Matthew 21

1Jesús jị'chiyactyi'tum mu' aty c̣hẹi'ya' tyiti Jerusalén in, aty ra' venjoij in Betfagéya', mọ' mụcu'ves bä'yedye' Orivoves. Mu'ya' dyäcyi in chat qui mu' Jesús pärä' jutaqui jị'chiyactyi' mu'. 2Mu' jéyacsi: —Tạij mi'in sisvac ọij tashche' bu'yis bä'yedye'. Mọ'ĉan ra' yiris dạquictiñe' bórico, sa'bas ạva'tumsi'. Dajjetiñe' ra' mi'in, úya' ra' tuyitiĉa' yụ mi'in. 3Mạ'je' dyäcjiĉun'nac jụijya' in jéyacsi ra' mi'in: “Ayo' tsun jemonacsi, q̂uin'dye ra' ji'ca'ñiyibunac.” 4Ọij me' jiyi' paj qui cạ̈tsi' mọ' sánacdye' jaso'mitis p̂eyacdye' Jen', yi mu': 5Jéyacseva mu'in Siónĉan bä'yity in: “Atyu' ĉushnac ayo' mi'in. Mu' ĉụi' uya'ya' yu'ti foqui'quiij bóricoche', bóricosche' ạva' mọ'”, yi' sánacdye'. 6Sacti in pärä' jị'chiyactyi' mu', chiquete in jätäjjeyacsi chuc mu'. 7Tuyete in ạva'tumdye mọ' bórico, jäm'chuyete q̂uị'si' mu'in, chat qui foquin'ti mu' Jesús, chat qui mi'i mu'. 8Shach mu'ya' muntyi' in, pạrej natstyeyete in mụijya' quị'si' mu'in, yóche'dyem' ra' yútyi mu' u. Pạrej shantuij in chime'dye natsjeyete mụijya' in. 9Anic shach mu'ya' muntyi' pen'dyetutety in, pạrej tashche' bu'yi in, pạrej jäqui' in. Vaj me' je' p̂eyacdye' in, fer p̂eyaqui in, yi in: —¡Tima'queja uts Davidtyi' vóshim'! Mu' nash jutactyi' Ayo'tyi' tsun, ¡paj Jen' ñịbe'jajiti! ¡Tima'queja mu' Jen' mạyedye'-chety! 10Aty shupquequi Jerusalén-ĉan, räj sacyi mu'ĉantyi' in ma'jotyete in, yi jítidyeij in: —¿Tyi buty uts jo'mety muntyi'? 11Pạrej muntyi' voryi in: —Uts nash Jesús, mu' nash jaso'mitity p̂eyacdye' Jen', Nazaretĉan bä'yity mu', mọ' Galileas jac bä'yedye'. 12Jesús siti Jen'si'ĉan aca' mu', chat qui mu' ji'shupcacsi räj mu'in ji'mincaquity in judyeya' ya'ity in. Mu' äpjeyacsebi mesa mu'in cambiyaijtyi' querec̣ha in judyeya' bä'yaquis mu'in ji'mincai'tyi' ji'co'shayacdyedyes ọ'to' in. 13Jéyacsi mu': —Yi' mọ' Jen'si' sánacdye' mu': “Ọij aca' yụ cọdacdyedyes mọmo' yụ́che'” yi', mi'in qui nam' jam me', mu'ĉan ji'bä'yacsi mi'in shushu'aty muntyi' in. 14Chat qui atsij mu'ĉan in tofety muntyi' in judyeya' mu'in väi'väi'yity in, ĉọshte mu'in in mu' Jesús yóĉandyem' Jen'si' aca' um'. Mu' qui ji'chäcacseban. 15Chime'dye mu'in miqui'muntyi' in fer p̂eyaqui yi in: “Tima'queja uts Davidtyi' vóshi' mu'.” Mu'in na tashchety cudyitity Jen'che' in judyeya' mu'in jị'chiyacsity yụ'tacdye' Jen'si' in, aty cạvepte Jesússi' ferdye' in, judyeya' se'vacsebi p̂eyacdye' miqui'-muntyis in, mu'ya'dye fạ́coij tyeij mu'in in. 16Mu'in jéte in mu' Jesús: —¿Jam adac se'vacsebi p̂eyacdye' mi mu'in tima'quintyi' in? Jesús vorjeyacsi: —Yụ nash se'vacsebi tima'cacdye' mu'in. Mi'in na ¿jam adac mọ' p̂eyetiñe' sánacdye' yi': “Mi Jen' mi nash yụ'tacsi mu'in miquity in judyeya' joijno' in paj qui mu'in anic rụij tima'quin in?” 17Chat qui mu' Jesús mu'ĉan shuban, yạjquiban' mọ' bä'yedye' Jerusalén, Betaniave qui jịjcaij, mu'ĉan qui ĉọshi. 