Matthew 15

1Pạrej Jerusalénĉantyi' fariseo in judyeya' jị'chiyacsity Jen'si' yụ'tacdye' in atsij in ĉọshte Jesús in. Jéte in: 2—¿Jun' ca' jị'chiyactyi' mi muyetyejcai' in mọ' ji'chäyitidye' so'misin'si' tsun vóshi'vun tsun jiquej? Ĉaĉaij na aty ra' säcsi mu'in in, jam jun' cäc̣hä'chubusin' yicdye' tsun favtiya' unya' in. 3Jesús vorjeyacsi: —Mi'in na ¿jun' ca' muyetyejcaptinte Jen'si' yụ'tacdye' mu', ĉụi'sim' yicdye' me'chuqui mi'in? 4Mu'dye Jen' yi: “Jäm'jeyaqui ra' ĉụi'tyi' jen' mi'in judyeya' tse' mi'in.”43 Yi mu' chime': “Tyi chuc mistaqui ĉụi'tyi' jen' mu' judyeya' tse' mu', mu' ra' sän'dye' so'mac”, yi mu' Jen'. 5- 6Ĉụi'sim' ji'chäyitidye' yi' mi'in: “Yirity muntyi' me' bu'yi yi jụijya': Räj ĉụi'si' jedye' yụ aty so'mete yụ mu' Jen'.” Tyi chuc me' yụ'tyety p̂eyacdye' jụijya' in, me' tsan' me'chui'tyi' jedye' in, aty qui nam' jam jemoñe' nọ́taqui ĉụi'tyi' jen' mu' judyeya' tse' mu', me' tsan' mu'in jayejjotaqui in, me' bu'yi yi mi'in. Me' nash mi'in muyetyejcaptinte Jen'si' ji'chäyitidye' mu', ĉụi'sim' ji'chäyitidye' cạqui mi'in. 7Anic mi'in ac̣hi' dyijyity, jäm' yu'ti tsan' mi'in. Anic rụij p̂iijnac jiquej mi'in Isaíassi' sánacdye' mu', yi': 8Yi mu' Jen': “Utsi muntyi' q̂uin' in p̂eyacdye'yam' irijyi yụ́che' in, ĉojtyi' qui nam' mu'in jam úya', jam irijyi yụ́che' in. 9Fibim' tima'quin yụ in ĉaĉaij na muntyis yicdye' jị'chiyacsi in jeñej aty yụs yụ'tacdye' ĉọi' u in, yi' sánacdye'.” 10Jesús qui fayacsi muntyi' jéyacsi: —Jäm' ra' se'vibutiĉa' mi'in ọij p̂eyacdye' yụ paj qui chicacsi mi'in. 11Jedye' chuc jebei' yirity muntyi', jam mọ' jun' ja'ac̣hi'ti. Mọ' ji'shupque'si' chụ'ĉan, mọ' chat ja'ac̣hi'ti. 12Jị'chiyactyi' mu' mu'in ĉọcte in mu' Jesús, jéte in: —¿Jam buty chịj mi mu'in fariseo in jam ma'jotyibun p̂eyacdye' in? 13Vorjeyacsi mu' Jesús: —Jesha', mọ'in cätidye' in jam quịcsis jụijya' Jen' yụ mạyedye'chety, räj ra' mọ'in c̣hoijjeyac in. 14Paj mu'ya' mu'in fariseo in. Mu'in nash jeñej bu'yi yirity tofety muntyi' mu' tapchute yoctyi' tofety muntyi', ji'mi'iti tsan' in, vaj me' to'ĉan tŝọij jọ'chaij in. 15Pedro jéte Jesús: —¿Jedye' buty cại' mọ' p̂eyacdye' ja'ac̣hi'tis muntyi' in? 16Jesús vorjeyacsi: —¿Taca' adac itŝi' dyijyedye' mi'in chime'? 17¿Jam adac chịj mi'in, jedye' chuc jebei' yirity muntyi' vo'coĉan mọmo' jị'tŝoi', aty me'si' chat qui ji'shupjan'? 18Mọ' na a'c̣his dyijyedye' ji'shupque'si' chụ'ĉan mu'in, mọ'ĉandye shupqui' ĉojtyi'ĉan mu'in, mọ' mọmo' ja'ac̣hi'ti muntyi' in, 19ĉaĉaij na ĉojtyi'ĉan mu'in mọ'ĉansi' shupqui' a'c̣his dyijyedye' mu'in, ijatidye' mu'in judyeya' vo'vodye' mu'in judyeya' shapudye' mu'in, judyeya' shu'adye' mu'in judyeya' väñädye' mu'in, judyeya' ñäñitidye' mu'in chime'. 20Jo'mesya' nash ĉụi' ac̣hi'ti muntyi' in. Me' tsan' jam rụij favti unya' in, jam qui nam' jun' ja'ac̣hi'ti in. 21Jesús yocsi've jịjcaij jac, yóvedyem' bä'yedye' Tiro o judyeya' Sidón. 