1 Jesús jị'chiyactyi'tum mu' aty c̣hẹi'ya' tyiti Jerusalén in, aty ra' venjoij in Betfagéya' judyeya' Betaniaya', mọ'in mụcu'ves bä'yedye' in. Mu'ĉan venjoij in, mu' Jesús pärä' jutaqui jị'chiyactyi' mu', 2 jéyacsi: —Tạij sisvac ọij tashche' bu'yis bä'yedye'. Aty ra' sistiñe'ya', mu'ĉan ra' dạquictinte yirity ban'tyity bórico, jambi' foquin'tactyi'. Dajjetinte ra' mi'in, tutinte ra'. 3 Mu'ĉantyi' jụijya' jínac in: “¿Jedyedyety bu ra' cạtinte mi'in?” Jínac jụijya' in, jéyacsi ra' mi'in: “Mu' Ayo' nash tsun jemonte, q̂uin'dye ra' ji'ca'ñeyebadyeyac tsun” —yi jéyacsi tashche' Jesús. 4 Chat qui sacti in, anicdye me' dạquicte in mu' bórico cayeĉan sa'baij dạquicte in chụi'dye'ya', chat qui dajte in. 5 Mu'ĉantyi' in jéyacsi in: —¿Jedyedyety dash dajjetinte mu' bórico? —yi in. 6 Jị'chiyactyi' mu' jéyacsi in jätäjjeyacsi chuc mu', me'dyes qui mu'in so'macsi in. 7 Chat qui tuyete Jesús in mu' bórico, jäm'chuyete quị'si' in, chat qui foquin'ti mu'. 8 Mu'ĉantyi' in dai' mu'in natsjeyete mụijya' quị'si' mu'in, yoctyi' na shantuij in, chime'dye natsjeyete mụijya' in, me' bu'yi tiĉun'te in. 9 Dai' muntyi' pen'dyetutety in, räj bu'yi in pạrej tashche'yi in judyeya' jäqui'yi in. Vaj me' p̂eyaqui fer in yi in: —¡Tima'queja uts, uts nash jutactyi' Ayo'tyi' tsun, paj mu' Jen' ñịbe'jajiti! 10 Där nash ra' jäm'si' ayo'bu'yedye' mu', jeñej Davidsi' jiquej vóshi'vunsi' tsun. ¡Tima'queja mu' Jen' mạyedye'chety! 11 Jerusalénĉan siti mu' Jesús, rụij bu'yi Jen'si'ĉan aca' mu'. Pai' cạvi mu'ĉan, chat qui jọban mu' ĉaĉaij na aty yómoij, Betaniave jịjcaban quivij, cạcsi mu'in yiri'tac pärä' jiyity jị'chiyactyi' mu'. 12 Nojno mạyedye' mu'ĉantyi' shuban Betaniaĉantyi' in, dáquistum mi'eban mu' Jesús. 13 Taca' moch tyiti nạijtye' yiris cätidye' higuera aty shañeban'si' mọ'. Mọ' ĉọ́que' quevicbi' tsan' väsh mọ'. Itŝi' méquis dạcbi' väsh mọ', shan mọmo' mọ'yam' ĉaĉaij na jambi' tupudye' väshedye'. 14 Mọ'dyes qui mu' Jesús je' mọ' cätidye': —¡̣Q̂uin' chat jadyic mi me'qui'dye ra' jebac väsh mi! Jị'chiyactyi' mu' se'vepte p̂eyacdye' in. 15 Jerusalénĉan quivij shupqueshan in, quivij siti Jen'si'ĉan aca' mu'. Tiyacchui' ji'shupcacsi mu'in ji'mincaquity in judyeya' ya'ity in. Räj äpjeyacsebi mesa mu'in cambiyaijtyi' querec̣ha in judyeya' bä'yaquis mu'in ji'mincai'tyi' ji'co'shayacdyedyes ọ'to' in. 16 Mu'dye dyäcjeĉúnacsi muntyi' in paj qui jam mu'ĉan jiyi in Jen'si'ĉan aca' mu', paj qui jam cạqui jedye' in. 17 Chat qui mu' tiyacchuti jị'chiyacsi muntyi' in, jéyacsi: —Yi' nash Jen'si' sánacdye' mu': “Ọij aca' yụ cọdacdyedyes mọmo' yụ́che' yụ'tac, räjdyes muntyi' in”, yi'. Mi'in qui nam' yụ'tiñe' paj qui mu'ĉan bä'yi mu' shushu'aty muntyi' in —jéyacsi mu' Jesús. 