Matthew 12

1Jị'jutyitidyes mạyedye' mu' Jesús jị'chiyactyi'tum mu' mi'i in, cätidye'ĉan trivo mu'ĉan tyeij in. Dáqui in jị'chiyactyi' mu', shorjepte in trivos väsh mu' judyeya' jebepte in. 2Mu'in fariseo in aty cạvacsiya' in chat qui jéte in mu' Jesús: —¿Jun' dash me' in jị'chiyactyi' mi? Mu'in jam ạ̈räjje' in mọ' jị'jutyitidyes mạyedye', carijtaqui mọmo' in. 3Jesús vorjeyacsi: —¿Jam adac p̂eyetiñe' mi'in sánacdye' p̂eijtes mu' David jiquej, yoqui'dyem' dáquiya' jiquej u in pen'dye'tum mu'? 4Siti pen'dye'tum mu' Jen'si'ĉan aca' mu', jebete mu' pan yụ'tactyi' Jen'ya'. Yi' yụ'tacdye' uts pan cudyititydyety mọmo' Jen'che' in, mu'in mọmo' tupuj jebete in, yi', mijam yoctyidyety in. 5Chime'dye ¿jam adac p̂eyeptinte Jen'si' yụ'tacdye' mu'? Mọ' yi' jun' chuc cudyitity Jen'che' in mu'indye mọmo' jam ạ̈räjje' in mọ' jị'jutyitidyes mạyedye'. Me' tsan' mọ' mạyedye' jị'jutyitidyes, mu'in carijtaqui in Jen'si'ĉan aca' mu'. Me' tsan' me', jam qui nam' juchaj shupqui' mọ'. 6Yụ jéyac, aty q̂uin' tui' yụ yocsi' yụ'tacdye', mọ' mọjo'chas, ọya'ya' Jen'si' aca' mu'. 7Yi' sánacdye': “Yụ muju'cha' mạ'je' paj qui ñịbe' ĉọcsi mi'in, uya'ya' mọ' mạ'je' yụ mọ' ji'co'shayacdye' yụ́dyes”, yi'. Chị́yetiñe' jụijya' mi'in jedye' buty cại' ọij sánacdye', a vuty jam ji'me'tacsi u mi'in mu'in itŝity juchaj in. 8Yụ Anictyity Muntyi' yụ, bächäi'tyi' yụ ọij jị'jutyitidyesĉan mạyedye'. 9Jesús mu've jịjcaij vajmu'ya--dye'ĉan mu'in mu'ĉan sitacsi. 10Mu'ĉan chime'dye yirity muntyi' putyuijtyi' un. Pạrej mu'ya' muntyi' in mạ'je' dạcbite juchaj Jesússi' in, paj qui tupuj ji'me'te ayo'ya' in. Mọ'dyes jéte in: —¿Tupuj buty jị'jutyiti-dyesĉan mạyedye' ji'chäĉacseban mi, jätäjyi' buty yụ'tacdye' tsunsi'? 11Jesús vorjeyacsi: —Jesha' yiris oveca mi'in jọ'chai' jụijya' to'ĉan jị'jutyiti-dyesĉan mạyedye' ¿jätäjyi buty mi'in? ¿Jam buty jäĉajtiñe' mi'in, me' tsan' jị'jutyitidyes mạyedye'? 12Dadam' mu'in muntyi' in muju'cha' otejjeyac in, ọya'ya' oveca in. Mọ'dyes jorojĉanyi' mọ' yụ'tacdye' tsun yi' tupuj jị'jutyitidyesĉan mạyedye' nọ́tacseja' muntyi' in. 13Chat qui mu' Jesús jajiti mu' putyuijtyi' muntyi': —Chụi'jebada' un mi. Me'dye qui mu' chụi'jeyeĉan un mu', me'ĉandye jäm'joban' un mu', yojdyem' yocves um', me' shuban' mu'. 14Fariseo shuban in tiyacchui' dyijyi in jun' bu'yi chuc ra' ji'ijate in mu' Jesús. 15Jesús chị́qui p̂eyacdye' ijate ra' in, mọ'dyes qui yocve jịjcaij mu'. Anic shach cäc̣hä'-chute muntyi' in. Räj ji'chäcac-seban japacjoijtyi' in, 16judyeya' ferche' jéyacsi paj qui jam jị'chiqueyacsi yoctyi' in. 17Ọij me' jiyi' paj qui jị'cätsepte Jen'si' p̂eyacdye' mu', jaso'mitis Isaías jiquej. Yi' sánacdye': 18“Mush tyu' uts úñity yụ, mu' nash tsim'tactyi' yụ anic mạ'jete yụ judyeya' ma'jotyete chime' yụ. Yụ ra' jute' Ạ'edye' yụ, paj qui mọ' játŝutyiti. Chat qui ra' mu' jị'chiqueyacsi yụ́si' dyijyedye' muntyi' in, pai' jacche' bä'yity in, jéyacsi ra' mu'. 19Mu' ra' jam chuti p̂eyacdye'ya', mijam ra' sac ja'yacsi muntyi' in mijam ra' mu' äjnaqui cayeya'. 