Mark 10

1Jesús sacbun Capernaum-ĉantyi', chat qui Judeave jịjcaij, nopej Jordán jịjcaij. Cuvij anic dai' mu'ĉan muntyi' ĉọcte in, cuvij jị'chiyacsi ĉaĉaij na yiqui me'. 2Pạrej fariseo ĉọcte in mạ'je' se'vepte p̂eyacdye' in vatyquej ra' cäjsis ji'shupque' paj qui ji'me'te in. Jéte in: —¿Yirity muntyi' tupuj buty yacchuqui p̂en ĉụi'si' mu' mạ'je' jụijya' mu'? ¿Jätäjyi' buty yụ'tacdye' Jen'si' mu'? 3Vorjeyacsi Jesús: —¿Jätäjjinac ca' Moiséssi' sánacdye' mu'? 4Fariseo jéte in: —Yi jiquej mu' Moisés yirity muntyi' tupuj sáñe' yiris yacchutidyes paper, chat q̂uin'dyem' tupuj yacchui' mọ' p̂en. 5Vorjeyacsi Jesús: —Mu' Moisés me' so'minac mọ' yacchutidyes yụ'tacdye' ĉaĉaij na anic yäcäj ĉojtyi' mi'in. 6Jam qui nam' me' Jen'si' dyijyedye' jiquej jäm'tacsiya' muntyi' in, “son' judyeya' p̂en jäm'tacsi”.69 7Yi Jen': “Me'dye qui mu' muntyi' yacchuqui ra' ĉụi'tyi' jen' mu' judyeya' tse' mu', pạrejti qui ra' p̂entum bä'yi. 8Aty qui jam pärä' muntyi' cạvacsi Jen', yirity bu'yi cạvacsi Jen'.”70 Mọ'dyes aty jam pärä' muntyi' cạvacsi Jen', yirity quim'. 9Mọ'dyes muntyi' in aty jam tupuj yacchuti' in ĉaĉaij na Jen'dye me' jiquej yiri'ya' yụ'tacsi. 10Aty aca'ĉan in mu'in jị'chiyactyi' mu' cuvij jéte in: “¿Jedye' buty cại' mọ' p̂eyacdye' jéyacsis baja' mi?” 11Jesús vorjeyacsi: —Tyi chuc yacchui' ĉụi'si' p̂en mu' judyeya' qui vämi yocsi'che' p̂en jụijya' mu', aty mọ' juchaj shupqui', juchaj so'me' mọ' tashches p̂en mu'. 12Chime'dye p̂en yacchute jụijya' vämtyi' mọ' judyeya' qui vämi' yoctyi'che' jụijya' mọ', aty mọ' juchaj shupqui' chime'.71 Jesús jụjjeyacsi miqui'muntyi' in 13Pạrej muntyi' in tuyete Jesús miqui'muntyi' in, mu' qui toco'jeyacsi. Mu'in na jị'chiyactyi' mu' fạra'jeĉúnacsi mu'in tuyetety in. 14Jesús cạvacsi aty me' in mọ'dyes mu' fạ́coij, jéyacsi jị'chiyactyi' mu': —Jam ra' me' mi'in ñutsjeĉúnacsi mi'in uts miqui'muntyi' in, paj atsij mọmo' yụ́ya' in. Tyi chuc sitity ra' Jen'ya' in ayo'bu'yedye'ĉan mu', mu'in ra' jeñej bu'yi uts miqui'muntyi' q̂uin' in. 15Yụ jéyac, tyi chuc jam caman' dyijyebantyi' in yojdyem' yirity miquity, mu'in ra' jam jun' siti ayo'bu'yedye'ĉan Jen'si'ĉan in. 16Chat qui mu' Jesús c̣hobacsi judyeya' tababajjeyacsi judyeya' qui cọdaqui Jen'che' miqui'muntyidyes in. 17Aty sacbun mu' Jesús, yirity muntyi' shuj tyeij ĉọshte Jesús dyụtsyi mu'ya' jéte: —Jị'chiyacsity, mi nash jäm'yity, ¿jedye' buty jemoñe' yụ paj qui tupuj Jen'ya' bä'yi yụ? 18Jesús vorjajiti: —¿Jun' “jäm'yity” jíti' um? Me'dye yirity mọmo' mu'ya' jäm'yity Jen'. 19Mi nash chị́yepte yụ'tacdye' mu'. Ọij nash yi': “Jam ra' ijate muntyi' mi, jam ra' vo'voij mi, jam ra' shi'aij mi, jam ra' väñädye'ya' ji'me'te muntyi' mi, jam ra' shi'atucsi muntyi' mi, jäm'jeyaqui ra' ĉụi'tyi' jen' mi judyeya' tse' mi,”72 me' me' nash yi' yụ'tacdye'. 