Mark 16

1Aty me'si' mọ' mạyedye' jị'jutyitidyes, chat qui María Magdalena judyeya' Salomé judyeya' yocsi' María tse' mu' Santiagos, mọ'in ya'i' tsan' in tai'tacdyes jẹrejres paj qui ta'yecbibajte in a' mu' Jesússi'. 2Nojnodye mạyedye' dọmico pam'dye q̂uin'dyem' shupqui tsun, mọ'in sacti' in, ru'dyei'ya' jịjcai' in. 3Majmiya' yi' jítidyei' in: —¿Tyi bu ra' ucheya' jityisin' mu' därtyi' mij ñujĉuty chụi'dyesya' to'? 4Aty c̣hẹi'ya' tyiti' in jäm' qui cạvi' mọ'ĉan in, nạijte in mu' mij därtyi' aty mu' tạ'caty muveya' tac. 5Rụij bu'yi' qui siti' in. Cạvete mu'ĉan yirity muntyi' in, jui'butyĉantyi' quị'si', tacve bu'yi bä'va'joij. Tyum' tyeij mọ'intyi' ĉojtyi' mọ'in. 6Mu' jéyacsi: —Jam ra' tyum'yi ĉojtyi' mi'in. Mi'in quevtinte mu' Jesús, Nazaretĉan bä'yity, mu' pactety croshche' jiquej in. Aty itŝij atsvun úĉan, aty vañinyeban. Cạvevac yóya'dyem' chuden'jeteya' jiquej u in. 7Tạij jéyacseĉajsham' jị'chiyactyi' mu', Pedromun ra' chime' jétinte. Jéyacsi ra' mi'in: “Mu' chum ra' tashche' Galileave jịjcaij mu', mu've ra' cạvetinte mi'in, yoj jinacdyem' jiquej u”, me' jéyacsejam'. 8Me'dye mọ'in p̂en shuban' to'ĉan in noc̣ho' noc̣hoyequi' qui in, anic därsi' noi'yedye' játŝuti' in. Shuj qui tyei' ĉa'joi' in, mijam tyi jéyacsi' rébacsity in ĉaĉaij na jiyi' noi'yacñi' in. 9Aty ra' nạijjoi'ya' mạyedye' mọ' dọmico mu' Jesús vañinyeban. Tashi mu' ji'cavibun Maríaya' Magdalenaya', mọ'dye meijjetyeban'si' yävätidye'yis sọyo' jiquej. 10Mọ' ĉọcsequi' jéyacsequi' pen'dye' mu' jiquej, mu'in na táreva'te in dyijtute in mu' Jesús. 11Me' tsan' jéyacsi' jun' chuc tsạ'buban mu' judyeya' anic cạvete mọ', jam qui nam' jun' anicyi mu'in. 12Aty me'si' mu' Jesús ji'caviti pärä'tyityya' jị'chiyactyi' mu', meij jịjcaij mu'in majmiya' in jorojya' bä'yedye' in, yocdyeij ji'caviti mu'inya' in. 13Mu'in qui cavin ca'ñibun in jị'chique-yacseban yoctyi' in, jam qui nam' mu'in anicyi in. 14Aty me'si' mu' Jesús ji'caviti mu'inya' in yiri'tac yirity jiyityya' jị'chiyactyi' mu', mu'in na säcseva'joij in. Mu'ĉan fạra'nacsi ĉaĉaij na jam anicyi in judyeya' yäcäj ĉojtyi' mu'in. Mijam anicjeyacsebi p̂eyacdye' mu'in mu'in cạvetetysi' in aty vañinyeban. 15Chat qui jéyacsi: —Tạij mi'in, pai' ọij jac jịjcajam', voro'tacsejam' räj jacchety muntyi' in, jéyacsejam' jäm'si' p̂eyacdye' Jen'si' mu'. 16Tyi chuc anicyity, tyi chuc ji'chojtity, mu'in ra' c̣hoñi in. Tyi chuc jam anicyity mu'in ra' va'cacdyety in. 17Tyi chuc anicyity in mu'in ra' so'mac in paj qui jị'caveyacsi Jen'si' ferdye' in. Yụ́si'che' ra' tịj meijjetyetacseban sọyo' in mu'inĉansi' in, judyeya' ra' yoctyisĉan chime' p̂eyacdye' p̂eyaqui in. 18Vatyquej tapjeyacsi nas jụijya' in, vatyquej tyeij veneno jụijya' in, jam ra' jedyeij in. Chime'dye mu'in ra' tupuj toco'jeyacsi are'reijtyi' in chat qui ra' chäĉän mu'in in. 19Aty me'si' jéyacsi mu' Jesús Ayo' tsun, chat qui mạyedye'che' cạc mu', fer bu'ban mu' tacve Jen'ya'. 20Mu'in jutactyi' mu' sacti in, pai' voro'tacsi in. Ayo' tsun nọ́tyetacsi so'macsi ferdye' jị'cavacdyes mu'in, paj qui jorojĉan mọ'ya' Jen'si' p̂eyacdye' mu'.

will be added

X\