18Nojno mạyedye' pam' mu' Jesús Jerusalénve jijtuban, dáquistum mi'eban. 19Cạve' yiris cätidye' higuera jeijsis majmi. Mọ' ĉọ́que' itŝi' na mọs väsh, shan mọmo' mọ'yam'. Chat qui je' mu' cätidye': —¡̣Q̂uin' chat jadyic mi me'qui'dye jebac väsh mi! Yédye'ĉan mọmo' sacñen' tyei' mọ' cätidye'. 20Mu'in jị'chiyactyi' mu' aty cạve' in anic äjyi mu'in in. Yi jéte Jesús in: —¿Jun' cavintum sacñen' tyei' o? 21Jesús vorjeyacsi: —Yụ jéyac, anicjetinte Jen' jụijya' mi'in, judyeya' jam yocve dyijyi ĉojtyi'ĉan jụijya' mi'in, chime'jetiñe' ra' mi'in chime', yóje'dyem' yụ u sacñen' ji'tyeij ọij cätidye' q̂uin'. Jam ra' mọ' mọmo' me'jetiñe', chime'dye mi'in ra' tupuj jétinte uts mụcu': “Roi'jeva' ojñi'ĉan”, me'dye ra' cạ̈tsi' p̂eyacdye' mi'in. 22Jedye' chuc cọdyetinte Jen', anicjetinte jụijya', jụjbunac ra' cọdacdye' mi'in. 23Chat qui mu' Jesús atsijban Jen'si'ya' aca' mu' jijtuban, mu'ĉan siti. Aty jị'chiyacsiya' muntyi' in, chat qui mu'in tashchety cudyitity Jen'che' in judyeya' mu'in tashchety ĉọjcacsity in ĉọcte jéte in: —¿Tyi ca' me' yu'tyin mi ọij carijtacdye' mi? ¿Tyi buty so'min mi yụ'tacdye' me'sis? 24Jesús vorjeyacsi: —Yụ ra' chime' jéyac yiris cọdacdye', vorjitiĉa' jụijya' yụ mi'in, chat qui yụ ra' jéyac tyi buty yu'tyin yụ. 25¿Tyi buty jayu'ti mu' Juan paj qui mu' chojtacsi muntyi' jiquej in, Jen' buty jayu'ti, are' muntyi' me' yụ'te in? —jéyacsi Jesús. Mu'in ayo' in jítidyeij in, yi in: —¿Jätäjjeja bu ra' tsun? Jéja na ra' jụijya' tsun: “Jen' nash jayu'ti”, mu' ra' jísin': “¿Jun' dash ĉaĉaij jam anicjetinte mi'in?” 26Tsun na ra' jéja jụijya': “Muntyi' nash yụ'te in”, mu'in muntyi' ra' fáquisin' tsun in ĉaĉaij na jutactyi' Jen'tyi' ĉọ́te in mu' Juan —jítidyeij in. 27Mọ'dyes qui jéte Jesús in: —Jam chịj tsun tyi ra' me' bu'yi yụ'te mu' Juan. Jesús jéyacsi: —Yụ chime' jam ra' dam' jéyac mi'in tyi buty yu'tyin yụ paj qui yụ me' ji'shupcacsi. 28Jesús jéyacsi: —Se'vibutiĉam' jäm' ọij p̂eyacdye' yụ. Mu'ya' jiquej yirity muntyi' pärä' ạva' mu'. Mu' muntyi' jéyaqui mu' tashchety ạva' mu': “Ạva' yụ, q̂uin' ra' carijtaqui mi quịjodye'ĉan yụ.” 29Mu' ạva' mu' voryi: “Jam mạ'je' yụ.” Me' tsan' me' yi, jábiya' qui nam' yocve dyijyi mu', mu'ĉan jịjcaij carijtaqui. 30Chat qui mu' muntyi' yoctyi' ạva' jéyaqui mu' chime' paj qui chimu'ĉandye carijtaqui. Mu' ạva' yoctyi' mu' jụjyi tsan' yi: “Jụdyej,” jéyaqui jen' mu', jam qui nam' mu'ĉan jịjcaij. 31Yụ ra' jéyac: ¿jụ'ñity buty ạva' mu' chicaqui jen'? Vorjete in: —Mu' tashchety ạva' mu', chicaqui ĉụi'tyi' jen' mu'. Jesús jéyacsi: —Yụ jéyac, mọ'in me'taquis p̂en in judyeya' mu'in tsim'tety querec̣ha in, mu'in ra' tashche' bu'yi ra' siti in Jen'si'ĉan ayo'bu'yedye'ĉan, jäqui'che' ra' mi'in. 32Me' tsan' atsij mu' Juan chojtacsity jiquej ji'chäquiyinac mọ' rụijsis majmi Jen'si' mu', mi'in qui nam' jam jụjtinte. Me' tsan' cạvacsi mi'in jun' chuc mu'in tsim'tety