Mark 14

1Jayej pärä'dyety mạyedye' Ji'c̣honacdyes feshta, yocsi' tịj mọ': pan jam ji'dujraquistumtyi'. Tashchety cudyitity Jen'che' in judyeya' mu'in jị'chiyacsity yụ'tacdye' in queve' in jun' bu'yi' chuc ra' tapjete in mu' Jesús caminve, chat qui ra' ji'ijate in. 2Yi jítidyeij in: —Jam ra' feshtaya' tapjeja, cäjya' ra' tapjeja paj qui jam sac ja'yacseja' räj yoctyi' muntyi' in. 3Jesús ĉọcte yirity muntyi' Betaniaĉantyi', bayi'yity jiquej, Simón tịj mu', mu'ĉan siti Jesús. Aty säcseva'joijya' mu'ĉan, yiris p̂en vatyquej ayij, jẹrejres tui' puñujĉan mọ', mọ' puñuj mij jäm'tacdye', anic jiyi' ya'i'si' jẹrejres mọ'ĉan mọ' jam cafontacsi' yocsi'tum jedye', yedyes. Chat mọ'ya' qui tocjetye' puñus tuj mọ', tsa'mepte Jesússi' jo'no' mu'. 4Fạ́coij tyeij mu'ya' cạvety in, jítidyeij in: —¿Jun' buty me' fibi'ñe' ọij jẹrejres? 5Anic mọ' ya'i'si', tupuj ji'mincac ya'ijtyi'ya' querec̣ha, mu' qui querec̣ha so'mac in mu'in jayejjotaquity jedye' in —yi jítidyeij in. Fạra'ñe' mọ' p̂en in. 6Jesús qui jéyacsi: —Paj mọ'ya', jam ra' me'tiñe' mọ' p̂en. Anic nash jäm' yu'tyiyin yụ. 7Räjĉan ra' mi'inya' mu'in jayejjotaquity jedye' in, jun'si' ram' ĉụi' nọ́tyetacsi mi'in, mạ'jetiñe' jụijya' mi'in. Yụ qui na ram' itŝij, aty ra' jam pen'dyetuyac mi'in. 8Mọ' jäm'si' yu'tyiyin yụ ĉaĉaij na itŝi' tupuj yocsim'. Tsa'min yụ jeñej bu'yi' tai'tac a' yụ nạcdyedyes ra' yụ. 9Yụ jéyac mi'in, pai' ra' junanaj ĉụi' voro'yi in jäm'si' p̂eyacdye' Jen'si' mu', räj bu'yi' ra' ọij jac, p̂eye' ra' in jun' chuc tsa'min jiquej yụ, muntyi' ra' in jam yaquintubi' in. 10Mu'in yiri'tac pärä' jiyity jị'chiyactyi' Jesústyi' mu', yirity na tịj mu' Judas Iscariote. Mu' ĉọcsequi tashchety cudyitity Jen'che' in, mạ'je' ji'mincate mu' Jesús. 11Ma'jotyepte p̂eyacdye' in Judassi'. Jéte in: “Tsun ra' so'meyac querec̣ha.” Chat qui mu' tiyacchuti queve' jun' bu'yi' chuc ra' ji'taptyeyacsi Jesús. 12Cha'she' in mọ' tashches mạyedye' feshtas, yi': pan jam ji'dujraquistumtyi', mọ'dye mạyedye' ijai' in oveca feshtadyes Ji'c̣honacdyedyes. Chat qui mu'in jị'chiyactyi' mu' jéte in: —¿Juna' mạ'je' um paj qui mọ'ya' jäm'tyeyeyac tsun säcsedye' Ji'c̣honacdyedyes feshtadyes? 