Mark 7

1Fariseo in judyeya' Jerusalénĉantyi' jị'chiyacsity yụ'tacdye' in, mu'in ĉọshte Jesús in. 2Mu'in cạvepte in Jesústyi' jị'chiyactyi' mu', aty ra' säcsi in pạrej jam cäc̣hä'chucsebi yicdye' judíos mu'in, jam tashche' jäm' yụ'taqui un mu'in. 3Mu'in na fariseo in judyeya' yoctyi' judío in mu'in jambi' jụ'ñiij säcsi in jun' qui' chuc jäm' yụ'taqui un mu'in, chat q̂uin'dyem' säcsi mu'in in, ĉaĉaij na me'dye yi vóshi'vun mu'in. 4Chime'dye prasayaty aca'ya' jịjcaban jụijya' in jam tupuj säcseban in jambi' jụijya' rụij favjun unya' in. Dai' mọ'ya' yicdye' jo'mes cäc̣hä'chui'si' in. Chime'dye mu'ya' rụij favety piji' mu'in judyeya' tyéquis mu'in judyeya' tạ'dyity mu'in judyeya' ĉọshaquis chime' mu'in. 5Chat qui mu'in fariseo in judyeya' mu'in jị'chiyacsity yụ'tacdye' in jéte Jesús in: —¿Jun' dash jị'chiyactyi' mi muyetyejcai' in mọ' ji'chäyitidye' so'misin'si' tsun vóshi'vun jiquej tsun? Ĉaĉaij na mu'in säcsi in jam tashche' jäm' yụ'taqui un mu'in. 6Jesús vorjeyacsi: —Anic ac̣hi' dyijyity mi'in, jäm' yu'ti tsan' mi'in, anic rụij p̂iijnac jiquej mi'in Isaíassi' sánacdye' mu', yi': Yi mu' Jen': “Utsi muntyi' q̂uin' in p̂eyacdye'yam' irijyi yụ́che' in, ĉojtyi' qui nam' jam úya' mu'in, jam irijyi yụ́che' in. 7Fibim' tima'quin yụ in, ĉaĉaij na muntyis mọmo' yicdye' jị'chiyacsi in, jeñej aty yụs yụ'tacdye' ĉọi' u in, yi' sánacdye'.” 8Me'dye mi'in va'quecbitinte Jen'si' yụ'tacdye' mu', ĉụi'sim' yicdye' me'chuqui mi'in. 9Chime'dye jéyacsi: —Där jäm' ĉúti mi'in, ĉụi'si'ya' dyijyedye' mi'in muyi mi'in Jen'si'ya' yụ'tacdye' mu', paj qui ĉụi'si' yicdye' me'chuqui mi'in. 10Moisés sáñe': “Jäm'jeyaqui ra' ĉụi'tyi' jen' mi'in judyeya' tse' mi'in.”63 Chime'dye yi: “Tyi chuc mistaqui ĉụi'tyi' jen' mu' judyeya' tse' mu', mu' ra' sän'dye' so'mac”, yi. 11- 12Mi'in na ĉụi'sim' ji'chäyitidye' yụ'taqui mi'in paj qui jam nọ́taqui ĉụi'tyi' jen' mi'in. Yi mi'in: “Yirity muntyi' me' bu'yi yi jụijya': Räj jedye' ĉụi' me'chui'si' q̂uin' yụ, aty Jen'dyes yụ'taqui yụ.” Tyi chuc me' yụ'tyety p̂eyacdye' jụijya' in, me' tsan' me'chui'tyi' jedye' in, aty qui nam' jam jemoñe' nọ́taqui ĉụi'tyi' jen' mu'in judyeya' tse' mu'in, me' tsan' mu'in jayejjotaqui in, me' yi mi'in. 13Me'tyity nash mi'in muyetyejcabitintety Jen'si'ya' ji'chäyitidye' mu', ĉụi'sim' ji'chäyitidye' cạqui mi'in, mọ'dye mọmo' jị'chiyacsi yoctyi' chime' mi'in. Anic dai' jo'mes jäm'tiñe' mi'in. 14Jesús quivij fayacsi muntyi' in jéyacsi: —Se'vibutiĉam' jäm' ọij p̂eyacdye' yụ, räj mi'in q̂uin' jemoñe' chicacsi mi'in jedye' buty cại' ọij. 15Jedye' chuc jebei' yirity muntyi', jam mọ' jun' ja'ac̣hi'ti Jen'dyes. Mọ' ji'shupque'si' ĉojtyi'ĉan, mọ' chat ja'ac̣hi'ti. 17Jesús qui yạjquicsi muntyi' chat qui siti aca'ĉan. Jị'chiyactyi' qui mu' jéte in: “¿Jedye' buty cại' mọ' p̂eyacdye' jítiĉas baja' mi'in?” 18Jesús vorjeyacsi: —¿Taca' adac itŝi' dyijyedye' mi'in? ¿Jam adac chịj mi'in, jedye' chuc jebei' yirity muntyi' q̂uin' jam mọ' jun' ja'ac̣hi'ti Jen'dyes? 19Ĉaĉaij na mọ' jam jun' jasäsbuti ĉojtyi' mu', vo'coĉan mọmo' jị'tŝoi', aty me'si' chat qui ji'shupjan'. (Ọij p̂eyacdye' mu' ji'chäquiyisin' räj säcsedye' in jäm' jebac.) 