Mark 5

1Nopej venjoij tsique' Galilea in, Gerasa tịj mọ' jacsi'. 2Aty sojquiti in, p̂ai'jodye'ĉan mọmo' Jesús, vatyquej jasistujtuti sọyo'tumtyi' muntyi', ru'dyei'yaty jijtuij, 3ĉaĉaij na mu'yaty mu'. Mijam tupuj chọco'te in me' tsan' cadenaya'. 4Dai' qui' tsan' chọco'te cadenaya' in judyeya' fiyeroya', mu' na räj chotocje' cadena judyeya' quishje' fiyero, mijam tyi tupuj ji'pente in. 5Räj tsedyedye' räj mạij mu'ya' nati ru'dyei'ya' judyeya' mụcu'che', äjnaquim' bä'yi, chime'dye ĉụi' are'jiti mijya'. 6Taca' moch tyiva'ti mu' Jesús, mu' muntyi' janaijti shuj vatyquej tyeij, ĉọshte mu' Jesús dyụtsyi mu'si'ya' vej mu'. 7Äjyedye'tum jéte: —Jam ra' me'ti' yụ mi, mi nash Jesús, Jen'tyi' Ạva' mi, mu' muju'chaty Ayo', yụ jéye Jen'si'che' tịj mu', jam ra' jị'ñibe'catim —jéte Jesús. 8Me' yi mu' ĉaĉaij na Jesús jajiti tashche' jiquej: —Mi sọyo', meijyebada ọ́ĉan muntyi'ĉan —jajiti jiquej. 9Chime'dye mu' Jesús jajiti: —¿Tyi tịj u mi? Vorjete: —Yụ́si' nash tịj: “Dai'tyi'”, ĉaĉaij na anic jiyi' dai' bu'yi' tsun. 10Mu' fer cọdyete Jesús paj qui jam yocsi've jac jutacseban. 11Chime'dye mọ'ya' anic shach cochij mụcu'che' säcsis in. 12Sọyo' fer cọdyete in mu' Jesús, jéte in: —Jutitiĉam' paj qui cochijĉan siti' tsun. 13Jesús jụjjeyacsebi cọdac-dye' mọ'in. Chat qui meijyeban' muntyi'ĉansi' in, cochijĉan qui jịjcai' siti' in. Me'ĉandye mọ'in cochij in yiristum shuj tyei' in, ĉụi' roi'je' tsävĉan in mọ'ĉan tŝọi' in ojñi'ĉan tasdye p̂uti' in. Mọ'in cochij in pärä' mir vodo' in. 14Mu'in ĉọjcacsity cochij in shuj mu'in chime' tyeij ĉa'joij in, jéyacsequi bä'yedye'ĉantyi' in judyeya' jorojya' bä'yedye' bä'yity in. Chat qui mu'ĉan bä'yity in atsij in mạ'je' cạvete' in jun' buty jiyi' mọ'. 15Aty venjoij in cạvete in mu' sọyo'tumtyi' muntyi' jiquej, aty bä'va'joban mu'ya'. Me' tsan' shach jiquej mọ'ĉan sọyo' in, q̂uin' qui nam' aty jiyi' shapudye' mu', aty quị'si'ĉan bu'ban, mọ'dyes qui jäm' irijyi mu'in in. 16Mu'in mu'vety cạvetety jiquej in jéyacsi mu'in mụi'dye atsijtyi' in jun' chuc mu' sọyo'tumtyi' jiquej judyeya' cochij in. 17Chat qui muntyi' in tiyacchui' cọdyete in mu' Jesús paj qui yocve jịjcaij mu' yạjquicsi. 18Jesús aty covambache' bijti, mu' sọyo'tumtyi' jiquej fer tsan' cọdyete mu' paj qui mu'mun pen'dyetute. 19Jesús na jam jun' jụjyi, jajiti mọmo': —Tạij acatubada mi, jéyaca ĉụi'tyi' chätidye' mi jun' chuc mu' Ayo' anic där ñútyin mi judyeya' ñịbe' ĉun mi. 20Me'dye yạjquicseban mu've jịjcaij Decápolisve, me' tịj mọ' jacsi', mu've tiyacchui' jéyacsi jun' chuc mu' Jesús ji'c̣honte jiquej. Chat qui mu'in muntyi' in anic där se'yi in. 21Jesús quivij nopjan. Mu'vedye sinve tsique' shach muntyi' ĉọshte in. 22Me'ĉandye atsij yirity tashche' bu'yity vajmu'yadye'ĉantyi', Jairo tịj mu'. Aty cạvete mu' Jesús dyụtsyi mu'ya' Jesúsya', 23fer cọdyete, jéte: —Aty va'quicdyi' ạva' yụ. Cabu'tyum, toco'jebiva' a' mọ' paj qui chäĉän', paj qui jam säñi' mọ'. 