Mark 2

1Nojnoĉanya' mu' Jesús ca'ñibun Capernaumĉan jijtuban mu'. Muntyi' chị́qui in a nam' aca'ĉan mu' Jesús. 2Ñur tyeij muntyi' in ĉọcte in sät tŝọij chụi'dye'ya' in, itŝi' vav yụ'tye' mọ'ya' in. Jesús qui voro'tacsi Jen'si' p̂eyacdye' mu'. 3Tute in yirity punichjoijtyi' muntyi', vạjpedye' muntyi' in turacdye'che' cạte in. 4Jam qui nam' jun'yi Jesúsya' jịjcaij in ĉaĉaij na sät mu'ya' muntyi' in. Bojvi qui fajche' aca' in, mọ'ya' qui cóshe' in tai'ya' mọ' aca', mu'ya' qui jị'chate turacdye'che' in mu' punichjoijtyi' muntyi'. 5Jesús aty cạvacsi jun' chuc fer anicjete in, mọ'dyes qui jéte mu' punichjoijtyi' muntyi': —Yụ jéye ạva' yụ, q̂uin' aty vayac juchaj mi. 6Mu'yaty na jị'chiyacsity yụ'tacdye' in, ĉojtyi'ĉan mu'in dyijyi in, yi in: 7“¿Jun' buty me' yi uts muntyi'? Anic ñinacdye' Jen'ya' shupqui' mọ' p̂eyacdye' mu', jeñej Jen' yu'ti mu', ĉaĉaij na yirity mọmo' mu'ya' Jen', mu' tupuj vayacjibusin'tyi' juchaj muntyis tsun”, yi in. 8Mu' na Jesús chị́yacsebi a'c̣his dyijyedye' mu'in. Jéyacsi: —¿Jun' me' dyijyi ĉojtyi'ĉan u mi'in? 9¿Jụ'ñis buty carij ĉọ́tiñe' mi'in, are' vayac juchaj utssi' mu', are' chäĉän mu'? ¿Are' jéte yụ, “Aty vayac juchaj mi”, jam jụijya', are' jéte yụ: “Sacyebada, mi'ebada?” ¿Jätäjyi mi'in u? 10̣Q̂uin' ra' jị'caveyeyac yụ jun' chuc yụ ferdye' so'mac paj qui yụ vayacjetyetacsi juchaj jacchetysi' muntyi' in, ĉaĉaij nash yụ Anictyity Muntyi' yụ. Chat qui jajiti mu' punichjoij-tyi' muntyi': 11—A nash yụ jéye, sacyebada, tapjebada' jubij mi, tạij aca'ya' jịjcabada mi. 12P̂eyacdye'ĉandye mu' punichjoijtyi' muntyi' jiquej sacyeban me'ĉandye tapjeban' jubij mu' mu'insi'ya' vej in chat qui jọban mu'. Anic räj äjjete muntyi' in, tima'quete Jen' in. Yi in: —Mijam jäm'dyeya' jo'mes cạveja'. 13Jesús quivij sinve jịjcaij tsique'. Shach muntyi' ĉọcte in chat qui jị'chiyacsi. 14Aty yạjquicseban mu' Jesús cạvete yirity muntyi', Leví tịj mu', Alfeoty ạva' mu', mu'ĉan bä'va'joij yóĉandyem' tsim'teĉan querec̣ha u in ayodyety. Jesús jajiti: —Cäc̣hä'chuti' ram. Leví sacyi cäc̣hä'chute mu' Jesús. 15Yirisĉan mạyedye' mu' Jesús säcsequi Levísĉan aca'. Chime'dye mu'ya' dai' tsim'tety querec̣ha in judyeya' yoctyi' juchajtumtyi' muntyi' chime' in. Mesaya' pen'dyetute in mu' Jesús räjtumdye jị'chiyactyi' mu', ĉaĉaij na dai' mu'in cäc̣hä'chutety in. 16Fariseo in judyeya' mu'in jị'chiyacsity in yụ'tacdye' Jen'si' mu', aty cạvete in mu' Jesús jun' chuc mu'tum säcsi in, jam jäm' ĉọi' mu'in in. Mọ'dyes qui mu'in jéyacsi in jị'chiyactyi' Jesústyi' mu': —¿Jun' dash me' Jị'chiyacsity