Matthew 10

1Jesús fayacsi mu'in yiri'tac pärä' jiyity jị'chiyactyi' mu', chat qui so'macsi ferdye' paj qui tupuj meijjetyetacsi sọyo' in judyeya' räj ji'chäĉac-seban muntyi' in, are'reijtyi' in judyeya' japacjoijtyi' in. 2Ọij nash tịj mu'in yiri'tac pärä' jiyity jutactyi' mu'. Mu' tashchety tsim'tactyi' Simón, chime' tịj mu' Pedro, judyeya' vojity mu', Andrés, judyeya' Santiago vojitytumdye mu' Juan, mu'in nash in Zebedeoty ạva' mu'. 3Chime' mu' Felipe judyeya' Bartolomé, judyeya' Tomás, judyeya' Mateo, mu' tsim'tety querec̣ha, judyeya' mu' Santiago, Alfeoty ạva' mu', judyeya' Tadeo, 4judyeya' yoctyi' Simón, mu' nash ñuru'tyity in mu'in fạ́cacsi in Romaĉantyi' in, judyeya' mu' Judas Iscariote, mu' ra' ji'mincatety Jesús. Me' me' nash jutactyi' mu'. 5Jesús jutacsi mu'in yiri'tac pärä' jiyity in, yi mu' jéyacsi: —Jam ra' mu'ĉan jịjcaij yútacsebi mi'in bä'yedye' jam judíos mu'in, mijam ra' Samaria-ĉansi' bä'yedye' yútyetiñe' mi'in chime'. 6Mu'in ram' ĉọcsequi mi'in Israeltyi' vóshi' in, mu'in jeñej bu'yity moñis oveca in. 7Mu'in ram' jéyacsequi mi'in: “Aty c̣hẹi'ya' ayo'bu'yi ra' Jen'.” 8Ji'chäcacsebajsham' japacjoijtyi' in, vañinjeyacsebaj-sham' mu'in säñity in, judyeya' ji'chäcacsebaj-sham' mu'in bayi'yita-quity a' in, judyeya' chime' meijjetyetacsebajsham' sọyo' mu'in sọyo'tumtyi' in. Mi'in fibi'ya' so'mac ọij ferdye', mọ'dyes jam ra' cọdaqui mi'in ji'chäcacsebanya' mi'in ọijya' ferdye'. 9Jam ra' cạtinte querec̣ha mi'in, 10mijam ra' jubij mi'in, mijam ra' nabac camisa mi'in mijam yujches mi'in mijam ra' mutyudye' mi'in, ĉaĉaij na tyi chuc carijtaquity, mọ'ya' mu' chime' säcsedyes ra' so'mac. 11Ventyectiñe' jụijya' yiris bä'yedye' mi'in, mu'ĉan ra' quevacsi mi'in tyi chuc ra' tiĉuñinactyi' in. Mu'ĉan ra' dyäqui mi'in jun' qui' chuc yạjquibajtiñe' bä'yedye'. 12Aty ra' sistiñe'ya' yiris aca', vorjeyacsi ra' mi'in mu'ĉantyi' in, jéyacsi ra' mi'in jäm'yedyestum p̂eyacdye'. 13Tiĉuñinac jụijya' mu'ĉantyi' in, cạ̈tsi' ra' mu'indyes p̂eyacdye' mi'in. Jam na ra' tiĉuñinac jụijya' in, jam ra' jun' cạ̈tsi' mu'indyes in mọ' p̂eyacdye'. 14Vatyquej ra' mu'ya' aca'ĉantyi' in, bä'yedye'ĉantyi' in jam tiĉuñinac jụijya' in, mijam se'vinac jụijya' in, chischisjeyac-taqui ra' jac yujches mi'in, mọ' ra' jị'ĉoyacsi mi'in anic va'cac bä'yi mu'ĉantyi'. 