Matthew 14

1Aty me'si' mu' Herodes,42a Galileaĉantyi' ayo' mu'in, mu' se'vaqui jun' chuc carijtaqui mu' Jesús. 2Yi mu' Herodes jéyacsi úñity mu': —Uts Jesús q̂uin' mu' nash Juanvun chojtacsity jiquej, a nash vañinyeban mu', mọ'dyes q̂uin' ferdye' me'chui' mu' —jéyacsi mu' Herodes. 3- 4Me' yi ĉaĉaij na mu'dye Herodes ji'tapte mu' Juanvun jiquej judyeya' c̣họco' bu'yi ji'ĉär'te. Tashche' jiquej mu' Herodes vämi vojitysi'che' p̂en mu', Felipe tịj vojitysi' mu'. Mu' Juan fạra'jeĉun'te yejĉoij jéte: —Jam tupuj me'chui' mi ọij p̂en Erodías ĉaĉaij na vojitysi' p̂en mi. 5Mọ'dyes mu' Herodes mạ'je' tsan' ji'ijate mu' Juan, jam qui nam' jun'te ĉaĉaij na quijnacsi muntyi' in, ĉaĉaij na mu'in irijyi Juanche' in, chị́yete in mu' jaso'mitity p̂eyacdye' Jen'. 6Aty cha'she' na'edye' Herodessi', chat Erodíassi' ạva' mọ' ro'yaqui' mu'insi'ya' vej in mu'in fayactyi'ya' in Herodestyi'. Anic ma'jotye' mu' mọ' nanas. 7Mọ'dyes qui yụ'tyeye' p̂eyacdye', je': —Yụ q̂uin' jéye Jen'si'ya' vej mu', räj jedye' ĉụi' mạ'je' jụijyam, yụ ra' mọ' so'meye —je'. 8Mọ' Erodías tse' mọ' nanassi' cavin jéyaqui' ạva' mọ' paj qui mọ' cọdyetyete paj qui Herodes ji'ijate mu' Juan. Yi' mọ' nanas jéte mu' Herodes: —Yụ mạ'jepte Juansi' jo'nom', piji'ĉan ra' so'mitim. 9Mu' ayo' Herodes aty se'vebi' p̂eyacdye' mọ'si', där mu' tári. Jam qui nam' mạ'je' ticame' ĉaĉaij na mu' aty yụ'tye' p̂eyacdye' mu'insi'ya' vej mu'in fayactyi' mu'. Mọ'dyes qui mu' chiquebi' p̂eyacdye' mọ' nanassi'. 10Chat qui mu' jutacsi paj qui ĉär'taquisĉan jịjcaij in tätsecbite in jo'no' Juansi' mu'. 11Chat qui piji'ĉan tupte in jo'no' mu' Juansi' so'me' in mọ' nanas, mọ' qui ji'jiyeyaqui' tse' mọ'. 12Chat qui atsij in Juantyi' jị'chiyactyi' mu' cạbite a' in, rudyu'jepte in chat qui ĉọcte in mu' Jesús jéte in jun' chuc mu' Juanvun. 13Aty chị́quiya' mu' Jesús jun' chuc mu' Juan, yirity quim' mu' jọban covambache' cäjyasĉan jac jịjcaij. Chị́qui mu'in muntyi' in pai' bä'yedye'ĉantyi' in sacti in, baquits tyeij majmiche' in cäc̣hä'chute in, tashi mu'in venjoij in. 14Aty p̂ai'joijya' mu' Jesús covambachety anic shach cạvacsi muntyi' in. Anic ñịbe' ĉọcsi mọ'dyes qui ji'chäcacseban japacjoijtyi' in. 15Aty shocam-yejoi' ĉọcte in jị'chiyactyi' mu', jéte in: —A tyu' u yómo'yejoja' tsun, cäjya' tyu' u úya' tsun. Jéyacseva uts muntyi' in paj bä'yedye'ĉan jịjcaij in paj qui ya'iyequi mọ'ĉan säcsedye' in. 16Jesús jéyacsi: —Jam jemoñe' mu'ĉan jịjcaij in, mi'indye ra' ji'säcsacsi. 