querec̣ha in judyeya' mọ'in me'taquis p̂en in anicjete in, mi'in qui nam' yejĉoij jam dyijyi juchajche' mi'in mijam dam' anicjetinte mi'in. 33Se'vibutiĉa' ra' mi'in yocsi' jị'ĉocdyes p̂eyacdye' yụ. Mu'ya' jiquej yirity muntyi' jäm'tyety quịjodye' ova quị'tyi'. Sópetui' judyeya' jäm'tye' cuptaquis ova, judyeya' jäm'tye' chime' mọ'ĉan moches cạvacdyes quịjodye'. Aty ijaijya' jäm'tye' jo'memes, chat mu' yụ'tyeyacsi ĉọjcaptety in, mu'in ra' ji'cheteyebajte in mọ' vädacdye', chat qui yocsi've jac jịjcaij mu'. 34A na p̂uri'ya' mọ' cätidye', aty cha'shaqui tupudye' intsidyedye' mọ'sim', mu' muntyi' jutacseban úñity mu' paj qui mu've jịjcaij in ĉọcseĉan in mu'in ĉọjcaptety in quịjodye' mu', paj qui cọdyetacseban mu'in ji'chetacdye' muntyidyes in. 35Mu'in na ĉọjcaptety in tapjepte úñity in. Yirity úñity mu' untupte in, yoctyi' na ijapte in, judyeya' yoctyi' na farajñepte mijya' in. 36Mu' muntyi' cuvij yoctyi' úñity mu' juteyeyacsi, dadam' dai' jutacsi. Mu'in na ĉọjcaptety quịjodye' in anic ñịbe' jị'cavacsi mu'in in, yojdyem' mu'in tashchety jiquej u in, me'jeyacsidye in. 37Jäqui've qui ĉụi'tyi' ạva' mu' jutaqui. Yi mu': “Mu' ra' chat ạ̈räjjibun ạva' yụ in.” 38Mu'in na ĉọjcaptety quịjodye' in, aty cạvebite ạva' in, vaj mu'in jítidyeij in: “Uts nash ạva' mu' a'tumtyi' quịjodye'. Dam'dye jäm' ijaja mu' paj qui tsundyes qui ọij jac, säñiya' a' mu'.” 39Anicdye me', chute in judyeya' ji'shupjajte in quịjodye'ĉantyi' chat qui ijate in. 40Chat qui mu' Jesús jéyacsi: —Mu' a'tumtyi' quịjodye' ĉọcsequi jụijya' mu'in ĉọjcaptety quịjodye' in, ¿jun'jeyacsi buty ra' mu'? 41Mu'in vorjete Jesús in: —Mu' ra' tasjeyacsi ijacsi mu'in ac̣hi'yity muntyi' in, jam ra' dam' ạ̈räjjeyacsi mu'. Chat qui ra' mu' yoctyi' so'macsi ĉọjcaptety quịjodye' in. Chat mu'in ra' so'mete in ji'chetacdye' in aty ayijya' tupudye' vädacdyes mọ' cätidye'. 42Chime'dye mu' Jesús jéyacsi: —Jam adac p̂eyetiñe' ọij sánacdye' yi': “Mu' mij va'quectety acaijtyi' jiquej in, mu' q̂uin' muju'cha' yụ'tac acadyety. Mu'dye Ayo' tsun me' yi ĉụi'si' dyijyedyem', mọ' anic där äjyeja' tsun.” 43Mọ'dyes yụ jéyac mi'in, me' tsan' mu' Jen' dyijtunac jiquej mi'in paj qui Jen'si'ĉan ayo'bu'yedye' mu' siti mi'in, mu' qui na ram' va'quicnac mi'in, yoctyi' qui ra' yụ'tacsi, mu'in qui ra' siti in ayo'bu'yedye'ĉan mu', tyi chuc chiquetety in jun' chuc mạ'je' mu'. 44Tyi chuc jọ'chaij mijche' tŝọij fajche', mu' ra' are' tŝọij. Tyi chuc fajche' jị'tŝote mij, mu' ra' räj nụi' jayu'ti. 45Mu'in tashchety cudyitity Jen'che' in judyeya' mu'in fariseo in, aty se'vepteya' in jị'ĉocdyes p̂eyacdye' mu', anic jị'fajqueyete in ĉaĉaij na chịj in mu'indyem' p̂eyacsi mu' Jesús, p̂eyacdye'ya' mu'. 46Mọ'dyes qui mu'in in mạ'je' tsan' ji'ĉär'te in Jesús, jam qui nam' jun'te in ĉaĉaij na quijnacsi muntyi' in, mu'in na chị́yetety in mu' Jesús jutactyi' Jen'tyi' mu'.

will be added

X\