Matthew 24

1Chat qui mu' Jesús shuban Jen'si'ĉan aca' mu' aty ra' jọban mu'. Jị'chiyactyi' mu' ĉọcte in judyeya' c̣họco'bite Jen'si' aca' in, dai' yocsi' mọ'ya' aca' in. 2Jesús jéyacsi: —Anicdye me', där jäjämunsi' ọij aca' cạvejas q̂uin'. Yụ ra' jéyac räj ọij q̂uin' cạvetiñes, räj ra' jịva'chac in, räj ra' mij mọ' vän'jetac, mijam ra' yirity tacya' ji'yajcati. 3Aty mụcu'che' mu' Orivoche' mu'che' bä'yi p̂utsquen'yi mu' Jesús. Ĉọcte in jị'chiyactyi' mu', itŝij yoctyi' yocvety jijtuij in. Jị'chiyactyi' jéte in: —Jítiĉam', ¿jun'si' buty ra' cạ̈tsi' ọij jítiĉas tsun mi'in? ¿Jedye' buty ra' jị'ĉocdyes aty ra' ca'ñibunya' mi, aty ra' ayijya' jadyiquis tupudye'? 4Jesús vorjeyacsi: —Are'ĉa mi'in jam ra' se'vacsebi mi'in väñädye' muntyis mu'in. 5Dai' ra' muntyi' ji'caviti in, yụ́si' ra' tịj ji'jäcbun yụ in, yi ra' in: “Yụ nash Ji'c̣honacsity Muntyi'”, judyeya' qui ra' dai' anicjeyacsebi väñädye' mu'in. 6Chime'dye dai' ra' se'vetiñe' chutidye' in, c̣hẹi'ya' bä'yity in judyeya' mochtyi' in. Me' ra' tsan' se'vetiñe' jam qui na ram' cajotyiti mi'in, me' ra' tsan' me' cạ̈tsi', jambi' qui na ram' ayij jadyiquis tupudye'. 7Yiris ra' jac yocsi'tum chutidyeij in, judyeya' yirity jacchety ayo' jutaqui ra' väc̣hä'tyity mu', chuti ra' yoctyi'tum in. Jun'si' ra' ĉụi' mọ'ya' dáquedye' chime', judyeya' ra' chime' pai' mọ'ya' ji'caviti bubacdye'. 8Me' ra' tiyacchuti' ñịbedyes muntyidyes in. 9Chat qui ra' me'si' ji'me'tyinac ayo'ya' in, mu'in qui ra' jị'ñibe'canac in, judyeya' ra' ijanac in. Räj jacchety muntyi' in fáquinac ra' in yụ́dyes. 10Anic ra' dai' farajjin yụ in, aty jam ra' cäc̣hä'chubun yụ in, pạrej ra' fạ́cacsi yoctyi' in ji'me'tacsi ra' in ayo'ya'. 11Chat qui ra' dai' mu'ya' va've jị'chiyacsity in, jeñej bu'yi ra' jaso'mitity p̂eyacdye' Jen' in, me' bu'yi ra' in, me'dyes qui dai' muntyi' in anicjeyacsebiban ra' in cäjsis p̂eyacdye' mu'in. 12Dadam' ra' muju'cha' ac̣hi'yi muntyi' in, araj ra' räj muntyi' in aty ra' jam mạ'jitidyestum bä'yi in. 13Tyi chuc jam peñity in jun' qui' chuc jadyic tupudye', mu'in ra' c̣hoñi in. 14Pai' bä'yity jacchety muntyi' in, räj ra' mu'in se've' in mọ' p̂eyacdye' Jen'si' mu', mọ' p̂eye' aty ra' ayo'bu'yi Jen', chat aty ra' me'si' q̂uin'dyem' ra' ayij jadyiquis tupudye'. 15Mu' Daniel jiquej jaso'mitity p̂eyacdye' Jen', sánacdye' mu' p̂eye' mọ' ji'ac̣hi'tacsis ra' jäm'tacdye'. Mọ'ĉan ra' yụ'tac Jen'si'ĉan aca' mu'. (Tyi chuc p̂eye' ọij sánacdye' paj jäm' chique' jätäjyi' chuc.) 16Aty cạvetiñe'ya' mi'in aty mọ'ĉan mọ' yụ'tac Jen'si'ĉan aca' mu', chat qui ra' mu'in Judeaĉantyi' in yiristum mu'vedye yacchuti ĉa'joij in, paj mụcu'che' jịjcaij in. 17Tyi chuc jorojya' aca' jụijya' aty se've'ya' mọ', paj jam jun' sisan ĉụi'si'ĉan aca' mu', paj jam jäcaĉan jubij mu'. 