Mark 13

1Jesús shupqui Jen'si'ĉantyi' aca' mu'. Yirity jị'chiyactyi' mu' p̂eijbite aca' mu', jéte: —Jị'chiyacsity, cạveva' anic där jäm'tyi' uts mij in. ¡Där jäjämunsi' ọij aca' q̂uin' in! 2Jesús vorjeyacsi: —Anicdye me', där jäjämunsi' ọij aca' cạvejas q̂uin'. Yụ jéyac, räj ọij q̂uin' cạvetiñes, räj ra' jịva'chac, räj ra' mij mọ' vän'jetac, mijam ra' yirity tacya' ji'yajcati. 3Jesús mụcu'che' jịjcaij Orivoche', mu'che' bä'yi, quic̣hen' bu'yi Jen'si' aca' mu'. Vạjpedye' jị'chiyactyi' mu' ĉọcte in, Pedro judyeya' Santiago judyeya' Juan judyeya' Andrés, mijam yoctyi' mu'ya' in. 4Jéte in: —Jítiĉam' tsun, ¿jun'si' buty ra' cạ̈tsi' ọij jítiĉas tsun mi'in? ¿Jedye' buty ra' jị'ĉocdyes aty ra' cạ̈tsi'ya' mọ'? 5Jesús vorjeyacsi: —Are'ĉa mi'in jam ra' se'vacsebi mi'in väñädye' muntyis mu'in. 6Dai' ra' muntyi' ji'caviti in, yụ́si' ra' tịj ji'jäcbun yụ in, yi ra' in: “Yụ nash Ji'c̣honacsity muntyi'”, judyeya' qui ra' dai' muntyi' in anicjeyacsebi väñädye' mu'in. 7Chime'dye ra' dai' se'vetiñe' chutidye' in, c̣hẹi'ya' bä'yity in judyeya' mochtyi' in. Me' ra' tsan' se'vetiñe' jam qui na ram' cajotyiti mi'in, me' ra' tsan' me' cạ̈tsi', jambi' qui na ram' ayij jadyiquis tupudye'. 8Yiris ra' jac yocsi'tum ra' chutidyeij in, judyeya' yirity jacchety ayo' jutaqui ra' väc̣hä'tyity mu', chuti ra' yoctyi'tum in. Jun'si' ram' ĉụi' mọ'ya' bubacdye' chime', chime' ra' mọ'ya' dáquedye'. Me' ra' tiyacchuti' ñịbedyes muntyidyes in. 9Ĉujcatiĉam' jä'miij mi'in, ji'me'tyinac nash ra' ayo'ya' in judyeya' ra' ji'si'binac in vajmu'yadye'ĉan in. Yụ́dyesi' ra' ji'me'tyinac in bä'yedye'ĉantyi'ya' ayo' in judyeya' muju'chatyya' ayo' chime'. Mi'in ra' jị'chiqueyacsi yụ́si' p̂eyacdye' mu'in ayo' in. 10Jambi'dyem' shupqueti' jadyiquis ra' tupudye', pai'tyity ra' in se've' ra' in jäm'si' p̂eyacdye' Jen'si' mu', chat q̂uin'dyem' ra' cha'shinac jadyiquis tupudye'. 11Aty ra' ji'me'tyinac jụijya' in, jam ra' cavin cajotyiti mi'in mijam ra' dyijtutiñe' mi'in jun' bu'yi chuc ra' ñutsjiti mi'in p̂eyacdye'ya', Jen'dye ra' so'minac p̂eyacdye' paj qui mu'ya' p̂eyaqui mi'in. Mi'in ra' jam ĉụi'si' p̂eyacdye' ji'shuptiñe', Jen'si' ra' Ạ'edye' mọ' ra' p̂eyacdye' so'minac. 12Pạrej ra' mu'ya' in ĉụi'tyi' vojity mu'in ji'me'taqui ra' ayo'ya' in paj qui ijate in, judyeya' ra' pạrej ji'me'taqui ayo'ya' in ĉụi'tyi' ạva' mu'in paj qui ijac in, judyeya' pạrej ra' ji'ijaqui ĉụi'tyi' jen' mu'in judyeya' tse' mu'in. 13Räj ra' yụ́dyes mọ'jinac fáquinac in. Tyi chuc jam peñity in jun' qui' chuc jadyic tupudye', mu'in ra' c̣hoñi in. 14Chime'dye ra' mọ' ji'ac̣hi'tacsis jäm'tacdye' mọ'ĉan ra' mọ' yụ'tac jam jun'tacdye'ĉan. (Tyi chuc p̂eye' ọij sánacdye' paj jäm' chique' jätäjyi' chuc.) Aty cạvetiñe'ya' mọ'ĉan mọ', chat qui ra' mu'in Judeaĉantyi' in yiristum ĉa'joij in mụcu'che' jịjcaij in. 15Tyi chuc jorojya' aca' jụijya' aty se've'ya', paj jam jun' sitaĉan ĉụi'si' aca' mu', paj jam jäcaĉan jubij mu' paj mu'vedye ĉa'joij. 16Chime'dye tyi chuc quịjodye'ĉan jụijya', paj jam acatuban jäcaĉan quị'si' mu', paj yiristum mu'vedye yacchuti ĉa'joij mu'. 