15Anicdye ra' me', aty ayijya' tupudye' Jen' jị'cäts yụ'tacsiya' ra' juchadye'ya' muntyi' in, dadam' ra' muju'cha' Jen' so'macsi va'tacdye' mu'in in jam se'vinactyi' in, uya'ya'dye so'macsi ra' Jen' mu'in bä'yity Sodomaĉan jiquej in judyeya' Gomorraĉan. 16Jeñej oveca bu'yi mi'in yụ ra' juteyac yóĉandyem' bä'yi' vajedyedye' o. Jemoñe' ĉụi' dyijyedye'tum mi'in jeñej nas, judyeya' jäm'jitac chime' mi'in jeñej ọ'to', me' ra' mi'in. 17Ĉujcati ra' mi'in pạrej ra' mu'ya' ji'me'tyinac ayo'ya' in, judyeya' ra' ji'si'binac in vajmu'yadye'ĉan in. 18Yụ́dyesi' ra' ñịbe'tac mi'in, mu'in ra' ji'me'tyinac in bä'yedye'ĉantyi'ya' ayo' in judyeya' muju'chatyya' ayo' chime' in. Mi'in ra' jị'chiqueyacsi yụ́si' p̂eyacdye' mu'in ayo' in, judyeya' mu'in jam judío in. 19Aty ra' ji'me'tyinac jụijya' in, jam ra' dyijtutiñe' jun' chuc ra' ñutsjiti p̂eyacdye'ya' mi'in, Jen'dye ra' so'minac p̂eyacdye' ji'p̂eyacnacya' in. 20Mi'in ra' jam ĉụi'si' p̂eyacdye' ji'shuptiñe', Ạ'edye' Jen'si' mu', mu' Ạvatunactyi' mi'in, mu'si' ra' p̂eyacdye' so'minac. 21Pạrej ra' mu'ya' ĉụi'tyi' vojity ji'me'taqui ayo'ya' in paj qui ijate in, judyeya' ra' pạrej ji'me'taqui ayo'ya' ĉụi'tyi' ạva' mu'in paj qui ijac in, judyeya' pạrej ra' ji'ijaqui ĉụi'tyi' jen' mu'in judyeya' tse' mu'in. 22Räj ra' yụ́dyes mọ'jinac fáquiyinac in. Tyi chuc jam peñity in jun' qui' chuc jadyic tupudye', mu' ra' c̣hoñi in. 23Ñịbe'tyinac ra' jụijya' in yirisĉan bä'yedye', yocsi've ra' jịjcaij ĉa'joij mi'in. Yụ anic jéyac, jambi' ra' räj socor'jetiñe' bä'yedye' Israelĉansi' in voro'tacsequi mi'in, uya'ya'dye ra' atsijban yụ Anictyity Muntyi' yụ. 24Jam yirity ji'chäyitity muju'cha', uya'ya' jị'chiyetety mu', jam yirity úñity muju'cha', uya'ya' ayo' mu'. 25Mu' jị'chiyactyi' jemoñe' dyijyi paj qui cätste mu' jị'chiyetety, judyeya' mu' úñity jemoñe' dyijyi paj qui cätste ayo' mu'. Me'dye ra' chime' mi'in cäc̣hä'chutiĉaty yụ mi'in, ĉaĉaij na muntyi' jin yụ in: “Uts nash ayo' sọyoty mọ'in, tịj mu' Beelzebú”, jin yụ in. Me' ñäñin yụ in ayo' mi'in, dadam' ra' mi'in muju'cha' ñäñinac in úñity yụ. 26Mọ'dyes jam ra' quijnacsi muntyi' mi'in. Mọ'in jujmus q̂uin' in, räj ra' mọ' jorojĉanyi' in, judyeya' mọ' jumve yụ'tacsi muntyi' q̂uin' in, räj ra' chị́yac in. 27Ọij ji'chäyitidye' caminves jéyac yụ mi'in, muntyisya' ra' vej p̂eyetiñe' mi'in, räj ra' jéyacsi mi'in. 28Jam ra' quijnacsi muntyi' mi'in. Paj ra' tsan' a' ijabunac jụijya' in, ạ'edye' qui na ra' mi'in jam jun'jibunac in. Mu'dye ram' quijñetinte Jen', ĉaĉaij na mum' tupuj ijanac mi'in judyeya' tŝijĉan va'quicbunac ạ'edye' mi'in. 29Uya'yaty mọmo' ficha tupuj ya'itye' pärä' jaijtyi'. Me' tsan' jam ya'i' in muntyisya' vej mu'in, mu' qui nam' Jen' Ạvatunactyi' mi'in, mu' räj chị́yacsi jaijtyi' in, mijam yiris säñi' in jam me' Jen' yíya'. 