13Jesús qui jutacsi pärä' jị'chiyactyi' mu' jéyacsi: —Tạij mi'in sisvac ọij bä'yedye', mu'ĉan ra' yirity muntyi' rébinac ji'veñety ojñi' puñujĉan. Mu' ra' cäc̣hä'chutinte mi'in. 14Juna' chuc sisan mu', mu'ya'dye ra' mi'in siti chime', quevtinte ra' mu'ĉan a'tumtyi' aca'. Jétinte ra' mi'in: “Mu' Ji'chäyintyi' tsun yi jin mi: ¿Jụ'ñisĉan ra' vavsi' säcsi u yụ Ji'c̣honacdyedyes säcsedye' jị'chiyactyi'tum yụ?” jétinte ra' mi'in. 15Mu' qui ra' ji'caviyinac yiris därsi' vavdye' che'ves acas mọ', aty jä'mii'tyi' räj mọ'che' —jéyacsi Jesús mu'in pärä'tyity in. 16Sacti in bä'yedye'ĉan venjoij in. Anicdye me' dạquique' mọ'che' vavdye' in yoj jeyacsidyem' jiquej Jesús u. Mọ'che' jäm'tye' in säcsedye' Ji'c̣honacdyedyes. 17Aty shocamyejoi' atsij mu' Jesús yoctyi'tum jị'chiyactyi' mu', mu'ĉan siti in. 18Säcseva'joij in yi mu' Jesús: —Yụ ra' jéyac, yirity mi'inĉantyi' q̂uin' jibityintyi' yụ, mu' ra' ji'mincantyi' yụ. 19Jị'chiyactyi' mu' där yoqui in mọ' se'vepteya' p̂eyacdye' in, cäts yirityityij jéte in, —¿Jam adac yụ? —yi jéte in. 20Jesús vorjeyacsi: —Yirity jị'chiyactyi' yụ mi'inĉantyi' q̂uin' yiri'tac pärä' jiyity mi'in yódyetydyem' aty jibityintyi' u yụ mọ'dye piji', mu'dye ra' ji'mincan yụ. 21Yụ Anictyity Muntyi' ijac ra' yụ ĉaĉaij na me' yi' mọ' sánacdye'. Me' tsan' me', mu' qui na ram' ji'mincantyi' yụ, där ra' ñịbe' cạve' mu'. Dam'dye jäm' jiquej jam na'aqueya' mu' me'tyity muntyi'. 22Taca' säcseva'joij in, mu' Jesús tapjete mu' pan, yoshoropaij jéte Jen', chat qui q̂uemi'vete, so'maqui jị'chiyactyi' mu', jéyacsi: —Miya'ĉa uts, uts nash jeñej bu'yi ĉụi'si' a' yụ —yi. 23Tyéquis qui tapje', yoshoropaij jéte Jen', so'maqui jị'chiyactyi' mu', räjdye mu'in tyeij in. 24Jesús qui jéyacsi: —Ọij nash jeñej bu'yi' ĉụi'si' chäsh yụ, dai'dyes ra' muntyi' yụ ra' yụ'tye', mọ' ferdye' jaso'miti' ra' mụi'sis p̂eyacdye' Jen'si' mu', yụ'tyeyacsis ra' muntyi' in. 25Yụ jéyac, aty ra' jam quivij tyeij yụ ovas fi' mọ', jun' qui chuc venchui' mọ' tupudye' ayo'bu'yedye'ĉan Jen'si'ĉan yụ, mu'ĉan ra' tyeij yụ mụi'sis fi' mọ'. 26Mu'in qui jime' in Jen'dyes jimacdye' mu', chat qui shupqui in mụcu'che' Orivoche' jịjcaij in. 27Jesús jéyaqui jị'chiyactyi' mu': —Räjen'dye ra' farajjitiĉa' yụ mi'in, ĉa'joij ra' mi'in. Me' ra' cạ̈tsi' sánacdye' yi': “Jen' ra' ijacsebi mu' ĉọjcacsity oveca in, chat qui ra' ji'pai'cac oveca in.” 28A na ra' vañinyebanya' yụ, yụ chum ra' tashche' venjoij mu've Galileave jäqui'dye ra' mi'in —yi Jesús jéyacsi. 