18Me'dye chime' tyi chuc quịjodye'ĉan jụijya', paj jam jun' acatuban mu' jätaĉan quị'si' mu', paj yiristum ĉa'joij mu'. 19¡Där ra' ñịbe' cạve' in mọ'in p̂en jạjtsis in, judyeya' tsi'yity ạva' mọ'in! 20Cọdyemac Jen' paj qui jam tsịvu'vudye'ĉan cav'quinac in, mijam ra' jị'jutyitidyesĉan mạyedye' chime'. 21Anic ra' mọjo'chas därsi' ñịbedyes jị'ĉojtye' ra' muntyi' in, jam jeñej tashches jiquej yoqui'dyem' jämaqueya' ọij jac jiquej o, ọya'ya' ñịbe' cạve' muntyi' in, mijam ra' cuvij jo'mes cha'she' ñịbedyes. 22Jen' aty dyijyi dam' ra' dyäcje' mạyedye' ñịbedyes tupudye', jam me' jụijya' a vuty tas muntyi' säñi u in. Tsim'tactyi-dyes mọmo' in, mu'indyes ram' dyäcjetyetac in ñịbedyes mạyedye' in paj qui jam men me' bu'yi'. 23Aty ra' me'si' jụijya', yirity muntyi' jínac jụijya': “¡Mush úya' útsi Ji'c̣honacsity Muntyi'!” jam jụijya', vatyquej ra' yi in: “Mu've mu' Ji'c̣honacsity Muntyi'.” Me' yi jụijya' in, jam ra' anicjeyacsebi p̂eyacdye' mi'in, 24ĉaĉaij na atsij ra' pạrej muntyi' väñäijtyi' in, jeñej bu'yi ra' Ji'c̣honacsity Muntyi' yu'ti in, judyeya' jeñej bu'yi ra' jaso'mitity p̂eyacdye' Jen' in, me' bu'yi ra' yu'ti in. Därsi' ra' ferdye' jị'caveyacsi muntyi' in paj qui muntyi' in anicjeyacsebive väñädye' mu'in. Chime' mu'inmun ra' fer väñätucsi in Jen'tyi' tsim'tactyi' mu', paj qui mu'inmun anicjeyacsi in chime', me' tupuj jụijya' in. 25Jä'mij tashche' jị'chiqueyeyac q̂uin' ọij, paj qui chịjve mi'in, jam qui anicyive mi'in. 26Vatyquej yi jụijya' in: “Mu'ya' cäjyasĉan jac mu' Ji'c̣honacsity Muntyi'”, jam ra' jun' anicjeyacsi mi'in. Chime'dye: “Mu'ĉan jijmu'siti”, yi jụijya' in, jam ra' jun' anicjeyacsi mi'in. 27Atsijbanya' yụ Anictyity Muntyi' yụ, jorojĉandye ra' yụ jeñej bu'yi ra' vịcui'quedye' räj mạijyi' mạyedye'che', räj jịjcaijche' tsun mạij ra' tŝọi', me'yedye'ĉandye ra' jorojĉanyi yụ. 28Me' ra' cạ̈tsi' ọij p̂eyacdye' yi': “Yóya'dyem' säñi'si' jedye' o, mọ'ya' vạjmo'yai' shi'e' in.” 29Aty ra' jiyi'ya' ñịbedyes, chat qui ra' tomajyi mu' tsun, tyum' ra' mọ' tyei' ịvaj, mu'in na ra' ọ́rota' jọ'chaij in, judyeya' ra' mạyedye'ches chime' jedye' buben'yi' in. 30Chat qui ra' che've cavibubun yụ in jị'ĉocdyes Anictyitydyes Muntyi' yụ. Räj jacchety muntyi' in, yoc yoc p̂eyaquity in fer ra' tári in aty cavinya' yụ in Anictyity Muntyi' yụ, ji'ĉujtuyibun ra' yụ in, dyicba'badye' ra' jijtui' yụ, därsi'ya' ra' ferdye' yụ judyeya' mạijquedye'tum ra' atsijban yụ. 31Anic ra' fer mạ'i' tujyi', chat qui ra' yụ jutaqui anjer yụ paj qui pai' ọij jac jịjcaij in, jätisve, judyeya' rocve, judyeya' jijtuijve tsun, judyeya' sitiche' tsun, räj ra' dyụ́tsedye've jac jịjcaij in, me' me' ra' jäcacsi tsim'tactyi' yụ in. 32Dyijtuvac ra' mi'in jedye' chuc ji'ĉuyinac mọ' cätidye' higuera. Mọ' cätidye' aty tiyacchuti' co'ñeyeban' jụijya', mọ' ji'chäquiyinac aty c̣hẹi'ya' tupudye' juñ'yeban'. 