30Dadam' mi'in chäyibunac Jen' fin mi'in räj tsic Jen'ya', mu' chäyibunac juñucsi' chuc fin mi'in. 31Mọ'dyes jam ra' noi'yi mi'in, dadam' muju'cha' otejjinac Jen', ọya'ya' jaijtyi' in, me' mu' anic ĉujcanac mi'in. 32Tyi chuc jị'chicaqui yụ́dyes in muntyisya' vej mu'in, yi in, “Yụ nash Jesucristoty” me'dye ra' yụ chime' jị'chicaqui mu'indyes in Jen'si'ya' vej yụ mạyedye'chetyya'. 33Tyi chuc jam jị'chicaqui yụ́dyes muntyisya' vej mu'in, yity in: “Yụ jam Jesucristoty,” me'dye ra' yụ chime' jam jị'chicaqui mu'indyes in yụ́tyi'ya' Jen' mạyedye'chetyya'. 34Me' buty ĉútiĉa' yụ mi'in yụ atsij paj qui jäm'jitive jacchety muntyi' in, me' buty ĉútiĉa' yụ mi'in. Jam me'dyes atsij yụ. Yụ nash atsij paj qui jam jäm'jiti muntyi' in. 35Yụ́dyes ra' pạrej muntyi' in jam ra' jäm'jiti ĉụi'tyi'tum jen' mu'in, judyeya' ra' mọ' p̂en in jam ra' jäm'jiti' ĉụi'si'tum tse' in, judyeya' mọ' p̂en in jam ra' jäm'jiti' yaya'dye'tum in. 36Pạrej fáquitidyeij in ĉụi'tyi'tum chätidye' mu'in, me'dyes qui fạ́cacdyety shupqui mu'in in. 37Tyi chuc muju'cha' mạ'jeyaqui ĉụi'tyi' jen' mu' judyeya' tse' mu', uya'ya' mạ'jin jụijya' yụ, mu' ra' jam tupuj cäc̣hä'chun yụ. Tyi chuc muju'cha' mạ'jeyaqui ạva' mu', uya'ya' mạ'jin yụ, mu' ra' jam tupuj cäc̣hä'chun yụ. 38Tyi chuc jam vemetety crosh paj qui me' bu'yi jịjcabun ñịbedyes yụ, jam me' jụijya' in, mu' ra' jam tupuj cäc̣hä'chun yụ. 39Tyi chuc otejjiti ĉụi' paj qui jam yụ́dyes säñi, mu' ra' fibidyes bä'yi. Tyi chuc jam otejjiti säñi yụ́dyes, mu' ra' jam fibidyes bä'yi, bijodye' ra' so'mac mu'. 40Tyi chuc tiĉuñinac in, chime' yụ tiĉuñin yụ in, judyeya' tyi chuc tiĉuñin yụ in, Jen' chime' tiĉun'te in, mu' jutintyi' yụ. 41Tyi chuc tiĉun'te in yirity jaso'mitity p̂eyacdye' Jen' jụijya' in, Jen'dyes mọmo' tiĉun'te jụijya' in, mu'inmun ra' so'mac bijodye-dyes mu'in. Chime'dye tyi chuc tiĉun'te in yirity jäm'tyi' muntyi', ĉaĉaij na mu' jäm'tyi', mu'inmun ra' so'mac bijodyedyes chime' in. 42Tyi chuc ojñi' so'metety in mu'in cäc̣hä'chuntyi' yụ in, me' tsan' mu' uya'yaty, mọ'ya' ra' bijodyedyes mu'in so'metety in.

will be added

X\