Matthew 2

1Jesús na'i Belénĉan, Judea tịj mọ' jacsi', yoqui'dyem' ayo'bu'yiya' Herodes jiquej u.32b Atsij in pạrej mu'in chị́quity ọ́rota'ya' in, pam'vety atsij in Jerusalénĉan shupqueti in. 2Yi jéyacsi muntyi' in: —¿Juna' buty mu' na'ity ayo'bu'yity ra' judíodyes in? Pam've cạvete tsun jị'ĉocdyety ọ́rota' mọ'dyes atsij tsun mạ'je' tima'quete tsun mu' na'ity joijno'. 3Mu' ayo' Herodes aty se'vacsebiya' p̂eyacdye' mu'in, anic yoqui tyeij, räjtumdye Jerusalénĉan bä'yity in. 4Mọ'dyes mu' Herodes vajmu'ya'jeyacsi mu'in tashchety cudyitity Jen'che' in judyeya' mu'in jị'chiyacsity yụ'tacdye' in, chat qui yi jéyacsi: —¿Juna' buty ra' na'i mu' Ji'c̣honacsity muntyi'? 5Mu'in yi vorjete in: —Belénĉan ca ra' na'i, mọ' Judeaĉansi' jac, yi nash jiquej mu' jaso'mitity p̂eyacdye' Jen' jiquej, yi' sánacdye': 6“Mi Belén, Judáĉansim, me' tsan' miquis bä'yedye' mi, mọjo'cha' bu'yi' qui nam' mi ĉaĉaij na mu'ĉan ra' na'i yirity Ayo', mu' ra' ayo'bu'yi muntyidyes yụ Israeltyi' vóshi' in”,33 yi' sánacdye' —jéte in mu' Herodes. 7Chat qui mu' Herodes pạrejjeyacsi mu'in chị́quity ọ́rota'ya' in, caminve jéyacsi: —¿Jun'dyeya' ca' tiyacchuti ji'caviti mu' ọ́rota'? 8Chime'dye mu' jéyacsi: —Tạij mi'in Belénĉan jịjcajam' quevicmac mu' miquity. Dạctinteya' ra' mi'in, atsijban ra' mi'in úya', jítiĉa' ra' yụ mi'in paj qui yụ chime' tima'quecte. 9Aty me'si' se'vepteya' p̂eyacdye' ayo'si' in, chat qui sacti in. Mu'dye ọ́rota' pam've cạvetety jiquej in mu'dye jịjcatyete in jun' qui' chuc cha'she' in mọ' aca' yóĉandyem' miquity u, mu'ya' dyäqui mu' ọ́rota'. 10Aty cạveteya' in mu' ọ́rota' dyäqui, anic där ma'joij in. 11Chat qui siti aca'ĉan in cạvete mu'ĉan miquity in judyeya' tse' mu' María, mu'ĉan dyụtsyi in tima'quete in. Jäcaqui ñịbe'yedyes mu'in mọjo'cha' jäm'si' mọ' so'mete in, oro, judyeya' ji'co'shayacdyesi' jẹrejres, judyeya' yäcäs jẹrejres mirra tịj mọs. 12Chat qui tamin'dye'ĉan Jen' jéyacsi paj qui yocve tyeban in, jam Herodesya', me' bu'yi ĉụi'si'ĉan jac jijtuban in. 13Mu'in chị́quity ọ́rota'ya' in aty me'si' jọban in chat qui Jen'tyi' anjer mu' tamin'dye'ĉan ji'caviti Joséya'. Jajiti: —Sacta Egiptoĉan jịjcava tiĉav'queme mu' miquity tse'tumdye. Mu'ĉan ra' taĉan me' bu'yim jun' qui' chuc yụ jébadyeye, ĉaĉaij na mu' Herodes quevte ra' mu' miquity, mạ'je' ijate. 14Me'dye mu' José tsạ'i tsedyedye', ji'ĉav'quete mu' miquity tse'tumdye, mu've jịjcaij Egiptoves majmi jịjcai'. 15Mu'ĉan me' bu'yi in jun' qui' chuc säñi mu' ayo' Herodes, q̂uin'dyem' shuban Egiptoĉan in. Me' cạ̈tsi' Ayo'si' p̂eyacdye' mu', sáñe' mu' jaso'mitity p̂eyacdye' Jen' jiquej. Yi' mọ': “Yụ fayaqui ĉụi'tyi' Ạva' yụ paj shuban Egiptoĉan.”34 16Mu' Herodes aty cạve'ya' jun' chuc mu'in chị́quity ọ́rota'ya' in väñätute in, chat qui mu' fạ́coij tyeij. Jutacsi qui väc̣hä'tyity mu' paj qui ijacsi in mu'in miqui'muntyi' son' in, räj Belénĉan bä'yity in judyeya' c̣hẹi'ya' bä'yity chime' in. Pärä' yómodye'yity in judyeya' joijno' in chime', räj ijacsi in, ĉaĉaij na me' mu'in yi in chị́quity ọ́rota'ya' in, aty pärä' yómodye' tyiti cạvete ọ́rota' jiquej in. 17Me' cạ̈tsi' mọ' p̂eyacdye' jaso'mititysi' Jen' Jeremías tịj mu'. Mu' sáñe' yi': 18“Fersi' táredye' mu'in Ramáĉan bä'yity in vóshi' mọ' Raqueltyi', anic fer táraqui ạva' mu'in. Jam jun' tyäpi' táredye' mu'in ĉaĉaij na aty itŝij ạva' mu'in.” 19Aty säñiya' mu' Herodes chat qui Jen'tyi' anjer mu' tamin'dye'ĉan ji'cavibun Joséya' Egiptoĉan. 20Yi jajiti: —Sacta, Israelĉan jịjcabada cạbajme mu' miquity tse'tumdye, a nash säñi mu'in mạ'je' ijatety jiquej in mu' miquity. 21Me'dye mu' sacbun Israelĉan jijtuban, tubajte mu' miquity tse'tumdye. 22Chị́qui mu' aty qui mu' Arquelao Judeaĉan ayo'bu'yi,35 jeñej bu'yi jen'vun jiquej mu' Herodes. Mọ'dyes mu' José noi'yi, aty jam mạ'je' ĉụi'situban bä'yedye' mu', cuvij tamin'dye'ĉan jéyac, mọ'dyes qui Galileave jịjcaij mu'. 23Nazaretĉan qui bä'ban mu' mọ' Galileaĉansi' bä'yedye'. Me' ọij cạ̈tsi' p̂eyacdye' mu'in jaso'mititysi' Jen' jiquej in. Yi' in: “Mu' nash Nazaretĉantyi'”, jéte ra' in.

will be added

X\