Mark 8

1Yirisĉan mạyedye' shach tyeij muntyi' cuvij in, aty itŝi' säcsedye' mu'in. Jesús fayacsi jị'chiyactyi' mu', jéyacsi: 2—Anic ñịbe' ĉọcsi yụ uts muntyi' q̂uin' in, chibin mạyedye' pen'dyetun úya' yụ in, aty itŝi' säcsedye' q̂uin' mu'in. 3Jutacseban qui na ram' jụijya' yụ paj qui yịñijche' aca'ya' jịjcaban in, jam säcsi jụijya' in, vatyquej ra' yamjoban majmiya' in, ĉaĉaij na pạrej mochmuntyi' atsij in. 4Jị'chiyactyi' mu' vorjete in: —¿Tupujtacseja' buty ji'säcsacseja' uts muntyi' shachtyity in? Ĉaĉaij na úya' cäjya' tsun. 5Jesús jéyacsi: —¿Juñucsi' ca' pan mu'ya' mi'in? Vorjete in: —Yävätidyem' mu'ya'. 6Chat qui Jesús jéyacsi muntyi' in: “Bä'jam' mụijya' mi'in.” Tapjete yävätidye'tyity pan, yoshoropaij jéte Jen', chat qui q̂uemi'vete mu' pan, so'macsi jị'chiyactyi' mu', mu'in qui ji'cheteyacsi in. 7Chime'dye mọ'ya' miqui'munsi' tạbedye' in. Chat qui mu' yoshoropaij jéte Jen' mu', judyeya' qui so'macsi jị'chiyactyi' mu' paj qui mu'in ji'cheteyacsi muntyi' in. 8Räjdye mu'in säcsi in c̣hụcmun yu'ti in. Jäqui've qui tsimjan' in ji'shucdyidye' mu'in, yävätidye' ụ́bu' därmuntyi' me'si'ĉan juban' mọ'. 9Anic shachtyity muntyi' säcsi in, vạjpedye' mir rụi'cu' muntyi' in. Chat qui q̂uin'dyem' jutacseban muntyi' in. 10Covambache' mu' jịjcaij yocsi've bä'yedye', Dalmanuta tịj mọ'. 11Fariseo in pạrej ĉọshte in mu' Jesús tiyacchui' p̂eyacdye'ya' chutidyeij Jesústum in. Mạ'je' jị'ĉojte in are' jutactyi' Jen'tyi' mu', are' jam, mọ'dyes qui cọdyete in paj qui jị'caveyacsi ferdye' mu'. 12Jesús shọijtacsi táristum jụ́tyejyi ĉojtyi'ĉan mu'. Yi mu': —¿Jun' dash me' uts muntyi' q̂uin' cudyityin yụ in paj qui yụ jị'caveyacsi ferdye'? Yụ anic jéyac, yụ ra' jam jun' jị'caveyacsi ferdye'. 13Chat qui yạjquicseban, yocve qui roi'je' covambache' mu', nopej qui jịjcaij. 14Jị'chiyactyi' mu' yaquintute pan vítedyety mu'in, yirity mọmo' pan a'ya' covambaĉan mu'in. 15Jesús jéyacsi: —Are'ĉa mi'in jäm' ra' ĉujcati mi'in ji'dujraquisya' mu'insi' in fariseos in judyeya' Herodessi' chime'. 16Jị'chiyactyi' in vaj meij p̂iyitidyeij in, yi in: —Me' jísin' Jesús ĉaĉaij na itŝij pan úya' tsun. 17Mu' na Jesús chị́yacsebi dyijyedye' mu'in, mọ'dyes qui jéyacsi: —¿Jun' me' yi u mi'in? “Itŝij pan mu'ya' tsun”, yi mi'in. ¿Taca' adac jambi' chäyitiĉa' yụ mi'in, mijam chicacsi mi'in? ¿Taca' adac yäcäj ĉojtyi' mi'in? 18Me' tsan' vejtum mi'in, jam qui nam' naijti mi'in, me' tsan' chuntum mi'in jam qui nam' se'vaqui mi'in. 19¿Jam dyijyeban u mi'in yoqui'dyem' q̂uemi'veteya' yụ ĉanam'tyity pan ji'cheteyeyacsiya' yụ mu'in ĉanam' mirtyity muntyi' jiquej in? ¿Juñucsi' ca' ụ́bu' ji'shucdyidye' tsimjajtiñe' jiquej mi'in? Vorjete in: —Yiri'tac pärä' jiyi' juban'. Jéyacsi mu': 20—Chime'dye yoqui'dyem' yävätidye'tyityya' pan ji'säcsacsi u yụ vạjpedye' mirtyity muntyi' in, ¿juñucsi' ca' ụ́bu' ji'shucdyidye' tsimjajtiñe' jiquej mi'in? Vorjete in: —Yävätidye' juban'. 21Mọ'dyes qui mu' jéyacsi: —¿Jambi' qui nam' chicacsi mi'in jedye' buty ọij cại' p̂eyacdye' yụ? 22Chat qui Betsaidave venjoij in. Muntyi' in tuyete Jesús in yirity tofety, fer cọdyete mu' paj qui mu' toco'jajiti. 