Matthew 18

1Aty me'si' mu'in jị'chiyactyi' Jesústyi' mu' ĉọcte in jéte in: —¿Tyi ca' muju'cha' bu'yi ayo'bu'yedye'ĉan Jen'si' mu'? 2Chat qui Jesús yirity fayete miquity, mu'insi'ya' vej yụ'te Jesús. 3Chat qui jéyacsi mu': —Yụ anic jéyac, jemoñe' caman' dyijyeban mi'in jeñej yirity dyijyi miquity, jam jụijya' me' mi'in, jam ra' jun' siti mi'in ayo'bu'yedye'ĉan Jen'si' mu'. 4Tyi chuc ọya'ya' jéyaqui ĉụi'si' dyijyedye' mu' jeñej bu'yi uts miquity q̂uin', mu' ra' muju'cha' bu'yi ayo'bu'yedye'ĉan Jen'si' mu'. 5Tyi chuc yụ́dyes tiĉun'te yirity anicjintyi' yụ, yódyem' uts miquity q̂uin' u, yụ́dyem' tiĉuñin yụ in. 6Därsi' ra' va'tacdye' cại' in tyi chuc ji'juchayacsity in mu'in anicjintyi' yụ in, me' tsan' miquity. Me'tyity ra' in dam'dye jäm' turu'jeyeyac mij därtyi' tujĉan mu'in, chat qui ra' va'cac marĉan in. 7Därsi' va'tacdye' ra' cại' in úchety ra' in, tyi chuc ji'juchayacsity in. Jam jayej mu'in ji'juchayacsity in, därsi' qui na ram' va'tacdye' cại' mu'in in tyi chuc me' ji'juchayacsity anicjintyi' yụ in. 8Jesha' ĉụi'si' un mi judyeya' yuj mi, mọ' ji'juchayin jụijya' mi, jemoñe' tätsjeyaqui un mi judyeya' yuj mi va'quequem. Dam'dye jäm' tacniij mọmo' siti Jen'ya' mi, uya'ya' qui va'cac mi jam quiv'joi'si'ĉan tŝij, pären'dye un mi judyeya' pären'dye yuj mi. 9Chime'dye vej mi mọ' ji'juchayin jụijya', jemoñe' fon'jeyaqui vej mi va'quequem. Dam'dye jäm' itŝi' pen' vej mi siti Jen'ya' mi, uya'ya' qui va'cac tŝijĉan mi pären'dye vej mi. 10Jam ra' äcäijjeyacsi mi'in mu'in anicjintyi' yụ in me' tsan' miquity in. Yụ jéyac, mu'intyi' anjer in ĉọjcacsity in, Jen'si'ya' vej bä'yi in mạyedye'chety Jen' yụ. 12Jesha' yirity muntyi' me'chui'tyi' yiri' cien oveca jụijya', montaqui jụijya' yiris oveca, ¿jun' buty ra' mu'? ¿Jam buty ra' farajjeyacsetaqui chum mọ'ya' in mọ'in arajtac qui'tac arajtac jiyis oveca in, paj qui quevjan' mọ' moñis oveca? 13Jéyac, aty dạĉan'ya', där ra' ma'joban mu', mọjo'cha' ra' mu' ma'jotye' mọ' yirissis moñis oveca, ọya'ya' mu' ma'jotacsi arajtac qui'tac arajtac jiyis oveca in jam moñis in. 14Me'dye chime' mu' mi'intyi' Jen' mạyedye'chety, mu' mạ'je' paj qui jam yirity moñi uts miquity in. 15Juchatunac jụijya' anicjetety Jen', jemoñe' ĉọctinte, pạrej voro'mac jam qui se'vaqui yoctyi' in. Se'vibunac p̂eyacdye' jụijya' mi'in, aty jụj ja'yebajtinte vojity mi'in. 16Jam na mạ'je' chäquinac jụijya' mu', jemoñe' quevtinte yoctyi' vojity mi'in, yirity judyeya' pärä', quivij ra' ĉọctinte mu' juchatunactyi' jị'chiqueyebajtinte ra' mi'in. Me' ra' jị'cäts yụ'tiñe' sánacdye', yi': Jemoñe' pärä' judyeya' chibin mu'in se've'tyi' in ji'me'tacdye'. 