17Vorjete in: —Itŝi' to' o méquis tsunsi' säcsedye', me'dye ĉanam' mọmo' pan mu'ya' tsun judyeya' pärä' miqui'munsi' tạbedye' tsun. 18Jesús jéyacsi: —̣Ọya' tuvac yụ́ya'. 19Chat qui mu' jéyacsi shachtyity muntyi' in paj qui bä'yi birurucche' in. Aty me'si' q̂uin'dyem' mu' tapjete ĉanam'tyity pan judyeya' pärä'sis tạbedye' in. Chat qui mạyedye'che' cạvi yoshoropaij jéte Jen'. Chat qui q̂uemi'vete pan so'macsi jị'chiyactyi' mu', mu'in qui ji'cheteyacsi muntyi' in. 20Räjdye mu'in säcsi in chucmun yu'ti in jam yirity jayej in. Chat qui mu'in jị'chiyactyi' mu' tsimjan' in mọ' ji'shucdyidye' mu'in, yiri'tac pärä' jiyi' ụ́bu', me'qui' juban' ji'shucdyidye' mu'in. 21Anic mu'in shachtyity säcsi in, ĉanam' mir rụi'cu' in yedyety son' in, mọ'in qui nam' p̂en in jam tsic mọ'in in mijam miquity in. 22Chat qui mu' Jesús jéyacsi jị'chiyactyi' mu' paj qui mu'in tashi nopej jịjcaij in covambache' in, Jesús na tacya' chum jutacseban muntyi' in. 23Aty tas jéyacsi mu', chat yirity qui mụcu'ya' jịjcaij mu', mu'che' cọdaqui Jen'che'. Tacche'dye yómoij yirity mu' Jesús. 24Mu' na covamba aty moch tyiti. Anic därsi' vacam'quedye' chidac játubun covamba, fertyi' tyi'mu rébete. 25Aty nạijjoqui've ĉụi'dye mu' atsij Jesús fajche' tyeij ojñi' mi'i. 26Jị'ĉojtuyeĉun'te in jị'chiyactyi' mu', anic tyum' tyeij ĉojtyi' mu'in, shavyi in, yi in: —¡Onojnodye' o! 27Me'ĉandye Jesús vorjeyacsi: —Sóñi'yi ra' mi'in, yụ́dye nashu', jam ra' noi'yi mi'in. 28Chat qui mu' Pedro p̂eyete jéte: —Jị'chiyacsity, mídye mọmo' jụijya', fayiti' yụ paj qui yụ ĉọcye, yụ ra' chime' fajche' tyeij ojñi' mi'i. 29Jesús vorjajiti: —Atsiva yụ́ya'. Chat qui mu' Pedro p̂ai'joij covambachety fajche' tyeij ojñi' mi'i, Jesúsya' tsan' jịjcaij. 30Aty cạveteya' fer fujqui tyi'mu, noi'yi mu' Pedro me'ĉandye pepechjoij. Yi: —¡Jị'chiyacsity, ji'c̣hondyi'! 31Chat qui mu' Jesús tapjajibuti un mu', jajiti: —Dam' mọmo' anicyi mi ¿jun' ca' me' yocve dyijyi mi? 32Aty pären'dye p̂ai'jobanya' covambache' in, me'ĉandye dyäqui mu' tyi'mu. 33Jị'chiyactyi' mu' aty me' cạveteya' in me'ĉandye covambache' dyụtsyi in Jesúsya', jéte in: —Mi nash anic Jen'tyi' Ạva' mi. 34Nopej venjoij in Genesaret-ya' sojquiti in. 35Chị́yeĉun'te in mu' Jesús mu'in muntyi' in. Aty chị́quiya' in mu'ya' mu' Jesús, chat qui mu'in pai' bä'yity muntyi' in tuyete Jesús in mu'in japacjoijtyi' muntyi' in. 36Cọdyetyete in yi in: “Tupuj buty toco'biyac ĉaptacdye've quị'si' mi.” Yósi'dyem' mu'in u in toco'jeptety quị'si' in me'si'dye chäĉän in.

will be added

X\