Matthew 19

1Jesús aty me'si' jị'chiyacsi ọij, chat qui jọban mu' yạjquiban' Galilea, roi'je' Judeave jịjcaij nopej Jordán. 2Anic shach muntyi' cäc̣hä'chute in, Jesús ji'chäcacseban japacjoijtyi' in. 3Pạrej atsij fariseo in mạ'je' se'veshbite p̂eyacdye' in, vatyquej ra' mọ'ya' cäjsis tui' jụijya'. Jéte in: —¿Yirity muntyi' tupuj buty yacchuqui p̂en mu' ĉụi'si' mạ'je' jụijya' mu'? ¿Jätäjyi' buty yụ'tacdye' Jen'si' mu'? 4Vorjeyacsi Jesús: —¿Jam adac p̂eyetiñe' mi'in ọij Jen'si' sánacdye' mu'? Yi', tashche' jiquej mu' Jen' jäm'tacsi muntyi' in, son' judyeya' p̂en jäm'tacsi.47 5Yi mu' Jen': “Me'dye qui mu' muntyi' yacchuqui ĉụi'tyi' jen' mu' judyeya' tse' mu', paj qui pạrejti p̂entum bä'yi, aty qui jam pärä' muntyi' cạvacsi Jen', yirity bu'yi cạvacsi Jen'.”48 6Mọ'dyes aty jam pärä' muntyi' cạvacsi Jen', jeñej yirity qui mọmo'. Mọ'dyes muntyi' in aty jam ra' pạrejmun yụ'tacsi in ĉaĉaij na Jen'dye yiri'ya' yụ'tacsi. 7Fariseo jéte in: —Me' yi jụijya' Jen', ¿jun' qui buty mu' me' Moisés yụ'tye' yocsi' yụ'tacdye' yi': “Yirity muntyi' mạ'je' jụijya', tupuj so'me' p̂en mu' yiris yacchutidyes paper, chat qui q̂uin'dyem' yacchui' mu'?” 8Vorjeyacsi Jesús: —Anicdye me' so'minac Moisés p̂eyacdye' tupuj qui tiĉav'-cac-dyes p̂en mi'in, ĉaĉaij na anic yäcäj ĉojtyi' mi'in, jam me'dyes Jen' jäm'tye' jiquej jäm'tacsiya' muntyi' in. 9Yụ na jéyac, yirity muntyi' yacchui' jụijya' ĉụi'si' p̂en mu' jam vo'voi'si' jụijya' mọ', judyeya' qui vämi yocsi'che' p̂en jụijya' mu', aty mọ' juchaj shupqui' mu'. 10Chat qui jị'chiyactyi' mu' jéte in: —Me' jụijya' jam jun' yacchuĉa' p̂en jụijya' tsun, dam'dye jäm' jam vämeja' tsun —yi jị'chiyactyi' mu'. 11Vorjeyacsi Jesús: —Jam nash ọij räjtumdyes p̂eyacdye', pạrej so'mac Jen'ya' in, mu'indyes mọmo' ọij p̂eyacdye' in. 12Pạrej muntyi' jam tupuj vämi in, ĉaĉaij na na'idye' me' in jam jäm'si' a' mu'in, yoctyi' na in jäctyetac a' mu'in muntyi'ya' in, mọ'dyes qui jam tupuj vämi in, judyeya' chime' pạrej jam p̂en cạve'tyi' in mu'in muju'cha' carijtaqui Jen'dyes in. Tyi chuc tupuj me' yirity bä'yity in, jemoñe' mem' in, mu'in ra' cäc̣hä'chui' in ọij ji'chäyitidye'. 13Pạrej muntyi' in tuyete Jesús miqui'muntyi' in paj qui mu' toco'jeyacsi judyeya' cọdyete Jen' mu'indyes in. Mu'in na jị'chiyactyi' mu' tiyacchuti fạra'nacsi in mu'in tuyetety in. 14Jesús jéyacsi jị'chiyactyi' mu': —Jam ra' ñutsjeĉúnacsi mi'in uts miqui'muntyi' in, paj yụ́ya' atsij in. Tyi chuc sitity ra' Jen'ya' in ayo'bu'yedye'ĉan mu', mu'in ra' jeñej bu'yi uts miqui'-muntyi' q̂uin' in. 15Mu' qui Jesús toco'-jeyacsetaqui chat qui jọban. 