Matthew 22

1Jesús jị'chiyacsiya' muntyi' in quivij yụ'tyeyacsi jị'ĉocdyes p̂eyacdye'. Yi mu': 2—Me' bu'yi' ayo'bu'yedye' Jen'si' mu', jeñej bu'yi' yirity ayo' jäm'tyeyaqui vämedyedyes feshta ạvadyes mu' son'. 3Mu' jutaqui úñity mu' paj qui tucsi mu'in ji'vorvactyi' in paj qui säcsi in, jam qui nam' jun' mạ'yi mu'in in. 4Mọ'dyes qui mu' muntyi' yoctyi' qui fayaqui úñity mu', jéyacsi: “Mi'in qui jéyacseĉam' mu'in ji'vorvactyi' tsan' in, jéyacsi ra' mi'in: Cu'dye' ayos a nash shúshi, a nash räj jä'mii'tyi'. Cabu'tyum mi'in, vämedyedyesya' feshta säcsi ra' mi'in, yi ra' jéyacsi mi'in.” 5Mu'in na ji'vorvactyi' in doroi'jepte in p̂eyacdye' mu', yejĉoij ĉụi' carijtaqui in. Yirity na päcä' quịjodye'ĉan jịjcaij mu', yoctyi' na päcä' chime'dye ĉụi'si'ĉan ji'mincacdye' jịjcaij mu'. 6Pạrej ji'vorvactyi' in tapjepte úñity in, chupte in judyeya' ijapte in. 7Mọ'dyes qui mu' ayo' där jị'fajque', jutacsi väc̣hä'tyity mu', mu'in qui ijacsi in mu'in ijaptety úñity in, judyeya' ji'co'shayacsebi bä'yedye' in. 8Cuvij mu' ayo' fayaqui úñity mu' jéyaqui: “Me' tsan' jä'mii'tyi' vämedyedyes säcsedye', mu'in qui nam' ji'vorvactyi' tsan' in mem' doroi'yi in, jam mạ'je' p̂ucush atsij in. 9Tạij q̂uin' mi'in, caye socor'jevac, tyi chuc täjjetinte jụijya' mu'ĉan mi'in, jémac paj qui vämedye-dyesya' säcsedye' jebete' in.” 10Anicdye me', sacti in úñity mu', cayeĉan jịjcaij in quevacsequi muntyi' in, tyi ĉụi' mọmo' täjjete in tute in, jäm'yity in judyeya' jam jäm'yity in. Chat q̂uin'dyem' sät tŝọi' in ayosĉan aca' in, yóĉandyem' säcsiĉan u. 11Siti mu'ĉan ayo', cạvacsi mu'in atsijtyi' in. Yirity muntyi' cạvete mu'ĉan jam quị́tety vämedyedyety quị'si'. 12Chat mu' ayo' jajiti: “Chätidye' ¿jun' dash siti úĉan mi, jam quị́te mi mu' vämedyedyety quị'si'?” Mu' na muntyi' c̣hu'c̣huij mọmo', jam dam' voryi. 13Chat qui mu' ayo' jéyacsi mu'in patstyeyeyacsity in: “C̣họco'tinte ra' útsi, un mu' judyeya' yuj mu', judyeya' ra' jorojya' va'quectinte mi'in tojmadye'ĉan, mu'ĉan ra' där tári mu' judyeya' ra' querechjeyaqui modyin mu'.” 14Chat qui yi mu' Jesús: “Anic dai' mu'ya' ji'vorvactyi' tsan' in, tsim'tactyi' qui nam' in uya'ya' in.” 15Chat qui mu'in fariseo jọban in, p̂eyaqui in jun' bu'yi chuc ra' tupuj paj qui cäjsis p̂eyacdye' dạcbite in Jesússi' mu'. 