20Mu' muntyi' yi vorjete: —Miquitydyem' jiquej yụ me'dye q̂uin' räj ọij chique' yụ. 21Jesús mạ'jitidyestum dyijtute jajiti: —Ọijdyety o jayej mi, tạij ji'mincaca tas ĉụi'si' jedye' mi, chat qui ra' so'macsi mi mu'in jayejjotaquity jedye' in mu' querec̣ha, me' ra' chat q̂uin'dyem' mọ'ya' bijodye' mi mạyedye'che', chat qui ra' q̂uin'dyem' cäc̣hä'chutim —yi jéte. 22Aty mọ' se'vepteya' p̂eyacdye', jäm' yocdyejyi vejya' mu', där tári mu' ĉaĉaij na jiyi' dai' me'chui' jedye' mu'. 23Chat qui Jesús cạvi jéyaqui jị'chiyactyi' mu': —Anic carij mu'in jedye'-tumtyi' in paj qui Jen'ya' bä'yi in, yóĉandyem' ayo'bu'yedye'ĉan um'. 24Jị'chiyactyi' mu' anic äjjepte p̂eyacdye' in. Jesús quivij jéyacsi: —Ạva' yụ, yụ ra' quivij jébadyeyac, anic carij mu'in me'tyity in paj qui Jen'ya' bä'yi in, yóĉandyem' ayo'bu'yedye'ĉan um'. 25Dadam' mu'in muju'cha' carij jedye'tumtyi' in paj qui Jen'ya' bä'yi in, uya'ya'dye carij jiyi yirity cameyo socor'muñi yóquesĉan to' mọ' —jéyacsi Jesús. 26Jị'chiyactyi' mu' anic jiyi äjjepte p̂eyacdye' in, vaj meij jítidyeij in: —Me' jụijya' me' bu'yi' ¿tyi buty tupuj c̣hoñi in? 27Jesús qui cạvi mu'inya' in, jéyacsi: —Anicdye me', muntyi' in jam tupuj ĉụi' c̣hoñi in, Jen' tupuj ji'c̣honacsi ĉaĉaij na itŝi' méqui' carij Jen'dyes. 28Chat qui Pedro jéte: —Jesha' tsun jiquej räj farajjeyaqui ĉụi'si' jedye' tsun paj qui cäc̣hä'chuyac mi. 29Jesús vorjeyacsi: —Yụ anic jéyac, tyi chuc farajjeyaqui ĉụi'si' aca' mu'in judyeya' jac mu'in, judyeya' vojity mu'in judyeya' voji' mu'in, judyeya' tse' mu'in judyeya' jen' mu'in judyeya' ạva' mu'in, tyi chuc me' me' farajjeyaquity yụ́dyes in cäc̣hä'chucdye'ya' judyeya' cại' in voro'tacdyes p̂eyacdye', 30mọ'ya' ra' bijodyedyes mu'insi' q̂uin' in. Dadam' ra' mọjo'cha' so'mac in, jam jeñej farajjes jiquej in, cien qui' ra' dam'dye so'mac in, aca' ra' so'mac in, judyeya' jac, judyeya' vojity, judyeya' voji', judyeya' tse', judyeya' ạva', me' me' ra' so'mac q̂uin' in paj tsan' ñịbe'tac jụijya' in. Judyeya' ra' mụi'sisĉan tupudye' Jen'ya' ra' bä'yi in. 31Chime'dye mu' jéyacsi: —Mu'in muju'chaty q̂uin' in, mu'in ra' jäqui've uya'ya' shupqui in, mu'in na uya'yaty q̂uin' in, mu'in qui ra' jäqui've muju'cha' shupqui in. 32Yejĉoij majmiya' in, Jerusalénĉan jịjcaij in. Jesús tashche' bu'yi mi'i, jäqui' mu'in jị'chiyactyi' mu', anic cajotyitidye'tum mu'in mi'i in. Mu'in na yoctyi' jäqui' cäc̣hä'chutety in noi'yedye'tum mu'in mi'i in. Jesús muju'veya' cạcsi jị'chiyactyi' mu', cuvij jéyacsi jun' chuc ra' jị'ñibe'cac mu'. 