1 Aty nạijjoi' mu'in tashchety cudyitity Jen'che' in judyeya' mu' tashchety ĉọjcac-sity in judyeya' mu'in jị'chiyacsity yụ'tacdye' in räjtumdye ayo' in vaj meij dyijyi in jun'jeyac chuc ra' mu' Jesús. Mu'ya'dye quim' chọco'te in mu' Jesús, cạte in Pilatosya' vej mu'. 2 Mu' Pilato jéte mu' Jesús: —¿Mi adac judíoty ayo' mu'in? Vorjete Jesús: —Me' nash yụ yoj yidye' bu um. 3 Mu'in tashchety cudyitity Jen'che' in juchadye'ya' dai' chọco'te tsan' in. 4 Mọ'dyes qui mu' Pilato cuvij jéte: —¿Jam bu ra' ĉụi' yụ'tyem p̂eyacdye' ñutsjitidyes mi? ¿Aty se'vacsebi p̂eyacdye' u mi mu'in p̂iijbuntyi' juchaj in? 5 Jesús na c̣hu'c̣huij mọmo' jam mu' dam' jätäjyi, jäm' mu' äjyi Pilato. 6 Räjĉan yómodye' cha'she' in mọ' feshta Ji'c̣honacdyedyes, mu' Pilato yicjoij ji'c̣honte ĉär'tactyi' muntyi', tyi chuc cọdyete muntyi' in. 7 Mu'ĉan ĉä'räij muntyi' in chutity jiquej Romaĉantyi' in, pạrej ijac in. Yirity mu'ĉan ĉä'räij Barrabás tịj mu'. 8 Shachtyity muntyi' in ĉọshte in mu' Pilato cọdyetyete in paj qui yụ'tye' yicdye' mu'. 9 Pilato jeĉúnacsi: —¿Mạ'jetiñe' adac paj qui ji'c̣honte yụ mi'indyes uts mi'intyi' Ayo' judíoty mi'in? 10 Pilato chị́yacsi tashchety cudyitity Jen'che' in, jun' chuc ji'me'tyiyitidye'ya' ji'me'te in mu' Jesús, mu'in fạ́quete Jesús in ĉaĉaij na muntyi' in fer mạ'jete in. 11 Mu'in tashchety cudyitity Jen'che' in se' ja'yacsi muntyi' in paj qui jéte Pilato in paj qui mu' ji'c̣honte Barrabás. 12 Pilato cuvij jéyacsi muntyi' in: —Me' jụijya', ¿jun'jete qui bu raij uts jétintety mi'in: “Uts Ayo' tsuntyi' judío tsun?” 13 Äjyedye'tum vorjete in: —¡Uts pacme croshche'! 14 Vorjeyacsi Pilato: —¿Jun' bu ra' ĉaĉaij na utssi' itŝi' juchaj mu'? Muntyi' na in anic che'je' mu'in p̂eyacdye' in, jéte in: —¡Uts pacme croshche'! 15 Pilato mạ'je' jụjtacsebi cọdacdye' muntyis mu'in mọ'dyes qui ji'c̣honte mu'indyes in mu' Barrabás. Pilato ji'si'bete Jesús, chat qui so'macsi väc̣hä'tyity in paj qui mu'in pacte croshche' in. 16 Väc̣hä'tyity qui cạte in mu' Jesús därsi'ĉan vavdye' ayosĉan aca', mu'ĉan ji'siste in. Mu'ĉan fayacsi väc̣hä'tyity in, jun'tum chuc mu'in ñuru' in. 17 Mu'in majmatute in jäijnätyĉan quị'si' jị'quite in.75 Chime'dye q̂uebe'ñe' yutij in jeñej bu'yi' ĉästacdyes jäm'tye' in judyeya' qui jo'no'che' yụ'tyeyete in. 18 Chat qui tiyacchui' äjyi in: —¡Tima'queja uts judíoty ayo' mu'in! —yi in. 19 Me'ĉandye tŝevjepte jo'no' in sonya' judyeya' chu'bete in judyeya' majmadye'ĉan chime' dyụtsyi mu'ya' in. 20 Aty me'si' majmatute in, quivij c̣honjetye-bajte in mu' jäijnäty coftyity mu', ĉụi'tyi'ĉan qui quị'si' jị'quibajte in judyeya' qui cạte in paj qui croshche' pactac mu'. 21 Aty mu've tyeij in rébete in yirity muntyi', Cireneĉan bä'yity, Simón tịj mu', jen' mu' Alejandroty judyeya' Rufoty. Mu' Simón jorojyaty bä'yedye' atsij. Väc̣hä'tyity in ji'vemeyete in Jesústyi' crosh mu'. 22 Jịjcate in mu' Jesús miquityche' mụcu' Gólgota tịj mu'si', (Gólgota yi' ca yi' Jo'no'vunya'.) 23 Mu'che' tsan' so'mete Jesús in tyédye' vino cafon bu'yis pịñidye'tum mirra tịj mọs, mu' qui nam' jam tyeij. 24 Chat qui pacte in. Mu'in väc̣hä'tyity in ji'chetiyiti in quị'si' mu' majmadye'ya' mu'in paj qui chịjve in tyi chuc ra' bijoij. 