mi'in jebetacsi uts in tsim'tety querec̣ha in judyeya' yoctyi' juchajtumtyi' muntyi' in? 17Jesús se'vacsebi p̂eyacdye' mu'in chat qui jéyacsi: —Jesha', mu' muntyi' räshtyi' jam jun' jemonte mu' pịñitucsity, mu' na japacjoijtyi' mu' chat jemonte pịñitucsity in. Me' bu'yidye yụ chime' atsij jam rụijtyitydyety muntyi' in, yụ atsij juchajtumtyidyety in. 18Yirisĉan mạyedye' mu'in jị'chiyactyi' Juantyi' mu' judyeya' mu'in jị'chiyactyi' fariseoty in, mu'in yịñij Jen'dyes in. Pạrej muntyi' ĉọcte in mu' Jesús jéte in: —Jị'chiyactyi' Juantyi' mu' judyeya' mu'in jị'chiyactyi' fariseoty in pucmun yịñij Jen'dyes in. Mítyi' na jị'chiyactyi' in mijam yịñij Jen'dyes in. ¿Jun' adac me' in? 19Jesús vorjeyacsi: —Mu'in feshtaijtyi' in vämitydyes in jam mu'in tupuj yịñij Jen'dyes in, jam jị'ĉoqui táredye' mu'in taca'dyem' mu'ya' jụijya' mu' vämity muntyi'. Taca' mu'ya' mu' mijam jun' yịñij in. 20A qui na ram' ayijya' tupudye' jäcac ra' yụ juban, me'qui'dye ra' pen'dyetucsi yụ uts in, chat qui ra' q̂uin'dyem' yịñij jị'chiyactyi' yụ. 21Jesha' ishoijtyi' quị'si' shẹi'joij jụijya', jam dam' raptac mụi'tyityya' quị'si'. Me' na jụijya' mọ' ra' raptacdye' mu' shätim', chat qui ra' mu' isho' quị'si' quivij peñi shẹi'joij. 22Chime'dye muntyi' in mijam jun' bijtye' in mụi'sis tyédye' vino urucyasĉan sho'pa'. Me' jụijya' aty pashi'ya' mọ' tyédye', top ra' tyei' mọ' sho'pa', räj ra' nai' tŝọi' mọ' tyédye' mụijya', mọ'tumdye ra' moñi' sho'pa'tum. Jemoñe' bijtac mụi'sisĉan sho'pa' mọ' mụi'sis tyédye' paj qui jam topyetac.57 23Mọ' mạyedye' jị'jutyitidyes mu' Jesús jị'chiyactyi'tum mu' mi'i in, cätidye'ĉan trivo mu'ĉan tyeij in. Jị'chiyactyi' mu' shorjepte in trivos väsh mu'. 24Mu'in fariseo jéte in mu' Jesús: —¿Jun' dash me' carijtaqui in mu'in jị'chiyactyi' mi? Mu'in jam ạ̈räjje' in mọ' jị'jutyitidyes mạyedye', carijtaqui mọmo' in. 25- 26Jesús vorjeyacsi: —¿Jam adac p̂eyetiñe' mọ' urucyas sánacdye' p̂eijtes mu' David jiquej? Yi' jun' chuc mu' jiquej yoqui'dyem' Abiatar yụ'tac tashchety cudyitity Jen'che' u. Mu' David dáqui pen'dye'tumdye mu', mọ'dyes qui siti Jen'si'ĉan aca' jebete mu' pan yụ'tactyi' Jen'ya' judyeya' so'macsi pen'dye' mu' chime'. Yi' yụ'tacdye' uts pan cudyititydyety mọmo' Jen'che' in, mijam yoctyidyety in, me' tsan' me' jebete qui nam' mu' David. 27Chime'dye yi jéyacsi: —Mọ' mạyedye' jị'jutyitidyes yụ'tac paj qui mọ' nọ́tacsi' muntyi' in, Jen' jam jäm'te mu' muntyi' paj qui ạ̈räjje' in mọ' mạyedye'. 28Yụ nash Anictyity Muntyi' bächäi'tyi' yụ ọij jị'jutyitidyes mạyedye' in.

will be added

X\