29Chat qui mu' Pedro yi jéte: —Me' ra' tsan' räjen'dye farajjin in, yụ qui na ram' yejĉoij jam jun' farajjeye mi. 30Jesús vorjajiti: —Yụ ra' jéye, ọij q̂uin' tsedyedye', jambi' ra' pärä' qui' p̂oñi ojtere', mi ra' chibin qui' yi: “Yụ jam cäc̣hä'chutety Jesús.” 31Pedro fersi'ya' p̂eyacdye' jéte: —Me' ra' tsan' yụ́mun ijan yụ in, jam qui na ram' jun' ticameye. Chiyidye mu'in yoctyi' räj in. 32Jesús jị'chiyactyi'tum mu' cätidye'ĉan jịjcaij in Getsemaníĉan. Jesús jéyaqui jị'chiyactyi' mu': —Uya' chum p̂utsquen'yejam', yụ ra' cọdajquiqui Jen'che' yụ. 33Muju'veya' jịjcaij mu' Jesús cạcsi mu' Pedro judyeya' Santiago judyeya' Juan. Mu'ya' därsi' táredye' játŝuti mu'ya'dye tyum'yi ĉojtyi' mu'. 34Jéyacsi chibintyity in: —Anic tyum'yi ĉojtyi' yụ jeñej ra' säñi ĉúti yụ. Uya' chum tacya' mi'in ñuts bu'jam' mi'in. 35Jesús dadam' muju'veya' jịjcaij, dyụtsyi mu've täjjeque' jac jáfiya' mu'. Cọdyete Jen' jéte: —Tupuj jụijya' me' ji'c̣honti' mi, paj qui jam tŝútyin yụ mọ' ñịbedyes tupudye'. 36Chime'dye Jesús jéte: —Yụ́tyi' Jen' itŝi' méqui' carij mídyes, yụ cọdyeye ji'c̣honti' paj qui jam därsi' ñịbedyes jị'ĉojtye' yụ, jam qui na ram' yojdyem' mạ'je' uij, yu'ti' ram yojdyem' mis dyijyedye' u. 37Aty me'si' cọdyete Jen' quivij chimu'ya' jijtuban, dạcacseshan mu'in chibintyity in ĉọshva'joij in. Jesús jajiti Pedro: —¿Ĉọshi ca' mi Simón? ¿Mijam buty yiris hora dyij bu'yi yụ́tum mi'in? 38Dyij bu'jam' mi'in, cọdaĉam' Jen'che' paj qui jam peñi jị'ĉojtacya' mi'in. Me' tsan' dyijyedye'ĉan mạ'jetiñe' cäc̣hä'chutinte Jen' mi'in, a'si' qui nam' mi'in itŝi' ferdye' mọ'. 39Cuvij mu' Jesús chimu'che' jịjcaban cọdyeĉajte Jen' mu', chịmo'dye cọdacdyem' so'mete Jen'. 40Aty me'si' quivij chimu'ya' jijtuban dạcacseshan ĉọshva'joij in ĉaĉaij na ĉush játŝuti in. Aty jéyacseshan mu' Jesús mu'in na mem' c̣hu'c̣huij in jam tupuj jéte in. 41Cuvij cọdajquiqui Jen'che' mu'. Aty ijaijya' chibin qui' ĉọsseshan jéyacseshan: —¿Taca' yejĉoij ĉọshi u mi'in? ¿Taca' yejĉoij jị'jutyiti chime' u mi'in? Aty me'qui'dye ato' o ayij tupudye' yụ Anictyity Muntyi' yụ, a nash ra' so'mac yụ juchajtumtyi'ya' in. 42Sacyejam' cabu'tyum mi'in. Atyu' u meij jijtuij ji'mincantyi' yụ. 43Taca' p̂eyacva'joij mu' Jesús shupqueti mu' Judas, jị'chiyactyi' tsan' mu' Jesústyi' chime' mu'. Mu' tujijtucsi