Matthew 13

1Mọ'dye mạyedye' mu' Jesús shupqui aca'ĉan, sinve tsique' jịjcaij mu', mu've p̂utsquen'yi bä'yi. 2Anic shach muntyi' ĉọshte in mu' Jesús, chat qui covambache' jịjcaij, mu'che' qui p̂utsquen'yi mu'che' bu'yi qui, muntyi' na tacche' jámanche' in. 3Mu'che' bu'yi tiyacchuti jị'chiyacsi mu' yụ'tyeyacsi jị'ĉocdyes p̂eyacdye', me' bu'yi jị'chiyacsi. Yi mu': —Yirity muntyi' quịjodye'-ĉan jịjcaij, cätiyequi. 4Aty facajnaquiya' mu', pạrej majmiĉan tŝọi' vej in, mọ'ya'dye jaijtyi' sacyi' in mọ' vej jebei' in. 5Pạrej na mijche' tŝọi' vej in jam tyes mu'si' jac, cavin mọ'che' chịbi' tsan' ĉaĉaij na jam tyes mọ' mijches jac. 6Fibim' me' chịbi', a na are'yiya' mu' tsun, q̂uin'dyem' sacñen' tyei' mọ' cätidye', ĉaĉaij na jam mochĉan ribin yi'. 7Pạrej däräsya' ribin tŝọi', mọ'tumdye chịbi' därä'tum, mọ' qui jabusti', jam jun' p̂añi'. 8Pạrej na jäm'ya' jac tŝọi', mọ'ya' jäm' p̂añi', jäm' mọ' väshi' cätidye', yiris vej quịcsi' cien mọs vej juban', pạrej na jäbän qui'tac vej juban', judyeya' pạrej chibin qui'tac vej juban'. 9Tyi chuc chuntumtyi' in paj jäm' se'vaqui in ọij p̂eyacdye' —yi jéyacsi Jesús. 10Jị'chiyactyi' Jesústyi' mu' ĉọcte in jéte in: —¿Jun' buty jị'ĉocdyes mọmo' p̂eyacdye' yụ'tyeyacsi mi? 11Jesús vorjeyacsi: —Mi'in mọmo' so'minac Jen' paj qui chị́yeptinte caminsis dyijyedye' mu', jun' chuc ayo'bu'yedye' mu'si'. Mu'in na yoctyi' muntyi' in jam me' so'mac mu'in in paj qui chị́yepte dyijyedye' in. 12Tyi chuc chiquepte dyijyedye' jụijya' mu', mu'in ra' so'mac in paj qui dadam' muju'cha' chị́yepte in, jam ra' jayej mu'indyes in. Mu'in na jam mạ'je' chiqueptety in, Jen' ra' jäctyetacseban mọ' dam' me'chui'si' in. 13Mọ'dyes yụ jị'ĉocdyestumsi' p̂eyacdye' jị'chiyacsi muntyi' q̂uin' in, me' ra' shupqui in: me' tsan' cạvi in, jam qui nam' naijti in, me' tsan' se'vaqui in jam qui nam' chicacsi in jätäjyi' chuc mọ'. 14Anicdye me' mu'indyes cạ̈tsi' in Isaíassi' sánacdye', yi': “Me' tsan' yejĉoij se'vaqui mi'in, jam qui na ram' chicacsi mi'in, me' tsan' yejĉoij cạvi mi'in, jam qui nam' naijti mi'in, 15ĉaĉaij na anic yäjqueban' dyijyedye' mu'in, judyeya' tyucje' chun in, judyeya' quiban'je' vej mu'in. Jam me' jụijya' mu'in in, a vuty tupuj naijti u in, tupuj se'vaqui in judyeya' tupuj chicacsi in, paj qui ca'ñibun yụ́ya' in paj qui yụ ji'c̣honacsi”, yi' sánacdye'. 