Mark 4

1Jesús quivij tiyacchui' jị'chiyacsi muntyi' in, sinve tsique' jị'chiyacsi mu'. Anic shach muntyi' ĉọcte in mọ'dyes qui mu' covambache' bu'yi, mu'che' qui p̂utsquen'yi, mu'in na jámanche' muntyi' in. 2Dai' jedye' jị'chiyacsi, yụ'tyeyacsi jị'ĉocdyes p̂eyacdye' ji'chäyitidye'ĉan. Jéyacsi: 3—Se'vaĉam' mi'in. Yirisĉan mạyedye' mu'ya' yirity muntyi' quịjodye'ĉan jịjcaij cätiyequi. 4Aty facajnaquiya' mu', pạrej majmiĉan tŝọi' vej in, mọ'ya'dye jaijtyi' sacyi' in, mọ' vej jebei' in. 5Pạrej na mijche' tŝọi' in, jam na mus tyes jac, cavin tsan' mọ'che' chịbi' ĉaĉaij na jam tyes jac mijche'. 6Fibim' me' chịbi', a na are'yiya' mu' tsun q̂uin'dyem' sacñen' tyei' mọ' cätidye' ĉaĉaij na jam mochĉan ribin yi'. 7Pạrej däräsya' ribin tŝọi', mọ'tumdye chịbi' därä'tum, mọ' qui jabusti' mọ'dyes qui jam mọ' väshi' cätidye'. 8Pạrej na jäm'ya' jac tŝọi', q̂uin'dyem' mọ'ya' jäm' p̂añi', jäm' väshi' mọ' cätidye', yiris vej quịcsi' cien mọs vej juban', pạrej na jäbän qui'tac vej juban', judyeya' pạrej cien vej juban', me'si' juban' mọ' jäm'yas jac tŝọi'si' in. 9Dadam' mu' jéyacsi: —Tyi chuc chuntumtyi' in paj jäm' se've' in ọij p̂eyacdye'. 10Aty yiritydyety mu' Jesús, chat qui jị'chiyactyi' mu' judyeya' yoctyi' cäc̣hä'chutety in ĉọcte in judyeya' jéte in, jedye' cại' o mọ' jị'ĉocdyes p̂eyacdye', yi jéte in. 11Jesús vorjeyacsi: —Mi'in mọmo' so'minac Jen' paj qui tupuj chị́yeptinte caminsis dyijyedye' mu', jun' chuc ayo'bu'yedye' mu'si'. Mu'in na yoctyi' muntyi' in jam me' mu'in so'mac in, jị'ĉocdyestumsi' mọmo' p̂eyacdye' jị'chiyacsi yụ, 12paj qui me' shupqui in: me' tsan' se'vaqui in jam qui nam' chicacsi in jätäjyi' chuc mọ'. Jam me' jụijya' mu'in in a vuty tupuj ca'ñibun Jen'ya' u in paj qui mu' Jen' vayacjetyetacseban juchaj mu'in. 13Jesús jéyacsi: —¿Jam adac chiquetiñe' ọij jedye' chuc cại' mọ' jị'ĉocdyes p̂eyacdye'? ¿Jun' buty ra' chiquetiñe' yocsi' jị'ĉocdyes p̂eyacdye' in? Me' yi' p̂eyacdye' p̂eijte cätity muntyi'. 14Mu' cätity muntyi' mọ' cại' jeñej mu' voro'tacsity Jen'si' p̂eyacdye' mu'. 15Vej majmiĉan tŝọi'si', mọ' cại' jeñej mu'in se've'tyi' tsan' in mọ' p̂eyacdye', mu'ya'dye mu' shupqui Satanás me'ĉandye jäctyetacsi p̂eyacdye' ĉojtyi'ĉansi' mu'in. 16Chime'dye vej mijche' tŝọi'si', mọ' cại' jeñej bu'yi' se'vety tsan' in mọ' p̂eyacdye' ma'jodye'tum tsan' tiĉuñe' in. 17Mijam qui nam' ĉojtyi'ĉan ji'site' in, jeñej bu'yi' itŝis ribin me' bu'yi' mọ' p̂eyacdye', dam'tuquim' cäc̣hä'chui' in. A na ñịbedyes jị'ĉojtye'ya' in judyeya' jị'ñibe'cac in p̂eyacdyedyes, chat qui farajjecajcai' in me'ĉandye ji'ca'ñibun in. 18Mọ' na vej däräsya' ribin tŝọi'si', mọ' cại' jeñej mu'in se'vety tsan' in mọ' p̂eyacdye' in. 19Me' tsan' me' mu'in qui nam' yejĉoij dyijtuqui in ĉụi'si' dyijyedye' jacches mu'in judyeya' fer mạ'jete querec̣ha in judyeya' chime' mạ'je' me'chui' jedye' in. Mọ'dyes qui jam pañi' mọ' p̂eyacdye' ĉojtyi'ĉan mu'in, mijam qui Jen'dyes bä'yi in. 20Mọ' na jäm'ya' jac tŝọi'si' vej, mọ' cại' jeñej mu'in jäm' se'vety