me' ra' tsan' räjen'dye farajjin in, yụ qui na ram' yejĉoij jam jun' farajjeye mi. 34Jesús vorjete: —Yụ ra' jéye, ọij q̂uin' tsedyedye', jambi' ra' p̂oñi ojtere', chibin qui' ra' yi mi: “Yụ jam cäc̣hä'chutety uts Jesús.” 35Pedro vorjete: —Me' ra' tsan' yụ́mun ijan yụ in, jam qui ram' jun' ticameye. Chiyidye mu'in yoctyi' räj in. 36Chat qui mu' Jesús jị'chiyactyi'tum mu' cätidye'ĉan jịjcaij in Getsemaníĉan. Jesús jéyaqui jị'chiyactyi' mu': —Uya' chum p̂utsquen'yejam', muju'veya' ra' dam' jịjcaij yụ, mu'ya' ra' cọdajquiqui Jen'che' yụ. 37Jesús cạte mu' Pedro judyeya' mu'in pärä' in Zebedeoty ạva' mu'. Därsi' táredye' játŝuti tyum'yi ĉojtyi' mu'. 38Jéyacsi chibintyity in: —Anic tyum'yi ĉojtyi' yụ, jeñej ra' säñi ĉúti yụ. Uya' chum tacya' mi'in, dyij bu'jam' yụ́tum. 39Jesús dadam' muju'veya' jịjcaij, dyụtsyi mu've täjjeque' jac jáfiya' mu'. Cọdyetyete Jen' mu', jéte: —Yụ́tyi' Jen', tupuj jụijya' mi, ji'c̣honti' paj qui jam därsi' ñịbedyes jị'ĉojtye' yụ, jam qui na ram' yojdyem' mạ'je' uij, me' ra' yu'tim mis dyijyedye'. 40Aty me'si' cọdyetyete Jen' mu', quivij chimu've, yóĉandyem' farajjeyacsetaqui jiquej u mu'in chibintyity jị'chiyactyi' um', dạcacseshan ĉọshva'joij in. Jesús jajiti Pedro: —¿Mijam buty yiris hora dyij bu'yi yụ́tum mi'in? 41Dyij bu'jam' mi'in, cọdaĉam' Jen'che' paj qui jam jị'ĉojtac mi'in juchadye'ya'. Me' tsan' dyijyedye'ĉan mạ'jetiñe' cäc̣hä'chutinte Jen' mi'in, a'si' qui nam' mi'in itŝi' ferdye' mọ'. 42Cuvij mu' Jesús chimu'che' jịjcaban cọdyebajte Jen' mu', jéte: —Yụ́tyi' Jen', jam tupuj ji'c̣honti'yam ñịbedyesĉan yódyesdyem' ra' jị'ĉojtye'si' u yụ, yụ'taqui ra' ĉụi'si' dyijyedye' mi. 43Quivij chimu've mu' Jesús caman', ĉọcseshan jị'chiyactyi' mu', dạcacseshan ĉọshva'joij in, ĉaĉaij na ĉush játŝuti in. 44Quivij mu' Jesús yạjquicse-taqui, mu'chem' cọdyetyete Jen' mu', aty chibin qui'yis mọ' cọdacdyem' so'mete Jen'. 45Aty me'si' quivij chimu've caman' jéyacseĉan jị'chiyactyi' mu': —¿Taca' yejĉoij ĉọshi' u mi'in? ¿Taca' yejĉoij jị'jutyiti chime' u mi'in? A nash ayij tupudye' yụ Anictyity Muntyi' yụ, a nash ra' so'mac yụ juchajtumtyi'ya' in. 46Sacyejam', cabu'tyum mi'in. Atyu' meij jijtuij ji'mincantyi' yụ. 47Taca' p̂eyacva'joij mu' Jesús shupqueti mu' Judas, jị'chiyactyi' tsan' mu' Jesústyi' chime' mu'. Mu' tujijtucsi dai'tyi' muntyi' in, tui' in chutidyes coc̣hino mu'in