Matthew 23

1Aty me'si' mu' Jesús jéyacsi jị'chiyactyi' mu' räjen'dye mu'ya' in. Yi mu': 2—Mu'in jị'chiyacsity yụ'tacdye' in judyeya' mu'in fariseo in, mu'in yụ'tac in paj qui jị'chiyacsity in mọ' yụ'tacdye' Jen'si' mu' jaso'mitis mu' Moisés jiquej. 3Yụ jéyac, tupuj se'vacsebi mi'in mu'insi' ji'chäyiti-dye' mu'in, jun' chuc jínac in, jam qui na ram' cäc̣hä'chucsebi dyijyedye' mi'in, jun' chuc bä'yi mu'in in, mu'in va've bä'yi in, jam cäc̣hä'chuqui ĉụi'si' ji'chäyitidye' mu'in. 4Anic carijsis jäm'tye' ji'chäyitidye' in, judyeya' jéyacsi muntyi' in paj qui tas chique've in, jeñej jiyi' javquis ji'veyecsis in, mijam qui nam' dam' nọ́tyetacsi in paj qui chique've in. 5Me' tsan' jäm' carijtacdye' Jen'dyes mu'in, mọ' mọmo' mu'in mạ'je' in paj qui tima'cacsi muntyi' in. Me'dyes qui va'bunyi in, yụ'taqui ĉụi' sánacdye' Jen'si' in jáfiche' mu'in judyeya' unya' mu'in, judyeya' moc̣has minacdye' yụ'taqui quị'si'che' mu'in paj qui tima'cacsive muntyi' in.51 6Chime'dye mu'in fer mạ'je' bä'yi in mọ' mọjo'chasche' bä'yaquis feshtadyes, judyeya' tashchesche' bä'yaquis vajmu'yadye'ĉansi'. 7Chime' mu'in fer mạ'je' in paj qui muntyi' in jäm'jeĉúnacsi cayeĉan in judyeya' chime' paj qui jäm'yedye'tum vorjeyacsi in, judyeya' paj qui jéyacsi muntyi' in: “Mi nash jị'chiyacsity.” 8Mi'in na ra' jam me', paj yoctyi' in jam jínac in: “Mi jị'chiyacsity”, ĉaĉaij na yirity mọmo' mu'ya' anictyity Jị'chiyacsity mi'in, mọ'dyes mi'in vojity bu'yi mi'in. 9Chime'dye jam ra' yụ'tinte jacchety muntyi' paj qui jen' bu'yi mi'indyes, ĉaĉaij na yirity mọmo' Jen' mi'in, mạyedye'chety. 10Chime'dye paj jam jínac in: “Mi nash ayo' tsun”, yụ Ji'c̣honacsity Muntyi' yum' yirity ayo' mi'in. 11Jụ'ñity chuc mạ'je' muju'cha' bu'yi mi'indyes, jemoñe' nọ́taquity yu'ti yoctyidyes mi'in. 12Jụ'ñity chuc muju'cha' yu'tity, mu' ra' Jen' uya'ya' jayu'ti, jụ'ñity chuc uya'ya' yu'tity, mu' ra' Jen' muju'cha' jayu'ti. 13Fer ra' ñịbe' cạvetiñe' mi'in jị'chiyacsity yụ'tacdye' mi'in judyeya' mi'in fariseo, anic ac̣hi' dyijyity mi'in, jäm' yu'ti tsan' mi'in. Mi'in ĉär'jetacsi muntyi' in mọ' Jen'yas chụi'dye' paj qui jam siti in ayo'bu'yedye'ĉan mu'. Mijam ĉụi' siti mi'in mijam ji'sitacsi mi'in mu'in mạ'je' sitity in. 15Fer ra' ñịbe' cạvetiñe' mi'in jị'chiyacsity yụ'tacdye' mi'in judyeya' mi'in fariseo, ac̣hi' dyijyity mi'in, jäm' yu'ti tsan' mi'in. Anic moch jịjcaij mi'in, nopej mar jịjcaij mi'in yocsi've jac, quevacsi muntyi' mi'in paj qui jụj ja'yacsi mi'in. Me' tsan' yirity mọmo' dạquictinte mi'in, jụj ja'yetinte chijäm' judyeya' jị'chiyetinte paj qui cäc̣hä'-chubunac dyijyedye' mi'in, yojdyem' mi'in u me' ji'shuptinte mu', yojdyem' mi'in u tŝijĉan-dyety mi'in, me'dye mu' muju'cha' tŝijĉandyety shupqui. 