Matthew 17

1Aty jäbän mạyedye' jiyi', chat qui mu' Jesús därtyi'che' mụcu' bojvi, mu'in mọmo' cạcsi Pedro judyeya' Santiago vojitytumdye mu' Juan, mijam yoctyi' cäc̣hä' mu'ya' in. 2Mu'che' mu' Jesús yocdyejyi mu'insi'ya' vej mu'in, anic pashyi vejya' jeñej tsun jo'meij, chipashyidye quị'si' mu' jai'baty mu'. 3Ĉụi'dye mu'in ji'caviti in Moisésvun judyeya' Elíasvun, p̂eyete Jesús in. 4Pedro p̂eyaqui jéte Jesús: —Jị'chiyacsity, ¡anic jäm' úya' q̂uin' tsun! Mạ'je' jụijya' mi, yụ ra' chibin p̂isijsis aca' jäm'tye', yiris ra' mídyes, judyeya' Moisésdyes judyeya' Elíasdyes. 5Pedro p̂eyacva'joij me'ĉan-dye juñumjeyacsi' pashyis dyicba'badye'. Yiris se've' in p̂eyacdye' dyicba'badye'ĉan, yi': —Uts nash mạ'jeyacdyety Ạva' yụ, anic ma'jotaqui yụ, mu' ra' se'vetinte mi'in. 6Jị'chiyactyi' Jesústyi' mu' aty se've'ya' in mọ' p̂eyacdye', anic tyum' tyeij ĉojtyi' mu'in, dyụtsyi in täjjeque' jac jáfiya' mu'in. 7Jesús c̣hẹi'ya'yi mu'inya' in, judyeya' toco'jeyacsi, chat qui jéyacsi: —Sacyevac, jam ra' noi'yi mi'in. 8Aty cạvebanya' in itŝij mu'ya' in, mu'dyety mu'ya' Jesús. 9Aty chạbanya' mụcu'chety in, mu' Jesús jéyacsi: —Mijam ra' méqui' jị'chique-yacsi muntyi' mi'in ọij cạvetiñes q̂uin', jun' qui' chuc aty vañinye-banya' yụ Anictyity Muntyi' yụ, chat qui ra' q̂uin'dyem' jị'chique-yacsi mi'in ọij cạvetiñes q̂uin'. 10Jị'chiyactyi' Jesústyi' mu' jéte in: —¿Jun' buty yi mu'in jị'chiyacsity yụ'tacdye' in Elías chum ca ra' tashche' ji'cavibun, chat qui ra' q̂uin'dyem' atsij mu' Ji'c̣honacsity Muntyi'? 11Vorjeyacsi Jesús: —Anicdye me', yi' sánacdye' mu' chum ra' tashi ji'cavibun Elías, räj ra' jị'ruij yụ'tye' mu', yi' sánacdye'. 12Yụ jéyac, a nash cạ̈tsi' ọij, aty ji'cavibun Elías, jam qui nam' chị́yete in, anic där jị'ñibe'cate in jun' chuc mạ'je' mu'in in. Me'dye ra' chime' mu'in ra' jị'ñibe'can yụ in Anictyity Muntyi' yụ. 13Chat qui q̂uin'dyem' mu'in jị'chiyactyi' mu' chique' in mu' jap̂iijti mu' Juan chojtacsity, mu' jị'cätse' urucyas sánacdye'. 14Jesús chibindye jị'chiyac-tyi' mu' shupqueshan mu'ya' in yóya'dyem' muntyi' u in. Atsij yirity muntyi' ĉọshte mu' Jesús, dyụtsyi mu'ya'. 15Jéte: —Jị'chiyacsity, ñịbe'jibut ạva' yụ. Anic där ñịbe' cạve' mu', juna' ĉụi' mọmo' ñe'i mu', jäm'dyeya' tŝijĉan tŝọij, judyeya' ojñi'ĉan tŝọij chime'. 16A tsan' cạyacsi yụ jị'chiyactyi' mi, jam qui nam' jun' tupuj ji'chäĉajte mu'in in. 17Jesús yi jéyacsi jị'chiyactyi' mu': —¡Där ac̣hi'tyity q̂uin' mi'in muntyi', jam anicyi mi'in, anic cäj cạtiñe' mi'in! Me'dye ra' yạjquibadyeyac. Aty ra' jam jun' dyichchuyac mi'in. Uya' jijtuvac yụ́ya'. 18Jesús fạra'jeĉuñe' mọ' sọyo', me'ĉandye mọ' meijyeban' sọyo' mọ'ĉansi' nanatyĉansi', chat qui mu' chäĉän. 19Aty jọbanya' muntyi' in, mu'in jị'chiyactyi' Jesústyi' mu', mu'in ĉọcte in jéte in: —¿Jun' buty tsun me' jam jun' meijteban' sọyo'? 20Vorjeyacsi Jesús: —Ĉaĉaij na taca' jayej anicyedye' Jen'che' mi'in. Yụ jéyac, anicjetinte Jen' jụijya' mi'in, me' tsan' dam' mọmo' anicyedye' mi'in jeñej quis miquis vej mostazasim', jụ'ñis ĉụi' mọmo' cọdacdye' tupuj jụjbunac. Tupuj p̂eyetinte yirity mụcu', jétinte: “Paj meijyi yocya' jịjcaij”, chat qui ra' mu' meijyi. 22Jesús jị'chiyactyi'tum mu' yiri'ya' nati Galileaĉan in. Chat qui mu' Jesús jéyacsi: —Mu'in ra' ayo'ya' ji'me'tyin yụ in Anictyity Muntyi' yụ. 23Chat qui ra' mu'in ijan yụ in, chibin qui na ram' mạyedye' me' bu'yi yụ, chat qui ra' vañinyeban yụ. Ọij p̂eyacdye' mu' anic ji'taracsi' jị'chiyactyi' mu'. 24Jesús jị'chiyactyi'tum mu' Capernaumĉan venjoij in. Pạrej mu'in dyim'tety querec̣ha Jen'sidyety aca' atsij in ĉọshte Pedro in jéte in: —¿Uts ji'chäyintyi' mi, jam adac yụ'te querec̣ha Jen'sidyety aca' mu'? 25Vorjeyacsi Pedro: —Yụ'te nashu'. Aty aca'ĉan siti Pedro, Jesús tashi jap̂iyiti Pedro, jajiti: —¿Jätäjyi tyu' um Simón? Uts jacchety ayo' q̂uin' in ¿tyijtyi buty cọdyetacsi bä'yedyedyety querec̣ha? ¿Are' mu'ĉantyi'dye cọdyetacsi in, are' mochtyi' in? 26Vorjete Pedro: —Mu'in jacchety ayo' in jam cọdyetacsi taĉantyi' in, mu'in mọmo' mochtyi' cọdyetacsi in. Jesús jajiti: —Anicdye me', ĉụi'tyi' mu' jam jun' yụ'taqui. 27Me'dye yụ chime' Jen'tyi' Ạva' yụ, yụ jam jemoñe' yụ'te Jen'sidyety aca'. Me' tsan' me' yụ'te qui na ram' yụ paj qui jam fáquinve yụ in. Tạij tsique'ĉan jịjcava mi, yovityi ra' mi. Tä'maqui' ra' jụijya' tạbedye', jäcva' mọ', mu'ĉan ra' yirity ficha chụ'ĉan mọ'. Mu' ra' jäctyem ficha chụ'ĉantyim', chat qui ra' tupuj so'macsim querec̣ha Jen'sidyety aca' mu', yụ́dyety judyeya' mídyety —jéte Jesús.

will be added

X\