Matthew 16

1Atsij pạrej fariseo in saduceotum in ĉọshte in mu' Jesús mạ'je' jị'ĉojte in, are' jutactyi' Jen'tyi' mu', mọ'dyes qui cọdyetyete in paj qui jị'caveyacsi ferdye' mu'. 2Vorjeyacsi Jesús: —Jesha', jäijnäs mạyedye-'che' jụijya' aty jä'dyäijdyety tsun, yi mi'in: “Jäm'si' ra' mạyedye'.” 3Pam' na jụijya' tojmas jäijnästum jụijya', yi mi'in: “Añei' ra'.” ¿Jun' dash chị́yetiñe' me' mi'in mọ' mạyedye' are' jäm'si' are' a'c̣his, jam qui nam' chịj mi'in jedye' chuc mọ' cại' ọij carijtacdye' yụ cạvetiñes q̂uin' mi'in? 4̣Q̂uin'tyity mi'in anic ac̣hi'yacñity mi'in, anic yacchutintety Jen'. Me' tsan' cudyityitiĉa' ferdye' mi'in, jam qui na ram' jun' me' jị'caveyeyac. Aty yiri' quim' jị'caveyeyac ferdye' yụ, jun' chuc ji'caviti Jonás jiquej, me'dye ra' yụ chime'. Aty me'si' yạjquicseban qui. 5Aty nopej jịjcaijya' in mu'in jị'chiyactyi' mu' yaquintute pan vítedyety mu'in. 6Jesús jéyacsi: —Are'ĉa mi'in jäm' ra' ĉujcati mi'in ji'dujraquisya' mu'insi' fariseos in judyeya' saduceos in. 7Jị'chiyactyi' in vaj meij p̂iyitidyeij in, yi in: —Me' jísin' Jesús ĉaĉaij na yaquintuja pan vítidyety tsun. 8Jesús chị́yacsebi dyijyedye' mu'in. Jéyacsi mu': —¿Jun' dash me' yi mi'in? “Itŝij pan mu'ya' tsun”, yi mi'in. Dam' mọmo' anicyi yụ́che' mi'in. 9¿Taca' adac jam chäyitiĉa' yụ mi'in? ¿Jam dyijyeban u mi'in jun' chuc yụ ĉanam'tyityya' pan ji'säcsacsi yụ ĉanam' miryity muntyi' in? ¿Juñucsi' ca' ụ́bu' ji'shucdyidye' tsimjajtiñe' mi'in? 10Chime'dye yoqui'dyem' yävätidye'tyityya' pan ji'säcsacsi yụ vạjpedye' miryity muntyi' in, ¿juñucsi' ca' ụ́bu' ji'shucdyidye' tsimjajtiñe' jiquej mi'in? 11¿Jun' dash jam chịj mi'in yụ jam p̂eijte pan jéyacya' yụ: “Are'ĉa jäm' ra' ĉujcati mi'in mu'insi'ya' ji'dujraquis fariseos in judyeya' saduceos in?” 12̣Q̂uin'dyem' mu'in chịj in jị'chiyactyi' Jesústyi' mu' jam p̂eijte pan ji'dujraquis, mọ' mu' p̂eye' paj qui jam cäc̣hä'chucsebi in ji'chäyitidye' fariseos in judyeya' saduceos in. 13Jesús yocsi've jịjcaij jac yóĉandyem' bä'yedye' Cesarea Filipo o, me' tịj mọ'. Mu'ĉan jéyaqui jị'chiyactyi' mu': —¿Jätäjyi buty q̂uin' muntyi' in, tyi buty ĉun yụ in Anictyity Muntyi' yụ? 14Vorjeyacsi in: —Pạrej yi in: “Uts nash Juan chojtacsity.” Pạrej na yi in: “Uts nash Elías”, judyeya' chime'dye pạrej yi in: “Uts nash Jeremías, are' yoctyi' jaso'mitity p̂eyacdye' Jen' jiquej”, jam vaj cäts ji'jäquin in. 15Chat qui mu' Jesús jéyacsi: —Mi'in na ¿tyi yụ ĉútiĉa' u mi'in? 16Vorjete mu' Pedro: —Mi nash Ji'c̣honacsity Muntyi', Jen'tyi' Ạva' mi, mu' tsạ'bu'yity. 17Jajiti Jesús: —Där ma'joij mi Simón, Jonástyi' ạvam'. Jam yirity muntyi' ji'chäquiyin mi, me'dye Jen' mọmo' yụ́tyi' mạyedye'chety, mum' yirity ọij ji'chäquiyin mi. 18Yụ jéye, mi nash Pedro, “mij” yi' nash tịj mi, yụ ra' därtyi'che' mij yụ'tacsi anicjintyi' yụ in mijam qui ra' sän'dye' tupuj ji'penacsi'. 