dai'tyi' muntyi' in, tuqui chutidyes coc̣hino mu'in judyeya' son pa'cacdyes mu'in. Jutacsity in mu'in tashchety cudyityity Jen'che' in judyeya' jị'chiyacsity yụ'tacdye' in judyeya' tashchety ĉọjcacsity in. 44Mu' Judas ji'mincatety Jesús aty mu' tashche' jéyacsaque muntyi' in: “Jụ'ñity chuc ra' pụ'setety yụ, mu' ra' tŝọ́yetinte mi'in, cạtinte ra' mi'in anic ra' jäm' ĉọjcatinte mi'in”, jéyacsaque mu' Judas. 45Anicdye me' shupqueti mu' Judas chụi' bu'yi Jesúsya' jéte: —¡Jị'chiyacsity! Yédye'ĉan mọmo' pụ'sete. 46Chat mu'in muntyi' in mu'dye tŝọ́tyete in tapjete in. 47Yirity pen'dye' Jesústyi' sanjeyaqui coc̣hino siscajcapte úñity mu'tyi' tashchetytyi' cudyitity Jen'che', chat qui mu' sei'jebite chun mu'. 48Jesús jéyacsi: —¿Jedyedyes ca' jo'mes tutiñe' coc̣hino judyeya' son? Jeñej quiyaij ac̣hi'yity muntyi' ĉútiĉa' yụ mi'in, mạ'je' me' tapjitiĉa' yụ mi'in. 49Yoqui' na Jen'si'ĉan aca' jiquej yụ, mu'ĉan jị'chiyacsi yụ. ¿Jun' ca' jam yiristum ĉushdyiĉa' yụ mi'in tapjitiĉa' mi'in? Me' tsan' me', me'jitiĉam' mọmo' mi'in paj qui cạ̈tsi've mọ' sánacdye'. 50Me'ĉandye jị'chiyactyi' mu' muya' tŝọij in farajjetacte in mu' Jesús. 51Yirity mu'ya' chime' nanaty cäc̣hä'c̣häyeva'joijtyi' Jesúsya', me' mọmo' bus bu'yi yirity méqui'vetyya' tyä'väty. Mu' tsan' tapjete chime' in. 52Farajjeyactaqui quị'sim' cädäj qui ĉa'joij. 53Mu'in tapjetety Jesús in cạte in yụ'te in mu'si'ya' vej tashchetyya' cudyitity Jen'che'. Aty mu'ĉan tsudyujñiti in mu'in tashchety cudyitity Jen'che' in judyeya' mu'in tashchety ĉọjcacsity in judyeya' mu'in jị'chiyacsity yụ'tacdye' in. 54Jä'quiij mu' Pedro cäc̣hä'chute Jesús jun' qui' chuc siti p̂ejsi'ya' acas mọ', mu'si'ĉan tashchetysi'ĉan cudyitity Jen'che'. Mu'ĉan bä'yi pen'dyetucsi väc̣hä'tyity in mu'in ĉọjcai'tyi' aca' in, tŝijve cäc̣hä' jufiti. 55Mu'in tashchety cudyitity Jen'che' in räjtumdye tashchety ayo' in quevacsi tsan' muntyi' in paj qui yụ'tyeyete p̂eyacdye' in ji'ijacdyedyes Jesússi' mu', jam qui nam' dạcbite in. 56Me' tsan' dai' väñädye' tuyete Jesús in cäj cäj p̂eyacdye' ji'shupqueyete in. 57Pạrej mu'ĉantyi' sacyi in väñädye'tum p̂eijte Jesús in, yi in: 58—Tsun se'vete jiquej yi mu' “Yụ ra' jịva'chapte Jen'si' aca' mu', mọ' jäm'tyes muntyi' in, chibin ra' mạyedye' jo'mejteban' quivij jäm'ban' yụ, mọ' ra' jam jäm'tyes muntyi' in,” yi uts Jesús —me' jéyacsi ji'me'tety in. 59Me' tsan' yi in jam qui nam' cäts bu'yi' p̂eyacdye' mu'in. 60Chat qui mu' tashchety cudyitity Jen'che' sacyi mu'insi'ya' vej mu'in, jéte mu' Jesús: —Aty se'vacsebi p̂eyacdye' um mu'in p̂iijbuntyi' juchaj in. ¿Jam bu ra' voryi mi? ¿Jam bu ra' ĉụi' ñutsjitim? 