20Chime'dye yi mu' Jesús: —Mọ' ji'shupques muntyi' in mọ' nash ac̣hi'tacsi', 21ĉaĉaij na ĉojtyi'ĉan mu'in mọ' ji'shupque' in räj a'c̣his dyijyedye' mu'in, judyeya' vo'vodye' mu'in, judyeya' shapudye' mu'in, judyeya' shu'adye' mu'in judyeya' ijatidye' mu'in, 22judyeya' ac̣hi'tidye' mu'in, judyeya' väñädye' mu'in, judyeya' ji'me'tyiyitidye' jedye' mu'in, judyeya' ñäñitidye' mu'in, judyeya' va'bunyedye' chime' mu'in. Chime'dye fer mạ'je' jedye' in, anic jiyi ac̣hi' bä'yi in judyeya' itŝi' dyijyedye' mu'in. 23Räj ọij jo'mes a'c̣his dyijyedye' yacchuti' muntyisĉansi' ĉojtyi' mu', mọ' nash ja'ac̣hi'ti Jen'dyes. 24Jesús roi'je' Tirove jịjcaij. Yirisĉan aca' dyäqui mu', jam tsan' mạ'je' mu' paj qui chịjve muntyi' in, jam qui nam' jun' tupuj jijmu'siti. 25Chime'dye yiris p̂en ạva' mọ' sọyo'tumsi', chị́qui' mu'ĉan mu' Jesús, mọ'dyes qui ĉọcte mu' Jesús dyụtsyi' mu'si'ya' vej mu'. 26Jam mọ' judío, yocves ayij sirofenicia, me' tịj jacsi' mọ'. Mọ' fer cọdyete Jesús paj qui mu' meijjajityityibun' sọyo' ạva'sim'. 27Jesús je': —Jemoñe' tashche' ji'säcsac ạva' in. Jam nash jäm' chutyetac säcsedye' ạva' in chat qui so'mac ac̣huj in.64 28Mọ' vorjete: —Anic me' Jị'chiyacsity, me' tsan' me' mọ'in qui nam' ac̣huj mesayas in, mọ' tsimjan' in q̂uemi'mii'si' ạva'si' in, mọ' jebei' in.65 29Jesús vorje': —Anic rụij voryi' mi anicyedye'ya' mi. Tupuj aca'ya' jịjcaban' mi, a nash meijyeban' sọyo' ạva'ĉansim. 30Chat qui aca'ya' jịjcaban' mọ' p̂en dạcajquiĉan' ạva' mọ' jubijĉan, aty meijyebadaque sọyo' mọ'ĉansi'. 31Jesús yạjquiban' mọ' jac Tiro, Sidónve qui tyeij, chime' bu'yidye tyeij Decápolisve, tsique' Galilea mọ' cha'she'. 32Tuyete in yirity jepepej muntyi', jän'jän'yi p̂eyaquity. Mu'in fer cọdyete in mu' Jesús jéte in paj qui mu' toco'jete. 33Jesús yocya' jácati, chocomjete chunĉan chirijriya' mu' judyeya' tai'jepte nem sóno'yam'. 34Chat qui mu' Jesús mạyedye'che' cạvi, fer jụ́tyejyi judyeya' jajiti: —¡Efata! (Mọ' yi' ca yi': “¡Chapyeva!”) 35Me'ĉandye chun mu' jonoc tyei' mu', judyeya' chap tyei' nem mu' chime', chap vatyquej p̂eyaqui mu'. 36Jesús jéyacsi paj qui jam yoctyi' jị'chiqueyacsi muntyi' in. Me' tsan' ferche' jéyacsi mu' paj qui jam p̂eijteve in, mu'in qui na jam c̣hu'c̣huij in, dadam' muju'cha' p̂eijte in, jam dam' ticamete in. 37Anic jiyi äjyi in. Yi in: —Räjdye jäm'si' carijtacdye' mu', meij jịjcaij mu' ji'se'vacseban mu'in tyuctyity chun in judyeya' ji'p̂eyacacseban mu'in jam p̂eyaquity in.

will be added

X\