Mark 6

1Jesús ca'ñibun ĉụi'situban bä'yedye' mu', pen'dyetute in jị'chiyactyi' mu'. 2Jị'jutyiti-dyesĉan mạyedye' mu' Jesús ĉọ́que' mọ' vajmu'yadye'ĉan judíos mu'in, jị'chiyacsi dai' mu'ĉan muntyi' in. Aty se'vepte p̂eyacdye' in anic tsan' äjyi in, yi jítidyeij in: —¿Jun' buty me' so'mac útsi? ¿Jun' buty dạque' därsi' dyijyedye' uts? ¡Anic därsi' ferdye' jị'cave' chime'! 3¿Jam adac utsdye mọmo' son carijtyety? ¿Jam adac mu'dyem' Maríaty ạvam'? Uya' chime' vojity mu' Santiago judyeya' José, judyeya' Judas judyeya' Simón. Chime'dye ọ́ya' voji' mu' —yi in. Mọ'dyes fạ́quete in. 4Mọ'dyes yi Jesús jéyacsi: —Pai' juna' ĉụi' jụjyi mu'che' in jaso'mitityche' p̂eyacdye' Jen' in, mu'in na ĉụi'tyi' chätidye' mu' judyeya' ĉụi'si'ĉantyi' bä'yedye' in, jam dam' mu'in jụjyi mu'che' in. 5Chat qui mu'ya' mu' Jesús jam jun' jị'caveyacsi ferdye' mu', juñucsim' toco'jeyacsi are'reijtyi' muntyi' in ji'chäcacseban. 6Mu' anic äjyi jam anicjete in. Chat qui mu' Jesús sacti socor'je' bä'yedye' c̣hẹi'ya'munsi' in, jị'chiyacsi mu'ĉantyi' muntyi' in. 7Jesús fayacsi mu'in yiri'tac pärä' jiyity jị'chiyactyi' mu', cäts pärä' jịjcaij jutacsi paj qui voro'tacsi in. Mu' so'macsi ferdye' mu' paj qui mu'in meijje-tye-tac-seban sọyo' in. 8Chime'dye jéyacsi paj qui jam cại' majmiya-dyes jedye' mu'in, mutyudyem' jemoñe' cạqui in. Jéyacsi: —Jam ra' cạtinte obota mi'in, mijam ra' säcsedye' mijam ra' querec̣ha cạtinte mi'in. 9Jam ra' nabac bu'yi cạqui quị'si' mi'in, yujches ram' quị́tiñe' mi'in. 10Chime'dye jéyacsi: —Aty sistiñe'ya' yiris aca' mi'in, mu'ĉan ra' dyäqui mi'in jun' qui' chuc yạjquibajtiñe' mi'in mọ' bä'yedye'. 11Vatyquej juna' ĉụi' jam tiĉuñinac jụijya' in judyeya' jam se'vinac in, jemoñe' yạjquicseban mi'in, chischisjeyac-taqui ra' jac yujches mi'in, jo'mes ra' jị'ĉoyacsi mi'in mu'ĉan bä'yity in anic va'cac in —jéyacsi Jesús.61 12Chat qui jị'chiyactyi' mu' shupqui in voro'tacsequi muntyi' in, jéyacsi in paj qui dyijyi juchajche' in. 13Chime'dye dai' muntyi' meijjetyetacseban sọyo' in judyeya' dai' tai'jeyacsi aseijteya' japacjoijtyi' in judyeya' ji'chäcacseban in. 14Mu' ayo' Herodes se'vaqui jun' chuc mu' carijtaqui Jesús ĉaĉaij na pai' p̂eijte in.62 P̂eyaqui mu' Herodes yi: —Jesús q̂uin', mu' nash Juanvun chojtacsity jiquej a nash vañinyeban q̂uin' mọ'dyes me' q̂uin' anic ferdye'tum. 15Pạrej na yoctyi' yi in: —Mu' nash Elíasvun jaso'mitity p̂eyacdye' Jen' jiquej. Pạrej na yi tsan' chime' in: —Mu' nash urucyaty jaso'mitity p̂eyacdye' Jen' jiquej. 16Mu' na Herodes se'vaqui jun' chuc Jesússi' carijtacdye' mu', yi tsan' mu': —Mu' nash Juanvun, mu' nash ji'tätseptety jo'no' yụ, q̂uin' aty vañinyeban mu'. 17- 18Mu'dye Herodes jiquej jaji'ĉär'tity mu' Juan jiquej ĉaĉaij na mu' Juan fạra'ñeĉun'te, jéte jiquej: “Jam jun' tupuj jäcbite mi vojitysi' p̂en mu'.” Me' yi mu' ĉaĉaij na mu' Herodes vämi jiquej mọ'che' Erodíasche', mọ' nash Felipes p̂en mu'. Mu' Felipe ĉụi'tyi' vojity mu' Herodestyi'. 