16Fer ra' ñịbe' cạvetiñe' mi'in. Mi'in jeñej yirity tofety muntyi' tapchute yoctyi' tofety muntyi'. Yi mi'in ji'chäyiti-dye'ĉan: “Yirity muntyi' yụ'taquiya' tsäqui'sistumsi' p̂eyacdye' jụijya', ji'jäcbite Jen'si' aca' mu' jụijya' paj qui chịj in anicsis p̂eyacdye' mu', mọ' qui nam' jam ya'im', jam jemoñe' jị'cätsaqui”, me' bu'yi yi mi'in. “Oro qui nam' aca'ĉantyi' ji'jäcte jụijya', mọ' chat ya'im', mọ' chat jemoñe' jị'cätsaqui p̂eyacdye' mu'”, me' bu'yi' jị'chiyacsi mi'in. 17¡Itŝi' dyijyedye' mi'in jeñej tofety mi'in! ¿Jam adac chịj mi'in mọ' Jen'si' aca' mu' mọjo'cha' tsäqui' bu'yi', uya'ya' mu'ĉantyi' oro? Ĉaĉaij na mọ' Jen'si' aca' mu' tsäqui' yụ'tye' mọ'ĉansi' jedye' in. 18Chime'dye jị'chiyacsi mi'in: “Yirity muntyi' ji'jäque' mọ' ji'co'shayacdye'che' paj qui chịj in anicsis p̂eyacdye' mu', mọ' jam ya'im', jam jemoñe' jị'cätsaqui mu'. Mọ' qui nam' ji'jäque'ya' mọ'ches cu'dye' ji'co'shayacdye'ches, mọ' chat q̂uin'dyem' ya'im', mọ' chat jemoñe' jị'cätsaqui p̂eyacdye' mu'”, me' bu'yi yi mi'in. 19!Jeñej tofety mi'in! ¿Jam adac chịj mi'in mọjo'cha' tsäqui' bu'yi' mọ' ji'co'shayacdye'che' Jen'dyes, ọya'ya' mọ'ches cu'dye'? Ĉaĉaij na mọ' ji'co'shayacdye'che' tsäqui' yụ'tye' mọ'ches jedye'. 20Jụ'ñity ĉụi' ji'jäque' jụijya' mọ' ji'co'shayacdye'che', räjtumdye ji'jäque' mọ'ches ji'co'shayac-dye'ches. 21Jụ'ñity ĉụi' ji'jäcbite Jen'si' aca' mu' jụijya', jam mọ' mọmo' ji'jäcbite, a'mundye chime' mu'ĉan bä'yity ji'jäcte. 22Tyi chuc ji'jäque' mạyedye'ches jụijya', ayo'bu'yedye'mundye ji'jäcbite Jen'sim', mu'tumdye ayo'bu'yi mu'che'. 23Fer ra' ñịbe' cạvetiñe' mi'in jị'chiyacsity yụ'tacdye' mi'in judyeya' fariseo mi'in, anic ac̣hi' dyijyity mi'in, jäm' yu'ti tsan' mi'in. Mi'in räj me'chutiñes jedye' mọ' pạrejjetiñe' dam' Jen'dyes, yiri'tacĉansi' jedye' so'metinte, me' tsan' miquis cätidyes shan, mọ' chime' pạrejjetiñe' Jen'dyes mi'in.52 Me' tsan' mọ' dyijtutiñe' mi'in, mọ' qui nam' mọjo'chas ji'chäyitidye' yụ'tacdyes farajjetiñe' mi'in, jun' chuc jemontiñe' rụij bä'yi mi'in judyeya' ñịbe' ĉọcsity mi'in judyeya' jị'cätsaquity p̂eyacdye' mi'in. Mọ'in mọjo'cha' jemonac in, jam qui na ram' farajjetiñe' mọ' ọya'yas yụ'tacdye' chime'. 24Mi'in jeñejtyity yirity tofety muntyi' tapchute yoctyi' tofety muntyi', ji'mi'iti tsan' in. Me' bu'yi mi'in, ọya'yas yụ'tacdye' chiquetiñe' mi'in, mọjo'chas qui nam' yụ'tacdye' va'quectiñe' mi'in, mọ' jeñej bu'yi jun' chuc shajsis tyeij mi'in paj qui jam jedye' miquis facsetiñe' mi'in, mu' qui nam' cameyo jeñej facsetinte mi'in, me' bu'yi' dyijyedye' shupqui' mi'in. 25Fer ra' ñịbe' cạvetiñe' mi'in jị'chiyacsity yụ'tacdye' mi'in judyeya' fariseo mi'in, anic ac̣hi' dyijyity mi'in, jäm' yu'ti tsan' mi'in. Mi'in me' tsan' jäm' ji'ĉuti mi'in, ĉojtyi'ĉan qui nam' anic yocve mi'in a'c̣his mọ'ya' mi'in, jeñej bu'yi' yiris tyéquis fajche' chụi'bui' yụ'tiñe' mi'in, ọ́ĉan qui nam' a'c̣hi' mọ'. Ĉojtyi'ĉan mi'in dyijtutiñe' shi'adye' judyeya' ac̣hi'yedye'. 