Mark 9

1Chime'dye mu' Jesús jéyacsi: —Yụ fer jéyac pạrej úya' q̂uin' in jambi' ra' säñi in mu'in ra' cạvepte in Jen'si' ayo'bu'yedye' mu', ferdye'tum ra' ayo'bu'yi mu'. 2Aty jäbän mạyedye' jiyi', chat qui mu' Jesús mụcu'che' jịjcaij, cạcsi chibin mọmo' in, Pedro judyeya' Santiago judyeya' Juan, itŝij yoctyi' mu'che'. Jesús yocdyejyi mu'che' mu'insi'ya' vej mu'in.67 3Anic pashyi quị'sim' anic jiyi jai'baty mu', jam jụ'ñis jo'meij quị'si' pupte in. 4Ĉụi'dye mu'in ji'caviti in Elías judyeya' Moisés, p̂eyete Jesús in. 5Chat qui yi mu' Pedro jéte Jesús: —Jị'chiyacsity, ¡anic jäm' úya' q̂uin' tsun! Jesha' tsun ra' jäm'tye' chibin p̂isijsis aca', yiris ra' mídyes, judyeya' Moisésdyes judyeya' ra' Elíasdyes. 6Itŝistum dyijyedye' p̂eyaqui mu' Pedro ĉaĉaij na anic jiyi noi'yi mu'in jị'chiyactyi' in. 7Vatyquej juñumjeyacsi' dyicba'badye'. Yiris p̂eyacdye' se've' in dyicba'badye'ĉan yi': —Uts nash mạ'jeyacdyety Ạva' yụ, mu' ra' se'vetinte mi'in. 8Cạveban in, aty mu'in itŝij yoctyi' in, mu'dyety yirity mu'ya' Jesús. 9Aty chạban mụcu'chety in, chat Jesús jéyacsi: —Jam ra' méqui' jị'chique-yacsi muntyi' mi'in ọij cạvetiñes q̂uin' mi'in, jun' qui' chuc vañinyebanya' yụ Anictyity Muntyi' yụ, q̂uin'dyem' ra' jị'chiqueyacsi mi'in. 10Anicdye me', jị'chiyactyi' mu' jam jị'chiqueyacsi yoctyi' in. Ĉụi' mọmo' jítidyeij p̂iyiti in jedye' buty cại' ọij p̂eyacdye' vañinyeban ca ra' mu'. 11Chime'dye jéte Jesús in: —¿Jun' buty yi mu'in jị'chiyacsity yụ'tacdye' in, Elías chum ca ra' tashche' ji'cavibun, jäqui've ra' mu' Ji'c̣honacsity muntyi'? 12- 13Vorjeyacsi Jesús: —Anicdye me' yi' sánacdye' mu' chum ca ra' tashi ji'cavibun Elías, räj ra' jị'ruij yụ'tye' mu', yi' sánacdye'. Yụ jéyac, a nash cạ̈tsi' ọij, aty ji'cavibun Elías, anic qui nam' där jị'ñibe'cate in jun' chuc mạ'je' mu'in in yoj yi'dyem' sánacdye' o.68 Chime'dye sánacdye' yi' där ra' jị'ñibe'cac yụ judyeya' äcäijjeyac yụ Anictyity Muntyi' yụ. 14Jesús judyeya' chibin jị'chiyactyi' mu' shupqueshan mu'ya' in, dạcacseshan in yoctyi' jị'chiyactyi' mu' anic shachtyity muntyi' cọijtacsi in. Pạrej jị'chi-yacsity yụ'tacdye' in p̂eyacdye'ya' chutidyeij in jị'chiyactyidyes mu'. 