Matthew 25

1Aty ra' atsijbanya' yụ, me' bu'yi' ra' ayo'bu'yedye' Jen'si' mu', jeñej bu'yi' yiri'tacyis nanas in. Mọ'in sacti' in vämedye-dyesĉan feshta feshtayequi' in, paj qui tiĉun'te in mu' mụi'dye vämity muntyi', mạijyis cạqui' in. 2Ĉanam' dyijyedye'tumsi' nanas in, chiĉanam'dye itŝis dyijyedye' in. 3Mọ'in itŝis dyijyedye' in, me' tsan' mạijyis cạqui' in, itŝi' qui nam' yocsi' aseijte cại' in. 4Mọ'in na dyijyedye'tumsi' in voteyaĉan cạqui' in. 5Mu' na muntyi' vämity jam mu' cavintum atsij, mọ'in nanamunsi' in chijäm'dye ĉush játŝuti' in ĉọshi' in täcren'yejoi' in. 6Aty menya', ĉụi'dye se've' in mọ' p̂eyacdye' yi': “¡Atyu' meij jijtuij mu' vämity muntyi'! ¡Tiĉun'mac mi'in!” 7Mọ'in yiri'tacyis nanas in sacyi' in, jäm' yụ'taĉan' mạijyis in. 8P̂eyaqui' mọ'in itŝis dyijyedye' in, cọdyetacsi' dyijyedye'tumsi' in jéyacsi' in: “Aty to' o dạ̈rä' mạijyis tsun, mạ'je' quiv'joi' in, cum'jiyitiĉam' aseijte mi'in.” 9Mọ'in dyijyedye'tumsi' vorjeyacsi' in: “Jam jun', are'ĉa jam tupuj tsundyes. Dam'dye jäm' ya'iyequi' mi'in ĉụi'dyesi' aseijte mi'in.” 10Chat qui mọ'in itŝis dyijyedye' in sacti' ya'iyequi' in. Jambi' shupqueshan' in, jä'mijdye mu' shupqueti mu' vämity muntyi', mu' bisva'tety in. Mọ'in ĉanam' nanas in jä'mii'tyis in mu'tum qui yiri'ya' siti' in, judyeya' vanacjeyac chụi'dye' in. 11Jäqui'vedye shupqueshan' in mọ'in ya'iyequis in. Cháta' yi' in: “¡Mi ayo' tsun, ji'säsdyiĉam' tsun chime'!” 12Mu' muntyi' vorjeyacsi: “Yụ jam dam' chị́yeyac mi'in.” 13Chat qui mu' Jesús jéyacsi: —Ĉujcatac mi'in bisdyiĉam' yụ, ĉaĉaij na jam chịj mi'in mọ' mạyedye' judyeya' hora ayidyes yụ. 14Aty ayijya' tupudye', me' bu'yi' ra' ayo'bu'yedye' Jen'si' mu', jeñej bu'yi yirity muntyi' yocsi've ra' jac jịjcaijtyi'. Tashche' mu' fayacsi úñity mu' judyeya' qui yụ'tacsi paj qui räj jedye' ĉọjcapte in. 15Mu' räj so'macsi querec̣ha mu', cäj cäj so'macsetaqui, jun' jun' chuc chịj carijtaquity in. Yirity úñity mu' so'maqui ĉanam' mir querec̣ha, yoctyi' na so'mete pärä' mir querec̣ha judyeya' yoctyi' so'mete yiri' mir mọmo', me' me' tsan' so'mac in paj qui ji'daijbite in querec̣ha mu', chat qui mu' muntyi' sacti yạjquicsi. 16Mu' úñity so'mactyi' ĉanam' mir querec̣ha, cavintum mu' carijtaqui querec̣hadyes paj qui ji'daijte. Jäqui've dayi mu' querec̣ha yoctyi' chichime'si' ĉanam' mir me'si' cächyi. 17Me'dye mu' chime' pärä' mir so'mactyi', mu' chime' carijtaqui querec̣hadyes paj qui ji'daijte, yoctyi' chichime'si' pärä' mir me'si' cächyi. 18Mu' na yoctyi' yiri' mir so'mactyi', jam mu' me'. To'ĉan mọmo' rudyu'jepte querec̣ha ayo'tyi' mu'. 