17¡Där ra' ñịbe' cạve' in mọ'in p̂en jạjtsis in, judyeya' tsi'yity ạva' mọ'in! 18Cọdyemac Jen' paj qui jam tsịvu'vudye'ĉan cav'quinac in. 19Anic ra' mọjo'chas därsi' ñịbedyes jị'ĉojtye' ra' muntyi' in, jam jäm'dyeya' jiquej jo'mes ñịbedyes cạve' in, yoqui'dyem' Jen' jäm'tye'ya' ọij jac u me'dye q̂uin', mijam ra' jäqui've cuvij jo'mes mọ'ya' ñịbedyes. 20Jen' aty dyijyi dam' ra' dyäcje' mạyedye' ñịbedyes tupudye', jam me' jụijya' a vuty tas muntyi' säñi u in. Tsim'tactyidyes qui mọmo' in, mu'indyes ram' dyäcjetyetac ñịbedyes mạyedye' in paj qui jam men me' bu'yi'. 21Aty ra' me'si' jụijya', yirity muntyi' jínac jụijya': “Mush úya' útsi Ji'c̣honacsity muntyi'”, jam jụijya', vatyquej ra' yi in: “Mu've mu' Ji'c̣honacsity muntyi'.” Me' yi jụijya' in jam ra' anicjeyacsebi p̂eyacdye' mi'in. 22Ayijban' ra' därsi' väñädye' jeñej bu'yi ra' Ji'c̣honacsity muntyi' me' bu'yi ra' yu'ti in, judyeya' ra' jeñej bu'yi jaso'mitity p̂eyacdye' Jen' in, me' bu'yi ra' yu'ti chime' in. Därsi' ra' ferdye' jị'caveyacsi muntyi' in paj qui anicjeyacsebive väñädye' mu'in. Chime'dye ra' mu'inmun ra' fer väñätucsi in Jen'tyi' tsim'tactyi' mu' paj qui mu'inmun anicjeyacsebi in chime' väñädye' mu'in, me' tupuj jụijya' in. 23Jä'miij tashche' q̂uin' jị'chiqueyeyac ọij paj qui dyij bu'yi mi'in jam qui anicyive mi'in mu'inche' in. 24Aty ra' me'si' jiyi'ya' mọ' ñịbedyes, chat qui ra' tomajyi mu' tsun, tyum' ra' mọ' tyei' ịvaj. 25̣Ọrota' ra' jọ'chaij in, judyeya' ra' mạyedye'ches chime' jedye' noc̣ho' noc̣ho'yi' ra' in. 26Chat qui ra' che've ji'ĉujtuyin yụ in yụ Anictyity muntyi' yụ, dyicba'badye' ra' jijtutui' yụ chạij yụ, därsi'ya' ra' ferdye' yụ judyeya' mạijquedye'tum ra' atsijban yụ. 27Chat qui ra' yụ jutaqui anjer yụ paj qui pai' úche' jacche' jịjcaij in, jätisve, judyeya' rocve, judyeya' jijtuijve tsun, judyeya' sitiche' tsun, räj ra' dyụ́tsedye've jac jịjcaij in, me' me' ra' jäcacsi tsim'tactyi' yụ in. 28Dyijtuvac mi'in jedye' chuc ji'ĉuyinac mọ' cätidye' higuera. Mọ' cätidye' aty tiyacchuti' co'ñeyeban' jụijya' mọ', mọ' ji'chäquiyinac aty c̣hẹi'ya' tupudye' juñ'yeban'. 29Me'dye ra' chime' aty cạvetiñe'ya' jo'mes nạijyi' chat qui ra' chịj mi'in aty c̣hẹi'ya' ayidye' yụ. 30Yụ jéyac, jambi' ra' jụ'ñij mọtsi uts muntyi' in räj ra' tashche' cạ̈tsi' mọ'. 31Mạyedye'ches jedye' in judyeya' ọij jac mọtsi' ra' in, yụ́si' na p̂eyacdye' jam ra' jun' mọtsi', mọ' ram' cạ̈tsi'. 32Mijam tyi chịj jun'si' chuc ra' ayij jadyiquis tupudye'. Mijam anjer mu'chety mạyedye'chety chịj in, mijam yụ Jen'tyi' Ạva' yụ, me'dye Jen' mọmo' yirity chịj. 33Mọ'dyes jäm' ra' ĉujcati mi'in, tsạ'bu'yi ra' mi'in, ĉaĉaij na jam chịj mi'in, ĉụi'dye ra' ayij tupudye' yụ. 34Mọ' ra' tupudye' jeñej bu'yi yirity muntyi' yocsi've jac jịjcaijtyi'. Aty ra' sactiya' mu' so'macsetaqui carijtacdye' cäts yirity carijtaquity mu'. Chime'dye jétacte mu' ĉọjcai'tyi' chụi'dye' paj qui jäm' ĉọjcai'. 35Me'dye ra' mi'in chime', ĉujcati ra' jäm' mi'in ĉaĉaij na jam ra' chị́va'joij mi'in caminve ra' shupqueshan yụ, jeñej bu'yi a'tumtyi' aca'. Ĉụi'dye ra' shupqueshan yụ, vatyquej ra' shocam, vatyquej ra' menya', vatyquej ra' nạijjoqui've, vatyquej ra' pam' shupqueshan yụ. 36Ĉujcatiĉam', ĉụi'dye ra' shupqueshan yụ, vatyquej ra' ĉọshva'joij dạquishadyeyac mi'in. 37Ọij p̂eyacdye' jéyacsi' jam mi'indyes mọmo', räjtumdyes muntyidyes in.

will be added

X\