16Mọ'dyes mu'in fariseo in juteyete in pạrej cäc̣hä'chucsity in, mu'intumdye pạrej cäc̣hä'-chutety in mu' Herodes, vaj me' ĉọcte Jesús in, jéte in: —Jị'chiyacsity, tsun nash chị́yeyac mi anic rụij p̂eyaquity mi, chime'dye rụij jị'chiyacsi mi Jen'si' p̂eyacdye' mu', jun' chuc ra' bä'ja' tsun, mijam dyijtucsebim muntyis dyijyedye' mu'in, ĉaĉaij na mi vaj cäts cạvacsi muntyi' in. 17¿Jätäjyi tyu' um, tupuj buty yụ'tyeja querec̣ha jacchetydyety ayo' muju'chatydyety Romaĉantyi-dyety ayo'? Jítiĉa' ra' tsun mi'in. 18Jesús na chị́yacsebi a'c̣his dyijyedye' mu'in, jéyacsi mu': —Anic ac̣hi' dyijyity mi'in, jäm' yu'ti tsan' mi'in. ¿Jun' dash me' mạ'je' ji'ĉujtiĉa' yụ mi'in? 19Ji'caviyitiĉam' ficha mu' yụ'tyeyetintety ayo'. Chat qui tuyete in mu' ficha. 20Jesús jéyacsi: —¿Tyis ọij ọ́che' queptac-dye' um'? ¿Tyis ca' tịj ọ́che' yụ'tac? 21Chat mu'in vorjete in: —Muju'chaty ayo' Romaĉantyi'. Jesús qui jéyacsi: —Anicdye me', mọ'dyes so'memac jacchety ayo' jedye' chuc mu'dyes mọ'ya', chime'dye so'memac Jen' jedye' chuc mu'dyes mọ'ya'. 22Anic äjjepte p̂eyacdye' in, chat qui yạjquibajte in judyeya' qui jọban in. 23Mọ'dye mạyedye' atsij pạrej saduceo in ĉọshte in mu' Jesús, mu'in yity in jam ra' vañinyeban säñity ĉọcsity in. Mọ'dyes jéte Jesús in: 24—Jị'chiyacsity, Moisés jiquej yụ'tye' p̂eyacdye' yi mu': “Yirity muntyi' jambi'dyem' ạva'yity säñi mu', jemoñe' vojity mu' mọ'che' vämeban vojityvunsi'che' p̂en mu', paj qui ạva'yi mọ'ĉan, mu'in qui ạva' mu' jeñej bu'yi ra' vojityvuntyi' ạva' mu', me' bu'yi yụ'tac”, yi Moisés. 25Uya' bä'yi jiquej in yävätidye' vojity in, yedyety son' in. Tashchety vojity mu'in vämi, vämim' säñi jambi'dyem' ạva'yi. Chat qui mu' uya'yaty vojity mu' vämeban chịmo'che'dye tsan'. 26Chime'dye mu' säñi judye'dye ạva'yetaqui. Chibinyity yoctyi' vämeban' mọ'che'dye, me'dye mu' chime' säñi. Yävätidye'dye me' in vämi mọ'che' in, me'si'dye säñi in mọ'che' vämity in. 27Jäqui've qui mọ' säñi' chime' p̂en. 28Mọ'dyes tsun jéyac, aty vañinyebanya' mu'in in ¿jụ'ñity qui buty ra' vämtyi' mọ'? Ĉaĉaij na tasdye mu'in in yävätidye'yity in p̂entui'tyi' jiquej in tasdye säñi in. 29Jesús vorjeyacsi: —Anic cäj cạtiñe' dyijyedye' mi'in, jeñej aty ra' jam vañin-yeban säñity ĉọcsi u mi'in, ĉaĉaij na jam chị́yebitinte Jen'si' sánacdye' mu', mijam chị́yeptinte ferdye' mu' chime'. 