20Mu' ra' jam ji'pente mu' peñiyejoijtyi', mijam ra' jịva'chate mu' itŝity ferdye'. Mu' ra' yejĉoij jị'chiqueyacsi jun' qui' chuc muntyi' chiquepte in Jen'si' yụ'tacdye' mu'. 21Pai' ra' jacche' bä'yity in ĉúti ra' mu'che' in.” 22Aty me'si' tuyete in yirity jepepej muntyi' tofety mu', ĉaĉaij na sọyo'tumtyi'. Jesús ji'chäĉajte mu' muntyi', aty naijbun mu' judyeya' p̂eyaĉan chime'. 23Anic där äjjepte in Jesússi' ferdye' mu'. —¿Jam buty Davidtyi' vóshi' mu', mu' bisjaty tsun? —yi in. 24Mu'in na fariseo aty se'vacsebiya' p̂eyacdye' muntyis in, yi in: —Mu'dye Beelzebú sọyoty ayo' mọ'in,41 mu'dye mọmo' jaso'miti Jesús ferdye' paj qui tupuj meijjetyetacsi sọyo' in. 25Jesús chị́yacsebi dyijyedye' mu'in, jéyacsi: —Jesha' bä'yedye'ĉantyi' chuti ayo'tum jụijya' mu'in, mijam ra' men me' bu'yi' mọ' bä'yedye'. Chime'dye vaj chätidye' jụijya' in vaj meij chuva'tidyeij jụijya' in, cavin ra' mọtsi in. 26Me'dye ra' chime', Satanás vaj meij chutidyei' sọyo' in, jam ra' men me' bu'yi' ayo'bu'yedye' mu' Satanás, cavin ra' mọtsim'. 27Anic cäj p̂iijtiĉa' yụ mi'in, yi mi'in: “Uts Jesús Beelzebúsi'ya' ferdye' meijjetyetacsi sọyo'”, yi mi'in. Anic va've yi mi'in, ĉaĉaij na mọ' Sọyo' jam tupuj meijjetyetacseban sọyo'. Chime'dye chịj mu'in ĉụi'tyi' chätidye' mi'in jam Satanássi'ya' ferdyem' meijjetyetacsi sọyo' in, mu'indye chịj in anic cäj cạtiñe' dyijyedye' mi'in. 28Jen'si' Ạ'edye' mu' mọ' so'min ferdyedyes yụ paj qui meijjetyetac-seban yụ sọyo' in. Ọij ji'ĉuyinac mi'in Jen' aty ayo'bu'yi mi'indyes. 29Jesha', jam tyi tupuj sisbite aca' ferdye'tumtyis muntyi' paj qui shi'atute jedye' mu'. Jemoñe' tashche' chum saptac mu' ferdye'tumtyi' muntyi', chat q̂uin'dyem' tupuj räj cạpte aca'ĉansi' jedye' mu'. Me'dye yụ chime' aty ji'pente yụ Satanás, tupuj qui yụ meijjetyetacsi sọyo' mu'in. 30Tyi chuc jam ñútyintyi' yụ in, mu'in fáquin yụ in, judyeya' tyi chuc jam ñútyintyi' yụ in ĉujcabuntyi' oveca yụ in, mu'in cav'cacsity mọmo' in. 31Mọ'dyes yụ jéyac, Jen' tupuj vayacjeyacsebi jụ'ñis ĉụi' juchaj muntyis mu'in, judyeya' jụ'ñis ĉụi' ñäñitidye' mu'in, mu'in na ac̣hi' p̂eijbitety in Jen'si' Ạ'edye' mu', mu'in me'tyity in, Jen' ra' jam tupuj vayacjetyetacsi juchaj mu'in. 32Tyi chuc ac̣hi' p̂iyin yụ in yụ Anictyity Muntyi', Jen' tupuj vayacjeyacsebi juchaj mu'in, mu'in na ac̣hi' p̂eijbitety in Jen'si' Ạ'edye' mu', Jen' ra' jam tupuj vayacjetyetacsi mijam ra' q̂uin' mijam ra' jụ'ñisĉan mạyedye' vayacjetyetacsi mọ' juchaj mu'in. 33Jesha', tsạ'si' jụijya' mọ' cätidye', anic jäm' väshi', shị́na'joi'si' na jụijya' mọ' cätidye', jam jäm' väshi', ĉaĉaij na mọ' cätidye' chị́yac ĉụi'si'che' väsh mọ'. 34¡Mi'in jeñej nas! Jam jun' rụij p̂eyaqui mi'in ĉaĉaij na anic ac̣hi'yacñity mi'in. Jụ'ñis chuc me'chutiñe' ĉojtyi'ĉan mi'in, mọ'dyem' ji'shuptiñe' p̂eyacdye' mi'in. 35Rụijtyity muntyi' rụijsisdye p̂eyacdye' ji'shupque', ĉaĉaij na rụijsis me'chui' ĉojtyi'ĉan mu'. Mu' na ac̣hi'yity muntyi' a'c̣hisdye p̂eyacdye' ji'shupque', ĉaĉaij na a'c̣his me'chui' ĉojtyi'ĉan mu'. 