22Ayij yiris p̂en, vóshi' mu'in Canaánĉantyis jiquej in, ĉọshte mọ' Jesús jéte: —Jị'chiyacsity, Davidtyi' vóshi' mu', ñịbe'jiti'. Ạva' yụ sọyo'tumsi', anic där ñịbe' cạve' mọ'. 23Jesús na c̣hu'c̣huij jam vorje'. Jị'chiyactyi' mu' ĉọcte in ferche' jéte in: —Jéva' ọij p̂en paj jọban', aty tsun shọijtye' anic shọijquejchui' jäqui'. 24Chat qui yi mu' Jesús q̂uin'dyem' je': —Jen' jutin yụ paj qui mu'in mọmo' nọ́tacseti yụ Israeltyi' vóshi' in, mu'in jeñej bu'yity moñis oveca in, mu'in mọmo' voro'tacseti yụ. 25Mọ' p̂en ĉọcte Jesús, mu'si'ya' vej dyụtsyi', jéte: —Jị'chiyacsity, ñútyiti'. 26Jesús vorje': —Jam yụ jun' rụij ĉọi' chutyeyac säcsedye' ạva' in, chat qui so'mac ac̣huj in.44 27Mọ' p̂en vorjete: —Anic me', Jị'chiyacsity, me' tsan' me', ac̣huj qui nam' tsimjan' in mọ' jebei' in q̂uemi'mii'si' mesaches jọ'chai'si'.45 28Jesús vorje': —Mi p̂en, anic fer anicjitim, jun' chuc cudyityitim, me' ra' cạ̈tsi'. Yédye'ĉan mọmo' chäĉän' ạva' mọ'. 29Jesús Galileave jịjcaij mu', pen' tyeij mọ' tsique'. Chat qui mụcu'ya' jịjcaij bojvi, mu'che' p̂utsquen'yi bä'yi. 30Anic shach atsij muntyi' in ĉọshte Jesús in, tuyete in are'reijtyi' muntyi' in, bureijtyi' in, judyeya' tofety in, judyeya' jepepej in, judyeya' väi'väi'yity in, me' me' japacjodye' mu'in. Jesússi'ya' vej mu' yụ'tacsi in, chat qui mu' ji'chäcacseban räj in. 31Anic äjyi muntyi' in cạvepteya' ferdye' in, jepepejtyity jiquej in p̂eyaĉan in, judyeya' bureijtyi' jiquej in chapjoban in me'ĉandye mi'eban in, judyeya' väi'väi'yity jiquej in chäĉän in, judyeya' tofety jiquej in naijbun in, mọ'dyes qui muntyi' in tima'quete Jen' in, mu'intyi' Jen' in Israeltyi' vóshi' in. 32Jesús fayaqui jị'chiyactyi' mu', jéyacsi: —Anic ñịbe' ĉọcsi yụ uts muntyi' q̂uin' in, ĉaĉaij na aty chibin mạyedye' pen'dyetun úya' yụ in aty itŝi' säcsedye' mu'in. Jam yụ mạ'je' mem' jutacseban yịñijche' in jam säcsi in, vatyquej ra' yamjoban majmiya' in. 33Jị'chiyactyi' mu' jéte in: —¿Juna' buty ra' dạcja' säcsedye' shachtyitydyes muntyi' in, ĉaĉaij na úya' cäjya' tsun? 34Vorjeyacsi Jesús: —¿Juñucsi' ca' pan mu'ya' mi'in? Vorjete in: —Yävätidye' pan mu'ya', chime'dye tạbedye' mọ'ya' juñucsi'. 35Chat qui mu' Jesús jéyacsi muntyi' in paj qui bä'yi mụijya' in. 36Chat qui mu' tapjete yävätidye'tyity pan judyeya' tạbedye' in chime', yoshoropaij jéte Jen'. Mu' qui q̂uemi'vete pan, so'macsi jị'chiyactyi' mu', mu'in qui ji'cheteyacsi muntyi' in. 37Räjdye mu'in säcsi in chucmun yu'ti in. Jị'chiyactyi' mu' tsimjan' in ji'shucdyidye' mu'in, yävätidye' ụ́bu' därtyi', me'si'ĉan juban'. 38Anic shachtyity muntyi' säcsi in, vạjpedye' mir rụi'cu' in yedyety son' in, mọ'in qui na p̂en in jam tsic in, mijam miquity in. 39Chat qui q̂uin'dyem' Jesús jutacseban muntyi' in. Covambache' mu' jịjcaij, yocsi've bä'yedye' jịjcaij mu' Magadánve jịjcaij.

will be added

X\