16Jesús jéyaqui jị'chiyactyi' mu': —Mi'in na q̂uin' anic där ma'joij mi'in, mi'in chat anic naijtity mi'in, judyeya' chicacsity mi'in. 17Yụ anic jéyac, anic dai' rụijtyity muntyi' jiquej in judyeya' jaso'mitity p̂eyacdye' Jen' jiquej in, mu'in fer tsan' mạ'je' cạve' in jedye' chuc cạvetiñes mi'in q̂uin', jam qui nam' jun' cạve' jiquej in, judyeya' chime' mu'in fer tsan' mạ'je' se've' in mọ' se'vetiñes q̂uin' mi'in, jam qui nam' jun' se've' jiquej in —jéyacsi Jesús. 18Jesús jéyacsi: —Se'vitiĉam' yụ, yụ ra' jéyac jedye' buty cại' mọ' p̂eyacdye' p̂eijte cätity muntyi'. 19Mu'in se've'tyi' in p̂eyacdye' yi'si' jun' chuc ayo'bu'yi Jen', jam qui nam' chicacsi in, mu'in jeñej bu'yi in majmiĉan tŝọi'si' vej, mọ'ya'dye mọ' shupqui' Sọyo' jäctyetacsi' p̂eyacdye' ĉojtyi'ĉansi' mu'in. 20Vej mijche' tŝọi'si', mọ' cại' jeñej bu'yi' se'vety p̂eyacdye' in, anic tiĉuñety in mọ' p̂eyacdye'. 21Mijam qui nam' ĉojtyi'ĉan ji'site' in, jeñej bu'yi' itŝis ribin, me' bu'yi' mọ' p̂eyacdye', dam'tuqui mọmo' cäc̣hä'chui' in. A na ñịbedyes jị'ĉojtye'ya' in judyeya' jị'ñibe'cac in p̂eyacdyedyes, chat qui farajje' in ji'ca'ñibun in. 22Vej däräsya' ribin tŝọi'si', mọ' jeñej bu'yi' se'vety tsan' p̂eyacdye' in. Me' tsan' me', mu'in qui nam' yejĉoij dyijtuqui in ĉụi'si' dyijye-dye' jacches mu'in judyeya' anic fer mạ'jete querec̣ha in, mọ'dyes jam p̂añi' mọ' p̂eyacdye' ĉojtyi'ĉan mu'in, mijam Jen'dyes bä'yi in. 23Mọ' na jäm'ya' jac tŝọi'si' vej, mọ' jeñej bu'yi' se'vety p̂eyacdye' in, judyeya' chique' in, me'dyes qui Jen'dyes bä'yi in, jeñej jäm'si' väsh, me' mu'in in, pạrej yiris vej quịcsi', cien mọs vej juban' mọ', judyeya' pạrej jäbän qui'tac vej juban' mọ', judyeya' pạrej chibin qui'tac vej juban' mọ', me' me' ra' carijtaqui Jen'dyes in. 24Jesús jéyacsi yocsi' jị'ĉocdyes p̂eyacdye', yi: —Me' bu'yi' ayo'bu'yedye' Jen'si' mu', jeñej bu'yi' cätidye' in. Jeñej yirity muntyi' cäti quịjodye'ĉan mu', yedyej jäm'si' trivos vej quịpte. 25Yirisĉan tsedyedye' aty räj ĉọshiya' muntyi' in, atsij mu' jafaquitity muntyi' quị́te a'c̣his därä' trívoĉan mu'. 26Mọ' qui a'c̣his därä' trívotum chịbi', mu'tumdye p̂añi' yiri'ya'. Aty topti'ya', q̂uin'dyem' chị́yac mọ' a'c̣his därä'. 27Chat qui úñity mu' atsij in jéte in: “Yoj nac yedyej jäm'si' vej quị' mi. ¿Jun' qui ĉaĉaij me' a'c̣histum därä' chịbi' o?” 28Mu' qui vorjeyacsi: “Jeñej an fáquintyi' mu'ya' yụ in.” Uñity jéte in: “¿Tupuj buty tsun c̣hojyacseban mọ' a'c̣his därä' in?” 29Vorjeyacsi mu': “Jam ra' me' mi'in, are'ĉa trivomun c̣hoijyi. 