33Me' jéyacsi: —̣Q̂uin' tsun Jerusalénĉan jịjcaja'. Mu'ĉan ra' ji'me'tyin ayo'ya' yụ in, yụ Anictyity Muntyi' yụ, mu'inya' ra' ji'me'tyin yụ in tashchetyya' cudyitity Jen'che' in judyeya' mu'inya' in jị'chiyacsityya' yụ'tacdye' Jen'si' in. Mu'in ra' yu'tyiyin yụ in p̂eyacdye' sän'dyedyes yụ, judyeya' qui ra' ji'me'tyin yụ in yoctyi'ya' ayo' in jam judíoya' in. 34Mu'in ra' dyisactyin yụ in judyeya' ra' si'bin yụ in judyeya' ra' chu'bin yụ in chat qui ra' me'si' ijan qui ra' yụ in. Chibin ra' mạyedye' me' bu'yi yụ, chat qui ra' vañinyeban yụ. 35Atsij mu' Santiago judyeya' Juan, mu'in Zebedeoty ạva' mu'. Mu'in ĉọshte Jesús in jéte in: —Jị'chiyacsity, tsun cọdyetyeyac paj qui jụjbutiĉa' mi'in cọdacdye' tsun. 36Jesús vorjeyacsi: —¿Jedye' mạ'jityitiĉa' u mi'in? 37Vorjete in: —Yu'tiĉam' paj qui tsun uvemun bu'yi míya', aty ayo'bu'yedye'ĉan jụijya' mi, yoctyi' ra' tacve bu'yi, yoctyi' ra' q̂uimve bu'yi tsun. 38Jesús vorjeyacsi: —Mi'in jam chịj jedye' chuc mọ' cại' p̂eyacdye' mi'in. ¿Tupuj buty cätsbutiĉa' yụs ñịbedyes mi'in? ¿Tupuj buty cätsbutiĉa' yụs sän'dye' mi'in? 39Mu'in vorjete in: —Tupujbiyac tsun. Jesús jéyacsi: —Me'dye ra' cätsbutiĉa' ñịbedyes yụ́si' mi'in judyeya' ra' sän'dye' chime' yụ. 40Yụ qui nam' jam yụ'tac paj qui yụ'tacsi yụ tyi chuc ra' uvemun bu'yi yụ́ya' in, tacve bu'yi judyeya' q̂uimve bu'yi. Mu'dye Jen' aty tsim'tacsi tyi chuc ra' uvemun bu'yidyety yụ́ya' in, tacve bu'yity judyeya' q̂uimve bu'yity. 41Yoctyi' in yiri'tacyity jị'chiyactyi' mu' jị'fajque' in mọ' cọdacdye' Santiagos judyeya' Juansi'. 42Mu' qui Jesús fayacsi jị'chiyactyi' mu' jéyacsi: —Mi'indye chịj jun' chuc mu'in jacchety ayo' in anic son' bu'yi yu'ti in ayo'bu'yi muntyidyes in, me' mu'in ferbu'yity in anic ferche' jutacsi muntyi' in. 43Mi'in qui na ram' jam me'. Tyi chuc mạ'je' muju'cha' bu'yi yu'tity jụijya', jemoñe' nọ́taquity yu'ti yoctyidyes in, 44tyi chuc mạ'je' tashche' bu'yi, jemoñe' mu' úñity yu'ti räjdyes in, 45ĉaĉaij na mijam yụ Anictyity Muntyi' yụ atsij yụ paj qui muntyi' ñútyin yụ in. Yụ atsij nọ́tyetacsetity judyeya' ra' ji'säsdyi yụ sän'dye'ĉan paj qui ji'c̣honacsi yụ dai' muntyi' in. 46Jesús jị'chiyactyi'tum mu' venjoij in Jericóve. Aty mi'eban in yạjquiban' mọ' bä'yedye' in anic shach muntyi' jäqui' cäc̣hä'chute in. Mu'ya' yirity tofety muntyi', Bartimeo tịj mu', Timeoty ạva' mu', mu' cọdaquity querec̣ha jeij majmi bä'va'joij. 47Aty chịj mu' tofety muntyi' mu' Jesús mu'ya' tyeij, mu'ya'dye fer p̂eyaqui, yi: —¡Jesús, anictyity Davidtyi' vóshi' mu', ñịbe'jiti'! 48Dai' mu'yaty in mạ'je' tsan' dyäcjeĉun'bite p̂eyacdye' in, mạ'je' tsan' ji'tyäpete in. Mu' na jam tyäpä'yi dadam' muju'cha' fer äjyi p̂eyaqui, yi: —¡Davidtyi' vóshi' mu' ñịbe'jiti'! 49Chat qui mu' Jesús dyäcyi, yi mu' jéyacsi: —Fayemac paj atsij yụ́ya'. Chat qui fayete in mu' tofety muntyi', jéte in: —Ma'jova, sacyeva q̂uin', atyu' u fayin mi. 50Me'ĉandye mu' muntyi' farajjeyactaqui nabactyity quị'si' mu', roi'tum yi muya' tŝọij, ĉọcte Jesús. 51Jesús jajiti: —¿Jedye' mạ'jityiti' u mi? Mu' tofety muntyi' vorjete: —Jị'chiyacsity, paj ji'naijbun've mi. 52Jesús vorjete: —Tạij q̂uin' mi, aty naijbun mi anicyedye'ya' mi. P̂eyacdye'ĉandye mu' naijbun chat qui mu'ya'dye yacchuti cäc̣hä'chute majmiya'.

will be added

X\