16Atsij yirity muntyi' ĉọshte Jesús jéte: —Jị'chiyacsity, ¿jedye' buty jemoñe' jäm'si' carijtacdye' yụ paj qui tupuj Jen'ya' bä'yi yụ? 17Vorjajiti Jesús: —¿Jun' dash me' ji'jäquem jäm'si' jedye'? Yirity mọmo' jäm'tyi' mu'ya'. Mạ'je' Jen'ya' bä'yi jụijya' mi, jemoñe' chiquepte yụ'tacdye' mi. 18Mu' muntyi' jéte Jesús: —¿Jụ'ñis buty yụ'tacdye'? Vorjajiti Jesús: —Ọij nash yi': jam ra' ijate muntyi' mi, jam ra' vo'voij mi, jam ra' shu'aij mi, jam ra' väñädye'ya' ji'me'te muntyi' mi, 19jäm'jeyaqui ra' ĉụi'tyi' jen' mi judyeya' tse' mi,49 judyeya' fer ra' mạ'jeyacsi chätidye' mi, yojdyem' ĉụi' mạ'jiti um, me' me' yi' yụ'tacdye'. 20Mu' muntyi' vorjete: —Räj ọij yụ chique'. ¿Jụ'ñisdyety buty taca' jayej yụ? 21Vorjajiti Jesús: —Mạ'je' jụijya' jam jayej jedye' mi, jemoñe' ji'mincaqui tas ĉụi'si' jedye' mi, judyeya' mu' querec̣ha so'macsi mi mu'in jayejjotaquity jedye' in, me' ra' chat mọ'ya' bijodye' mi mạyedye'che', chat qui ra' q̂uin'dyem' cäc̣hä'chutim —yi jéte. 22Mu' muntyi' aty se'vepteya' mọ' p̂eyacdye' mu', chat qui jọban mu' anic táredye'tum ca'ñibun, ĉaĉaij na anic jiyi' dai' me'chui' jedye' mu'. 23Chat qui mu' Jesús jéyaqui jị'chiyactyi' mu': —Yụ jéyac, anic carij mu'in jedye'tumtyi' in paj qui Jen'ya' bä'yi in ayo'bu'yedye'ĉan mu'. 24Cuvij yụ jébadyeyac, dadam' mọjo'cha' carij mu'in jedye'tumtyi' in paj qui Jen'ya' bä'yi in ayo'bu'yedye'ĉan mu', uya'ya'dye carij jiyi yirity cameyo socor'muñi yóquesĉan to' mọ' —jéyacsi Jesús. 25Mu'in jị'chiyactyi' mu' äjjepte mu'in p̂eyacdye' in, jéte in: —Me' jụijya' ¿tyi buty tupuj c̣hoñi in? 26Jesús cạvacsi jéyacsi: —Anicdye me', muntyi' in jam tupuj ĉụi' c̣hoñi in, Jen' tupuj ji'c̣honacsi ĉaĉaij na itŝi' méqui' carij Jen'dyes. 27Chat qui Pedro jéte: —Jesha', tsun jiquej räj farajjeyaqui ĉụi'si' jedye' tsun paj qui cäc̣hä'chuyac mi. ¿Jedye' buty ra' bijodye' tsun? 28Jesús vorjeyacsi: —Yụ anic jéyac, aty ra' mọ'ya' mụi'sis jac jụijya', yụ nash Anictyity Muntyi' yụ ra' ferdye'-tum ayo'bu'yi, mi'in cäc̣hä'chu-tiĉaty q̂uin' yụ mi'in, mi'in yiri'tac pärä' jiyity mi'in, mi'in ra' chime' ayo'bu'yi Israeltyidyes vóshi' in, mu'in yiri'tac pärä' jiyi ñuru'tyity-ya' in, mu'indyes ra' ayo'bu'yi mi'in. 29Tyi chuc farajjeyaqui ĉụi'si' jedye' in, judyeya' chätidye' mu'in paj qui cäc̣hä'chun yụ in, mu'in ra' so'mac bijodye' in. Tyi chuc yụ́dyes farajjeyaqui vojity mu', judyeya' voji' mu', judyeya' tse' mu', judyeya' jen' mu', judyeya' ạva' mu', judyeya' aca' mu', judyeya' jac mu', mu'in ra' muju'cha' so'mac bijodye' in, cien qui' ra' so'mac in. Chime'dye ra' so'mac in paj qui Jen'ya' bä'yi in. 30Mu'in muju'chaty q̂uin' in, mu'in ra' uya'ya' shupqui in, mu'in na uya'yaty q̂uin' in, mu'in ra' muju'cha' shupqui in.

will be added

X\