judyeya' son pa'cacdyes mu'in. Mu'in jutacsity in tashchety cudyityity Jen'che' in judyeya' mu'in tashchety ĉọjcacsity in. 48Mu' Judas ji'mincatety aty mu' jéyacsaque jiquej muntyi' in: “Jorojĉan ra' tyi chuc pụ'sete yụ, mu' ra' tŝọ́yetinte mi'in.” 49Anicdye me', mu' Judas chụi' bu'yi Jesúsya', jéte: —Yómoi' Jị'chiyacsity —jéte. Yédye'ĉan mọmo' pụ'sete. 50Jesús vorjete: —Chätidye', jedyetuij chuc atsij mi, me' ra' mọmo' jäm'taqui mi. Me'ĉandye ĉọcte in mu' Jesús jäm'chute vatyquej in. 51Yirity jị'chiyactyi' Jesústyi' mu' sanjeyaqui coc̣hino siscajcapte úñity mu', mu'tyi' tashchetytyi' cudyityity Jen'che', chat qui mu' sei'jebite chun mu'. 52Jesús jajiti: —C̣havjeyaĉada coc̣hino mi, tyi chuc chucsity coc̣hinoya', mọ'ya'dye ra' ijac in. 53¿Jam adac chịj mi, mạ'je' jụijya' yụ, tupuj cọdyetaqui Jen' yụ, mu' tupuj jutiyin yụ shach anjer in, paj qui mu'in ñutsjin yụ in?53 54Me' na ra' jụijya' yụ, jam ra' tupuj cạ̈tsi' mọ' sánacdye', yi'si' jun' chuc ra' ñịbe' cạve' yụ. 55Chat qui mu' Jesús jéyacsi muntyi' in: —¿Jedyedyes ca' jo'mes tutiñe' coc̣hino judyeya' son? Jeñej quiyaij ac̣hi'yity muntyi' ĉútiĉa' yụ mi'in, mạ'je' me' tapjitiĉa' yụ mi'in . Yoqui' na Jen'si'ĉan aca' yụ jiquej, mu'ĉan jị'chiyacsi yụ, jam méqui' ĉushdyiĉa' yụ mi'in. 56Räj ọij me' q̂uin' jiyi paj qui cạ̈tsi've sánacdye' mu'insi' in jaso'mititysi' p̂eyacdye' Jen' in. Me'ĉandye muya' tŝọij räj jị'chiyactyi' mu', farajjetacte in mu' Jesús. 57Mu'in tapjetety Jesús in cạte in ayosĉan aca' tashchetysi' cudyitity Jen'che', tịj mu' Caifás. Mu'ĉan tsudyujñiti atsvun in mu'in jị'chiyacsity yụ'tacdye' Jen'si' in judyeya' mu'in tashchety ĉọjcacsity in. 58Jä'quiij mu' Pedro cäc̣hä'chute Jesús, jun' qui' chuc cha'she' p̂ejya' aca'. Mu'ĉan siti väc̣hä'tyitytum judyeya' mu'tum bu'yi bä'yi, mu'in ĉọjcai'tyi' in aca' mu', mu'ĉan bisaqui, mạ'je' chịj jun' chuc ra' mu' Jesús. 59Mu'in tashchety cudyitity Jen'che' in räjtumdye tashchety ayo' in mu'in quevacsi tsan' muntyi' in paj qui väñädye'ya' yụ'tyeyete p̂eyacdye' in ijacdyedyes Jesússi' mu', 60jam qui nam' dạcbite in. Me' tsan' dai' väñädye' tuyete Jesús in, jam qui nam' jun' tupuj ijacdye' yụ'tyeyete in. Chijäm'dye atsij yoctyi' pärä' in, 61yi mu'in in: —Yi jiquej uts muntyi': “Yụ tupuj jịva'chapte Jen'si' aca' mu', chibin ra' mạyedye' jo'mejteban' quivij jäm'ban' yụ”, yi uts Jesús —jéyacsi väñäijtyi' in. 62Chat qui mu' tashchety cudyitity Jen'che' sacyi jéte mu' Jesús: —Aty se'vacsebi p̂eyacdye' um mu'in p̂iijbuntyi' juchaj in. ¿Jam bu ra' voryi mi? ¿Jam bu ra' ĉụi' ñutsjitim? 