Matthew 11

1Aty me'si' yụ'tyeyacsi p̂eyacdye' mu' mu'in yiri'tac pärä' jiyity jị'chiyactyi' mu', chat qui mu' Jesús sacti, voro'tacsequi mu'ĉan bä'yedye'ĉantyi' in. 2Mu' na Juan chojtacsity ĉä'räij mu' ĉär'taquisĉan, mu' se'vaqui jun' chuc mu' jị'caveyacsi ferdye' mu' Cristo. Mu' qui juteyete pạrej jị'chiyactyi' mu', paj qui ĉọcte in mu' Jesús. 3Jéte in: —¿Mi buty jiquej p̂iyin mu' Juan, yi mu' jiquej, “Atsij ra' mu' Ji'c̣honacsity muntyi'”, mídye adac? Jam jụijya' mi, tsun ra' yejĉoij biste yoctyi'. 4Jesús vorjeyacsi: —Tạij mi'in jecmac mu' Juan jun' chuc cạvetiñe' q̂uin' mi'in judyeya' se'vetiñe'. 5Jecmac jun' chuc yụ jị'naijtacseban mu'in tofety in, judyeya' ji'mi'acseban yụ mu'in bureijtyi' in, judyeya' ji'chäcac-seban yụ mu'in bayi'-yiijtyi' in, judyeya' ji'se'vacseban yụ mu'in tyuctyity chun in, judyeya' vañinjeyacseban yụ mu'in aty säñity in, judyeya' jéyacsi yụ ñịbety in c̣hon'dyedyes p̂eyacdye'. 6Anic ma'jodye'tum in mu'in jam yocve dyijyity yụ́dyes in. 7Aty jọbanya' in mu'in jị'chiyactyi' Juantyi' mu', Jesús p̂eijte mu' Juan, jéyacsi mu' dai'tyi' muntyi' in: —¿Jedyetuij ca' mu'ĉan mi'in cäjyasĉan jac, cạvectinte mu' Juan? ¿Jeñej buty jedye' ĉọ́tinte mi'in? ¿Jeñej shan ji'nashva'ques tyi'mu, me' buty ĉọ́tinte mi'in?40 Mijam me' mu'. 8¿Jeñej buty ya'ijtyi'ĉantyi' quị'si' cäti, me' ĉọ́tinte mi'in? Mijam me' mu'. Mu'in ya'ijtyi'ĉantyi' quị'si' in ayosĉan aca' bä'yi mu'in in. 9Quivij ra' yụ jéyac: ¿jeñej buty jedye' ĉọ́tinte mi'in? ¿Mạ'je' buty cạvectinte yirity jaso'mitity p̂eyacdye' Jen'? Me' nash mu' Juan cạvectintety mi'in, mu' nash anic muju'cha' jaso'mitity p̂eyacdye' mu' Jen', mi'in jam chị́yetinte mu'. 10Mu' nash Juan jị'cätsepte ọij sánacdye' Jen'si' mu', yi mu': “Yụ ra' jutete jutactyi' yụ, mu' ra' tashi paj qui jä'mij jäm' yụ'tyiyin majmi mídyes.” 11Anicdye me', mu' Juan chojtacsity anic räj muntyi' cajnacsi mu', urucyaty in judyeya' q̂uin'tyity in. Me' tsan' me' mu'in Jen'dyety q̂uin' in, ayo'bu'yedye'ĉantyi' in, me' tsan' mu' uya'yaty, mu'in qui nam' muju'cha' yụ'tac Jen'ya' in, uya'ya' quim' Juan chojtacsity. 12Aty tiyacchui'ya' voro'tacsi mu' Juan me'dye q̂uin', mu'ya' ferdye'tumtyi' muntyi' in mu'in ferche' ñutsjeĉun'bite in Jen'si' ayo'bu'yedye' mu'. 13Räj mu'in urucyaty in jaso'mitity p̂eyacdye' Jen' jiquej in, jị'chicaquity mọmo' in p̂eijbite in ayo'bu'yedye' ra' Jen'si' mu', jun' qui' chuc atsij mu' Juan. 14Sánacdye'che' p̂eijte jiquej mu' Elías yi' atsijban ra' mu', uts Juan q̂uin' aty jị'cätse' mọ' sánacdye', vátyequej anicjetiñe' jụijya' mi'in. 15Tyi chuc chuntumtyi', jäm' se'vevac ọij p̂eyacdye' yụ. 16¿Jedye'tum bu ra' jị'cäts-tac-siij uts muntyi' in? Jeñej miqui'muntyi' majmaijtyi' in, yi jéyacsi pen'dye' mu'in: 17“Tsun ma'jodyedyes boñi mi'indyesi', jam qui nam' ma'joij mi'in, chat qui táredyedyes jime' tsun, mijam chime' tári mi'in”, yi miqui-'muntyi' in. 18Me'dye mi'in chime' q̂uin', mijam Juan ma'jotyetinte jiquej mi'in, mu' jam dyijtui' jäm'si' säcsedye', mijam dam' tyeij vino chime'. Mi'in qui nam' jam ma'jotyetinte, “Uts