Mark 3

1Jesús cuvij ĉọ́que' mọ' vajmu'yadye' judíos mu'in. Mu'ĉan chime'dye yirity muntyi' putyuijtyi' un. 2Fariseo na in cạveva'te Jesús in jun' a ĉa ji'chäĉajte jị'jutyitidyesĉan mạyedye' yi in, ĉaĉaij na mạ'je' ji'me'te ayo'ya' in. 3Jesús yi jéte mu' muntyi' putyuijtyi' un: —Sacyeva tashche' bu'va. 4Chat qui mu' Jesús jéyacsi muntyi' in: —¿Jụ'ñis buty tupuj yụ'tyeja' jị'jutyitidyesĉan mạyedye'? ¿Are' jäm'si' are' a'c̣his? ¿Tupuj buty ji'chäĉajsha muntyi', are' ji'me'yeja mọmo'? ¿Jätäjyi' buty yụ'tacdye' Jen'si' mu'? —jéyacsi Jesús. Mu'in na mem' c̣hu'c̣huij in, mijam dam' voryi in. 5Jesús chijäm' jị'fajte in me'ĉandye ji'tarete in, ĉaĉaij na anic yäcäj ĉojtyi' mu'in. Chat qui mu' Jesús jéte mu' muntyi' putyuijtyi' un: —Chụi'jebada' un mi. Me'dye mu' chụi'jeyaĉan un mu', me'ĉandye jäm'joban' un mu'. 6Fariseo shuban in, chat qui ĉọcsequi in mu'in cäc̣hä'chutety Herodes in,58 dyijyi in jun' bu'yi chuc ra' ji'ijate in Jesús. 7Jesús räjtumdye jị'chiyactyi' mu' tsique've jịjcaij in. Chime'dye Galileaĉantyi' in shach mu'in tyeij ĉọcte in. 8Muntyi' in aty chị́qui in jun' chuc jị'caveyacsi därsi' ferdye' mu', shach vatyquej tyeij ĉọcte in pai' bä'yity in, Judeaĉantyi' in judyeya' Jerusalénĉantyi' in, Idumeaĉantyi' in judyeya' nopety cojiro Jordán in judyeya' Tiroĉantyi' in judyeya' Sidónĉantyi' chime' in, me' me' ĉọcte in mu'ĉantyi'dye pai'tyity in. 9Jesús jéyaqui jị'chiyactyi' mu' paj qui yụ'tyeyete covamba in paj qui jam quec̣hete muntyi' in. 10Muntyi' fer mạ'je' toco'jete in ĉaĉaij na ji'chäcacseban japacjoijtyi' in. 11Chime'dye jun'si' ĉụi' cạveteya' in mu'in sọyo'tumtyi' muntyi' in, dyụtsyi in Jesússi'ya' vej mu', äjyedye'tum p̂eyaqui jéte in: —Mi nash Jen'tyi' Ạva' mu'. 12Jesús ferdye'tum jéyacsi paj qui jam jị'chiqueyacsi muntyi' in. 13Jesús mụcu'che' jịjcaij, chat qui fayacsi muntyi' in jụ'ñity chuc dyijtucsi, mu'in ĉọcte in. 14Yụ'tacsi yiri'tac pärä' jiyi in pen'dyetutety ra' in, mu'in ra' jutactyi' mu' paj qui cạyacsity p̂eyacdye' in. 15Chime'dye so'macsi ferdye' mu' paj qui tupuj meijjetyetacsi sọyo' in. 16Ọij nash tịj mu'in: Simón, Pedro chime'dye jị'ti'ete, 17Santiago judyeya' vojity mu' Juan, Zebedeoty ạva' in. Yocsi' tịj so'macsi mu' Jesús: “Pururu Bu'yity in”, me' jéyacsi. 