30Paj mọ'ya' chum mọ' a'c̣his därä', jäqui'vedye ra' c̣hoijyi' aty vädacya' trivo. Yụ ra' jéyacsi vädaquity in paj mọ' chum tashche' c̣hoijjan' in judyeya' c̣họcoco' yụ'tye' in paj qui ji'co'shaye' in. Chat qui ra' q̂uin'dyem' vächbubun trivo yụ in, judyeya' jäm' yụ'te in vädacdyedyesĉan aca' yụ”, yi jéyacsi mu' muntyi'. 31Yocsi' jị'ĉocdyes p̂eyacdye' jéyacsi Jesús, yi: —Me' bu'yi' nash ayo'bu'ye-dye' Jen'si' mu', jeñej bu'yi' yirity muntyi' quịjodye'ĉan mu' quị'tyi' miquis vej mostazas. 32Vej mostazas anic miquis mọ' jam jeñej yocsi' in, a qui nam' däryejoi' jụijya' mọ' anic mọjo'cha' därsi' shupqui' jeñej därsi' son, mọ'si'che' daca' dai' tị'i' jaijtyi' in. 33Jesús jéyacsi yocsi' jị'ĉocdyes p̂eyacdye', yi: —Me' bu'yi' nash ayo'bu'ye-dye' Jen'si' mu', jeñej bu'yi' mọ' ji'dujraquis pan. Yiris p̂en jäm'teya' pan, jäcte ja'sha, cafonte ji'dujraquistum, me' tsan' dai' ja'sha tas qui nam' sajquen'jete mọ', ji'dujrete mọ' ji'dujraquis. 34Jesús jị'chiyacsi ọij p̂eyacdye' jo'mestum jị'ĉoc-dyestum p̂eyacdye', jam yoc bu'yi jị'chiyacsi. 35Me' jéyacsi mu' paj qui cạ̈tsi' mu'si' p̂eyacdye' jaso'mititysi' Jen' jiquej, yi' sánacdye': Yụ ra' yụ'tyeyacsi jị'ĉocdyes p̂eyacdye' jị'chiyacsiya' yụ, yụ ra' jị'chiqueyacsi urucyas ji'chäyitidye' jam chị́yes jiquej in, mọ' tạ'cas caminve jiquej yoqui'dyem' jäm'tacya' ọij jac jiquej o. 36Jesús farajjeyacsetaqui muntyi' in, aca'ya' jịjcaban sisan. Ĉọcte in jị'chiyactyi' mu' jéte in: —Jítiĉam' ¿jedye' buty cại' mọ' p̂eyacdye' a'c̣his därä'? 37Jesús vorjeyacsi: —Mu' cätity yedyej jäm'si' vej, jeñej bu'yi yụ Anictyity Muntyi' yụ. 38Mọ' quịjodye' yóĉandyem' cäti u, mọ' jeñej bu'yi' ọij jac q̂uin'. Mọ' jäm'si' vej mọ' jeñej bu'yi' ayotutety Jen' in, mọ' na a'c̣his därä' jeñej bu'yi' Sọyoty in. 39Mu' fạ́quetety muntyi' jeñej bu'yi Sọyo'. Vädacdye' jeñej bu'yi' ra' jäqui've tupudye' Jen'si' mu', judyeya' mu'in vädaquity in jeñej bu'yi anjer in. 40Yojdyem' mọ' jäcac a'c̣his därä' o judyeya' ji'co'shayac, me'jeyacdye ra' chime' muntyi' in aty ayijya' tupudye' jäqui've. 41Yụ Anictyity Muntyi', yụ ra' jutacsi yụ́tyi' anjer in paj qui pạrej yụ'tacsi ac̣hi'yity in judyeya' mu'in ji'juchayacsity in. Mu'inĉantyi'dye ra' jäcacsi ayotuntyi'ĉan yụ in. 42Chat qui ra' mu'ĉan va'cac in yóĉandyem' yenamqueva'joi'si'ĉan tŝij o, mu'ĉan ra' querechjeyaqui modyin in judyeya' ra' tári in. 43Chat qui ra' mu'in rụijtyity Jen'ya' in anic ra' ma'jotac in, mu'in ra' chuñem mạij bu'yi in ayo'bu'yedye'ĉan Jen'si' mu'. Tyi chuc chuntumtyi' in jäm' se'vaĉam' ọij p̂eyacdye'. 