61Jesús mem' c̣hu'c̣huij jam dam' jätäjyi. Mu' tashchety cudyitity Jen'che' mu' cuvij jéte: —¿Mi adac Ji'c̣honacsity muntyi'? ¿Mi adac Jen'tyi' Ạva' mu' tima'cactyi' mu'? 62Jesús vorjete: —Yụ nashu', yirisĉan ra' mạyedye' naijtiĉa' yụ mi'in Anictyity Muntyi' yụ, tacve bu'yi ra' Jen'ya' yụ, mu' muju'cha' ferdye'tumtyi', judyeya' ra' chime' ji'ĉujtuyibudyiĉa' yụ mi'in dyicba'badye' ra' jijtui' yụ. 63Mu' tashchety cudyitity Jen'che' shẹi'jeyaqui quị'si' mu' fạ́codyedyes p̂eyacdye' Jesúsdyes. Chat qui jéyacsi ayo' in: —Aty jam jun' jemonja tsun tyi chuc p̂eijbitety juchaj utssi' mu', 64ĉaĉaij na mụi'dye se'veptinte ñinacdye' Jen'ya' mu'. ¿Jätäjyi tyu' u mi'in? Ayo' yụ'tyeyete in ji'ijacdyes p̂eyacdye' in. 65Chat qui tiyacchuti chu'bete in judyeya' p̂ur'jete vejya' in chat qui untute in, jéte in: —Chị́va, ¿tyi ca' me'jin pä'jin? Mu'in väc̣hä'tyity ĉọjcai'tyi' aca' in pajjete mu'in chime' in. 66Pedro uĉanyam' bä'yi p̂ejya'. Ayij yiris nanas mu'si' úñis mu' tashchetysi' cudyitity Jen'che'. 67Mọ' nạijte mu' Pedro jufiva'ti tŝijve. Jäm' chum jacaviti chat qui jéte: —Mi nash chime' cäc̣hä'chutety mu' Jesús Nazaretĉan bä'yity. 68Pedro ticamete, je': —Mijam yụ chị́yete mu' muntyi' jedye' ra' mis cại' p̂eyacdye'. Chat qui mu' chụi'dye'ya' jịjcaij, chat qui p̂oñi ojtere'. 69Aty mu'ya' bu'ban mu', mọ' nanas cạvebajte, jéyacsi' mu'ĉantyi' in: —Uts nash chime' cäc̣hä'chutety Jesús. 70Quivij mu' Pedro ticamete Jesús. Dam' mọmo' tyä'päi'tyi', cuvij mu'ĉantyi' in jéte Pedro in: —Anicdye me', mi nash cäc̣hä'chutety uts ĉaĉaij nash mi Galileaĉan bä'yity. 71Dadam' qui muju'cha' ticamete, jéyacsi: —Jam rụijsis jụijya' ọij p̂eyacdye', mu'dye ra' Jen' va'tacdye' so'min yụ, Jen'si'ya' vej mu' jéyac yụ, yụ jam chị́yete. 72P̂eyacdye'ĉandye p̂oñi ojtere', aty pärä' qui' p̂oñi. Pedro dyijtubibajte Jesússi' p̂eyacdye' mu', yi jiquej: “Jambi' ra' pärä' qui' p̂oñi ojtere', chibin qui' ra' yi mi: Yụ jam cäc̣hä'chutety uts Jesús.”

will be added

X\