24Chat qui mu' Jesús sacje' jịjcate mu' Jairo. Anic shach-tyity muntyi' pen'dyetute in, anic quec̣he' tyeij Jesúsya' in. 25Chime'dye mọ'ya' yiris p̂en japacjoi'si', yiri'tac pärä' jiyi' yómodye' me' bu'yi' chäshvaqui' a' mọ'. 26Me' tsan' dai' qui' tsan' jị'piñituti' pịñitucsityya' in, yejĉoij taca' me' mọmo'. Chijäm' ñäpjeyaqui' jedye' mọ' mijam qui nam' jụ'ñii' chäĉän', meij mọmo' jịjcai' tse'i' japacjodyem'. 27Mọ' na se'vacsebi' p̂eijbite in ferdye' mu' Jesússi', chat qui mọ' dyete'ĉaĉan muntyi' tyei', murujruchetute mu' Jesús camintute toco'jepte quị'si' mu', 28ĉaĉaij na mọ' dyijyi' ĉojtyi'ĉan jiquej yi': “Täjyedye'ĉan ram' quị'si' mu', chäĉän' yụ.” 29Rụijdye me', täjyedye'ĉan mọmo', täts tyei' chäshvacdye' mọ', ji'ĉujcayiti' shushĉan mọ' aty chäĉän'. 30Chime'dye mu' Jesús jị'ĉojcayaqui a' mu' aty shupqui' ferdye' mu', me' ĉọ́qui. Chat qui caman'yi mu' pai' cạvacsi muntyi', jéyacsi: —¿Tyi ca' toco'jibun quị'si' yụ? —yi jéyacsi mu' Jesús. 31Yi jị'chiyactyi' mu' jéte in: —Uts muntyi' in quec̣he' tyeijtyi' míya' in, “¿Jun' dash me' yi mi, tyi buty toco'jin yụ?” 32Jesús na yejĉoij pai' cạvi, quevacsi jụ'ñity chuc toco'jetety in. 33Aty chị' mọ' p̂en chäĉän', mọ'dyes aty qui noi'yedye'tum ĉọcte mu' Jesús dyụtsyi' mu'si'ya' vej mu', noc̣ho'c̣hoi'tyi' mọ'ya', judyeya' qui räj jéte jun' chuc mọ' toco'jete. 34Jesús je': —Ạva' yụ, aty anicyedye'ya' chäĉän' mi, ma'jodye'tum acatubada q̂uin', q̂uin' chat räsh aty chäĉän' mi. 35Taca' p̂eyacva'joij mu' Jesús atsij in ayosĉantyi' aca' in, p̂eyacdye' tui'tyi' in. Jéte in: —Aty nash säñi' ạva' mi. Me'qui'dye ra' me'te Jesús mi. 36Jesús jam se'vacsebi p̂eyacdye' mu'in. Jajiti mọmo' mu' ayo': —Jam ra' cajotyiti mi, anicyeva mọmo' mi. 37Aty mi'ebanya' in mu'in mọmo' cạcsi Jesús: Pedro judyeya' mu' Santiago, vojitytumdye mu' Juan. 38Ventyecbite in ayos aca' mu', dạcacsequi mu'ĉan in uya'qui'dyi mu'in in, táreva'que' in mọ' nanas. 39Jesús siti aca'ĉan jéyacsi mu'ĉantyi' in: —¿Jedyeij shọijtacva'joij u mi'in, táreva'tiñe' mọ' nanas? Jam nash mọ' säñi', ĉọshi' nash mọ' —yi jéyacsi. 40Mu'ĉantyi' dyisacbite p̂eyacdye' in Jesússi' mu'. Mu'dye ji'shupcacsi muntyi' in. Mu'ĉan qui siti yóĉandyem' mọ' nanas o, jen' mọmo' cạbi' judyeya' tse' mọ' judyeya' mu'in cäc̣hä'chutety in. 41Tapjebi' un mọ' je': —Talita, cum (yi' ca yi': “Nanas, yụ jéye, sacyebada mi.”) 42P̂eyacdye'ĉandye mọmo' sacyeban' mọ' nanas mi'eban' mọ', yiri'tac pärä' jiyi' yómodye' tyitis mọ'. Muntyi' in anic där äjyi in. 43Jesús ferche' jéyacsi paj qui jam yoctyi' jị'chiqueyacsi in. Chat qui jéyacsi paj qui ji'säcseban' in mọ' nanas.

will be added

X\