15Cạvacdye'-ĉandye muntyi' in anic se'yi in judyeya' ji'rebeĉun'te in, vorjete in. 16Jesús jéyaqui jị'chiyacsity mu': —¿Jedye' ca' p̂eijtiñe' mu'intum jị'chiyacsitytum yụ'tacdye' in? 17Yirity mu'ĉantyi' vorjete: —Jị'chiyacsity, tuyeye ạva' yụ, sọyo' nash jepepej jayu'ti. 18Juna' ĉụi' mọmo' sọyo' jaji'ñe'iti, mụijya' jaji'tŝuti, shucben' tyeij chụ'ĉan, queruchjeyaqui modyin chime', cháta' qui ti'yejoij. Yụ tsan' cọdyetacsi jị'chiyactyi' mi paj qui mu'in meijjetyebajte sọyo' in, jam qui nam' jun'te' in. 19Chat qui Jesús jéyacsi: —¡Anic jam méqui' anicyi mi'in! Me'dye ra' yạjquibadyeyac tạ'caijdye ra' mi'in. Aty ra' jam jun' dyichchuyac mi'in. Uya' jijtuvac tuca ạva' mi yụ́ya'. 20Chat qui tuyete in mu' nanaty. Sọyo' jaji'ñe'iti mu' nanaty aty cạveteya' Jesús, mụijya' tŝọij bur'bur'yejoij judyeya' shucben' tyeij chụ'ĉan. 21Jesús jepte jen' mu': —¿Jun'dyeya' ca' yacchuti me' uts nanaty ạva' mi? Vorjete mu': —Miquitydyem' jiquej me' yacchuti. 22Chime'dye jäm'dyeya' tŝijĉan tŝọij judyeya' ojñi'ĉan chime', mạ'je' ja'ujati mọ'. Tupuj jụijyam, paj qui ñịbe' ĉútiĉa' judyeya' ñútyitiĉam' —yi jéte. 23Jesús vorjajiti: —¿Jun' dash jítim: tupuj jụijya' mi? Mídye ra' tupuj anicyi Jen'che', tyi chuc anicyi jụ'ñis ĉụi' mọmo' cọdacdye' tupuj jụjbiyac. 24Chat qui mu' nanatytyi' jen' mu' fer p̂eyaqui jéte: —Anicyi nash yụ Jen'che', ñútyiti' ĉaĉaij na taca' jayej anicyedye' yụ. 25Jesús jị'ĉojtuyacsi shachtyity muntyi' in, cavin mu' mu'ya'dye fạra'je' sọyo', je': —Mi sọyo' jepepej yụ'tacsis muntyi' in, yụ jéye, meijyebada ọ́ĉan nanatyĉansi' q̂uin' mijam ra' quivij sisjajtem. 26Fer mọ' shavyi' sọyo' ji'ñe'etacte mu' nanaty q̂uin'dyem' meijyeban' mọ'ĉansi', jeñej säñity muntyi' me' cạvete in. Dai' mu'ĉantyi' yi in: —Atyu' u säñi —yi in. 27Jesús qui tapjepte un mu', sacjebajte, q̂uin'dyem' mu' sacyeban nanaty. 28Chat qui mu' Jesús yạjquicsi aca'ĉan siti. Jị'chiyactyi' mu' jéte in: —¿Jun' buty tsun me' jam jun' meijteban' sọyo'? 29Vorjeyacsi Jesús: —Mọ' nash anic carij meijyi', jemoñe' tashche' cọdyetinte Jen' chat qui ra' q̂uin'dyem' chäquinac mi'in. 30Chat qui sacti in yạjqui' mọ' bä'yedye' in, soquem tyeij Galilea in. Mu' jam mạ'je' paj qui chịj muntyi' in mu'ya' mu', 31ĉaĉaij na mu'in mọmo' jị'chi-yacsi jị'chiyactyi' mu'. Jéyacsi: —Mu'in ra' ayo'ya' ji'me'tyin yụ in Anictyity Muntyi' yụ. Mu'in qui ra' ijan yụ in, chibin qui na ram' mạyedye' me' bu'yi yụ, chat qui ra' vañinyeban yụ. 32Jị'chiyactyi' mu' me' tsan' mu'in jam chiquebite p̂eyacdye' in, noi'yi qui nam' mu'in in, jam mạ'je' jéte in jedye' chuc cại' mọ' p̂eyacdye' mu'. 