sọyo'tumtyi'” yim' jétinte mi'in. 19Yụ na atsij Anictyity Muntyi' yụ, jäm' säcsi yụ, judyeya' chime' tyeij yụ, chime'jitiĉa'dye yụ mi'in, jam ma'jotyitiĉa' mi'in. “Uts Jesús säsäcsaty judyeya' tyeijtyi' chime', pen'dyetucsi juchajtumtyi' in judyeya' tsim'tety querec̣ha in”, yi mi'in jítiĉa' yụ mi'in. Me' tsan' me', chị́yac qui nam' in mu'in me'chuptety in dyijyedye' Jen'si' mu', jun' chuc carijtaqui mu'in in. 20Mu'in bä'yedye'ĉantyi', me' tsan' mu' Jesús muju'cha' jị'caveyacsi ferdye' mu', mu'in qui nam' jam dam' dyijyi juchajche' in, mu'ĉantyi' qui fạra'jeĉúnacsi. 21Yi: —¡Där ra' ñịbe' cạvetiñe' mi'in Corazinĉantyi' mi'in, judyeya' Betsaidaĉantyi' chime' mi'in! Me' tsan' därsi' ferdye' jị'caveyeyac yụ, uts na jam dyijyi juchajche' mi'in. Jo'mes jị'caveyacsi ferdye' jụijya' yụ mu'in Tiroĉantyi' in judyeya' Sidónĉantyi' jụijya' in, jam ra' mụi' dyijyaque juchajche' in, a vuty p̂oc̣hi'c̣hijtyi'ĉan quị'si' cofjiti u in, judyeya' chimya' bucjiti jo'no'che' chime' u in, me' me' jị'ĉocdyes aty dyijyi juchajche' in. 22Mi'in na jam me' dyijyi, mọ'dyes aty ayijya' tupudye' Jen' jị'cäts yụ'tacsiya' ra' juchadye'ya' muntyi' in, dadam' ra' muju'cha' Jen' so'minac va'tacdye' mi'in Corazínĉantyi' mi'in judyeya' Betsaidaĉantyi' mi'in, uya'ya' ra' mu'in so'mac in Tiroĉantyi' in judyeya' Sidónĉantyi' in. 23Mi'in na Capernaumĉantyi', mi'in buty dyijyi anic ra' muju'cha' yụ'tac mi'in. Jam ra' me' mi'in, mu' ra' Jen' va'quicnac mi'in, dadam' ra' uya'ya' yụ'tac mi'in. Fibim' dai' qui' jị'caveyeyac ferdye' yụ, uts na jam anicyi mi'in. Me' cavibuse ferdye' Jen'si' jụijya' in mu'in Sodomaĉantyi' jiquej in, a vuty dyijyaque juchajche' u in, a vuty taca' yejĉoi' q̂uin' o mọ' bä'yedye'. 24Aty ayijya' tupudye' Jen' jị'cäts yụ'tacsi ra' juchadye'ya' muntyi' in, dadam' ra' muju'cha' Jen' so'minac va'tacdye' mi'in Capernaumĉantyi' mi'in, uya'ya' ra' mu'in Sodomaĉantyi' jiquej in. 25Aty me'si' mu' Jesús cọdyete Jen' mu' jéyaqui: —Yụ́tyi' Jen', mi nash ayo'bu'yi mạyedye'che' judyeya' jacche'. Yoshoropaij Jen' mi nash jị'chiqueyacsi ọij dyijyedye' mi mu'in jam chị́dye'tumtyi' in, mu'in qui nam' chị́dye'tumtyi' in judyeya' dyijyedye'tumtyi' ĉútity in jam jị'chiqueyacsim. 26Me' dyijyedye' mi Jen' ĉaĉaij na me' mạ'je' mi —yi jéyaqui. 27Jesús jéyacsi: —Yụ́tyi' Jen' mu' yu'tyin yụ paj qui räj ayo'bu'yi yụ. Mijam tupuj yirity chäyibun dyijyedye' yụ in, ĉaĉaij na yụ Jen'tyi' Ạva' mu', yirity mọmo' mu' Jen' chäyibun dyijyedye' yụ. Chime'dye jam tupuj yirity chị́yepte in dyijyedye' Jen'si' mu', yum' yirity Ạva' mu' chị́yepte yụ dyijyedye' mu'. Chime'dye tyi chuc mạ'je'ya', yụ tupuj jị'chiqueyacsi dyijyedye' Jen'si' yụ. 28Atsijam' úya' yụ́ya' mi'in, tyi chuc peñiyejoij no'bi in, chat qui ra' yụ jị'jutyeyac mi'in. 29Jụjjibutiĉam' ọij ji'chäyitidye' yụ jeñej bu'yi' vóyes chapa'taquis mu'. Ji'chäyiti ra' mi'in dyijyedye' yụ. Yụ nash jäm'yity judyeya' jam ashyi ĉojtyi'ĉan yụ, me' ra' jị'jutyiti mi'in. 30Jam nash javquis chapa'taquis so'meyacsi' yụ, mijam carijsis ji'chäyitidye' yụ.

will be added

X\