Matthew 20

1Me' bu'yi' ayo'bu'yedye' Jen'si' mu', jeñej bu'yi' yirity muntyi' quevacsity carijtaquity in. Pam' sacyi mu' quevacsequi muntyi' in paj qui ovaĉan carijtaqui in. 2Mu' jéyacsi, “Yụ ra' ya'itye' mạyedye' yirity ficha plata”, chat qui jutacsi paj qui carijtaqui in quịjodye'ĉan mu'. 3Aty moche' tsun, quivij sacti prasaya' jịjcaij, cạvacsi yoctyi' muntyi' itŝity carijtacdye' in. 4Chat qui mu' jéyacsi: “Tạij mi'in chime', carijtaĉam' quịjodye'ĉan yụ, yụ ra' ya'ityepyac carijtacdye' mi'in.” Jụjjete in, mu'ĉan jịjcaij in. 5Aty quichĉan tyiti tsun yoctyi' qui tucsi carijtaquity in, judyeya' aty rocve tsun chime'dye yoctyi' qui tucsi carijtaquity in. 6Aty jä'dyäijdyety tsun cuvij prasaya' jịjcaij, cạvacsi yoctyi' muntyi' in rụi'cujcuquen in. Mu' jéyacsi: “¿Jun' dash úya' me' bu'yi mi'in dyutsen' mạyedye'?” 7Mu'in vorjete in: “Ĉaĉaij na jam tyi ji'carijtyin tsun in.” Mu' muntyi' jéyacsi: “Tạij mi'in yụsĉan quịjodye' jịjcajam' mu'ĉan carijtaĉam'.” 8Aty shocam, mu' muntyi' jéyaqui nọ́taquity mu': “Fayacsebada mu'in carijtaquity in, ya'itacsebada, tashche' ra' mu'in jäqui' atsijtyi' in jun' qui' chuc mu'in tashche' atsijtyi' in.” 9Anicdye me', tashche' mu'in ĉọshtety in mu'in jä'dyäijdyety tsun sitity carijtacdye'ĉan in. Mu'in so'mac in yirity ficha plata. 10Jäqui've yoctyi' ĉọshte in mu'in pam' tiyacchui' carijtaquity in, jeñej ra' muju'cha' so'mac ĉúti in, jam na me', vaj me'dye jịjcaij in, yirity mọmo' ficha plata so'mac in. 11Aty so'macya' in, chat tiyacchui' p̂eijte in mu' muntyi'. 12Yi jéte in: “Uts jäqui' atsijtyi' in yiris mọmo' hora carijtaqui in, tsun na dyutsen'jety tsan' mạyedye' carijtaqui tsun, me'qui' tsan' jị'ĉojte tsun tsun. Uts na vaj me'dye ya'ityitiĉa' tsun mi'in jäqui' atsijtyi'tum in,” yi jéte in. 13Mu' quịjodye'tumtyi' jéte mu' yirity carijtaquity muntyi': “Chätidye', yụ jam shi'atuye ĉaĉaij na mídye tashche' jụjjiptim p̂eyacdye' yụ, me' bu'yi yirity ficha ya'ityeye yiris mạyedye'. 14Mọ'dyes tapjeme uts querec̣ha, tạij acatubada. Yụ mạ'je' so'mete uts jäqui' atsijtyi' vaj cätsdye mítum, 15ĉaĉaij na ĉụi'tyi' querec̣ha yụ, mọ'dyes me' tupuj so'macsi yụ, jun' qui' chuc mạ'je' yụ. ¿Jam buty ma'jotyitim paj qui yụ ñịbe'jeyacsi uts in?” 16Chat qui yi mu' Jesús: —Mu'in uya'yaty q̂uin' in mu'in ra' jäqui've muju'cha' shupqui in, mu'in na muju'chaty q̂uin' in mu'in qui ra' jäqui've uya'ya' shupqui in. 17Aty majmiya' in Jerusalén-ve jịjcaij in, mu' Jesús pạrejjeyaqui jị'chiyactyi' mu' muju'veya' cạqui, mi'edye'ĉan mu' jéyaqui: 18—̣Q̂uin' tsun Jerusalénĉan jịjcaja' tsun. Mu'ĉan ra' ji'me'tyin yụ in ayo'ya' yụ Anictyity Muntyi' yụ, mu'inya' ra' ji'me'tyin yụ in tashchetyya' cudyitity