19Chat qui mọ' Erodías yejĉoi' fạ́quete mu' Juan, mạ'je' ji'ijate tsan', jam qui nam' jun'te 20ĉaĉaij na mu' Herodes irijyi Juanche', chị́yete mu' anic jäm'yity mu' muntyi' judyeya' rụijtyity chime', mọ'dyes qui mu' Herodes jañutschuti. Ĉụi'dye p̂eyaqui Juantum anic cajotyiti, me' tsan' me' anic qui nam' ma'joij se'vepte p̂eyacdye' mu'. 21Vatyquejdye tupudye' jị'cätse' dyijyedye' Erodíassi', ĉụi'dye cha'shaqui na'edye' mu' Herodes. Jäm'tyeyeyacsi feshta nọ́taquitydyes mu' judyeya' mu'in väc̣hä'tyitytyi' ayo' in judyeya' ferbu'yitydyes Galileaĉan bä'yity in. 22Ayij Erodíassi' ạva' mọ', mọ' tui' ro'yacdye' mu'insi'ya' vej mu'in feshtaijtyi'ya' in. Herodes fayactyi'tum mu' anic ma'jotye' in mọ' nanas, chat qui mu' Herodes je' mọ' nanas: —Cudyityiti' ram jedye' chuc mạ'je' mi, yụ ra' so'meye. 23Yi ferdye'tum yụ'tye' p̂eyacdye' je': —Jedye' chuc cudyityiti' jụijyam, me' tsan' chocya' qui' ọij jac yụ, yụ ra' me'qui' bu'yi' so'meye. 24Mọ' nanas shuban' jéyajquiĉan' tse' mọ': —¿Jedye' buty jäm' cọdyetyete yụ? Mọ' qui tse' mọ' jéyaqui' ạva' mọ': —Cọdyetyete ram jo'no' Juansim' mu' Chojtacsitysi'. 25Dochyequim' ca'ñibun' mọ' nanas ĉọ́shajte mu' ayo', jéte: —Yụ cọdyeye paj yiristum so'mitim Juansi' jo'no' mu', mu' Chojtacsitysi', piji'ĉan ra' so'mitim —yi' jéte. 26Mu' ayo' aty se've'ya' mọ' cọdacdye' anic där otejyi tsan', jam qui nam' mạ'je' quịjatutye' cọdacdye' mọ', ĉaĉaij na aty mu' ferdye'tum yụ'tye' p̂eyacdye' feshtaijtyisya' vej mu'in. 27̣Q̂uin'dye mọmo' jutete yirity väc̣hä'tyity, jéte paj qui tubibajte jo'no' Juansi' mu'. 28Chat qui sacje', mu've jịjcaij ĉär'taquisĉan, tätsjecbite jo'no' Juansim'. Atsijban chat qui so'me' mọ' nanas, mọ' qui ji'jiyeyaqui' tse' mọ'. 29Chị́qui mu'in cäc̣hä'-chutety Juanvun jiquej in, mu'in qui atsij in jeshbibajte a' in nạpte qui in. 30Aty me'si' ca'ñibun in mu'in jutactyi' Jesústyi' mu', jéte in mi'edye'ĉan mu'in, jun' chuc carijtacdye' mu'in, jun' chuc jị'chiyacsi muntyi' in. 31Atsij yoctyi' muntyi' in, jam dam' farajjete in mọ'dyes qui mu'in jam tupuj säcsi in. Mọ'dyes qui mu' Jesús jéyacsi jutactyi' mu': —Jesha', cäjyasĉan jac jịjcaja' tsun, paj qui mu'ĉan dam' jị'jutyiti mi'in. 32Chat qui covambache' cäjya' jịjcaij in jam yoctyi' cạcsi in. 33Dai' muntyi' jị'ĉojcayacsi in ĉaĉaij na chị́yacsi in, me'dyes qui mu'in shujmun tyeij mi'i in, mu've jịjcaij in yóvedye' ra' jịjcaij mu' Jesús u jị'chiyactyi'tum mu'. Mu'in na muntyi' in aty tashaque venjoque in, pai' junanaty ĉụi' bä'yedye' atsij in. 34Aty sojquiti in, cạvacsi anic shachtyity muntyi' in. Där ñịbe' ĉọcsi mu' ĉaĉaij na mu'in jeñej oveca in jam ĉọjcacsi' in, me' cạvacsi mu' muntyi'. Tiyacchui' qui jị'chiyacsi, dai' jedye' jị'chi-yacsi Jesús. 