26Jeñej tofety mi'in fariseo. Tashche' chum ra' chụi'buij yụ'taqui ĉojtyi' mi'in, chat qui ra' q̂uin'dyem' rụij bä'yi mi'in. 27Fer ra' ñịbe' cạvetiñe' mi'in jị'chiyacsity yụ'tacdye' mi'in judyeya' fariseo mi'in, ac̣hi' dyijyity mi'in, jäm' yu'ti tsan' mi'in. Mi'in jeñej bu'yi ru'dyei'yas aca', anic tsan' jäm' ji'ĉuti', fajche' jai'bai', ọĉan qui nam' anic yoc, a'c̣hi' säñitysi' jin mu'in focoijtyi' in. 28Me'dye mi'in chime', jäm' ji'ĉuti mi'in me' cavinac muntyi' in, ĉojtyi'ĉan qui nam' mi'in anic a'c̣hiij mi'in, mọ'ĉan bä'yi' fibi'nacdye' mi'in judyeya' juchaj mi'in. 29Fer ra' ñịbe' cạvetiñe' mi'in jị'chiyacsity yụ'tacdye' mi'in judyeya' fariseo mi'in, anic ac̣hi' dyijyity mi'in, jäm' yu'ti tsan' mi'in. Mi'in jäm' yụ'tacsebity ru'dyei'ya' mu'in jaso'mitity p̂eyacdye' Jen' jiquej in. Chime' mi'in sháshatucsebity dyijtucdyety mij mu'in rụij bä'yityvun jiquej in. 30Yi mi'in: “Faraj vu' ca' tsun mu'ya' jiquej yoqui'dyem' vóshi'vun jiquej u tsun ijapteya' jiquej in mu'in Jen'tyi' jutactyi' mu', a vuty jam tsun me' jiquej u nọ́tacseja' mu'in ijacsity in”, me' yi mi'in. 31Ĉụi'si'ya' p̂eyacdye' mi'in me' ji'me'ti mi'in ĉụi' jun' chuc mi'intyi' vóshi' jiquej in ijacsity jiquej in mu'in jutactyi' Jen'tyi' jiquej mu'. 32¿Mi'in adac ra' jị'cätsacsebi dyijyedye' vóshi'vunsi' mi'in jiquej? ¿Mi'indye buty ra' quivijyeban me' mi'in yojdyem' mu'in jiquej u in? 33¡Jeñejtyity nas, me'tyity nash mi'in! Jen' ra' jam jun' c̣honchunac, aty tŝijĉandyety yụ'tac mi'in. 34Mọ'dyes yụ ra' juteyeyac muntyi' in mu'in cayinactyi' p̂eyacdye' in, mu'in dyijyedye'tumtyi' in, judyeya' ji'chäyinactyi' in. Mi'in na ra' jam jụjjeĉúnacsi, pạrej ra' ijabutiĉa' mi'in, pạrej ra' pacbutiĉa' croshche' mi'in, judyeya' pạrej ra' si'bibutiĉa' vajmu'yadye'ĉan mi'in, judyeya' pạrej ra' junanaj ĉụi' jịjijcayibutiĉa' mi'in, me' me' ra' me'butiĉa' mi'in. 35̣Q̂uin' q̂uin'tyity muntyi' mi'in, mi'inche' ra' tŝọi' va'tacdye' räj ijacsity muntyi' jiquej in. Anic dai' muntyi' in úche' ujactyi' jiquej in, jam ĉụi'si'ya' juchaj ujac in, tashche' yacchuti' Abelya' jiquej mu' rụijtyity, jun' qui' chuc jäqui'vety jiquej Zacarías, Berequíastyi' ạva' mu'. Mu'in vóshi' jiquej mi'in mu'ya' ijate in Jen'si'ya' aca' mu', dyete'ĉan mọ' ji'co'shayacdye'che'. 36Yụ jéyac, räj va'tacdye' mu'indyes tsan' in ijacsity jiquej in, räj ra' mi'inche' tŝọi' mọ' va'tacdye' q̂uin'tyity mi'in. 37Jesús fer dyijtucsi Jerusalénĉantyi' in, yi mu': —Mi'in Jerusalénĉantyi', anic fer dyijtuyac mi'in. Mi'in ijacsi jiquej mu'in jaso'mitity p̂eyacdye' Jen' in judyeya' farajñeptinte mijya' mi'in mu'in jutactyi' Jen'tyi' mu'. Dai' qui' tsan' yụ mạ'je' vajmu'ya'tyeyac yụ́ya', jeñej yiris atava vajmọ'ya'jeyaqui' ạva' mọ' pavajĉan, jam qui nam' jun' jụjjitiĉa' yụ mi'in. 38̣Q̂uin' chat ra' va'quetac bä'yedye' mi'in. 39Yụ jéyac, aty ra' jam quivij cavibudyiĉa' yụ mi'in, a ra' tiĉun'tiĉa'ya' yụ mi'in, chat qui ra' q̂uin'dyem' cavibudyiĉa' yụ mi'in jítiĉa' ra' mi'in: ¡”Paj Jen' ñịbe'jajiti uts jutactyi' Ayo'tyi' tsun”! ̣Q̂uin'dyem' ra' quivij cavibudyiĉa' yụ mi'in.

will be added

X\