Jen'che' in judyeya' mu'in jị'chiyacsityya' yụ'tacdye' in, mu'in ra' yu'tyiyin p̂eyacdye' yụ in ji'ijacdyes yụ. 19Chat qui ra' ji'me'tyin yụ in yoctyi'ya' ayo' in jam judíoya' in. Mu'in ra' dyisactyin yụ in, judyeya' ra' si'bin yụ in, judyeya' ra' croshche' pactyin yụ in, chibin qui na ram' mạyedye' me' bu'yi yụ, chat qui ra' vañinyeban yụ. 20Ayij Zebedeos p̂en mu' pärä'dye ạva' mọ', mu' Juan judyeya' mu' Santiago, ĉọcte in mu' Jesús. Mọ' dyụtsyi' Jesússi'ya' vej mu', judyeya' cọdyete mọ'. 21Jesús je': —¿Jedye' mạ'jem? Mọ' jéte: —Yụ mạ'je' paj qui uts ạva' yụ úvemun bu'yi míya' in aty ayo'bu'yedye'ĉan jụijyam, yoctyi' ra' tacve bu'yi, yoctyi' ra' q̂uimve bu'yi. 22Jesús vorjebi' ạva' mọ': —Mi'in jam chịj jedye' chuc mọ' cại' mọ' p̂eyacdye' mi'in. ¿Tupuj buty cätsbutiĉa' yụs ñịbedyes mi'in? Vorjete in: —Tupujbiyac tsun. 23Jesús jéyacsi: —Anicdye me', cätsbutiĉa' ra' ñịbedyes yụ́si' mi'in, jam qui nam' yụ yụ'tac paj qui yụ'tacsi yụ tyi chuc ra' úvemun bu'yidyety yụ́ya' in, tacve bu'yi judyeya' q̂uimve bu'yi. Mu'dye Jen' yụ tsim'tacsi tyi chuc ra' yụ́ya' úvemun bu'yity in. 24Yoctyi' jị'chiyactyi' mu' yiri'tac in, fạ́cacsebi in cọdacdye' mu'in pärä' vaj vojitysi' in. 25Mọ'dyes mu' Jesús vajmu'ya'je-yaqui jị'chiyactyi' mu', jéyaqui: —Mi'indye chịj jun' chuc mu'in jacchety ayo' in anic son' bu'yi yu'ti in ayo'bu'yi muntyidyes in, me' mu'in ferbu'yity in anic ferche' jutacsi muntyi' in. 26Mi'in qui na ram' jam me', pạrej mạ'je' jụijya' muju'cha' bu'yi yu'tity, jemoñe' nọ́taquity yu'ti yoctyidyes mi'in. 27Tyi chuc mạ'je' tashche' bu'yi jụijya', jemoñe' úñi yu'ti yoctyidyes in, 28yojdyem' yụ u Anictyity Muntyi' yụ, ĉaĉaij na jam me'dyes atsij yụ jam ra' muntyi' ñútyin yụ in. Yụ atsij nọ́tyetacsetity mọmo' yụ dai'tyi' muntyi' in. Ĉụi' ji'säsdyi yụ mọ'dyes me' ra' säñi yụ paj qui tupuj ji'c̣honacsiij mu'in in. 29Chat qui jọban in yạjquiban' in mọ' Jericó. Shach muntyi' cäc̣hä'chute Jesús in. 30Pärä' mu'ya' tofety muntyi' in, jeij majmi bä'va'joij in. Aty chịj in mu' Jesús cajnacsi mu'ya', mu'ya'dye tiyacchuti fer p̂eyaqui, yi in: —¡Jị'chiyacsity, Davidtyi' vóshim', ñịbe'jitiĉam' tsun! 31Mu'in na muntyi' in dyäcjeĉúnacsebi tsan' p̂eyacdye' mu'in, mạ'je' tsan' ji'tyäpacsi in. Mu'in na dadam' muju'cha' äjyi in, jéte Jesús in: —¡Jị'chiyacsity, Davidtyi' vóshim', ñịbe'jitiĉam' tsun! 32Chat qui mu' Jesús dyäcyi, fayacsi tofej muntyi' in, jéyacsi mu': —¿Jedye' mạ'jityitiĉa' u mi'in? 33Mu'in vorjete in: —Jị'chiyacsity, paj ji'naijbutiĉa' tsun mi'in. 34Jesús ñịbe' ĉọcsi, chat mu' qui toco'jeyacsebi vej mu'in. Toco'yedye'ĉan mọmo', me'ĉandye naijbun in chat qui mu'ya'dye cäc̣hä'chute Jesús in.

will be added

X\