30Aty vañinyebanya' mu'in säñity in, jeñej qui ra' anjer in, me' qui ra' bä'yi in, aty qui ra' jam vämeban' in. 31̣Q̂uin' dyijtuja' vañinyedye' säñitysi' in. ¿Jam adac p̂eyeptinte mi'in ọij Jen'si' p̂eyacdye' mu' mi'indyes, yi mu': 32“Yụ nash Abrahamtyi' Jen' mu', judyeya' Isaactyi' judyeya' Jacobtyi' chime'?”50 Aty me' yi mu' Jen', aty jorojĉan jísin' me' tsan' aty sänaquety in, tsạ' qui nam' in. Jam me' jụijya' in, Jen' ra' jam jun' yi: “Yụ nash mu'intyi' Jen' in” —yi jéyacsi Jesús. 33Mu'in na muntyi' in anic äjjepte ji'chäyitidye' in. 34Mu'in fariseo in aty se'vaquiya' in jun' chuc mu' Jesús tyäpä'teyacsi mu'in saduceo in, chat qui mu'in fariseo pạrej vajmu'yaij in ĉọcte Jesús in. 35Yirity fariseo, jị'chiyacsity yụ'tacdye' Jen'si' mu', mạ'je' tsan' cäjsis p̂eyacdye' dạcbite Jesússi' in, mọ'dyes jéte: 36—Jị'chiyacsity, ¿jụ'ñis buty mọjo'chas yụ'tacdye' Jen'si' mu'? 37Jesús vorjajiti: —Mọ' nash mọjo'chas yụ'tacdye' yi': “Mạ'jemac fer mu' Jen' räjdye ĉojtyi' mi'in, judyeya' ạ'edye' mi'in judyeya' ferdye' mi'in judyeya' dyijyedye' mi'in.” 38Ọij nash mọjo'chas yụ'tacdye', anic tashche' bu'yis. 39Mọ' pärä'yis araj vaj me' bu'yi' yi': “Mạ'jeyacsejam' fer chätidye' mi'in, yojdyem' ĉụi' mạ'jiti u mi'in.” 40Ọij pärä' yụ'tacdye' in anic mọjo'cha'munsi' in. Me' mạ'jeyacsity bä'yi jụijya' mi'in, me' ra' chat räj chiqueptinte Jen'si' yụ'tacdye' mu', judyeya' sánacdye' mu'in jaso'mitity p̂eyacdye' Jen' in. 41Tacya'dyem' mu'ya' fariseo in, 42mu' Jesús jéyacsi: —¿Jätäjyi tyu' u mi'in, tyity buty vóshi' mu' Ji'c̣honacsitytyi' Muntyi'? Vorjete in: —Davidtyi' vóshi' jiquej mu'. 43Jesús vorjeyacsi: —Daviddye jiquej jaji'tŝuti Jen'si' Ạ'edye' mu', yi jéte mu' Ji'c̣honacsity Muntyi': “Mi nash Ayo' yụ.” Davidtyi' vóshi' jụijya' mu', ¿jun' ĉaĉaij mu' yi: “Mi Ayo' yụ”? Ĉaĉaij na yi' sánacdye' Davidsi': 44“Jen' jéte Ayo' yụ: Tacve bu'yi ra' bä'yi yụ́yam jun' qui' chuc yụ ji'penbiye mu'in fáquintyi' in.” 45Ọij jorojĉan jísin' me' tsan' Davidtyi' vóshi' mu' Ji'c̣honacsity Muntyi', anic muju'cha' bu'yi mu' ĉaĉaij na mu'dye David jéte jiquej: “Yụ́tyi' Ayo'”, jéte. 46Me' mu' Jesús tyäpä'te-yacsi räj mu'in in, mọ'dyes qui mu'in aty jam tupuj vorjebajte Jesús in. Tiyacchuti' mọ' mạyedye' jam tyi mạ'je' jéte in yiris vor p̂eyacdye' mu' Jesús ĉaĉaij na aty ji'penacsi p̂eyacdye'ya'.

will be added

X\