18 Mu'in tashchety cudyitity Jen'che' in mu'intumdye jị'chiyacsity yụ'tacdye' in, anic jị'fajque' in mọ' p̂eyacdye' se'ves in, mọ'dyes qui dyijyi in jun' bu'yi' chuc ra' ji'ijate in mu' Jesús. Mạ'je' tsan' ijate in, noi'yi qui nam' in ĉaĉaij na mu'ya' mu'in in shachtyity muntyi' in, mu'in anic äjjepte in ji'chäyitidye' mu'. 19 Aty shocamyejoi', mu' Jesús jị'chiyactyi'tum mu' yạjquiban' in mọ' bä'yedye'. 20 Nojno mạyedye' pam' cajñeban' in mọ' cätidye' higuera, anic räjen'yejoi' sacñi' räj ribintum. 21 Pedro dyijtubibajte Jesússi' p̂eyacdye' mu' chat qui mu' jéte: —Miya' tyujam Jị'chiyacsity, cạveva' ọij cätidye' jun'je' tyu' um, ato' o jäm' sacñi' tyei'. 22 Jesús vorjeyacsi: —Jemoñe' me' mi'in chime' anicjetinte Jen'. 23 Yụ jéyac, tyi chuc anicjete Jen' jụijya', judyeya' jam yi ĉojtyi'ĉan, “jun' a ĉa me'”, me' jụijya', jụ'ñis ĉụi' ra' cọdacdye' mu' jụjtac. Tupuj jéte uts mụcu': “Roi'jeva' ojñi'ĉan,” me'dye ra' cạ̈tsi' mọ' p̂eyacdye' mu'. 24 Mọ'dyes yụ jéyac jedye' chuc cọdyetinte Jen' jụijya' mi'in anicyedye'tum, chat qui ra' so'minac mu' cọdacdye' mi'in. 25 Jun'si' ĉụi' cọdaqui Jen'che' jụijya' mi'in, taca' mọ'ya' jụijya' ĉojtyi'ĉan mi'in yejĉoij dyijtucsebi juchaj yoctyis jụijya' in, jemoñe' mọ' farajjetiñe' dyijyedye' mi'in paj qui mi'intyi' Jen' mạyedye'chety vayacjibunac juchaj mi'in. 27 Jerusalénĉan cuvij shupqueshan in, Jen'si'ĉan aca' jịjcaban mu' Jesús. Aty mu'ĉan jịjcaij mu', atsij mu'in tashchety cudyitity Jen'che' in judyeya' mu'in jị'chiyacsity yụ'tacdye' in judyeya' mu'in tashchety ĉọjcacsity in, mu'in ĉọshte Jesús in. 28 Jéte in: —¿Tyi ca' me' yu'tyin mi ọij carijtacdye' mi? ¿Tyi buty so'min yụ'tacdye' me'sis? 29 Jesús vorjeyacsi: —Yụ ra' chime' jéyac yiris cọdacdye', vorjitiĉa' jụijya' yụ mi'in, chat qui ra' yụ jéyac tyi buty me' yu'tyin yụ. 30 ¿Tyi buty jayu'ti mu' Juan paj qui mu' chojtacsi muntyi' jiquej in, Jen' buty jayu'ti, are' muntyi' me' yụ'te in? Jesha' jítiĉam' —jéyacsi Jesús. 31 Mu'in ayo' in jítidyeij in, yi in: —¿Jätäjjeja bu ra' tsun? Jéja na ra' jụijya' tsun: “Jen' nash jayu'ti”, mu' ra' jísin': “¿Jun' dash ĉaĉaij jam anicjetinte mi'in?” 32 Chijam ra' jéja: “Muntyi' nash yụ'te in”, jítidyeij in. Mu'in me' yi jụijya' in muntyi' ra' fạ́cacsi in ĉaĉaij na jutactyi' Jen'tyi' ĉọ́te in mu' Juan. 33 Mọ'dyes qui jéte Jesús in: —Jam chịj tsun tyi ra' me' bu'yi yụ'te mu' Juan. Jesús jéyacsi: —Yụ chime' jam ra' yụ jéyac mi'in tyi buty me' yu'tyin yụ paj qui yụ ji'shupcacsi.