63Jesús c̣hu'c̣huij mọmo' jam jätäjyi. Mu' tashchety cudyitity Jen'che' mu' cuvij jéte: —Yụ ji'jäcbite Jen'si' tịj mu', mu' tsạ' bu'yitysi', paj qui rụij p̂eyaqui mi. Jítiĉa' tsun mi'in: ¿Mi adac Ji'c̣honacsity Muntyi'? ¿Mi adac Jen'tyi' Ạva' mu'? 64Jesús vorjete: —Me' nash yoj yidye' bu um. Yụ jéyac, yirisĉan ra' mạyedye' naijtiĉa' yụ mi'in Anictyity Muntyi' yụ tacve bu'yi ra' Jen'ya' yụ, mu' muju'cha' ferdye'tumtyi'. Chime'dye ra' yirisĉan mạyedye' ji'ĉujtuyitiĉa' yụ mi'in dyicba'badye' ra' jijtui' yụ. 65Mu' tashchety cudyitity Jen'che' me'ĉandye shẹi'jeyaqui quị'si' mu', yi jéyacsi: —¡Därsi' ñinacdye' Jen'ya' shupqui' ọij p̂eyacdye' mu'! Aty jam jun' jemonja tsun tyi chuc p̂eijbitety juchaj utssi' mu'. Mi'indye se'veptinte ñinacdye' mu'. 66¿Jätäjyi tyu' u mi'in? Ayo' voryi in: —Därsi' juchaj mu', jemoñe' aty ijac mu'. 67Chat qui mu'in in chu'bete vejya' Jesús in judyeya' päjjete in. Pạrej ĉatjete vejya' in, 68pạrej majmadye'ĉan yi jéte in: —Mi nash Ji'c̣honacsity Muntyi', chị́va, ¿tyi buty pä'jin mi? 69Pedro jorojya' bä'va'joij p̂ejya'. Ĉọcte yiris nanas mọ'ĉansi'dye úñis, jéte: —Mi nash chime' cäc̣hä'-chutety mu' Jesús Galileaĉantyi'. 70Pedro ticamete mu'insi'ya' vej in räjen'dye mu'ĉantyi' in. Yi mu': —Jam chịj yụ jedye' buty cại' mis p̂eyacdye'. 71Pedro c̣hẹi'ya' jịjcaij chụi'dye'ya'. Yocsi' úñis mọ'ĉan janaijti yi' mọ', jéyacsi' mu'ĉantyi' muntyi' in: —Uts nash chime' cäc̣hä'chutety Jesús jiquej Nazaretĉan bä'yity. 72Quivij mu' Pedro ticamete Jesús, tsäqui'sistumsi' p̂eyacdye' jéyacsi: —Yụ jam chị́yete. 73Dam' mọmo' tyä'päi'tyi' in cuvij mu'ĉantyi' ĉọcte Pedro in, jéte in: —Anicdye me', mi nash cäc̣hä'chutety uts ĉaĉaij na aty jorojĉan yocsi' p̂eyacdye' mi. 74Pedro tsäqui'sistum p̂eyacdye' jéyacsi: —Jam rụijsis jụijya' ọij p̂eyacdye' mu'dye ra' Jen' va'tacdye' so'min yụ. Jen'si'ya' vej mu' jéyac yụ, yụ jam chị́yete uts muntyi'. P̂eyacdye'ĉan mọmo' me'ĉandye p̂oñi ojtere'. 75Aty se'vepteya' p̂on'dye', chat qui mu' Pedro q̂uin'dyem' dyijtubibajte Jesússi' p̂eyacdye' mu', yi jiquej jajiti: “Jambi'dyem' ra' p̂oñi ojtere', chibin qui'dye ra' ticamitim.” Chat qui mu' Pedro shuban där tári mu'.

will be added

X\