19Yụ ra' yu'tim paj qui mi me'chui' mọ' c̣hácaquis vanacjetyetacsis ayo'bu'yedye' Jen'si' mu'. Jedye' chuc ñucje' jacches jụijya' mi, mọ' aty ñucje' Jen' mạyedye'che', jedye' chuc dajje' jacches jụijya' mi, mọ' aty dajje' Jen' mạyedye'chety. 20Chat qui mu' Jesús jéyacsi jị'chiyactyi' mu' paj qui jam dam' jị'chiqueyacsi muntyi' in mu' Jesús Ji'c̣honacsity muntyi'. 21Aty me'si' mu' Jesús tiyacchui' chap jéyacsi jị'chiyactyi' mu' jun' chuc ra' mu' cạve'. Jéyacsi: —Jerusalénĉan ra' jịjcaij yụ. Anic ra' jị'ñibe'cac yụ mu'ĉan, mu'in ra' judíoty ayo' in räjtumdye tashchety ĉọjcacsity in, judyeya' mu'in tashchety cudyitity Jen'che' in, judyeya' mu'in jị'chiyacsity yụ'tacdye' in, mu'in ra' fer jị'ñibe'can yụ in, judyeya' qui ra' ji'ijan yụ in. Chibin qui na ram' mạyedye' me' bu'yi yụ chat qui ra' vañinyeban yụ. 22Pedro yocya' cạte mu' Jesús, chat qui jéte: —Jị'chiyacsity, jam ra' me' ji'caviti mi. 23Jesús caman'yi jajiti Pedro: —Meijyeva mi Pedro, atyu' u mi jeñej bu'yi Satanás, ĉaĉaij na mi mạ'je' ñucjitim, mijam aty Jen'si' dyijyedye' cäc̣hä'chupte mi, muntyis qui mọmo' dyijyedye' cäc̣hä'chucsebi mi. 24Chat qui mu' Jesús jéyacsi jị'chiyactyi' mu': —Tyi chuc mạ'je' cäc̣hä'chun yụ in, paj ĉụi'si' dyijyedye' yacchuqui in, paj vemete crosh in,46 chat qui ra' q̂uin'dyem' cäc̣hä'chun yụ in. 25Tyi chuc otejjitity ĉụi' jam mạ'je' yụ́dyes bä'yi, mu' ra' fibi' mọmo' shupqui' jun' chuc bä'yi mu'. Tyi chuc yụ́dyes bä'yi, paj tsan' säñi, mu' ra' jam fibi' bä'yi, mu'si' ra' mọ'ya' bijodyedyes mu'. 26Mu'ya' muntyi' räj tsan' me'chui' jacches jedye' in, me' tsan' me' jam qui nam' yụ́dyes bä'yi jụijya' mu', fibidyety mu' shupqui. Jam yiris jedye' tupuj yụ'tye' mu' paj qui tsạ'bu'yi Jen'ya' mu'. 27Yụ Anictyity Muntyi' mạyedye'che' ra' jijtuban yụ, Jen'si'tum ferdye' mu' mọ'tum ra' atsij yụ, tucsi ra' anjer yụ. Chat qui ra' yụ räj so'macsi muntyi' in jun' chuc bä'yi jiquej in, are' bijodye' so'mac in, are' va'tacdye' so'mac in. 28Yụ anic jéyac, pạrej úyatydye mi'in jambi' säñity mi'in, taca'dye ra' cavibutiĉa' mi'in ayo'bu'yedye' yụ Anictyity Muntyi' yụ.

will be added

X\