19Men mu' tyäpi, ĉụi'dye shupqueshan ayo' mu'in. Fayaĉan úñity mu' judyeya' cọdyetacseban san'quejĉodye' mu'in. 20Tashche' atsij mu' so'mactyi' jiquej ĉanam' mir. Yi jéte ayo' mu': “Mi yajquiyitim ĉanam' mir jiquej, q̂uin' aty mu'ya' yoctyi' yụ chiĉanam' mirdye cächjete yụ.” 21Ayo' mu' voryi jajiti: “Där jäm', mi nash jäm'tyi' úñity yụ jị'cätsety mi. Aty jị'cätse' mi mọ' miquis p̂eyacdye', mọ'dyes qui yụ ra' so'meye därsi' yụ'tacdye'. Sisva paj qui yụ́tum ma'joij mi.” 22Yoctyi' qui atsij úñity so'mactyi' pärä' mir. Yi jéte ayo' mu': “Mi yajquiyitim pärä' mir jiquej, q̂uin' aty yoctyi'tum yụ chipärä' mirdye cächjete yụ.” 23Ayo' mu' voryi jajiti: “Där jäm', mi nash jäm'tyi' úñity yụ jị'cätsety mi. Aty jị'cätse' mi mọ' miquis p̂eyacdye', mọ'dyes yụ ra' so'meye därsi' yụ'tacdye'. Sisva paj qui yụ́tum ma'joij mi.” 24Jäqui've yoctyi' atsij úñity mu', mu' yạjquiyetety yiri' mir jiquej. Yi mu' jéte ayo': “Mi ayo' yụ, yụ chị́yeye jam ñịbe' ĉọcsity mi, mi nash ĉụi'situcse-bity yoctyis jedye' mu'in judyeya' jäcacsebi mi yoctyis cätidye' mu'in. 25Mọ'dyes noi'yi yụ, to'ĉan qui jijmu'sepye querec̣ha mi. Uts querec̣ha mi so'mitity baja' jiquej mi.” 26Ayo' mu' vorjajiti: “¡Där ac̣hi'tyity mi úñity, anic där to'oty mi! Yi mi yụ ca ĉụi'situcsebity yoctyis jedye' mu'in, judyeya' jäcacsebi caij yoctyis cätidye' mu'in, me' ĉúti' yụ mi. 27Me' dyijyi jụijya' mi, ¿jun' ca' jam so'macsi mi querec̣ha yụ mu'in mạ'je' prestaijtyi' in, paj qui dam' cächjete in? Me'dye jụijya' mi, aty shupqueshanya' yụ, tupuj qui ji'ca'ñiyibun' mi querec̣ha yụ, yojtumdyem' cächjeyac u.” 28Chat qui mu' ayo' jéyacsi yoctyi' úñity mu': “Chutyebajmac uts mu' yiri' miryity querec̣ha, so'mebajtinte ra' mi'in mu' me'chutety yiri'tac mir.” 29Tyi chuc jị'cätse'tyi', dadam' ra' so'mac paj qui muju'cha' me'chui' mu', tyi chuc jam jị'cätse'tyi', Jen' ra' jachutyiti mọ' dam' me'chui'si' mu'. 30Uts na fibity úñity jorojya' ra' va'quectinte tojmadye'ĉan, mu'ĉan ra' där tári mu' judyeya' ra' querechjeyaqui modyin mu'. 31Aty ra' atsijbanya' yụ Anictyity Muntyi' yụ, ferdye'tum ra' yụ, tucsi ra' yụ anjer in, chat qui ra' ayo'bu'yi yụ, ayo'si'che' bä'yaquis bä'yi ra' yụ, räj ra' irijyi yụ́che' in. 32Chat qui ra' vajmu'ya'jeyac räj jacchety muntyi' in, yụ́si'ya' ra' vej yụ'tac in. Yụ ra' pạrej bu'yi yụ'tacsi, pärä' ra' ñuru' ji'shupcacsi yụ, jeñej yirity ĉọjcai'tyi' cu'dye' pạrej bu'yi' yụ'tacsi cu'dye' mu', oveca in judyeya' chivo in. 33Mu'in jeñej bu'yity oveca in tacve bu'yi ra' mu'in in, mu'in na jeñej bu'yity chivo in q̂uimve ra' mu'in in. 34Yụ nash ra' Ayo', chat qui ra' yụ jéyacsi mu'in tacve bu'yity ra' in: “Atsijam' mi'in, mi'in nash ñịbe'jinac Jen', sisvac Jen'ya' mi'in, ayo'bu'yedye'ĉan mu', mi'indyes jäm'tyiyinac Jen', jambi'dyem' jämi' jac, tạ'cas aty mọ' mọ'ya' mi'indyes. 