p̂eyacdye' in, judyeya' chique' in, mọ'dyes qui mu'in Jen'dyes bä'yi in, jeñej jäm'si' väsh, me' bu'yi mu'in in, pạrej yiris vej quịcsi' chibin qui'tac vej juban' mọ', judyeya' pạrej jäbän qui'tac vej juban' mọ', judyeya' pạrej cien vej juban' mọ', me' me' ra' carijtaqui Jen'dyes in. 21Chime'dye Jesús jéyacsi: —Mọ' mạijyis jam jun' cạc paj qui cajónĉan yụ'tac mijam ĉushaquisĉan, jemoñe' che've yụ'tac paj qui tupuj mạijchucsi' yoctyi' mu'ĉantyi' in. 22Me'dye ra' chime'dye mọ'in jujmus q̂uin' in, jäqui've räj ra' mọ'in chị́yac in, judyeya' mọ'in caminves q̂uin' in, räj ra' mọ'in jorojĉanyi' in. 23Tyi chuc chuntumtyi' in paj jäm' se've' in ọij p̂eyacdye'. 24Chime'dye mu' jéyacsi: —Se'vevac jäm' mọ' p̂eyacdye', chiquetiñe' ra' mi'in judyeya' qui ra' yoctyi' ji'jiyeyacsi mi'in. Me' ra' jụijya' mi'in, dadam' ra' yocsi' cäch so'mac mi'in. 25Tyi chuc chique'tyi' in dadam' ra' muju'cha' so'mac in, jam na chique'tyi' in, mu'in ra' chutyetac ra' in dam'sis dyijyedye' me'chui'si' in. 26Chime'dye Jesús jéyacsi: —Me' bu'yi' nash ayo'bu'yedye' Jen'si' mu', jeñej yiris vej muntyi' quị' jacĉan. 27Chat qui mu' muntyi' tsedyedye' ĉọshi, mạij qui nam' tsạ'. Aty jiyi' mạyedye' ĉụi' mọmo' chịbi' tiyacchuti' p̂añi', jam nam' chịj mu' jun' chuc mọ'. 28Ĉụi' mọmo' jacĉan shuban' mọ' cätidye', tashi' chịpdye' mọ', chat qui jäqui've chapti' shan mọ' chat jäqui've väshi'. 29Aty ịjtsi' väsh mọ' chat qui vädac ĉaĉaij na aty ayij tupudye' vädacdyedyes. 30Jesús jéyacsi: —¿Jedye' buty cätstye' ayo'bu'yedye' Jen'si' mu'? ¿Jedye' buty jị'ĉocdyes p̂eyacdye' tupuj yụ'tye'? 31Mọ' jeñej bu'yi' yiris vej mostazas. Mọ' anic miquis vej jam jeñej yocsi' in. 32A na quịc jụijya' mọ', jam tacac bu'yi' anic mọjo'cha' där jịjcai' shupqui' mọ' cätidye' jeñej därsi' son, mọ'si'che' daca' dai' tị'i' jaijtyi' in ĉaĉaij na mọ' onom' bu'yi'. 33Jesús jị'chiyacsi Jen'si' p̂eyacdye' mu' dai' jo'mestum jị'ĉocdyestum p̂eyacdye' jéyacsi, jun' chuc tupuj chicacsi in. 34Jị'ĉocdyestum mọmo' p̂eyacdye' jị'chiyacsi mu', jam yocve jị'chiyacsi mu'. Aty itŝijya' yoctyi' in, Jesús räj jị'chiqueyacseban jị'chiyactyi' mu' jedye' buty cại' mọ' ji'chäyitidye' mu'. 35Aty shocamyejoi' Jesús jéyaqui jị'chiyactyi' mu': —Nopej tsique' jịjcaja'. 36Chat qui yạjquicseban muntyi' in, mu'dye covamba cạte in. Yoctyi' muntyi' in yoctyi'che-chej covamba cäc̣hä'chute in. 37Vatyquej atsij tyi'mu tsäqui'tyity, ji'site' covambaĉan ojñi', aty ra' ji'pechte covamba. 38Jesús na pechve covamba ĉọshva'joij jubijche'. Jị'chiyactyi' mu' jịjtsa'ebajte in jéte in: —¡Jị'chiyacsity! ¡Jam mọ' jedye' yi' mi ĉọi' u paj qui ĉụi' pechja' tsun! 39Chat me'ĉandye vañinyeban ji'dyäqueĉun'te tyi'mu, judyeya' je' ojñi': —¡Dyäcyeva! P̂eyacdye'ĉandye mọmo' pären'dye ji'dyäcacsi. 40Chat qui mu' Jesús jéyaqui jị'chiyactyi' mu': —¿Jun' dash noi'yi mi'in? ¿Taca' jayej anicjetinte Jen'? 41Taca' noi'yi in, mọ'dyes qui vaj meij jíti in, yi in: —¿Tyi buty uts muntyi'? Yoj na tupuj ji'dyäquete tyi'mu judyeya' ojñi', yoj na se'vete in.

will be added

X\