33Me'dye ra' chime' aty cạvetiñe' mọ' cạ̈tsi' jéyacsis yụ q̂uin', chat qui ra' q̂uin'dyem' chịj mi'in aty c̣hẹi'ya' ayidye' yụ. 34Yụ jéyac, jambi' ra' jụ'ñij mọtsi uts muntyi' in räj ra' cạ̈tsi' ọij. 35Mạyedye'ches jedye' in judyeya' ọij jac mọtsi' ra' in, yụ́si' qui nam' p̂eyacdye' jam ra' jun' mọtsi', mọ' ram' cạ̈tsi'. 36Mijam tyi chịj jun'si' chuc ra' ayij jadyiquis tupudye', mijam hora chị́yac. Mijam anjer mạyedye'chety chịj in, mijam yụ Jen'tyi' Ạva' yụ, me'dye Jen' mọmo' yirity chịj. 37Aty ra' atsijbanya' yụ Anictyity Muntyi' yụ, mijam ra' chị́va'joij muntyi' in, yojdyem' tomity muntyi' jiquej u in Noétum jiquej in. 38Jambi' ayij bänedye' jiquej, yejĉoij mọmo' ĉụi' bä'yi muntyi' in, säcsi mọmo' in, judyeya' vämi in, ĉụi'dye cha'she' in mọ' mạyedye' aty sitiya' covambaĉan mu' Noé. 39Mu'in jam chị́va'joij in, ĉụi'dye vatyquej shupqueti' ojñi' ji'p̂utacsi räj muntyi' in. Me'dye ra' mu'in chime' muntyi' in atsijbanya' yụ Anictyity Muntyi' yụ, jam ra' chị́va'joij in. 40Pärä' ra' quịjodye'ĉan in, yirity ra' ĉụi' moñi, yoctyi'dyety ra' tacya'. 41Me'dye ra' chime' p̂en in, pärä' ra' musacva'joi' in, yiris ra' ĉụi' moñi', yocsi'dyety ra' tacya'. 42Mọ'dyes ĉujcati ra' mi'in, ĉaĉaij na jam chäyitiĉa' mi'in, ĉụi'dye ra' atsijban yụ Ayo' mi'in. 43Jesha' yirity muntyi' chịj jụijya' mu' jun'si' chuc ĉụi' atsij mu' shushu'aty muntyi', mu' ra' tsạ'bu'yi mu' ĉọjcaqui aca' mu' paj qui jam jasäsbuti jashu'atuti jedye' mu'. 44Me'dye ra' mi'in chime', jemoñe' räjĉan ĉujcati mi'in bisdyiĉa' yụ mi'in Anictyity Muntyi' yụ, jam ra' chị́va'joij mi'in, jun'si' ra' ĉụi' mọmo' atsijban yụ mijam dyijtucdye'ĉan. 45Me' nash carijtaqui mu' dyijyedye'tumtyi' úñity, jị'cätsaquity p̂eyacdye'. Ayo' mu' yocve jịjcaijya', yụ'taqui tashchety úñity mu' paj qui räjĉan mạyedye' so'macsi säcsedye' yoctyi' úñity in. 46Där ra' ma'joij mu' tashchety úñity mu' jadaquishun jụijya' mu' yejĉoij jäm' carijtaqui chiqueptety p̂eyacdye' ayos mu'. 47Jéyac yụ, mu' me'tyity úñity muju'cha' ra' fer bu'yi yụ'tac ayo'ya' mu', mu' ra' jayu'ti paj qui räj ĉọjcai'tyi' jedye' mu'. 48Ac̣hi'yity na úñity jụijya' yocdye mu'. Yi mọmo' mu': “Taca' men ra' atsijban ayo' yụ.” 49Chat qui tiyacchui' mu' ñịbe' jị'cavacsi yoctyi' úñity in judyeya' mu'mun tyetyetacsi judyeya' jebetyetacsi mu'in shu'quity muntyi' in. 50Vatyquej c̣hon'yebanya' shupqueshan ayo' mu', jam ra' chị́va'joij úñity mu', me'tacva'joij ra' jadaquishun mu'. 51Chat qui ra' mu' ayo' mu' jäm'si' va'tacdye' jaso'miti, va'cac ra' yóĉandyem' mu'in u in ac̣hi' dyijyity in, jäm' yu'ti tsan' in. Mu'ĉan ra' där tári judyeya' ra' querechjeyaqui modyin mu'.

will be added

X\