35Me' ra' chat siti mi'in ĉaĉaij na dáqui yụ jiquej, mi'indyety ji'säcsitiĉa' yụ mi'in, jajri yụ jiquej, mi'indyety ji'tyetiĉa' yụ mi'in. Jeñej bu'yi yocve atsijtyi' yụ itŝity chätidye' me' bu'yi yụ, mi'indyety ji'dyäquitiĉa' yụ mi'in. 36Chime'dye cädäj yụ jiquej, mi'indyety ji'cätiĉa' yụ mi'in, judyeya' japacjoij jiquej yụ, mi'indyety ĉujcatiĉa' yụ mi'in, ĉär'taquisĉan ĉä'räij jiquej yụ, mi'indyety tän'jijcatiĉa' yụ mi'in”, jéyacsi ra' yụ. 37Mu'in rụijtyity ra' in vorjin ra' yụ in: “Mi nash Ayo' tsun, ¿jun'dyeya' ca' dáquistum dạquicyac tsun judyeya' ji'säcseyac? ¿Jun'dyeya' ca' jajristum dạquicyac tsun judyeya' ji'tyeyac? 38Chime'dye ¿jun'dyeya' ca' jeñej yocve atsijtyi' dạquicyac judyeya' ji'dyäqueyac? ¿Jun'dyeya' ca' cädäj dạquicyac judyeya' jị'quiyac? 39¿Jun'dyeya' ca' japacjoij mi, judyeya' ĉä'räij mi me' dạquicyac tsun, judyeya' tän'jejcayac?” me' ra' jin yụ. 40Chat qui ra' yụ Ayo' mu'in jéyacsi yụ: “Yụ jéyac jun'si' chuc ñútyibutiĉa' vojity bu'yity yụty jiquej mi'in, me' tsan' mu' uya'ya' bu'yity, yụ́dye qui nam' ñútyitiĉa' mi'in, me' shupqui mọ'.” 41Chat qui ra' yụ Ayo' mu'in jéyacsi ra' mu'in q̂uimve bu'yity in: “Meijyevac mi'in yụ́ya', tsäqui'sisĉandyety, tŝijĉan ra' va'cac mi'in, mọ' jam jedyei' quiv'joi'si'. Mọ' nash jäm'tye' Jen' Sọyodyes räjtumdye úñity mu', mu'ĉan ra' va'cac mi'in chime'. 42Me' ra' yu'nac Jen' ĉaĉaij na me' tsan' dáquistum jiquej yụ, mi'in qui nam' jam ji'säcsitiĉa' yụ mi'in, me' tsan' jajristum jiquej yụ, mi'in qui nam' jam ji'tyetiĉa' yụ mi'in. 43Chime'dye me' tsan' jeñej bu'yi yocve atsijtyi' yụ jiquej, mi'in qui nam' jam ji'dyäquitiĉa' yụ mi'in, me' tsan' cädäj jiquej yụ, mi'in qui nam' jam ji'cätiĉa' yụ mi'in, chime'dye japacjoij jiquej yụ judyeya' ĉä'räij jiquej yụ, mi'in qui nam' jam tän'jiĉudyiĉa' yụ mi'in,” me' ra' jéyacsi yụ. 44Mu'in ra' vorjin yụ in: “Mi nash Ayo' tsun, ¿jun'dyeya' ca' dáquistum dạquicyac tsun, judyeya' jajristum, judyeya' jeñej bu'yi yocve atsijtyi', judyeya' cädäj, judyeya' japacjoijtyi' judyeya' ĉä'räijtyi'? ¿Jun'dyeya' ca' tsun me' dạquicyac mi, jam qui nam' nọ́tyeyac tsun?” me' ra' jin yụ in. 45Chat qui yụ Ayo' mu'in jéyacsi ra' yụ: “Yụ jéyac, jun'si' chuc jam ñútyibutiĉa' vojity bu'yity yụty jiquej mi'in, me' tsan' uya'ya' bu'yity mu', yụ́dye qui nam' me'jitiĉa' mi'in, me' shupqui' mọ'.” 46Anicdye me', mu'in me'tyity in va'cac ra' tsäqui'sisĉan in, mijam ra' jụ'ñisĉan mạyedye' shuban mu'ĉan in. Mu'in na rụijtyity in Jen'ya' ra' bä'ban in, mijam ra' jụ'ñisĉan mạyedye' mọtsjan in.

will be added

X\