23Mu' Jesús tapjepte un mu', jorojya' bä'yedye' cạte. Mu've jatai'buti vej mu' sóno'ya' judyeya' toco'jajiti. Jesús qui jajiti: —¿Aty naijbun um? 24Cạvi mu' muntyi' jéte: —Atyu' u tsan' nạijtacseban muntyi' yụ, jeñej son mi'i' in me' cạvacsiij muntyi' in. 25Jesús quivij toco'jajibuti vej mu' judyeya' qui mu' muntyi' se' cạveban, anic jäm' chäĉän' vej mu', se' vatyquej cạvi mu' tofety jiquej. 26Jesús qui jutebajte aca'yam' chat acatuban qui mu', jajiti: —Jam ra' mu'ĉandye jịjcaban bä'yedye'ĉan mi. 27Aty me'si' mi'eban mu' Jesús jị'chiyactyi'tum mu', yocsi've jac jịjcaij in yóĉandyem' bä'yedye' o, Cesarea Filipo tịj mọ' bä'yedyes. Aty majmiya' jéyaqui jị'chiyactyi' mu': —¿Jätäjyi buty muntyi' in, tyi buty ĉun yụ in? 28Vorjete in: —Pạrej na yi in: “Uts nash Juanvun Chojtacsity,” judyeya' chime' pạrej yi in: “Uts nash Elíasvun”, chime'dye pạrej yi in: “Uts nash yoctyi' jaso'mitity p̂eyacdye' Jen' jiquej”, jam vaj cäts ji'jäquin in. 29Jesús quivij jéyacsi: —Mi'in na ¿tyi yụ ĉútiĉa' u mi'in? Pedro vorjete: —Mi nash Ji'c̣honacsity Muntyi'. 30Jesús jéyacsi paj qui jambi' mọ' yirity muntyi' jị'chiqueyacsi in. 31Jesús tiyacchui' p̂eye' jun' chuc ra' ijac mu'. Jéyacsi: —Anic ra' ñịbedyes jị'ĉojtye' yụ Anictyity muntyi' yụ, ĉaĉaij na mu'in tashchety ĉọjcacsity in, judyeya' mu'in tashchety cudyitity Jen'che' in, judyeya' mu'in jị'chiyacsity yụ'tacdye' in, räjdye mu'in ayo' in va'quiquin ra' yụ in, judyeya' ra' ji'ijan yụ in. Chibin qui na ram' mạyedye' vañinyeban yụ sän'dye'ĉantyi' yụ. 32Anic jorojĉan jéyacsi mọ' p̂eyacdye'. Chat qui mu' Pedro yocya' cạte mu' Jesús, mạ'je' tsan' dyäcjeĉun'bite dyijyedyem'. 33Mu' na Jesús caman'yim' cạvacsi jị'chiyactyim'. Chat qui mu' fạra'jajiĉun'dyi Pedro, jajiti: —Meijyeva mi Pedro atyu' um jeñej bu'yi Satanás, mijam aty Jen'si' dyijyedye' cäc̣hä'chuptem, muntyis qui mọmo' dyijyedye' cäc̣hä'chucsebi mi. 34Jesús qui fayaqui jị'chiyactyi' mu' judyeya' yoctyi' in. Jéyacsi: —Tyi chuc mạ'je' cäc̣hä'chun yụ in, paj ĉụi'si' dyijyedye' yacchuqui in, paj vemete crosh in,66 judyeya' qui ra' cäc̣hä'chun yụ in. 35Tyi chuc otejjitity ĉụi' jam mạ'je' yụ́dyes bä'yi jụijya', mu' ra' fibi' mọmo' shupqui' jun' chuc bä'yi mu'. Tyi chuc jam otejjitity ĉụi', mu' yụ́dyes bä'yi judyeya' jäm'sidyes p̂eyacdye', me' tsan' säñi, mu' ra' jam fibi' shupqui' jun' chuc bä'yi, mu'si' ra' mọ'ya' bijodye' mu'. 36Mu'ya' muntyi' räj tsan' me'chui' jacches jedye' in, me' tsan' me', jam qui nam' yụ́dyes bä'yi jụijya' mu', fibidyety mu' shupqui. 37Jam yiris jedye' tupuj yụ'tye' mu' paj qui tsạ' bu'yi Jen'ya'. 38Tyi chuc tsị́catyin yụ in judyeya' p̂eyacdye' yụ mu'insi'ya' vej mu'in uts juchajtumtyi'ya' muntyi' q̂uin' in, va'quectety Jen' in, mu'in me' tsị́catyintyi' yụ in, yụ ra' chime'jeyacsidye Anictyity Muntyi' tsị́catacsiij, jun'si' chuc atsijbanya' yụ Jen'si'tum mạijquedye' mu', mọ'tum ra' atsij yụ, pen'dyetun ra' Jen'tyi' anjer yụ.

will be added

X\