44Me' bu'yi' ayo'bu'yedye' Jen'si' mu' jeñej yirity muntyi' dạque'tyi' yiris ya'i'si' jedye' jijmu'sacsi' quịjodye'ĉan. Dạque' mu' quivij busjeban'. Ma'jodye'-tum jọban', räj ji'mincaqui ĉụi'si' jedye' mu' paj qui tupujtye' mọ' quịjodye' ya'ij, chat qui ca'ñibun ya'iyeban mọ' quịjodye'. 45Chime' bu'yi'dye ayo'bu'yedye' Jen'si' mu' jeñej yirity muntyi' quevaqui mạ'je' ya'ij muju'cha' jäm'tyi' mij, perla tịj mu'. 46Dạcte dadam' muju'cha' jäm'tyi' mij perla jụijya' mu', chat qui räj ji'mincaqui ĉụi'si' jedye' mu', tupujte qui ya'ij mu' muju'chaty mij perla. 47Chime' bu'yi'dye ayo'bu'yedye' Jen'si' mu' jeñej bu'yi' sạji'. Tạbity muntyi' in va'cajquiqui ojñi'ĉan sạji' mu'in. Chat mọ' sạji' jäcacsi' yịjyi tạbedye' in. 48Aty bäni'ya' mọ' sạji' chat qui chanam'che' cại' in, chat qui muntyi' in pạrej yụ'tacsi tạbedye' in. Jụ'ñiñis chuc jäjämunsi' in mọ'in ụ́bu'ĉan yụ'tac in, mọ'in na jam jäm'si' in va'cac juban' in. 49Me' bu'yi' ra' chime' aty ayijya' tupudye' jäqui've. Mu'in ra' anjer in pạrej yụ'tacsi muntyi' in, rụijtyityĉantyi' in, mu'ĉantyi' ra' jäcacsi in, 50chat qui ra' va'cac in yenamqueva'joi'si'ĉan tŝij in, yóĉandyem' ra' querechjeyaqui modyin u in judyeya' ra' tári in. 51Jesús jéyacsi jị'chiyactyi' mu': —¿Chicacsi tyu' u mi'in ọij p̂eyacdye' q̂uin' jedye' buty cại' mọ'? —yi jéyacsi. Vorjete in: —Chique' u tsun, Jị'chiyacsity —yi in. 52Jesús jéyacsi: —Mu'in jị'chiyacsity yụ'tacdye' jiquej in aty jụjjety jụijya' in mọ' ji'chäyitidye' Jen'si' mu' p̂eijbite ayo'bu'yedye' mu', mu'in me'tyity in tupuj jị'chiyacsi in urucyas p̂eyacdye' Jen'si' mu', judyeya' chime' mụi'sis in. Mu'in jeñej bu'yi yirity aca'ĉantyi' muntyi', jị'ĉoqui urucyas jedye' mu' judyeya' mụi'sis mu'. 53Jesús aty ijaijya' jéyacsi jị'ĉocdyes p̂eyacdye' mu', chat qui jọban mu' 54ca'ñibun ĉụi'situban bä'yedye' mu'. Jị'chiyacsi mu' vajmu'yadye'ĉan judíos mu'in. Se'veptety p̂eyacdye' in, anic äjyi in, yi in: —¿Junasi' buty därsi' dyijyedye' dạque' uts? ¿Junasi' buty dạque' ferdye' jị'cave'? 55¿Jam adac uts mu'tyi' ạva' mu' carijtyety son? ¿Jam buty ọij tse' Maríam'? Judyeya' úya' vojity mu' chime' uts Santiago, judyeya' José, judyeya' Simón judyeya' Judas. 56Chime'dye ọ́ya' voji' mu', ¿jun' buty me' q̂uin' uts Jesús? 57Mọ'dyes fạ́quete in. Mọ'dyes Jesús yi jéyacsi: —Pai' juna' ĉụi' jụjyi mu'che' in jaso'mitityche' p̂eyacdye' Jen' in, mu'in na ĉụi'tyi' chätidye' mu' judyeya' ĉụi'si'ĉantyi' bä'yedye' in, mu'in mọmo' jam jụjyi mu'che' in. 58Mọ'dyes mu'ya' mu' Jesús jam dai' qui' jị'caveyacsi ferdye' mu' ĉaĉaij na jam jun' anicjete in.

will be added

X\