36Yụ nash jéyac, aty ayijya' tupudye' Jen' jị'cäts yụ'tacsiya' ra' juchadye'ya' muntyi' in, mu' ra' cäts yirity jịjcaij cọdyetacsi p̂eyacdye' mu'in, jätäjyi chuc jiquej in fibisya' p̂eyacdye' mu'in. 37Räj p̂eyacdye' mi'in jiquej me' me' ra' cudyityibunac Jen', mọ' ra' p̂eyacdye' mi'in ji'me'tyinac, mọ' ra' ji'ĉubunac are' mọ'ya' juchaj mi'in, are' itŝi'. 38Chat qui pạrej mu'in jị'chiyacsity yụ'tacdye' in judyeya' mu'in fariseo in mu'in p̂eyaqui in jéte Jesús in: —Mi Jị'chiyacsity, tsun mạ'je' cạvebiyac ferdye' mi. 39Jesús vorjeyacsi: —Anic ac̣hi'yity q̂uin'tyity mi'in, anic yacchutintety Jen'. Me' tsan' cudyityitiĉa' ferdye' mi'in, jam qui na ram' jun' me' jị'caveyeyac. Aty yiri' quim' jị'caveyeyac ferdye' yụ, jun' chuc ji'caviti Jonás jiquej, me'dye yụ chime'. 40Jonás jiquej chibin mạyedye' me' bu'yi tạbedyesĉan vo'co, me'dye ra' yụ chime' Anictyity Muntyi' yụ, chibin ra' mạyedye' jacĉan me' bu'yi yụ. 41Aty ayijya' tupudye' Jen' jị'cäts yụ'tacsi ra' juchadye'ya' muntyi' in, mu'in ra' Níniveĉantyi' jiquej in mu'in ra' sacyi atsij in, ji'jäcbunac ra' mi'insi' juchaj mi'in, ĉaĉaij na mu'in aty se'vebitety in Jonássi' voro'yedye' jiquej mu', mu'in dyijyi juchajche' in. ̣Q̂uin' na me' tsan' yụ́si' p̂eyacdye' anic mọjo'chas, ọya'yas jiquej Jonássi', mi'in qui nam' jam dam' se'vibutiĉa' yụs p̂eyacdye' mi'in. 42Chime'dye mọ' ayo' jätisve bä'yis, aty ayijya' tupudye' Jen' jị'cäts yụ'tacsi ra' juchadyes muntyi' in, mọ' ra' ayo' sacyi' ji'jäcbunac ra' juchaj mi'in, ĉaĉaij na moch dyụ́tsedye've jijtui' mọ' paj qui se'vepte rụijsis ji'chäyitidye' Salomónsi' jiquej. ̣Q̂uin' na me' tsan' yụ́si' p̂eyacdye' anic mọjo'chas, ọya'yas Salomónsi' jiquej mu', mi'in qui nam' jam jun' se'vibutiĉa' yụs p̂eyacdye' mi'in. 43Yiris sọyo' meijyeban' muntyi'ĉansi' jụijya', jọban' chañesve jac tyeban', quevaqui' juna' chuc mạ'je' bä'yi' tsan'. Jam na dạcaqui jana' jụijya', dyijyi' yi': 44“Dam'dye jäm' acatuban' yụ, yóĉansi'dyem' shupqui' jiquej ọij.” Anicdye me', ca'ñibun' mọ' dạquishajte muntyi' jeñej bu'yity aca', jeñej jäm' coyacsi' jäm' yụ'tacsi', me' bu'yi dạquishajte. 45Mọ'dyes qui mọ' sọyo' quevacseĉan' yocsi' sọyo' in, yävätidye' in, anic mọ'in mọjo'chas a'c̣his in, mọ'ĉandye mọ'in siti' muntyi'ĉan in. Chat qui jäqui've dadam' qui muju'cha' ñịbe' cạve' mu' muntyi', jam jeñej tashche' jiquej, yirisdyem' sọyo' jame'chuti jiquej. Me'dye ra' chime' q̂uin'tyity muntyi' in där ra' ñịbe' cạve' in. 46Jesús p̂eyacva'joij muntyi'tum mu', ĉụi'dye shupqueti' tse' mu', judyeya' vojity mu'. Mu'in jorojya' dyäqui in cọdaqui in mạ'je' p̂eyaqui Jesústum in. 47Yirity muntyi' jéte Jesús: —Mosh tyu' jorojya' tse' mi judyeya' chime' vojity mi, mu'in nash mạ'je' p̂eyaqui mítum in. 48Jesús vorjete: —¿Mọ'ya' adac ĉaĉaij tse' yụ? ¿Mu'ya' adac ĉaĉaij vojity yụ in? 49Me'ĉandye c̣họco'jeyacsi jị'chiyactyi' mu', yi mu': —Uts q̂uin' jị'chiyactyi' yụ mu'in nash tse'tucsi yụ judyeya' vojitytucsi yụ. 50Tyi chuc chique' in jun' chuc mạ'je' Jen' yụ, mu' mạyedye'chety, mu'indye vojitytucsi yụ, judyeya' tse'tucsi yụ.

will be added

X\