17Taca' jam mạ'je' chäquinac jụijya' mi'in, jemoñe' ji'chiqueyacsi mi'in mu'in anicjetety Jen' in. Taca' jam se'vacsebi p̂eyacdye' jụijya' mu'in, jemoñe' qui yoc ĉọ́tinte, jeñej jam anicjetety Jen' jeñej tsim'tety querec̣ha, me' bu'yi qui ra' ĉọ́tinte mi'in. 18Yụ jéyac, jedye' chuc ñucjetiñe' jacches jụijya' mi'in, mọ' aty ñucje' Jen' mạyedye'che', jedye' chuc dajjetiñe' jacches jụijya' mi'in, mọ' aty dajje' Jen' mạyedye'chety. 19Chime'dye yụ jéyac, pärä' mi'in úchety mi'in vaj cäts dyijyi jụijya' mi'in cọdyetinte Jen', yụ́tyi' Jen' mạyedye'chety, mu' ra' jụjbunac cọdacdye' mi'in. 20Me' vajmu'yaij yụ́si'che' tịj jụijya' mi'in, me' tsan' juñucsi' mọmo' mi'in, mu'ya' yụ chime' pen'dyetuyac. 21Chat qui mu' Pedro ĉọcte Jesús jéte: —Jị'chiyacsity, vojity yụ yejĉoij juchatun jụijya' yụ, ¿juñucsi' qui' buty tupuj paj qui jam dyijtubibajte yụ juchaj mu'? ¿Tupuj buty yävätidye' qui'? 22Jesús vorjajiti: —Yụ jéye jam ra' yävätidye' qui' mọmo', me' tsan' dai' qui' juchatun jụijya' mu', me' tsan' vạjpedye' qui' cien arajtac jiyi' qui' juchatun mi, jam ra' jun' dyijtubibajtem mọ' juchadye' mu'. 23Me' bu'yi' ayo'bu'yedye' Jen'si' mu', jeñej yirity ayo' cọdyetacsi san'quejĉoi'si' déve mu'in nọ́taquitysi' mu'. 24Aty tiyacchutidye'ĉan tuyete in yirity nọ́taquity mu', anic jiyi dai'tyi' déve mu', juñucsi' qui'tac millones yụ'tye' déve mu'. 25Mu' nọ́taquity jam jun'bajte ya'ityebajte ayo' mu', mọ'dyes qui mu' ayo' jéyacsi paj qui ji'mincac mu' nọ́taquity, úñity qui shupqui, p̂entumdye judyeya' räj ạva' mu' ji'mincac, paj qui dam' uya'ya'joban' déve mu'. 26Mu' nọ́taquity dyụtsyi ayo'si'ya' vej mu', fer cọdyete jéte: “Bistyityiti' ram, tas ra' jiya'dyeye yụ.” 27Mu' qui ayo' ñịbe' ĉọ́te mu' nọ́taquity vayacjepte tas mọ' därsi' dévevun mu', chat q̂uin'dyem' c̣hoñi. 28Mu' nọ́taquity jọban rébebajte yoctyi' nọ́taquity pen'dye' mu', mu' déveijtyi' miqui'. Mu' tashchety nọ́taquity tapjajiti tujĉan jajiti: “Jiya'dyiyiti' ram' q̂uin'dye mọ' dévetutis mi.” 29Pen'dye' mu' dyụtsyi mu'si'ya' vej mu' fer cọdyete jéte: “Bistyityiti' ram, yụ ra' jiya'dyeye tas.” 30Mu' nọ́taquity jam jụjte, ji'ĉär'tem' ĉär'taquisĉan jun' qui' chuc tas jiya'dyeyete mu'. 31Mu'in na yoctyi' nọ́taquity in aty chị́quiya' in, anic yoqui mu'in in, ĉọcte in mu' ayo' jéte in jun' chuc mu' nọ́taquity. 32Mu' qui ayo' jaji'vorviti jajiti: “Där ac̣hi'tyity mi. Yụ nash tas vayacjepye déve mi jiquej, ĉaĉaij na me' cudyityitim. 33Jemoñe' qui tsan' mi ñịbe' ĉọte pen'dye' mi, yojdyem' yụ u ñịbe' ĉọ́ye.” 34Anic där mu' fạ́coij ayo', chat qui so'macsi mu'in ĉọjcacsity ĉär'taquity in, jéyacsi paj qui va'tacdye' so'mete in jun' qui' chuc tas jiya'dyeye' déve mu'. 35Chime'dye jéyacsi Jesús: —Chime'jinacdye ra' yụ́tyi' Jen' mạyedye'chety räj mi'in, yejĉoij dyijtucsebiban vojitysi' juchaj jụijya' mi'in. Mọ'dyes jam ra' jun' dyijtucsebi mi'in juchatunactyi' jụijya' in.

will be added

X\