25 Pam' arajtacya' me'si'ya' tyiti pacte in. 26 Mọ'che' yụ'tye' in sánacdye' p̂eijbites tsan' juchaj mu', yi': “Uts judíoty Ayo' mu'in.” 27 Chime'dye mu'ya' pärä' ac̣hi'yity muntyi' in, yoctyi'che' crosh pactac mu'in in, uvemun bu'yi Jesúsya' in, yoctyi' tacve bu'yi yoctyi' na q̂uinve bu'yi. 29 Mu'in muntyi' cajñetety in ñiñete in tecon' tecon'jeyaqui jo'no' mu'in,76 yi in: —Mi busha' yi jiquej tupuj ca busha' jịva'chaptem Jen'si' aca' mu', chibin ca busha' ra' mạyedye' chijo'mei'ban'dye quivij jäm'ban' mi, yi jiquej mi. 30 Ĉụi' ji'c̣honta q̂uin', chạbada croshchety. 31 Me'dye mu'in chime' tashchety cudyitity Jen'che' in judyeya' mu'in jị'chiyacsity yụ'tacdye' in yi jítidyeij in: —Uts ji'c̣honacsi yoctyi' muntyi' in, ĉụi' qui nam' jam me' ji'c̣honti. 32 Paj chạban croshche' uts Ji'c̣honacsity muntyi', Ayo' mu'in Israeltyi' vóshi' in. A ra' cạvejaya' tsun chat qui ra' q̂uin'dyem' anicyeja' tsun. Chime'dye pactactyi' in ñiñete jiquej in. 33 Aty quichĉan tsun, räj bu'yi' ọij jac tomaj bu'yi' chibin hora, me'qui' tomaj bu'yi'. 34 Aty roquen've tsun, q̂uin'dyem' mu' Jesús äjtum yi p̂eyaqui, yi mu' yoctyisĉan p̂eyacdye': —Eloi, Eloi, ¿lema sabactani? (yi: “Yụ́tyi' Jen', yụ́tyi' Jen', ¿jun' dash me' farajjitim?”) 35 Pạrej mu'yaty in se'vepte p̂eyacdye' in, yi in: —C̣huj, Elíasvun nash faijte mu'. 36 Yirity muntyi' shuj tyeij c̣hucjeque' shajbas va'cacsi'ĉan vino, chat qui sonche' yụ'tye', chụ'ĉan jéyete qui Jesús. Chat qui yi mu' muntyi': —Jambi' chum, vatyquej ra' atsij Elías jị'chabajte. 37 Äjyetaqui fer, chat qui säñi. 38 Me'ĉandye mu' juñum bu'yity quị'si' Jen'si'ĉantyi' aca' mu', ĉụi' vatyquej choc tyeij, che've tiyacchuti me'dye mụijya' bu'yi.77 39 Mu'ya' mu' chime' väc̣hä'tyity ayo' mu'in, rụi'cujcuj mu' mu'ya' Jesússi'ya' vej mu'. Jị'ĉojcayepte sän'dye' Jesússi' mu', chat qui yi mu' p̂eyaqui: —¡Rụijdye jiquej me' anictyity Jen'tyi' Ạva' mu' uts muntyi'! 40 Mọ'ya' chime' p̂en in, moch bu'yi' mọ'in meij cạvi' in. Mọ'ya' mọ' María Magdalena, judyeya' Salomé, judyeya' yocsi' María, Josési' tse' mu' judyeya' mọ'dyem' Santiagos tse' mu', mu' jäquity. 41 Mọ'in p̂en cäc̣hä'-chutes Jesús jiquej in judyeya' nọ́tyetes in Galileaĉan bä'yiya' jiquej mu' Jesús. Chime'dye mọ'ya' yocsi' dai' p̂en in cäc̣hä'chutes jiquej in atsijya' Jerusalénĉan jiquej mu'. 42 - 43 Mọ' mạyedye' viernesh, mọ' je' in: jäm' yụ'tidyes mạyedye', ĉaĉaij na nojno ra' jị'jutyitidyes mạyedye'. Mu'ya' yirity muntyi' tịj mu' José, Arimateaĉan bä'yity. Mu' nash mu'ĉantyi' in tashchety yụ'tactyi' judíoty mu'in, anic jäm'tyi' ĉọ́te mu'in in. Chime'dye mu' bisva'bite tupudye' Jen'si' mu' ayo'bu'yedyes mu'. Aty shocamyejoi' mọ' mạyedye' viernesh, mu' José sóñi'yi mu', ĉọcte mu' Pilato cọdyete Jesússi' a' mu' paj qui mu' nạpte. 44 Mu' Pilato anic äjyi cavintum mu' säñi Jesús. Mu' fayete väc̣hä'tyitytyi' ayo' mu'in, jéte: “¿Aty ca' säñi Jesús?” 45 Aty se'vepte mu'si' p̂eyacdye': “Aty säñi mu'”, chat qui so'mete mu' José a' mu'. 46 José ya'ij yirity jäm'tyi' tyä'väty quị'si'. Mu' qui jị'chabajte croshchety judyeya' qui comon'jepte a' mu' tyä'vätyya', judyeya' qui to'ĉan cạte, mu'ĉan rudyu'jete fadactyi'ĉan mij, mọ' mụi'sis, chat qui bur'jete därtyi' mij, mu'ya' ĉär'je' mọ' to'. 47 Mọ' María Magdalena judyeya' yocsi' María tse' mu' yoctyi' José, mọ'in chime' cạve' in yóĉandyem' yụ'tac u a' mu' Jesúsvunsi'.