33Aty ventyeque'ya' in mọ' bä'yedye' Capernaum chat qui siti aca'ĉan in. Mu'ĉan jéyaqui jị'chiyactyi' mu': —¿Jedye' ca' p̂eijtiñe' mi'in majmiya'? 34Mu'in na tsịcan'yi in mem' päm' tyäjtyäij in, ĉaĉaij na mọ' p̂iijse in jụ'ñity buty mu' mu'ĉan muju'cha' bu'yity. 35Jesús qui bä'yi mu'ĉan, fayacsi qui mu'in yiri'tac pärä' jiyity jị'chiyactyi' mu', jéyacsi: —Tyi chuc mạ'je' tashche' bu'yity jemoñe' mu' uya'ya' yu'ti, paj úñi yoctyidyes chime' in. 36Chat qui mu' Jesús yụ'te yirity miquity mu'insi'ya' vej mu'in, mu' qui c̣hobete. Jéyacsi: 37—Tyi chuc yụ́dyes tiĉuñete uts miquity in, yụ́mun chime' tiĉuñin yụ in. Tyi chuc tiĉuñin yụ in, jam yụm' tiĉuñin yụ in, Jen'mun chime'dye tiĉun'te in, mu' jutintyi' yụ. 38Juan jéte: —Jị'chiyacsity, tsun cạvete yirity muntyi' mísi'che' tịj meijjetyetacseban sọyo'. Tsun nash nóte paj qui jam me', ĉaĉaij na mu' jam cäc̣hä'tyity tsunya'. 39Jesús vorjeyacsi: —Jam ra' nótinte mi'in ĉaĉaij na mu' yụ́si'che' tịj jị'caveyacsi ferdye', mu' ra' jam jun' ñäñin yụ. 40Tyi chuc jam fáquisin'tyi' tsun mu' ñútyisin'tyi' tsun. 41Yụ jéyac, tyi chuc yụ́dyes so'minactyi' mi'in, me' tsan' ojñi' mọmo', mọ'ya' ra' bijodyedyes mu'si', ĉaĉaij na yụ Ji'c̣honacsity muntyi'. 42Därsi' ra' va'tacdye' cại' in tyi chuc ji'juchayacsity in mu'in anicjintyi' yụ in, me' tsan' miquity. Me'tyity ra' in dam'dye jäm' turu'jeyeyac mij därtyi' tujĉan mu'in chat qui va'cac marĉan in. 43Jesha' ĉụi'si' un mi mọ' ji'juchayin jụijya' mi, jemoñe' tätsjeyaqui un mi. Dam'dye jäm' täcniij siti Jen'ya' mi, jam qui va'cac mi jam quiv'joi'si'ĉan tŝij, pären'dye un mi. 45Chime'dye ĉụi'si' yuj mi mọ' ji'juchayin jụijya' mi, jemoñe' tätsjeyaqui yuj mi. Dam'dye jäm' täcniij mọmo' siti Jen'ya' mi, jam qui va'cac tŝijĉan mi pären'dye yuj mi. 47Chime'dye vej mi mọ' ji'juchayin jụijya', jemoñe' fon'taqui vej mi. Dam'dye jäm' itŝi' pen' vej mi siti mi Jen'si'ya' ayo'bu'yedye' mu', jam qui va'cac tŝijĉan mi pären'dye vej mi, yóĉandyem' räjĉan tsạ'bu'yi mótoi' u in, jam quiv'joi'si'ĉan tŝij. 49Räj ra' muntyi' in jị'ĉojtac ra' in tŝijya' in. 50Anic jäm'si' mọ' jicoj, a qui nam' aty jam jesec jụijya', jam ra' cuvij jesecjoban'. Jemoñe' me' bä'yi mi'in yojdyem' jesequis jicoj o, yejĉoij vaj meij jäm'jitidyeij bä'yi mi'in.

will be added

X\