18Chime'dye mu' yụ'tacsi mu' Andrés judyeya' Felipe judyeya' Bartolomé, judyeya' Mateo, judyeya' Tomás judyeya' Santiago, Alfeoty ạva' mu', judyeya' Tadeo judyeya' Simón, mu' nash cäc̣hä'chucsity mu'in fạ́cacsity Romaĉantyi' in, 19judyeya' mu' Judas Iscariote, mu' ra' ji'mincatety Jesús. Me' me' jutactyi' jiquej mu'. 20Jesús siti aca'ĉan. Cuvij shach ĉọcte muntyi' in, sät tŝọij in, mọ'dyes qui mu' Jesús jị'chiyactyi'tum mu' jam qui jun' tupuj säcsi in. 21Chị́qui in ĉụi'tyi' chätidye' mu', atsij mu'in in mạ'je' tsan' jeshajte in, ĉaĉaij na pạrej dyijyi in aty shapuij ĉọ́te in. 22Mu'ya' chime' jị'chiyacsity yụ'tacdye' in Jerusalénvety in. Chime'dye mu'in p̂eijte in yi in: “Mu' Beelzebú, sọyoty ayo' mọ'in, mu'si'ya' ferdye' mu' Jesús meijjetyetacsi sọyo' in”, yi in. 23Jesús fayacsi mu'in yity in, yụ'tyeyeyacsi jị'ĉocdyes p̂eyacdye', jéyacsi: —Satanás jam ĉụi' tupuj meijjiti. 24Jesha' bä'yedye'ĉantyi' chuti ayo'tum jụijya' mu'in, mijam ra' men me' bu'yi' mọ' bä'yedye'. 25Chime'dye vaj chätidye' jụijya' in vaj meij chuva'tidyeij in, cavin ra' mọtsi in. 26Me'dye ra' mu' chime' Satanás vaj meij chutidyei' bä'yi'ya' sọyo' in, jam ra' men me' bu'yi' ayo'bu'yedye' Satanássi', cavin ra' mọtsim'. 27Chime'dye jam tyi tupuj sisbite aca' mu'si' ferdye'tumtyis muntyi' paj qui shi'atute jedye' mu'. Jemoñe' tashche' chum saptac mu' ferdye'tumtyi' muntyi', chat q̂uin'dyem' tupuj räj cạpte aca'ĉansi' jedye' in ĉaĉaij na aty ji'pente in.59 28Yụ jéyac, Jen' tupuj jụ'ñis ĉụi' mọmo' vayacjetyetacsi juchaj muntyis mu'in, judyeya' jụ'ñis ĉụi' ñäñitidye' mu'in, 29mu'in na ac̣hi' p̂eijbitety in Jen'si' Ạ'edye' mu',60 mu'in jam ra' dam' mu' Jen' vayacjetyetacsi juchaj mu'in, tacya' bu'yi' ram' mọ' juchadye' mu'in. 30Me' jéyacsi mu' Jesús ĉaĉaij na yi jiquej in: “Uts nash Jesús sọyo'tumtyi'”, yi jéte in. 31Jesússi' tse' mu' judyeya' vojity mu' mu'ya' venjoij in. Jorojya' bu'yi ji'vorvete in. 32Dai' mu'ya' Jesúsya' bä'yi in. Mu'in jéte in: —Mosh tyu' jorojya' tse' mi, judyeya' vojity mi, mạ'je' nash cavin in —yi jéte in. 33Jesús qui vorjeyacsi: —¿Mọ'ya' adac ĉaĉaij tse' yụ? ¿Mu'ya' adac ĉaĉaij vojity yụ in? 34Chat qui mu' pai' cạvi cọtoij bu'yityya' in, yi mu' jéyacsi: —Uts q̂uin' in mu'in nash tse'tucsi yụ judyeya' vojitytucsi yụ. 35Tyi chuc chique' in mọ' ji'chäyitidye' jun' chuc mạ'je' mu' Jen', mu'indyem' vojitytucsi yụ judyeya' tse'tucsi yụ.

will be added

X\