35Aty shocamyejoi', ĉọ́ĉajte in jị'chiyactyi' mu', jéte in: —A tyu' u yómo'yejoja', cäjya' tyu' úya' tsun. 36Jéyacseva uts muntyi' in paj yocve jịjcaij jiyi in bä'yedye'ĉan jịjcaij in paj qui ya'iyequi säcsedye' in. 37Jesús vorjeyacsi: —Mi'indye ra' ji'säcsacsi uts muntyi' in. Vorjete in: —¿Tupuj tsun dai' jecja pan ya'ityya' querec̣ha paj qui ji'säcsacseja'? 38Vorjeyacsi Jesús: —¿Juñucsi' ca' pan mu'ya' mi'in? Tạij cạvecmac. Aty ca'ñibun in chat jéte in: —Mu'ya' ĉanam' pan in judyeya' pärä' tạbedye' in. 39Chat qui mu' Jesús jéyacsi muntyi' in paj qui cäts ñuru' jịjcaij p̂utsquen'yi bä'yi birurucche' in. 40Me'dye qui cäts ñuru' jịjcaij bä'yi in, pạrej ĉanam' qui'tac in, judyeya' pạrej cien in. 41Chat qui mu' Jesús tapjete ĉanam'tyity pan judyeya' pärä'sis tạbedye' in, mạyedye'che' cạvi, yoshoropaij jéte Jen' mu'. Chat qui q̂uemi'vete pan so'macsi qui jị'chiyactyi' mu', mu'in qui ji'cheteyacsi yoctyi' muntyi' in. Chimu'dye q̂uemi've' pärä'sis tạbedye' muntyidyes in. 42Räjdye mu'in säcsi in jäm' c̣hụcmun yu'ti in. 43Chat qui mu'in jị'chiyactyi' mu' tsimjan' in mọ' ji'shucdyidye' mu'in pan judyeya' tạbedye' in, yiri'tac pärä' jiyi' ụ́bu', me'qui' juban' mọ' ji'shucdyidye' mu'in. 44Anic shachtyity säcsi in, ĉanam' mir rụi'cu' in yedyety son' tsicsi in. 45Aty me'si', mu' Jesús jéyaqui jị'chiyactyi' mu' paj qui mu'in jä'mij covambache' nopej jịjcaij in, Betsaida tịj mọ' nopes jac. Tacya'dyem' mu' jutacseban muntyi' in. 46Aty me'si' vorjitacdyi in, chat qui mụcu'che' jịjcaij cọdajquiqui Jen'che' mu'. 47Tacche'dye yómoij yirity mu' Jesús, mu' na covambam' tsique'ĉan. 48Mu' Jesús cạvacsi anic ñịbe'quejĉoij in joi'dyi in jị'chiyactyi' mu' ĉaĉaij na täjacsi tyi'mu. Aty nạijjoqui've ĉụi'dye mu' atsij Jesús, fajche' tyeij ojñi' mi'i, jeij ra' tsan' cajnacsi mu'. 49Jị'chiyactyi' mu' jị'ĉojtuye-ĉun'te in fajche' tyeij ojñi' mi'i mu', jeñej onojnodye' ĉọ́te in chat qui shavyi mu'in in, 50ĉaĉaij na räj cạvete in, tyum' tyeij ĉojtyi' mu'in anic noi'yacñi in. Ĉụi'dye p̂eyaqui mu' Jesús jéyacsi: —Sóñi'yi ra' mi'in yụ́dye nashu', jam ra' noi'yi mi'in —jéyacsi mu' Jesús. 51Bijti qui covambache', me'ĉandye dyäqui mu' tyi'mu. Jị'chiyactyi' mu' där mu'in äjyi in, 52ĉaĉaij na mu'in jam dyijtubibajte in Jesússi' ferdye' mu' yoqui'dyem' ji'dayacsiya' pan jiquej u, ĉaĉaij na yäcäj ĉojtyi' mu'in. 53Chat qui nopej sojquiti in, Genesaret tịj mọ' jacsi'. 54P̂ai'joban in aty chị́yete muntyi' in. 55Pai' bä'yity in shuj tyeij mu'in in jäcacsequi in are'reijtyi' muntyi' in. Turacdye'che' tucsi in, junanaty chuc chị́qui in aty mu'ya' mu' Jesús venchuij, chat mu'ya' rụij bu'yi cạcsi in are'reijtyi' in. 56Juna' ĉụi' jịjcaijya' mu', paj tsan' bä'yedye'ĉan, paj tsan' jorojya' in, muntyi' in majmiĉan yụ'tyeyete are'reijtyi' in, chat qui cọdyete in paj qui tupuj toco'jepte in ĉaptacdye'veya' quị'si' mu'. Tyi chuc toco'jebitety in räj mu'in chäĉän in. Yicdye' mu'in urucya'muntyis in

will be added

X\